BA SOO-JEONG, sikupa lulayo wakusekondali ku South Korea, bali kubelesya mavidiyo kuzwa awebbusaiti ya jw.org mukkilasi yakwe. Bakaamba kuti: “Basicikolo bakaikkomanina kapati vidiyo yakuti What’s a Real Friend? Nobakamana kuyeebelela vidiyo, bakati, ‘Kunyina nondakeezyeezya kale makani aacilongwe munzila eeyi. Eelo kaka eeyi ninzila mpya yakuyiisya!’ Bamwi bakaamba kuti banoolanga awebbusaiti eeyi kufwumbwa ciindi bayanda lugwasyo.” Ba Soo-jeong bakayungizya kwaamba kuti: “Ndakakulwaizya bamayi banji kweebelela vidiyo eeyi, alimwi balikkomene kapati kuba acibelesyo cibotu boobu cakubelesya mumakkilasi aabo.”

Aimbi vidiyo iyabagwasya kapati basicikolo baku South Korea njeeyi yatumavidiyo itutondezya zyakudulowiŋa abboodi iijisi mutwe wakuti Amumuume Sikumupenzya Kakunyina Kumulwana. Mwiiyi umwi uubeleka mumbunga ya Juvenile Violence Prevention Foundation wakaitondezya vidiyo eeyi kuli basicikolo bakwe mukkilasi. Wakaamba kuti: “Vidiyo eeyi balaikkomanina kapati bakubusi banji akaambo kazifwanikiso zili mumo izibotu. Kuyungizya waawo, vidiyo eeyi ilagwasya nkaambo taitondezyi buyo muntu mbwakonzya kuliyumya napenzyegwa pele alimwi ilatondezya ambwakonzya kulikwabilila.” Bambunga eeyi bakalomba kuti kabaibelesya vidiyo eeyi ciindi nobayiisya bana bali mugiledi 1-7 alimwi abali mugiledi 8 a 9. Aboobo bakazumizyigwa. Nobaba bamapulisa balaabelesya mavidiyo aajanika awebbusaiti ya jw.org.

Ikuti naa tamunaunkide awebbusaiti eeyi, sena inga tiimwacita oobo? Taikatazyi kujula, alimwi zyakukkopa zyoonse—mbuli zyakuswiilila zyakalekkoodwa amavidiyo, kubikkilizya a Bbaibbele alimwi amabbuku aambi manji, tazibbadelelwi pe.