“Amulangile”
“Amulangile”
“Nkaambo kaako amulangile, nkaambo tamuzi buzuba mbwazoosika mwami wanu.”—MATAYO 24:42.
1. Ino babelesi ba Jehova ibamubelekela kwaciindi cilamfwu balimvwa buti kujatikizya myaka yabo minji njobaaba kumulimo? Amupe cikozyanyo.
IBUNJI bwababelesi ba Jehova balo ibamubelekela kwaciindi cilamfwu bakaiya kasimpe nobakacili bakubusi. Mbubwenya mbuli musambazi iwakajana ngale iidula kapati elyo iwakauzya zyoonse zintu nzyaakajisi ikutegwa ayuule, aabo basikwiiya Bbaibbele basungu bakaliimya akulyaaba kuli Jehova. (Matayo 13:45, 46; Marko 8:34) Ino balimvwa buti kujatikizya kulindila nkubalindila kwaciindi cilamfwu kwiinda mbuli mbobali kulangila ikutegwa babone kuzuzikizigwa kwamakanze aa Leza aajatikizya nyika? Tabatyompedwe pe! Balimvwa mbuli Mukwesu A. H. Macmillan walo iwakaamba majwi aya nokwakainda myaka iitandila ku 60 kalyaabide kumulimo wa Leza ategwa: “Lino ndilikanzide ikuzumanana mulusyomo lwangu kwiinda lyoonse. Lwapa kuti buumi bwangu bube boobo ibulaampindu. Lucindigwasya kulangila zili kumbele kakunyina akulibilika cili coonse.”
2. (a) Ndulayo nzi ilwaaciindi ceelede Jesu ndwaakapa basikumutobela? (b) Mmibuzyo nzi njotutilange-lange mucibalo eci?
2 Ino mbuti nywebo? Kufwumbwa naa muli baciimo nzi, amwaayeeyesye majwi aa Jesu aakuti: “Nkaambo kaako amulangile, nkaambo tamuzi buzuba mbwazoosika mwami wanu.” (Matayo 24:42) Ikaambo ako nkamasimpe. Tatubuzyi buzuba nayakuboola Mwami kuzyoonyonyoona bweende bwazintu obu bubyaabi, alimwi eci ncintu ncotutayandiki akuzyiba pe. Pele tweelede kupona bukkale ibutakatujazyi nsoni pe aakuboola. Nzikozyanyo nzi nzyotujana mu Bbaibbele ikujatikizya makani aya izinga zyatugwasya kuba bantu balangila lyoonse? Ino Jesu wakacitondezya buti eci? Alimwi mbumboni nzi buliko sunu ibutondezya caantangalala kuti tukkede kumazuba aamamanino aanyika eyi iitali yabunaleza?
Incenjezyo
3. Ino bantu banji sunu bakozyanya buti abaabo bakuciindi ca Nowa?
3 Munzila zinjaanji, ibantu sunu bali mbuli baalumi abamakaintu ibakali kupona kuciindi ca Nowa. Kuciindi eco, inyika yakazwide luuni alimwi miyeeyo yabantu yakali “mibi luzutu mazuba oonse.” (Matalikilo 6:5) Ibunji bwabo bakabbide buya muzintu zyabuzubaa buzuba. Pele katanaleta Zambangulwe pati, Jehova wakapa bantu ciindi cakweempwa. Wakalailila Nowa kuti akambauke, elyo Nowa wakacita obo—wakabeleka kali “mukambausi wabululami” ambweni kwamyaka iili 40 naa 50 nokuba kwiindaawa. (2 Petro 2:5) Nokuba boobo, ibantu tiibakakubikkila maanu kucenjezya kwa Nowa. Kunyina nobakali kulangila. Aboobo kumamanino alikke Nowa abamukwasyi wakwe mbabakafwutuka lunyonyooko lwa Jehova.—Matayo 24:37-39.
4. Muunzila nzi imulimo wa Nowa mounga waambwa kuti wakazwidilila, alimwi mbuti eco ncoona mbocinga caambwa kuti cilaujatikizya mulimo wanu wakukambauka?
4 Sena Nowa wakazwidilila mumulimo wakwe? Mutayeeyi buyo mweelwe musyoonto wabantu bakateelela. Atwaambe kuti, ibukambausi bwa Nowa bwakazuzikizya makanze aambubo nokuba kuti bantu ibakateelela bakali basyoonto. Nkaambo nzi? Nkaambo bwakapa bantu ciindi cipati cakuti balisalile kuyoobelekela Jehova naa pe. Ino mbuti kujatikizya cilawo canu nkomukambaukila? Nokuba kuti mbasyoonto ibamvwa, muli mukuzwidilila kapati. Nkaambo nzi? Nkaambo kwiinda mukukambauka, muli mukwaambilizya ncenjezyo zya Leza, aboobo muli mukuzuzikizya mulimo Jesu ngwaakapa basikumutobela.—Matayo 24:14; 28:19, 20.
Ikuunduluzya Basinsimi ba Leza
5. (a) Mbukkale buli buti ibwakadumide mu Juda kuciindi ca Habakuku, alimwi ino bantu bakautambula buti mulumbe wakwe wabusinsimi? (b) Ino bantu bana Juda bakabutondezya buti bulwani kubasinsimi ba Jehova?
5 Nokwakainda myaanda yamyaka kuzwa ciindi lyakali Zambangulwe, izintu mu Juda zyakabija kapati. Ikukomba mituni akutalulama akudyaaminina alimwi akujayana zyakaduma kapati. Jehova wakatuma Habakuku ikucenjezya bantu kuti beempwe, buyo-buyo imapenzi mapati akali kuyoobasikila kuzwa kuba Kasidi naa bana Babuloni. (Habakuku 1:5-7) Pele bantu teebakaswiilila pe. Ambweni bakali kuyeeya kuti, ‘Kunyina ambocibede eci, kayi imyaka iili mwaanda yainda imusinsimi Isaya wakatucenjezya mbubwenya buyo, pele asunu kunyina cainacitika!’ (Isaya 39:6, 7) Ibunji bwabeendelezi bamu Juda tiibakausulaika buyo mulumbe oyo pele bakabalwana abalo basikuwaambilizya. Cimwi ciindi, bakasoleka kujaya musinsimi Jeremiya alimwi nobakazwidilila buya naatakali Ahikamu iwakagwasya. Akaambo kakuti Mwami Jehoyakimu wakamunyemya mulumbe uumbi wabusinsimi, wakamujaya musinsimi Uriya.—Jeremiya 26:21-24.
6. Ino Jehova wakamuyumya buti Habakuku?
6 Imulumbe wa Habakuku awalo wakaambilizyigwa cabusicamba alimwi tiiwakali kuyandwa pe mbubwenya buyo mbuli wa Jeremiya imusinsimi wakatumidwe a Leza kuti asinsime lunyonyooko lwamyaka iili 70 lwa Juda. (Jeremiya 25:8-11) Aboobo tulakonzya kuzyiba ncaakatyompedwe Habakuku naakalila kati: “O Jehova, njooleka lili kukukwiilila notamvwi? Ndakulilila nkaambo kakupyopyongana kwabantu, pele toswiilili.” (Habakuku 1:2) Jehova wakaingula Habakuku mumajwi aalubomba alimwi aayumya lusyomo aakuti: “Cilengano cilijisi ciindi caco cibikidwe. Cileza bukunkulika, nkabela kumamanino tacikooyoobeja pe. Na camuka, kocilindila, nkaambo ncobeni cilaza, tacikooyoocedelelwa pe.” (Habakuku 2:3) Aboobo, Jehova wakajisi “ciindi . . . cibikidwe” cakumanizya bubi akudyaaminina. Ikuti naa kwakalibonya kuti camuka, Habakuku tanaakeelede kutyompwa pe nokuba kutolwaala mumulimo wakwe. Muciindi caboobo wakeelede ‘kucilindila,’ kacita milimo yakwe yabuzubaa buzuba cakubinda. Buzuba bwa Jehova kunyina nobwakali kuyoocedelelwa pe!
7. Nkaambo nzi ncokwakakanzigwa lunyonyooko lumbi kujatikizya Jerusalemu mumwaanda wamyaka wakusaanguna C.E.?
7 Nokwakainda myaka iitandila ku 20 kuzwa ciindi Jehova naakaingula Habakuku, imunzi mupati mu Juda, iwa Jerusalemu wakanyonyonwa. Kumbele wakayakululwa alimwi izintu zinjaanji izyatakaluzi ezyo zyakamutyompezyede Habakuku zyakalulamikwa. Pele mumwaanda wamyaka wakusaanguna C.E., imunzi oyo wakakanzigwa kunyonyoonwa alimwi akaambo kakutasyomeka kwabantu bakali kukkala mulinguwo. Akaambo kakuti ngusiluse, Jehova wakacita bubambe bwakuti ibabombe myoyo bafwutuke. Lino taakwe umbi ngwaakabelesya kunze lyamusinsimi mupati Jesu Kristo kuti aambilizye mulumbe oyo. Mu 33 C.E., Jesu wakaambila basikumutobela kuti: “Wabona kuti Jerusalemu wazinganwa mukati kempi, amukazibe kuti kusaalwa kwawo kuli afwaafwi. Ndilyonya abo abali mu-Judaya abacijile mumalundu.”—Luka 21:20, 21.
8. (a) Ncinzi cilangilwa kuti ncecakacitika ku Banakristo bamwi ciindi mbocakali kuyaabuya kuzwa ciindi Jesu naakafwa? (b) Ino majwi aa Jesu aabusinsimi kujatikizya Jerusalemu akazuzikizigwa buti?
8 Mboyakali kuyaabuya myaka, Banakristo bamwi ku Jerusalemu balakonzya kuti bakali kulibuzya nobwakali kuyoozuzikizigwa businsimi bwa Jesu. Amulange zintu zimwi izilangilwa kuti nzyobakacita bamwi. Ambweni bakakaka kucita makwebo aakali kunga abapa mali mabotu akaambo kamakanze aabo aakuyanda kuba bantu balangila lyoonse. Iciindi nocakali kuyaabuya, sena bakakatala? Sena bakayeeya kuti bakali kusowa buyo ciindi cabo akwaamba kuti imajwi aa Jesu akali kujatikizya zyalani lyakumbele ikutali lyabo? Mu 66 C.E., ibusinsimi bwa Jesu bwakatalika kuzuzikizigwa eelyo impi zyabana Roma nozyakauzinguluka munzi wa Jerusalemu. Aabo ibakali kulangila bakacibona citondezyo, bakatija kuzwa mumunzi elyo bakalufwutuka lunyonyooko lwakasikila Jerusalemu.
Ikutondezya Mbokuyandika Kulangila
9, 10. (a) Mbuti mbomunga mwaaluula mubufwaafwi icikozyanyo ca Jesu cabazike ibakalindila simalelaabo kuti apiluke kuzwa kulukwatano lwakwe? (b) Nkaambo nzi ncocakali cintu ciyumu kubazike ikulindila simalelaabo? (c) Nkaambo nzi ncokwakali kunoobagwasya bazike ikukkazika moyo?
9 Naakali kukankaizya mbokuyandika kulangila, Jesu wakakozyanisya basikwiiya bakwe kubazike ibalindila simalelaabo kuti apiluke kuzwa kulukwatano lwakwe. Bakalizi kuti wakali kunoobweeda mubusiku bumwi—pele ino cakali kunooli ciindi nzi? Sena nkukulindila kwamasiku kutaanzi? Sena nkwabili? Sena nkwatatu? Kunyina nobakazyi pe. Jesu wakati: “Kuti [simalelaabo] wasika kukulindila kwabili na kwatatu, abajana bali boobo [balalindila], bali acoolwe bazike abo.” (Luka 12:35-38) Kamuyeeya buyo mbobakali kulangila bazike aba. Kufwumbwa jwi ndyobakali kunoomvwa nociba cinzemweemwe zyakali kunooyindizya bulangizi bwabo akubapa kwaamba kuti: ‘Sena oyo ngosimaleleesu wasika?’
10 Ino kuti simalelaabo naakasika kukulindila kwabili kwamasiku kwalo kwakali kutalikila aciindi ca 21:00 hrs yamasiku kusikila akaandabwe kabusiku? Sena bazike bakwe boonse—kubikkilizyaa baabo bakali kubeleka buzuba boonse kuzwa cifwumofwumo bakali kunoolibambilide kumujuzya naa bamwi ambweni inga kaboona aciindi eco? Ino kuti simalelaabo naakasika kukulindila kwatatu kwamasiku ikwakali kutalika akaandabwe kusikila aciindi ca 03:00 hrs kubucedo? Sena bazike bamwi bakali kunootyompokelwa naa kucimwa akaambo kakumuka kwasimalelaabo? * Balikke abo ibakali kunoojanika kabalindila ciindi simalelaabo naakali kunoosika mbabakali kunooambwa kuti bali acoolwe. Kuli mbabo imajwi aa Tusimpi 13:12 akali kunoobeleka aakuti: “Bulangizi butafwambi kuzuzikizigwa bulacisya moyo, pele moyo nuujana ncuusukeme, musamu wabuumi.”
11. Mbuti mupailo mbounga watugwasya kuba bantu balangila lyoonse?
11 Ncinzi cakali kunoogwasya basikutobela Jesu kuzumanana kulangila kuciindi eco cakali kulibonya mbuli kuti nkumuka? Nobakali mumuunda wa Getesemane kakusyeede buyo kaindi kasyoonto kuti aangwe, Jesu wakaambila baapostolo bakwe botatwe kuti: “Amulangile akukomba, kuti mutanjili mukusunkwa.” (Matayo 26:41) Kumbele kakwiindide myaka iili mbwiibede, Petro iwakaliko ciindi eco wakapa lulayo lukozyanya ku Banakristonyina. Wakalemba kuti: “Mamanino aazintu zyoonse ali afwaafwi. Amulibatamike akulisitikizya kukukomba.” (1 Petro 4:7) Ee, ikupaila camoyo woonse ceelede kuba cilengwa cesu ca Bunakristo. Inzya, tweelede kuzumanana kukombelezya Jehova kuti atugwasye kulangila lyoonse.—Ba-Roma 12:12; 1 Ba-Tesalonika 5:17.
12. Ino kuzumbauzya akulangila ziindene buti?
12 Amubone kuti Paulo wakaamba akuti: “Lino mamanino aazintu zyoonse ali afwaafwi.” Ino ali afwaafwi buti? Kunyina nzila njobanga babelesya bantunsi ikubanda buzuba bwini aciindi. (Matayo 24:36) Pele kuli kwiimpana akati kakuzumbauzya buyo, kwalo ikutakulwaizigwi mu Bbaibbele alimwi akulangila mamanino ikukulwaizigwa. (Amweezyanisye 2 Timoteo 4:3, 4; Tito 3:9.) Ino ninzila nzi yomwe iinga yatugwasya kulangila mamanino? Nkwiinda mukubikkila maanu kapati kubumboni bwakuti imamanino ali afwaafwi. Aboobo atulange-lange nzila izili cisambomwi zyabumboni izisinizya kuti tukkede kumazuba aamamanino aanyika eyi mbyaabi.
Inzila Zyabumboni Izili Cisambomwi Izisinizya
13. Ino businsimi bwa Paulo ibulembedwe kuli 2 Timoteo caandano 3 businizya buti kuti tukkede “kumazuba aakumamanino”?
13 Ikusaanguna tulabubona businsimi bwamwaapostolo Paulo kabuzuzikizigwa kujatikizya “mazuba aakumamanino.” Paulo wakalemba kuti: “Kumazuba aakumamanino kuyooba ziindi zikataazya. Nkaambo bantu bayooba basikuliyanda, basimuyanda mali, basimantumbwaambwa, basikakomokomo, basikasankusanku, batamvwi bamawisi, batalumbi, batakombi, basikancimwa, basimfundiilili, abasiluvuya lwakutaminizya, batalyeendeleli, basitunyetunyetu, batayandi bubotu, basimusuzyanya, basikainya, basikulisumpula, bayandisya misalo yaansi kwiinda Leza, balijisi ciwa cabukombi pele inguzu zyambubo balazikazya. Eno kobafutatila bali bobuya. Pele balo bantu babi abasikulibeja balainda anka kubija, banooena akweenwa.” (2 Timoteo 3:1-5, 13) Sena businsimi obu tatuli mukububona kabuzuzikizigwa kuciindi cesu cino? Balikke ibatabikkili maanu kutwaambo otu mbabakonzya kukazya! *
14. Mbuti majwi aakubbuku lya Ciyubunuzyo 12:9 aajatikizya Diabolosi mbwaali mukuzuzikizigwa sunu, alimwi ino ncinzi ciyoocitika kulinguwe lino-lino?
14 Iyabili, twalibonena zintu zyacitika akaambo kakuti Saatani amadaimonaakwe bakatandwa kuzwa kujulu, ikuzuzikizya bbuku lya Ciyubunuzyo 12:9. Oko tubala kuti: “Simwaaba mupati wakawisigwa ansi, nguwenya muzoka waciindi, uutegwa Diabolosi a-Saatani, nguuena bantu boonse baansi. Wakawisigwa ansi, abalo baangelo bakwe bakawisigwa awe.” Eci caleta mapenzi mapati anyika. Ncobeni kwali mapenzi aataambiki kubantu, ikapati kuzwa mu 1914. Pele businsimi obo ku Ciyubunuzyo bulayungizya kuti elyo Diabolosi nawisilwa anyika, ulizyi kuti “ciindi ncacijisi nciniini buyo.” (Ciyubunuzyo 12:12) Muciindi eci, Saatani uli mukulwana nkondo abasikutobela Kristo bananike. (Ciyubunuzyo 12:17) Masimpe, twazibona zintu zyacitika muciindi cesu akaambo kankondo njalwana. * Pele lino-lino, Saatani uyoowaalwa mumulindi uutagoli ikutegwa “ateeni limbi masi.”—Ciyubunuzyo 20:1-3.
15. Ino bbuku lya Ciyubunuzyo 17:9-11 lipa buti bumboni bwakuti tukkede kuciindi cakumamanino?
15 Iyatatu, tupona kuciindi cabweendelezi ‘bwamwami’ walusele alimwi wamamanino iwaambwa kubusinsimi ibulembedwe ku Ciyubunuzyo 17:9-11. Kubbuku eli imwaapostolo Johane waamba makani aabami bali ciloba ibaiminina masi aayendelezya nyika yoonse aali ciloba—Egepita, Asuri, Babuloni, Mediya a Persia, Greece, Roma alimwi abwami bwamasi obile, Britain a America (Anglo-America). Alimwi wabona ‘mwami wamusanu abatatu uuli ngoumwi wabali musanu ababili.’ Oyu mwami walusele—wamamanino ngwaakabona Johane mucilengaano—ono wiiminina ciinga ca Lukamantano Lwazisi citegwa United Nations. Johane waamba kuti mwami walusele oyu “ulaya kulunyonyooko,” naakamana kwaamba boobo kunyina bami bambi baanyika ibaambwa. *
16. Ino twaambo tuzuzikizya ciloto ca Nebukadinezara cacikozyanyo tutondezya buti kuti tukkede kumazuba aakumamanino?
16 Iyane, tukkede kuciindi iciimininwaa zituta zyacikozyanyo camuciloto ca Nebukadinezara. Imusinsimi Daniele wakacipandulula ciloto eco ciyoosya icacikozyanyo cipati cili mbuli muntu. (Daniele 2:36-43) Izibeela zyalubulo zyone izyacikozyanyo eci ziiminina zisi zyeendelezya nyika ziindene-indene, ikutalikila kumutwe (Bwami bwa Babuloni) mane kuyoosikila kuzituta aminwe (mfwulumende izyeendelezya sunu). Imasi aayendelezya oonse aaimininwaa cikozyanyo eco akalibonya kale. Lino tukkede kuciindi iciimininwaa zituta zyacikozyanyo eco. Kunyina nokwaambwa zisi zimbi izilangilwa kumbele. *
17. Mbuti mulimo wesu wakukambauka Bwami mboupa bumboni bumbi bwakuti tukkede kuciindi cakumamanino?
17 Iyasanu, twalibonena kauzuzikizigwa mulimo wakukambauka nyika yoonse mbwiizulwa walo Jesu ngwaakati wakali kuyoocitwa kwasyaala buyo ciindi cisyoonto kuti mamanino aabweende obu acitike. Jesu wakati: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.” (Matayo 24:14) Sunu obo businsimi buli mukuzuzikizigwa kapati. Ee, kulakonzya kuti kucili masena amwi aatanakambaukilwa elyo ambweni kuciindi Jehova mwini ncabikkide, imulyango mupati uyoojalulwa wakucita milimo minji. (1 Ba-Korinto 16:9) Nokuba boobo, Ibbaibbele kunyina mpolyaamba kuti Jehova uyoolindila kusikila mane bantu boonse anyika bakakambaukilwe. Muciindi caboobo, makani mabotu ayelede kukambaukwa kusikila waawo mpayanda Jehova. Mpoonya mamanino ayoosika.—Amweezyanisye Matayo 10:23.
18. Ncinzi cilangilwa kucitika kubananike bamwi aakutalika mapenzi mapati alimwi ino eci inga cazyibwa buti?
18 Iyacisambomwi, imweelwe wabasikwiiya ba Kristo beni-beni ibananike uyabuyaansi, nokuba kuti kulangilwa kuti bamwi banoocili anyika elyo mapenzi mapati aakutalika. Ibunji bwabananike balicembeede kapati alimwi mukuya kwamyaka imweelwe wabaabo ibananike ncobeni wali kuyaabuceya. Pele kaamba makani aamapenzi mapati, Jesu wakati: “Mazuba ayo naatakafwiinsigwa nikwatazooba muntu naba umwi wali kunoozoofutulwa, pele mazuba ayoofwiinsigwa nkaambo kabasale.” (Matayo 24:21, 22) Aboobo kulibonya kuti bamwi babaabo “basale” ba Kristo banoocili anyika imapenzi mapati aakutalika. *
Ino Ncinzi Cilangilwa Kumbele?
19, 20. Nkaambo nzi ncokuyandika kapati kulangila lino kwiinda lyoonse?
19 Ino ncinzi ncotulangila kumbele? Iziindi zikatazya ziciboola. Paulo wakacenjezya kuti “buzuba bwa-Mwami buleza mbwasika uubba masiku.” Kaamba bantu ibabonekaanga mbasongo munzila yakunyika, waamba kuti: “Nobanoozoocili mukwaamba kuti, Kwatontola, kwaliiba, elyo muciindi eco nciconya lunyonyooko luzoofwambaana kubasikila.” Aboobo Paulo wakulwaizya basikubala bakwe kuti: “Tutanooni mbuli bantu bamwi, atukalinde, tube bapakamani.” (1 Ba-Tesalonika 5:2, 3, 6) Masimpe, ibantu abo basyoma mumbunga zyabantunsi kuti nzeziyooleta luumuno alukwabililo baunduluzya makani meni-meni. Ibantu bali boobo baloona!
20 Ilunyonyooko lwabweende bwazintu obu luyooboola aciindi aatayeeyelwi. Aboobo, amuzumanane kulangila buzuba bwa Jehova. Leza wakaambila Habakuku kuti: “Tacikooyoocedelelwa pe”! Masimpe, kunyina ciindi cimbi notwakali kuyandika kulangila kapati mbuli lino.
Bupanduluzi buyungizidwe
^ munc. 10 Simalelo taakabaambilide bazike bakwe ciindi ncaakali kuyoobweeda. Aboobo tanaakali kuyandika kupandulula makani oonse aajatikizya nyendo zyakwe alimwi taakeelede kupandulula kaambo ncaakamukila.
^ munc. 13 Ikuti kamuyanda twaambo tumbi kujatikizya businsimi obu, amubone cibalo 11 cabbuku lya Luzibo Lutola Kubuumi Butamani, ilyakamwaigwa aba Watchtower Bible and Tract Society of New York, Inc.
^ munc. 14 Ikuti kamuyanda makani aambi, amubone mapeeji 180-6 aabbuku lya Revelation—Its Grand Climax At Hand!, ilyakamwaigwa aba Watchtower Bible and Tract Society of New York, Inc.
^ munc. 15 Amubone Revelation—Its Grand Climax At Hand!, mapeeji 251-4.
^ munc. 16 Amubone caandano 4 cabbuku lyakuti Amububikkile Maanu Businsimi bwa Daniele!, ilyakamwaigwa aba Watchtower Bible and Tract Society of New York, Inc.
^ munc. 18 Mucikozyanyo cambelele ampongo, Mwanaa muntu uzoosika mubulemu bwakwe kuciindi camapenzi mapati elyo uzookkala kubeteka. Uzoobeteka bantu ikubona naa bakabagwasya banabokwabo Kristo bananike. Ikaambo aka kakubetekela bantu inga takabeleki pe kuti naa ciindi lubeteko nolucitwa banabokwabo Kristo bananike kabanooli bakazwa kaindi anyika.—Matayo 25:31-46.
Sena Mulayeeya?
• Nzikozyanyo nzi zyamu Magwalo izinga zyatugwasya kuba bantu balangila?
• Ncikozyanyo nzi ncaakapa Jesu kujatikizya mbokuyandika kuba bantu balangila?
• Ninzila nzi zyabumboni izili cisambomwi izisinizya kuti tukkede kumazuba aakumamanino?
[Mibuzyo yaciiyo]
[Zifwanikiso izili apeeji 3]
A. H. Macmillan wakabelekela Jehova cakusyomeka kwamakumi aamyaka aatandila kucisambomwi
[Cifwanikiso icili apeeji 4]
Jesu wakakozyanisya basikwiiya bakwe kubazike ibalangila