Bongo bwamuntu bulabona kubota kwacintu munzila izicikatazya kumvwisya. Bbaibbele talipandululi eeci mbocicitika, pele lilaamba kaambo ikapa kuti katucikonzya kubona kubota: Leza wakatulenga katujisi bube bwakwe. (Matalikilo 1:27; Mukambausi 3:11) Alimwi wakalenga mubili wamuntu munzila iikatazya kumvwisya. Mboubede alimwi amboubeleka ulagambya. Akaambo kaceeci, sikulemba nyimbo wansiku wakalemba kuti: “Ndilakutembaula [Leza] nkaambo ndilengedwe munzila iigambya, mbotu kapati.”—Intembauzyo 139:14.

Pele mazuba aano kubota ciwa kanji-kanji takulangwi munzila yeelede, ooyu ngomuzeezo uusumpulwa abasikubamba zintu zipya, mulisikapepele, acipekupeku, alimwi amumabbuku. Kweelana ambolyakaamba bbuku litegwa Body Image, buvwuntauzi buli mbobubede bwakacitwa mumasi aakubukuwa “bwakatondezya kuti mbouboneka mubili ncecintu ciyandika kapati kumuntu.” Kuyeeya kuli boobu, kulakonzya kupa kutabikkila maano kucintu ciyandika kapati, nkokuti moyo wamuntu.—1 Samuele 16:7.

Acimbi cikulwaizyigwa kapati kunze aambouboneka mubili, makani aakoonana ikwaambisya kujatikizya bamakaintu. Lipooti ya American Psychological Association (APA) yamu 2007 yakaamba kuti: “Nzila zyoonse zibelesyegwa mukumwaya makani izyakavwuntauzyigwa zipa bumboni bupa bamakaintu kuti kabalibonya munzila iisumpula muzeezo wakoonana.” Bbaibbele cakutainda mumbali lilatukulwaizya kutantamuka zilengwa zili boobu, alimwi kuli kaambo kabotu ncotweelede kucitila boobu!—Bakolose 3:5, 6.

“Kulisakatizya kwanu kutabi buyo kwaatala . . . , pele akube kulisakatizya kwamuntu wamukati kamoyo uusamide cisani citanyonyooki camoyo uukkede alimwi mubombe, ooyo uuyandika kapati mumeso aa Leza.”—1 Petro 3:3, 4.

Kujatikizya kubota ciwa, bamwi baamba kuti: “Kuti kolimubotu, kolitondezya!” Mumasena mokudumide kuyeeya kuli boobu, bakubusi basimbi nobaba baabo bali afwaafwi kuba bakubusi baiya kulibona kuti “mbantu balombozyegwa abantu bambi . . . , ibeelede kulangililwa alimwi akulumbaizyigwa akaambo kambobalibonya,” kweelana amboyakaamba lipooti ya  APA. Kuyeeya kuli boobu kulakonzya kuleta mapenzi mapati. Alimwi buya, kwabujatikizya kapati bukkale alimwi abuumi bwabantu, calo cikonzya kusololela “kumapenzi aaboola akaambo kamizeezo iitali kabotu” kweelana ambobakaamba ba APA. Mapenzi aaya alakonzya kubikkilizya kulibilika, “kutalikkomanina . . . , kutayanda kulya, kulimvwa kubula mulimo, alimwi akutyompwa.”

“Kozigwisya mumoyo wako zintu zileta mapenzi, alimwi kozitantamuna kumubili wako zintu zibi, nkaambo bukubusi alimwi anguzu zyabukubusi nzyabuyo.”—Mukambausi 11:10.

Bbaibbele litondezya kuti ‘kulibatamika’ naa kuyeeya kabotu, kuliswaangene abulemu. (1 Timoteyo 2:9) Mucikozyanyo: Bantu balibatamika tababikkili kapati maano mbobalibonya, pele balibona munzila yeelede. Alimwi balabikkila maano kujatikizya mbobalimvwa bamwi, aboobo eeci cipa kuti kabakkomaninwa abantu, kabalemekwa, alimwi kwiinda zyoonse kabakkomaninwa a Leza. (Mika 6:8) Kuyungizya waawo, balalangilwa kuba abalongwe beni-beni alimwi akukwelelezya baabo mbobanga bakwatana limwi balo batabikkili buyo maano kumakani aakoonana pele alimwi ibayanda kuba acikwati ciyumu alimwi cikkomanisya lyoonse.

Aboobo, akaambo katwaambo tunji tubotu, Bbaibbele litukulwaizya kubikkila kapati maano kubuntu bwamukati, nkokuti ‘muntu wamukati kamoyo.’ (1 Petro 3:3, 4) Bubotu bwamukati kamoyo tabumani pe. Alimwi buya, mukuya kwaciindi bulayungizyika! Lugwalo lwa Tusimpi 16:31 lwaamba kuti: “Imvwi musini wabweebesi ikuti zyajanika munzila yabululami.” Aboobo, kufwumbwa naa mbana naa mbapati, bantu bamvwida lulayo lwiinda kubota lwamu Bbaibbele, bayoojana bubotu butamani, bulemu, alimwi akukkutila.

“Kweebeka kulakonzya kweena, akubota ciwa kulakonzya kumana, pele mukaintu uuyoowa Jehova ngonguwe uulumbaizyigwa.”—Tusimpi 31:30.