Kupona Buumi Buli Kabotu Kumubili
Bbaibbele talili bbuku lyaamba makani aabusilisi. Pele lilijisi njiisyo izikonzya kutugwasya kupona buumi buli kabotu. Atulange-lange njiisyo zimwi zyamu Bbaibbele zikonzya kumugwasya kupona buumi buli kabotu.
AMUUBIKKILE MAANO MUBILI WANU
NJIISYO YAMU BBAIBBELE: “Kunyina muntu wakasulide kale mubili wakwe mwini, pele ulausanina akuubamba kabotu.”—Baefeso 5:29.
NCOCAAMBA: Njiisyo eeyi yamu Bbaibbele itukulwaizya kusolekesya kuubikkila maano mubili wesu. Lipooti imwi itondezya kuti malwazi manji alaboola akaambo kabuumi mbobasala kupona bantu. Aboobo, kusala zintu zili kabotu kulakonzya kutupa kupona buumi buli kabotu.
NCOMUKONZYA KUCITA:
-
Zyakulya. Amusale zyakulya zili kabotu alimwi akunywa maanzi manji.
-
Kunyanyaasya Mubili. Kunyanyaasya mubili kulakonzya kumugwasya kupona buumi buli kabotu tacikwe makani amyaka njomujisi, akuti naa muli balema naa mujisi bulwazi butaponi. Nokuba kuti bayandwa banu alimwi abasilisi balakonzya kumugwasya kupanga bubambe bwakunyanyaasya mubili, ndinywe mukonzya kupa kuti buzwidilile.
-
Amujane Ciindi Cinji Cakoona. Bantu batajani ciindi cinji cakoona balakonzya kuciswa kapati mukuya kwaciindi. Akaambo kazintu nzyobasala kucita, bantu banji tabajani ciindi cinji cakoona. Pele kuba aciindi cinji cakoona, kulakonzya kupa kuti kamupona buumi buli kabotu.
AMUZITANTAMUKE ZILENGWA ZIBYAABI
NJIISYO YAMU BBAIBBELE: “Atulisalazye kuzintu zyoonse zisofwaazya mubili amuuya.”—2 Bakorinto 7:1.
NCOCAAMBA: Tulakonzya kuba abuumi buli kabotu ikuti naa twasala kutabelesya zintu izitali kabotu mbuli tombwe walo uuzyibidwe kapati kuti nguuletela malwazi manji alimwi alufwu.
NCOMUKONZYA KUCITA: Amusale buzuba mbomuyanda kuti mukacileke kufweba, mpoonya akweenga akkalenda yanu. Kabutanasika buzuba oobo, amuusowe tombwe, itwakusowela mulota, zyakuyasyila tombwe alimwi azintu zimwi ziswaangene acilengwa eeci cibyaabi. Mutanikuunki mumasena oomo bantu bacita zilengwa zili boobu mobajanika. Amubaambile balongwe banu alimwi abanamukwasyi kuti mwasala kucileka kufweba kutegwa bamugwasye.
NJIISYO ZIMBI ZYAMU BBAIBBELE
Mulakonzya kuba a Bbaibbele lyanu limugeme kwiinda mukwaambila umwi wa Bakamboni ba Jehova uukkala mucilawo canu
AMUBIKKILE MAANO KUNTENDA.
“Ikuti naa wayaka ŋanda mpya, ciluli weelede kuciyakila citabililo kutegwa ŋanda yako itabi amulandu wabulowa nkaambo muntu ulakonzya kuloka kuzwa alinjiyo.”—DEUTERONOMO 22:8.
MUTANOOFWAMBAANI KUNYEMA.
“Ooyo uutafwambaani kunyema musongo kapati, pele ooyo uutakkaziki moyo utondezya bufwubafwuba bwakwe.”—TUSIMPI 14:29.
MUTANOOCIINDIZYI KULYA.
“Utabi akati kabantu . . . balya cabulyato.”—TUSIMPI 23:20.
Andiza Inga Mwaakkomanina Ayaaya
SINSIMUKA!
Mbomukonzya Kusumpula Buumi Bwanu
Zintu zyosanwe nzyomukonzya kucita mazuba aano zilakonzya kumugwasya kupona buumi buli kabotu.
SINSIMUKA!
Mbomukonzya Kujana Lukkomano—Kupona Buumi Buli Kabotu Akuzilanga Kabotu Zintu
Kuti muntu kaciswa-ciswa, sena eeco caamba kuti takonzyi kukkomana mubuumi?
