NZYOBAAMBA BANTU BAMWI

Bana Israyeli bakali kukomba “leza wankondo” ooyo iwakali kuyandisya kutila bulowa.

NCOLYAAMBA BBAIBBELE

Zisi nzyobakazunda bana Israyeli zyakali kucita micito mibyaabi kapati mbuli lunya, koonana abanyama, koonana mubusazinyina alimwi akutuula bana. Nokwakainda myaanda yamyaka iili mbwiibede njaakabapede kutegwa bacince nzila zyabo, Leza wakaamba kuti: ‘Akaambo kazintu eezyi zyoonse nzyobalisofwaazya bamasi aabo ncondibatandila kubusyu bwanu.’—Levitiko 18:21-25; Jeremiya 7:31.

“Nkaambo kabubi bwamisyobo eeyi Jehova Leza wanu ncaitandila kubusyu bwanu.”—Deuteronomo 9:5.

AMBWENI MWAKAMVWA KALE

Mumazwanga manji aacitika, basololi bazikombelo kumbazu zyoonse zyobilo inga baamba kuti Leza uli kulubazu lwabo. Bbuku litegwa The Causes of War lyakaamba kuti: “Lyoonse basizikombelo bali kutola lubazu munkondo izyakacitika kale.”

NCOLYAAMBA BBAIBBELE

Banakristo tabazumizyidwe kulwana basinkondonyina. Mwaapostolo Paulo wakalembela Banakristonyina kuti: “Kamusoleka kusikila mpomugolela kukkala muluumuno abantu boonse. Mutapilusizyi muntu cibi.”—Baroma 12:18, 19.

Muciindi cakubatuma kunkondo, Jesu wakaambila basikumutobela kuti: “Amuzumanane kuyanda basinkondonyoko akubapailila aabo bamupenzya, ikutegwa musinizye kuti muli bana ba Uso uuli kujulu.” (Matayo 5:44, 45) Noliba leelyo cisi cabo nocuunka kunkondo, Banakristo tabeelede kutola lubazu nkaambo ‘tabali banyika.’ (Johane 15:19) Ikuti Leza kayanda kuti bakombi bakwe mumasi oonse kababayanda basinkondonyina alimwi akuzumanana kutaba banyika, ino inga waba buti kulubazu lumwi lwabaabo bajatikizyidwe mumazwanga aacitika mazuba aano?

“Bwami bwangu tabuli bwanyika eeyi. Ikuti Bwami bwangu nobwali bwanyika eeyi, ibabelesi bangu nobalwana kutegwa nditaabwi kuba Juda. Pele lino Bwami bwangu tabuzwi munyika eeyi pe.”—Johane 18:36.

NZYOBAAMBA BANTU BAMWI

Nkondo tazikonzyi kweelebwa pe. Bbuku litegwa War and Power in the 21st Century lyakaamba kuti: “Nkondo zinooliko lyoonse alimwi takulangilwi kuba luumuno lwanyika yoonse.”

NCOLYAAMBA BBAIBBELE

Nkondo ziyoomana ciindi bantu boonse baakuleka kulombozya kulwana. Aboobo Bwami bwa Leza, nkokuti mfwulumende ini-ini iilela kujulu, ino-ino iyoolesya nkondo anyika akuyiisya bantu kukkala muluumuno. Bbaibbele litusyomezya kuti Leza ‘uyoolulamika twaambo tujatikizya masi alaanguzu aali kule. Bayoofwula mapanga aabo kuba maamba aakulimya amasumo aabo kuba zyakukwezuzya zisamu. Cisi tacikanyamuni panga kulwana cisinyina, alimwi tabakaiyi limbi nkondo pe.’—Mika 4:3.

Bbaibbele liyiisya kuti mubulelo bwa Bwami bwa Leza, kunoocinyina mfwulumende izinoozundana kutegwa zilijanine mpindu, milawo iitali kabotu iipa basicisi kuzanga naa lusalululo lupa kuti kube kwaandaana. Iciyootobela ncakuti, nkondo ziyoomana. Leza usyomezya kuti: “Tabakaciti cintu cili coonse cibi naa kunyonyoona . . . , nkaambo masimpe nyika iyoozula luzyibo lwa Jehova mbubonya maanzi mbwaazuzya lwizi.”—Isaya 11:9.

“Ulamanizya nkondo munyika yoonse mboizulwa. Ibuta ulabutyolaula alyalo sumo ulalipwayaula; inkalaki zyankondo ulazyuumpa amulilo.”—Intembauzyo 46:9.