Tutapiluki Cifwuteesule Kulunyonyooko!

“Swebo endiswe tuyoopiluka cifuteesule akufwa pe.”—BA-HEBRAYO 10:39.

1. Mbukkale nzi ibwakapa kuti mwaapostolo Petro atalike kuyoowa?

KULALANGILWA kuti baapostolo bakagambwa kapati ciindi Jesu, Simalelaabo siluyando naakabaambila kuti boonse bakali kuyoomwaikizyanya akumusiya alikke buyo. Ino cintu cili boobo inga caba buti—muciindi naakali kuyandika lugwasyo kapati? Petro wakazumanana ulaamba: “Boonse nibayoolebegwa, mebo nee.” Ncobeni, Petro wakali mwaalumi sicamba kapati. Pele Jesu naakaabwa akwaangwa, ibaapostolo kubikkilizyaa Petro, bakamwaikizyanya. Kumbele elyo Jesu nakaali kubuzyigwa muŋanda ya Mupaizi Mupati Kayafa, Petro wakawayawaya kumwi kalibilikide kapati mubbuwa lyaanze. Mbubwakali kuyaabuya busiku obu butontola kapati, Petro wakatalika kuyoowa kuti ambweni Jesu abaabo boonse mbocakali kuyanzana limwi balajaigwa. Ibamwi mbocakaimvwi limwi nobakamuzyiba Petro kuti wakali akati kabaabo ibakali balongwe ba Jesu, wakayoowa kapati. Ikwaziindi zyotatwe wakakonka kuti tiibakali limwi a Jesu. Petro mane wakakaka nokuba kwaamba buyo kuti wakalimuzyi!—Marko 14:27-31, 66-72.

2. (a) Nkaambo nzi ibukandu mbwaakajisi Petro mubusiku naakaangwa Jesu ncobwatakapa kuti ‘abe muntu uupiluka cifwuteesule’? (b) Makanze nzi ngotweelede kubaangawo?

² Eco cakali cintu cakamutola ansi kapati Petro, icintu cakamuusisya mubuumi bwakwe boonse. Pele sena eco Petro ncaakacita masiku aayo cakamupa kuti abe mukandu? Sena cakamupa kuti abe ‘umwi wabaabo’ imwaapostolo Paulo mbaakazyoopandulula naakalemba kuti: “Pele swebo endiswe tuyoopiluka cifuteesule akufwa pe”? (Ba-Hebrayo 10:39) Ibunji bwesu tulakonzya kuzumina kuti imajwi aa Paulo taabeleki pe kuli Petro. Nkaambo nzi? Nkaambo kakuti ibukandu bwa Petro bwakali bwakaindi kasyoonto buyo, ikuwa kwakaindi kasyoonto mubuumi bwabusicamba alusyomo luyumu. Mbubwenya buyo, ibunji bwesu tulijisi zintu izyakatucitikila musyule zyalo izitujazya nsoni twaziyeeya, iziindi notwakayoowa akwaalilwa kwiiminina kasimpe cabusicamba. (Amweezyanisye Ba-Roma 7:21-23.) Tusyomezyegwa kuti iziindi zyakuwa kuli boobo kwaciindi buyo takutupi kuba bantu ibapiluka cifuteesule kulunyonyooko. Nokuba boobo, tweelede kukanza ikutaba bantu bali boobo. Nkaambo nzi? Alimwi mbuti mbotunga twalilesya kuba bantu bali boobo?

Ncocaamba Ikupiluka Cifwuteesule Kulunyonyooko

3. Mbuti imusinsimi Eliya alimwi a Jona mbobakaba bayoofwu?

³ Paulo naakalemba makani aabantu ‘bapiluka cifuteesule,’ tanaakali kwaamba baabo ibatyompokelwa kwaciindi cisyoonto. Masimpe Paulo wakalizizi izyakacitikila Petro alimwi azimwi zikozyenye azeezyo. Iciindi cimwi Eliya imusinsimi sicamba alimwi iwatakali kusaya kukanana wakayoowa elyo wakatija akaambo kakuti Mwami mukaintu Jezebeli wakamukonga kumujaya. (1 Bami 19:1-4) Imusinsimi Jona wakayoowa cakuzwa munzila. Jehova wakamutuma kuti aunke kumunzi wa Nineve iwakazwide bubi aluuni. Jona wakatanta mubwato ibwakali kuya kulubazu lwaandeene ankwaakatumidwe ku Tarisi ikulampa  makkilomita aali 3,500! (Jona 1:1-3) Pele kunyina akati kabasinsimi aba naba mwaapostolo Petro uunga waambwa kuti mmuntu uupiluka cifwuteesule. Ino nkaambo nzi?

4, 5. (a) Ino makani aayengelede atugwasya buti kuzyiba ceeco Paulo ncaakali kupandulula naakaamba kuti “akufwa” ku Ba-Hebrayo 10:39? (b) Ino Paulo wakali kwaamba nzi naakati: “Swebo endiswe tuyoopiluka cifuteesule akufwa pe”?

⁴ Amubone kaambo koonse nkaakabelesya Paulo: “Pele swebo endiswe tuyoopiluka cifuteesule akufwa pe.” Ino wakali kupandulula nzi naakaamba kuti “akufwa”? Ibbala lya Cigiliki ndyaakabelesya zimwi ziindi lyaamba lunyonyooko lutamani. Ibupanduluzi obu buleendelana amakani aayengelede. Paulo wakazwide buyo aakucenjezya kuti: “Nkaambo kuti twabisya acaali munsi lyakumana kutambula kuziba kwinikwini, takucipailwa limbi cipaizyo cazibi, pele kwasyaala buyo kulangila kubetekwa kuyoosya, abukali bwamulilo wakutensya basinkondonyina Leza.”—Ba-Hebrayo 10:26, 27.

⁵ Aboobo elyo Paulo naakaambila basyominyina kuti, “Swebo endiswe tuyoopiluka cifuteesule akufwa pe,” wakali kwaamba kuti walo abasikubala bakwe Banakristo basyomeka bakakanzide ikutaleya kuzwa kuli Jehova akuleka kumubelekela. Ikucita boobo kwakali kusololela buyo kulunyonyooko. Judase Isikariote nguwakapiluka cifwuteesule kulunyonyooko, mbubwenya bwakacita basinkondo bambi bakasimpe balo ibakakazya muuya wa Jehova acaali. (Johane 17:12; 2 Ba-Tesalonika 2:3) Ibantu bali boobo babalilwa akati “[ka]bakandu” ibayoonyonyweedwa limwi muziba lyamulimo lyacikozyanyo. (Ciyubunuzyo 21:8) Peepe, kunyina anotuyanda kuba bantu bali boobo!

6. Ncinzi ncayanda kuti tucite Saatani Diabolosi?

⁶ Saatani Diabolosi uyanda kuti tupiluke cifwuteesule kulunyonyooko. Mbwaanga nguhaazibwene “mumeneeno,” ulizyi kuti ibukkale bwalunyonyooko kanjikanji butalika aasyoonto-syoonto. (Ba-Efeso 6:11) Ikuti naa ikupenzya kwakaanzambwene kwakakilwa kuzwidilizya makanze akwe, ulasoleka kunyonyoona lusyomo lwa Banakristo bakasimpe kwiinda mukubelesya nzila zyabucenjezu kapati. Uyanda kuti Bakamboni ba Jehova basicamba alimwi basungu bamanine limwi. Atubone nzila nzyaakabelesya ku Banakristo bana Hebrayo aabo Paulo mbaakalembela.

 Mbobakasinikizigwa Kupiluka Cifwuteesule Banakristo

7. (a) Ino mbungano yaku Jerusalemu yakali mubukkale buli buti? (b) Mbukkale nzi bwakumuuya ibwakaliko kuli basikubala ba Paulo bamwi?

⁷ Ibumboni butondezya kuti Paulo wakalemba lugwalo lwakwe ku Ba-Hebrayo mumwaka wa 61 C.E. Imbungano yaku Jerusalemu yakalibonena mapenzi mapati. Kuzwa ciindi Jesu naakafwa, ikupenzyegwa kutaambiki kwakatalika calo cakapa kuti Banakristo banji mumunzi bamwaikizyanye. Pele kwakaba ciindi caluumuno calo cakapa kuti Banakristo bavwule. (Incito 8:4; 9:31) Mukwiinda kwamyaka, ikupenzyegwa amakataazyo aambi zyakali kucitika muziindi. Kulibonya kuti iciindi Paulo naakalemba lugwalo ku Ba-Hebrayo, imbungano yakali muluumuno alimwi. Nokuba boobo, kwakali mapenzi. Imakumi aamyaka aatandila kuli otatwe akaliindide kuzwa ciindi Jesu naakasinsimide lunyonyooko lwa Jerusalemu. Kulangilwa kuti kwakali bantu ibakali kuyeeya kuti imamanino aayo akalimukide kapati akuti tanaakali kulangilwa kucitika kabacipona. Ibamwi ikapati aabo ibakali bapya mukasimpe, kunyina nobakasunkwa azipenzyo zipati alimwi tiibakazyi mbokwakali kuyandika kuliyumya mumasukusyo. (Ba-Hebrayo 12:4) Ncobeni Saatani wakayandisisya kubelesya bukkale buli boobo. Ino ‘mmeeneeno’ nzi ngaakabelesya?

8. Ino bama Juda banji bakali kwiilanga buti mbungano ya Banakristo impya alimwi yatakaina kusima?

⁸ Bama Juda baku Jerusalemu amu Judaya bakali kwiinyansya mbungano ya Banakristo yakacili mpya alimwi yatakaina kusima. Twaalanga-langa makani aali mulugwalo lwa Paulo, tulaaziba masampu alo ibasololi babukombi bwaba Juda basikulisumpula antoomwe abasikubatobela ngobakali kwaambila Banakristo. Atwaambe kuti kwiinda mukucita boobo bakali kwaamba kuti: ‘Itempele lyesu pati ndeeli lyaliko kwamyaanda yamyaka mu Jerusalemu! Tulijisi mupaizi mupati uusyomeka uukutaukila nkuko antoomwe abapaizi basyoonto. Izipaizyo zilatuulwa abuzuba. Tulijisi Mulawo iwakapegwa kuli Musa kwiinda mubangelo akubandikwa mumaleele aayoosya kapati aa Cilundu ca Sinai. Aaka kabunga kaile kutalika lino, aba Banakristo basikuleya kuzwa kubukombi bwaba Juda, kunyina nociba cimwi akati kazeezi ncobajisi!’ Sena ikusampaula kuli boobo kwakazwidilila? Cakutadooneka Banakristo ba Hebrayo bamwi bakapenzyegwaa kusampaulwa oko. Ilugwalo lwa Paulo lwakabagwasya aciindi nobakali kuyandika ncobeni lugwasyo.

Ncobatakeelede Kupiluka Cifwuteesule Kulunyonyooko

9. (a) Mutwe wamakani nzi uubandikwa mulugwalo loonse lwakalembelwa bana Hebrayo? (b) Muunzila nzi Banakristo mobakabelekela mutempele ibbotu kwiinda leelyo lyakali ku Jerusalemu?

⁹ Atulange-lange twaambo tobile Paulo ntwaakapa ibanyina abacizi baku Judaya kujatikizya ncobatakeelede kupiluka cifwuteesule kulunyonyooko. Ikakusaanguna nkakusumpuka kwabukombi bwa Banakristo alo aali ngamakani aavwulide mulugwalo ndwaakalembela ba Hebrayo. Mulugwalo lwakwe loonse, imutwe wamakani oyu ngwaakali kubandika. Itempele lyakali mu Jerusalemu cakali cikozyanyo buyo cacintu cimwi cipati, itempele lya Jehova lyakumuuya, ibuyake ‘ibwatakayakwa amaanza aabantu.’ (Ba-Hebrayo 9:11) Abo Banakristo bakajisi coolwe cakubelekela mububambe obo bwakumuuya bwabukombi busalala. Bakali kweendelezyegwaa cizuminano ciinda kubota, icizuminano cipya icakasyomezyedwe kuzwa kaindi loko calo cakajisi Simwiimaakati uusumpukide kwiinda Musa, Jesu Kristo.—Jeremiya 31:31-34.

10, 11. (a) Nkaambo nzi izyalane lya Jesu ncolyatakali kunga lyamukasya kweelela kubeleka kali Mupaizi Mupati mutempele lyakumuuya? (b) Muunzila nzi Jesu mwaakali Mupaizi Mupati uusumpukide kwiinda wooyo iwakali kubelekela kutempele lyaku Jerusalemu?

¹⁰ Alimwi Banakristo abo bakajisi Mupaizi Mupati imubotu, Jesu Kristo. Tanaakali waluzubo lwa Aroni pe. Pele wakali Mupaizi Mupati “[u]uli mbubonya mbuli Melkisideke.” (Intembauzyo 110:4) Melkisideke walo uulaazyalani lyatakalembwa, wakali mwami amupaizi mupati waku Salemu yansiku. Aboobo ngowakamwiiminina kabotu Jesu mubusinsimi, walo ibupaizi bwakwe ibwatakayeeme kumulongo wazyalani lyabantunsi batalondokede pele kucintu cimwi icipati—icikonke ca Jehova Leza mwini. Mbubwenya mbuli Melkisideke, Jesu tali buyo Mupaizi Mupati pele ulabeleka kali Mwami oyo uutakafwi.—Ba-Hebrayo 7:11-21.

¹¹ Kunze lyaboobo, mukwiimpana amupaizi mupati kutempele lyaku Jerusalemu, Jesu tanaakeelede  kutuula zipaizyo mwaka amwaka. Icipaizyo cakwe bwakali buumi bwakwe mwini ibulondokede bwalo mbwaakaaba ciindi comwe kukabe kutamani. (Ba-Hebrayo 7:27) Izipaizyo zyoonse zyakali kutuulwa kutempele zyakali ziiminizyo buyo zyaceeco Jesu ncaakatuula. Icipaizyo cakwe cilondokede cakapa kuti izibi zyabaabo boonse ibakamusyoma zilekelelwe mubwini. Itwaambo tumbi tukkazika moyo kapati ntwaambo twa Paulo itutondezya kuti oyu Mupaizi Mupati ngo Jesu ngoonya uutacinci ooyo Banakristo baku Jerusalemu ngobakazyi. Wakali mubombe, siluse alimwi ooyo ‘uukonzya kutweetelela mukulengauka kwesu.’ (Ba-Hebrayo 4:15; 13:8) Aabo Banakristo bakajisi bulangizi bwakuyoobeleka kabali bapaizi basyoonto ba Kristo! Ino inga bayeeya buti makani aakupiluka cifwuteesule ‘kuzintu zyabuyo eezyo zinyina ncito’ zyabukombi bwaba Juda busofweede?—Bagalatiya 4:9, Ci.

12, 13. (a) Nkaambo nzi kabili Paulo nkaakapa ncokuteelede kupiluka cifwuteesule? (b) Nkaambo nzi impuwo yabo yakuliyumya ncoyakali kunga yakulwaizya Banakristo bana Hebrayo kutapiluka cifwuteesule kulunyonyooko?

¹² Kakubee ibumboni obo tiibwakazulide, Paulo wakapa bana Hebrayo ikaambo kabili ncobatakeelede kupiluka cifwuteesule kulunyonyooko—impuwo yabo beni yakuliyumya. Wakalemba kuti: “Amuyeeye mazuba aaciindi, eliya nomwakamana kumunikilwa, mwakali kukonzya kwiima munkondo impati yamapenzi.” Paulo wakabayeezya kuti ‘bakaba ceebelo’ cakutukanwa akupenzyegwa. Bamwi bakaangwa muntolongo; ibamwi bakabafwida luzyalo elyo bakagwasilizya baabo ibakali muntolongo. Inzya, bakatondezya lusyomo luyumu akukakatila. (Ba-Hebrayo 10:32-34) Pele ino nkaambo nzi Paulo ncaakabaambilila kuti ‘kabayeeya’ zintu zibyaabi zili boobo? Sena eco tiicakali kunoobatyompya buyo?

¹³ Muciindi caboobo, ‘ikuyeeya mazuba aaciindi’ kwakali kuyooyeezya bana Hebrayo makani aambuli mbwaakabagwasilizya Jehova mumapenzi. Kwiinda mulugwasyo lwakwe, bakalaakazyide kale masukusyo manji aakaletedwe aa Saatani. Paulo wakalemba kuti: “Leza tali sikampenda, takonzya kuluba milimo yanu akuyanda nkomwatondezya nkaambo kezina lyakwe.” (Ba-Hebrayo 6:10) Inzya, Jehova wakaiyeeya milimo yabo yoonse yabululami, waiyobola mumizeezo yakwe iitagoli. Tulayeezyegwa kujatikizya lulayo lwa Jesu lwakuyobola mbono kujulu. Kunyina mubbi uunga wabba mbono ezi; kunyina mapempya naa nkalaya iinga yazinyonyoona. (Matayo 6:19-21) Atwaambe kuti, imbono ezi zilakonzya kunyonyoonwa lilikke Munakristo napiluka cifwuteesule kulunyonyooko. Eco inga canyonyoona imbono zili zyoonse nzyaakayobwede kujulu. Takali komeneni kaka ikaambo Paulo nkaakapa Banakristo bana Hebrayo, kakuti batatobeli bukkale buli boobo! Ino inga bainyonyweeda nzi myaka yoonse njobakabelesya kucita mulimo cakusyomeka? Inga calulama alimwi cilainda kubota kuzumanana buyo kuliyumya.

Ncotuteelede Kupiluka Cifwuteesule Kulunyonyooko

14. Mbuyumuyumu nzi mbotujisi ibukozyenye aboobo bwakajisi Banakristo bamumwaanda wamyaka wakusaanguna?

¹⁴ Banakristo bakasimpe sunu abalo balijisi twaambo tupati ncobateelede kupiluka cifwuteesule. Atusaangune kuyeeya mbotulongezyedwe a Jehova kumakani aabukombi busalala obo mbwaatupede. Mbubwenya mbuli Banakristo bamumwaanda wamyaka wakusaanguna, tukkede kuciindi elyo bantu bamuzikombelo zidumide nobatusampaula akutuweela kabalidunda akaambo kamaanda aabo aakukombela aayebeka alimwi azilengwa zyabo zyakaindi. Pele Jehova utusyomezya kuti ulabuzumina bukombi bwesu. Atwaambe kuti, sunu tujisi zilongezyo eezyo Banakristo bamumwaanda wakusaanguna nzyobatakajisi. Ambweni mulakonzya kulibuzya kuti, ‘Ino eco inga caba buti obo?’ Kayi balo bakali kupona kuciindi itempele lyakumuuya nolyakatalika kubeleka. Kristo naakabbapatizigwa mu 29 C.E. wakaba Mupaizi Mupati watempele elyo. Ibamwi bakamubona cakaanzambwene Imwanaa Leza sikucita maleele. Neciba ciindi kafwide kale, kwakali maleele aambi manji. Pele mbubwenya mbokwakasinsimidwe, izipego zili boobo zyakazikumana.—1 Ba-Korinto 13:8.

15. Mbusinsimi nzi ibuli mukuzuzikizigwa kuciindi ecino icipona Ibanakristo bakasimpe, alimwi ino eco caamba nzi kulindiswe?

¹⁵ Pele tukkede kuciindi ibusinsimi bwatempele  lyakuli Ezekieli zyaandaano 40-48 nobuli mukuzuzikizigwa kapati. * Aboobo twalibonena kupilusigwa kwabubambe bwa Leza bwabukombi busalala. Elyo tempele lyakumuuya lyasalazigwa kujatikizya busofwaazi boonse abukombi bwamituni. (Ezekieli 43:9; Malaki 3:1-5) Amuyeeye zintu zibotu nzyokwatuletela kusalazigwa oku.

16. Ncilengwa nzi cakaliko icakatyompya Banakristo bamumwaanda wamyaka wakusaanguna?

¹⁶ Mumwaanda wamyaka wakusaanguna, ibukkale bwakumbele bwambungano ya Banakristo iyakabambidwe tiibwakali kusyomezya pe. Jesu wakalisinsimide kuti kwakali kuyooba mbuli kuti imuunda wazwaa kusyangwa maila wakabaa nsaku zinji, calo cakali kuyoopa kuti kubule lwaandaano akati kamaila ansaku. (Matayo 13:24-30) Oobo mbocakacitika. Kuzikusika kumamanino aamwaanda wamyaka wakusaanguna, eelyo imwaapostolo Johane iwakacembeede naakasoleka ciindi camamanino kukazya busofwaazi buli boonse, iluleyo lwakali dumide kale. (2 Ba-Tesalonika 2:6; 1 Johone 2:18) Kakutanainda ciindi cilamfwu kuzwa ciindi baaposotlo boonse nobakafwa, iciinga cabasololi bacikombelo icilizandwide cakatalika, cakadyaminina butanga alimwi cakali kusama zyakusama zilizandwide. Iluleyo lwakayandilila koonse-koonse. Elyo eci cakali kutyompya kaka ku Banakristo basyomeka! Bakalibonena ibubambe bupya bwabukombi busalala kabuzingulukwaa bukombi busofweede bwiindene-indene. Eci cakacitika kakutanainda myaaka iili mwaanda kuzwa ciindi Kristo naakatalisya mbungano.

17. Muunzila nzi imbungano yasunu ya Banakristo moyakkala kwaciindi cilamfwu kwiinda yeeyo yamumwaanda wamyaka wakusaanguna?

¹⁷ Ono amubone makani aaimpene. Sunu ibukombi busalala bwakkala ciindi cilamfwu kapati ikwiinda ciindi ibaapostolo boonse nobakamana kufwa. Kuzwa ciindi imagazini yakusaanguna ya Ngazi Yamulindizi noyakamwaigwa mu 1879, Jehova watulongezya abukombi busalala bwiindilide. Jehova a Kristo Jesu bakanjila mutempele lyakumuuya mu 1918 ikutegwa balisalazye. (Malaki 3:1-5) Ikuzwa mu 1919, ibubambe bwakukomba Jehova Leza bwali kusalazigwa bucebuce. Ibusinsimi bwamu Bbaibbele alimwi anjiisyo twaziteelelesya. (Tusimpi 4:18) Ino kulumba kugama kulini? Takuyi kubantunsi ibatalondokede. Alikke Jehova a Mwanaakwe walo uuli ngo Mutwe wambungano mbabakonzya kukwabilila bantu ba Leza kubusofwaazi kuciindi cino cibyaabi. Aboobo atuzumanane kulumba Jehova akaambo kakuti watuzumizya kutola lubazu mubukombi busalala sunu. Alimwi katukanzide ikutapiluka cifwuteesule kulunyonyooko!

18. Nkaambo nzi nkotujisi ncotuteelede kupiluka cifwuteesule kulunyonyooko?

¹⁸ Mbubwenya mbuli Banakristo abo bana Hebrayo, tulaakaambo kabili ncotweelede kukaka bukkale bwakupiluka cifwuteesule kwabuyoofwu—impuwo yesu yakuliyumya. Kufwumbwa naa twatalika lino kubelekela Jehova naa twali kucita obo cakusyomeka kwamakumi aamyaka, twabaa mpuwo yakucita milimo ya Bunakristo. Ibunji bwandiswe twapenzyegwa munzila zisiyene-siyene, ikwaangwa, kukasigwa kukambauka akuswaangana, ikuumwa naa kunyangwa naa kunyonyweedwa mpasya. Alimwi ibanji bakazigwa amikwasyi, basampaulwa alimwi akutabikkilwa maanu. Toonse twaliyumya, twazumanana mumulimo wesu cakusyomeka kuli Jehova nokuba kuti kuli buyumuyumu alimwi amasukusyo. Kwiinda mukucita boobo, twabaa mpuwo  yakuliyumya yalo njatakalubi Jehova, ibutala bwambono kujulu. Aboobo, ncobeni ecino tacili ciindi cakupiluka cifwuteesule kunjila mubweende bwabukkale bwazintu obu bubyaabi mbotwakasiya musyule! Nkaambo nzi ncotunga twayanda kubeleka cabuyo? Eci ncamasimpe ikapati sunu, elyo nokuceede “kaindi kaniini buyo” kuti mamanino asike.—Ba-Hebrayo 10:37.

19. Ncinzi ciyoobandikwa mucibalo cesu citobela?

¹⁹ Inzya, atukanze kuti “endiswe tuyoopiluka cifuteesule akufwa pe”! Muciindi caboobo atube “baabo abajisi kusyoma.” (Ba-Hebrayo 10:39) Ino inga twasinizya buti kuti bupanduluzi obo bulatweelela, alimwi mbuti mbotunga twagwasya Banakristoma ikucita mbubwenya obo? Icibalo citobela cilaabandika makani aya.

Bupanduluzi buyungizidwe

Sena Mulayeeya?

• Ino caamba nzi kupiluka cifwuteesule kulunyonyooko?

• Nzintu nzi izyakapenzya Banakristo bana Hebrayo aabo Paulo mbaakalembela?

• Ntwaambo nzi Paulo ntwaakapa bana Hebrayo, ikujatikizya ncobatakeelede kupiluka cifwuteesule kulunyonyooko?

• Ntwaambo nzi ntotujisi ikujatikizya ncotweelede kukanza ikutapiluka cifwuteesule kulunyonyooko?

[Mibuzyo yaciiyo]

[Zifwanikiso izili apeeji 7]

Ibukandu bwa Petro tiibwakamupa kuti abe ‘wabaabo ibapiluka cifwuteesule kulunyonyooko’