NOKUBA kuti Bbaibbele talili bbuku lyasayaansi, lililuzi nolyaamba makani aajatikizya zilenge. Amulange-lange zikozyanyo zijatikizya makani aambobuca (meteorology) alimwi abupange bwesu (genetics).

MAKANI AAMBOBUCA—MBOIPANGIKA MVWULA

Bbaibbele lyaamba kuti: “[Leza] ulakwela malosi aamaanzi kuzwa ansi; alacinca kuba mvwula kuzwa muli sikunku wakwe; mpoonya makumbi alawisya mvwula mpati.”—Jobu 36:27, 28.

Aawa, Bbaibbele lipandulula mbazu zyotatwe zipati-pati zicitika kutegwa mvwula ipangike (hydrologic cycle). Leza—Sikupanga zuba—“ulakwela malosi aamaanzi kuzwa ansi” kwiinda (1) mukulekela maanzi kuunka kujulu (evaporation). Mpoonya kwiinda (2) mukwaangana kwamaanzi aakwelwa kuunka kujulu (condensation), makumbi alapangika alo aaleta mvwula naa (3) caanda, civwulamabwe asikunku (precipitation). Noliba lino, basyaazibwene mumakani aambobuca tabatumvwisyi twaambo toonse tujatikizya mboipangika mvwula. Cikkomanisya ncakuti, Bbaibbele libuzya kuti: “Sena kuli muntu uukonzya kumvwisya makumbi mbwaayalidwe?” (Jobu 36:29) Nokuba boobo, Mulengi ulaimvwisya mvwula mboipangika alimwi wakapa kuti imulembi alembe twaambo tuluzi mu Bbaibbele. Alimwi wakacita oobo kaindi basayaansi kabatanacikonzya kupandulula zintu eezyi mbozicitika.

MBOTUPANGIDWE—MBOIKOMENA NSALALILA

Mulembi wa Bbaibbele Mwami Davida wakaamba boobu kuli Leza: “Meso aako akandibona nindakacili nsalalila; zizo zyangu zyoonse zyakalilembedwe mubbuku lyako.” (Intembauzyo 139:16) Mumwaambo wakweema, Davida waamba nsalalila mboikomena kweelana amalailile aakalembelwa limwi “mubbuku.” Cigambya ncakuti, eeci cakalembwa myaka iibalilwa ku 3,000 yainda!

Pele kuzikusika mu 1860 nceciindi syaazibwene mumakani aazisyango Gregor Mendel waku Austria naakazyiba makani aajatikizya mbotupangidwe. Alimwi mu April 2003 ndendilyo basikuvwuntauzya nobakamana kumvwisya mboibede DNA, yalo iijisi malailile oonse aayandika kutegwa muntu apangike. Malailile aambotupangidwe alibikkidwe munzila mbotu kapati, mbubwenya mbuli mabala aajanika mubbuku lipandulula mabala mbwaabikkidwe munzila iitobeleka. Kweelana amalailile aaya, zizo zyansalalila—mbuli bongo, moyo, mapunga, maanza alimwi amaulu—zilakomena cakutobelana kabotu-kabotu alimwi aciindi ceelede. Cakweelela, basayaansi bapandulula DNA kuti “ndibbuku lyabuumi.” Mbuti mulembi wa Bbaibbele Davida mbwaakacikonzya kulemba munzila iiluzi boobo? Cakulicesya wakaamba boobu: “Muuya wa Jehova wakaamba kwiinda mulindime; ijwi lyakwe lyakali amulaka wangu.” *—2 Samuele 23:2.

NCIYUMU kapati naa tacikonzyeki kuzyiba ciindi, alimwi ambwayakubuka akuwa mami naa minzi. Nokuba boobo, Bbaibbele lyakaambila limwi makani manji kujatikizya kunyonyoonwa kwamami aakajisi nguzu alimwi aminzi. Amulange-lange zikozyanyo zyobilo buyo.

KUWA KWA BABULONI ALIMWI AKUBA MATONGO

Babuloni wansiku mbobwakali bulelo ibwakajisi nguzu kapati bwalo ibwakali kweendelezya azisi zyacooko ca Asia nkocili kumbo kwamyaanda yamyaka. Aciindi cimwi Babuloni ngowakali munzi mupati munyika. Nokuba boobo, kakucili myaka iibalilwa ku 200, Leza wakasololela mulembi wa Bbaibbele Isaya kusinsima kuti sikuzunda wazina lya Koresi uyakuuzunda munzi wa Babuloni alimwi akuti taukakkalwi limbi bantu. (Isaya 13:17-20; 44:27, 28; 45:1, 2) Sena eeci ncecakacitika ncobeni?

Mubusiku bomwe buyo, mu October 539 B.C.E., Koresi Mupati wakauzunda munzi wa Babuloni. Mukuya kwaciindi, tugelo itwakajisi maanzi itwakali kuzinguluka cooko eeci twakasinka akaambo kakutalanganizyigwa. Kuzikusika mu 200 C.E., busena oobu akaba matongo. Mazuba aano, Babuloni wazumanana kuba matongo. Kweelana a Bbaibbele mbolyakasinsima, Babuloni ‘wakaba matongo buyo.’—Jeremiya 50:13.

Ino mulembi wa Bbaibbele wakaajana kuli makani aaya aaluzi aakaindi aajatikizya zyakumbele? Bbaibbele lyaamba kuti aaya akali “makani mapati aajatikizya Babuloni ngaakabona Isaya mwana wa Amozi mucilengaano.”—Isaya 13:1.

NINEVE—“KUYUMA MBULI CIMPAYUMA”

Nineve, imunzi mupati wa Bulelo bwabana Asuri, wakapangidwe munzila iigambya kapati. Munzi ooyu wakali kulidunda akaambo kamigwagwa mipati, mapaaki, matempele, alimwi amaanda aabami mapati. Nokuba boobo, musinsimi Zefaniya wakaambila limwi kuti munzi ooyu iwakali kweebeka uyooba “matongo akuyuma mbuli cimpayuma.”—Zefaniya 2:13-15.

Nineve wakanyonyoonwa cakumaninina kwiinda mukulwanwa ampi zyobilo yabana Babuloni alimwi abana Mediya mumwaanda wamyaka waciloba B.C.E. Kweelana abbuku limwi, munzi ooyu iwakazundwa “wakalilubidwe kwamyaka iili 2500.” Kwaciindi cili mbocibede, bantu bali kudooneka naa munzi wa Nineve wakaliko ncobeni! Pele kuzikusika akati kamwaanda wamyaka wa 19, basikuvwukkula zyakaindi bakajana matongo aa Nineve. Mazuba aano, busena oobu buyaabunyonyooka kapati cakuti bambunga ya Global Heritage Fund bacenjezya kuti: “Zintu zimwi iziciliko zyansiku zyamunzi wa Nineve zilakonzya kusweekela limwi azyalo.”

Ino Zefaniya wakaajana kuli makani aaya aakali kwaamba zyakumbele? Wakaamba kuti lyakali “jwi lya Jehova ilyakamusikila.”—Zefaniya 1:1.

BBAIBBELE lilapa bwiinguzi bukkazika moyo kumibuzyo iiyandika kapati mubuumi. Amulange-lange zikozyanyo zitobela.

NKAAMBO NZI NCOKULI BUBI ALIMWI AKUPENGA KAPATI BOOBU MUNYIKA?

Makani aabubi alimwi akupenga alaambwa kapati mu Magwalo. Bbaibbele lipandulula kuti:

1. ‘Muntu weendelezya muntunyina munzila iimuletela mapenzi.’—Mukambausi 8:9.

   Bweendelezi bwabantu ibutali kabotu bwaleta mapenzi aataambiki.

2. “Boonse buyo balasikilwa ziindi zyamapenzi akucitikilwa zintu zitalangilwi.”—Mukambausi 9:11.

   Zintu zitalangilwi—mbuli kuciswa kapati, ntenda, naa ntenda zilicitikila—zilakonzya kumucitikila muntu uuli woonse, kubusena kuli koonse, alimwi aaciindi cili coonse.

3. ‘Cibi cakanjila munyika kwiinda mumuntu omwe alufwu kwiinda mucibi.’—Baroma 5:12.

   Kutalondoka kwabantu alimwi alufwu tiizyakaliko kumatalikilo ciindi mwaalumi amukaintu nobakalengwa. Cibi ‘cakanjila munyika’ ciindi nobakazangila Mulengi wabo acaali.

Bbaibbele talipandululi buyo kaambo bantu ncobapengela. Lilasyomezya kuti Leza uyakubumana bubi alimwi “uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe.”—Ciyubunuzyo 21:3, 4.

NCINZI CICITIKA MUNTU AFWA?

Bbaibbele lipandulula kuti lufwu nkuba muciimo cakutayeeya alimwi akutacikonzya kucita cintu cili coonse. Lugwalo lwa Mukambausi 9:5, lwaamba kuti: “Baumi balizyi kuti bayoofwa, pele bafwide tabazyi cintu nociba comwe.” Ikuti naa twafwa, ‘nzyotuyeeya zyoonse zilamana.’ (Intembauzyo 146:4) Aboobo zintu zyoonse zicitika kubongo—kubikkilizya azizo zyamubili zyoonse—zilacileka kubeleka ikuti naa twafwa. Aboobo, tatukonzyi kucita cintu cili coonse, kumvwa, naa kuyeeya ciindi twafwa.

Nokuba boobo, Bbaibbele talipandululi buyo ciimo cabantu bafwide. Lilapa abulangizi bukkomanisya bwakuti bantu bayoosinsimunwa kuzwa muŋonzi zyalufwu kwiinda mububuke.—Hosea 13:14; Johane 11:11-14.

INO BUUMI BUJISI MPINDU NZI?

Kweelana ambolyaamba Bbaibbele, Jehova Leza wakalenga mwaalumi amukaintu. (Matalikilo 1:27) Aboobo mwaalumi wakusaanguna Adamu, wiitwa kuti “mwana wa Leza.” (Luka 3:38) Kuli kaambo muntu ncaakalengelwa—kubamba cilongwe cakwe a Bausyi bakujulu, kukkala kakkomene alimwi akupona buumi  buli kabotu anyika mane kukabe kutamani. Akaambo kaceeco, bantu boonse balijisi luyandisisyo lwazintu zyakumuuya, nkokuti luyandisisyo lwakwiiya kujatikizya Leza. Aboobo, Bbaibbele lyaamba kuti: “Balikkomene aabo bazyi kuti bayandika kusololelwa a Leza.”—Matayo 5:3.

Kuyungizya waawo, Bbaibbele lyaamba kuti: “Ibakkomene mbaabo baswiilila jwi lya Leza akucita ncolyaamba!” (Luka 11:28) Bbaibbele talituyiisyi buyo kujatikizya Leza pele alimwi lilatugwasya kupona buumi bukkomanisya alimwi akutupa bulangizi bwakuyoopona kumbele.

MAMILIYONI aabantu munyika yoonse balazumina kuti Bbaibbele talili buyo bbuku lyakaindi ciindi nobamana kulanga-langa bumboni. Balazumina kuti Bbaibbele ndi Jwi lyakasololelwa a Leza, nzila njabelesya kubandika abantu—kubikkilizya andinywe! Lilijisi kutamba kwa Leza kulindinywe kuti mumuzyibe alimwi akuba mulongwe wakwe. Bbaibbele lisyomezya kuti: “Amuswene kuli Leza, eelyo awalo ulaswena kulindinywe.”—Jakobo 4:8.

Kubala Bbaibbele cakusitikila kupa kuba abulangizi butaliboteli. Ino mbulangizi nzi oobo? Mbubwenya mbuli kubala bbuku mbokukonzya kumupa kuzyiba cili mumizeezo yamulembi, kubala Bbaibbele kulakonzya kuyubununa mizeezo alimwi ambwalimvwa Mulembi wandilyo, Leza. Amuciyeeyele buyo eeci ncocaamba kulindinywe. Mulakonzya kuzyiba mbwayeeya alimwi ambwalimvwa Mulengi wanu! Kuyungizya waawo, Bbaibbele lilaamba:

• Zina lya Leza, mbwabede, alimwi abube butaliboteli.

• Makanze aa Leza kujatikizya bantu.

• Mbomukonzya kuba acilongwe a Leza.

Sena inga mwayanda kuzyiba zinji? Bakamboni ba Jehova bayookkomana kumugwasya. Balakonzya kupanga bubambe bwakuti kamwiiya Bbaibbele kakunyina kubbadela. Eeci cilakonzya kumugwasya kuswena ku Mulembi wa Bbaibbele—Jehova Leza.