Ibakkomene Muli Leza Walufwutuko Lwesu

“Nsileki kubotelwa muli-Jehova, noocikondwa muli-Leza walufutuko lwangu.”—HABAKUKU 3:18.

1. Ncilengaano cazintu nzi Daniele ncaakabona ibwami bwa Babuloni kabutanawa mu 539 B.C.E.?

KAKWIINDIDE myaka yiinda kukkumi bwami bwa Babuloni kabutanawa mu 539 B.C.E., musinsimi Daniele uucembeede wakabona cilengaano ciyoosya. Cakasinsima zintu zyakali kunoozoocitika munyika mane do kusikila kunkondo mpati iiyoolwanwa abasinkondonyina Jehova a Mwami wakwe ngwabikkide, Jesu Kristo. Ino Daniele wakalimvwa buti? Wakati: “Ndakawizuka . . . Cilengano cakandiyoosya.”—Daniele 8:27.

2. Ninkondo nzi Daniele njaakabona mucilengaano, alimwi ino mulimvwa buti kujatikizya mboiswenede afwaafwi?

² Ino swebo mbuti? Tukkede kumamanino kwini kwaciindi! Tulimvwa buti notuzyiba kuti nkondo ya Harmagedoni Daniele njaakabona mucilengaano ilaafwaafwi kapati? Tucita nzi notuzyiba kuti ibubi bwayubununwa mubusinsimi bwa Habakuku bwavwula kapati cakuti lunyonyooko lwabasinkondonyina Leza luyoosika kakunyina aulukasya? Kulangilwa kuti tulimvwa mbuli mbwaakalimvwa Habakuku lwakwe, mbubwena mbuli mbokupandulwidwe mucaandaano catatu cabbuku lyakwe lyabusinsimi.

Habakuku Wapailila Lubomba lwa Leza

3. Ino Habakuku wakali kupailila bani, alimwi ino mbuti majwi aakwe mbwaatujatikizya?

³ Makani aamu Habakuku caandaano 3 ngamupailo. Kweelana akapango ka 1 aya makani aitwa kuti Sigionoto, nkokuti nyimbo zyakuusa naa zyabuumba. Mupailo wamusinsimi waakombwa mbuli kuti wakali kulipailila mwini. Pele Habakuku wakali kwiiminina musyobo wa Leza uusalidwe. Mazubaano mupailo wakwe ulaampindu kapati kubantu ba Leza ibabeleka mulimo wakukambauka makani aa Bwami. Notubala caandaano 3 eci amuzeezo oyu, imajwi aaco atucitya kuti tuyoowe zyakumbele pele alimwi atupa kuti tukkomane. Mupailo wa Habakuku naa lwiimbo lwabuumba lutupa kaambo kapati kakukkomana muli Jehova, Leza walufwutuko lwesu.

4. Nkaambo nzi Habakuku ncaakayoowa, alimwi nkubelesyegwa kwanguzu zya Leza nzi nkotusinizizye kuti kuyoocitwa?

⁴ Mbuli mbotwabona kale muzibalo zyobile zyainda, iciimo cacisi ca Juda kuciindi ca Habakuku cakali cibyaabi kapati. Pele Leza tanaakali kuyoocilekela kuti cizumanane ciimo cili boobu. Jehova wakali kuyoobweza ntaamu, mbubwenya mbuli mbwaakacitide musyule. Anu  musinsimi oyu ncaakalila kati: “O Jehova, ndimvwide impuwo yako, ndiyoowede.” Ino ncinzi ncaakali kwaamba? ‘Impuwo ya Jehova’ akali makani aakaindi aazintu ziyoosya nzyaakacita Leza mbuli zyakacitika ku Lwizi Lusalala, munkanda alimwi aku Jeriko. Habakuku wakalizizi kabotu zintu ezi, elyo zyakamuyoosya nkaambo wakalizi kuti Leza wakali kuyoozibelesya alimwi nguzu zyakwe zipati kuli basinkondonyina. Notubona bubi bwabantu mazubaano, aswebo tulaziba kuti Jehova uyoocita mbubwena mbwaakacita ciindi cansiku. Sena eci cilatuyoosya? Inzya! Pele tulapaila mbubwena mbwaakapaila Habakuku kuti: “O Jehova, busya milimo yako mukati kamyaka. Mukati kamyaka uizibisye. Mukunyema kwako utalubi luzyalo.” (Habakuku 3:2) Muciindi mwini Leza ncabikkide, “mukati kamyaka,” azitondezye alimwi inguzu zyakwe zitaambiki. Alimwi kuciindi eco, akayeeye kutondezya lubomba kuli baabo bamuyanda!

Jehova Wafwoola!

5. Ino ‘mbuti Leza bwaakazwa ku-Temani,’ alimwi ino eci citondezya nzi kujatikizya Harmagedoni?

⁵ Ncinzi ciyoocitika Jehova aakwiingula mupailo wesu walubomba? Ibwiinguzi tulabujana kuli Habakuku 3:3, 4. Lutaanzi musinsimi waamba kuti: “Leza wazwa ku-Temani. Uusalala wazwa kucilundu ca-Parana.” Kaindi kumazubaa Musa, Temani a Parana akali masena aakali munzila yabana Israyeli nobakali kwiinda munkanda kugama ku Kanana. Mbowakali kuyabweendela musyobo wa Israyeli oyu mupati, Jehova lwakwe nguwakali kulibonya mbuli kuti uli mukweenda alimwi kwiina cakali kukonzya kumwiimika. Kakusyeede buyo ciindi cisyoonto katanafwa Musa wakati: “Jehova wakazwa ku-Sinai, wakatusikila kuzwa ku-Seiri mbuli bucedo, wakatumunikila kuzwa kucilundu ca-Parana; wakazwa kuzyuulu zyazyuulu [zyabangelo] basalala.” (Deuteronomo 33:2) Jehova aakweenda kulwana basinkondonyina lya Harmagedoni, inguzu zyakwe nzyoonya zitakonzyi kwiimikwa uyoozitondezya.

6. Kunze lyabulemu bwa Leza, ncinzi cimbi Banakristo bapakamene ncobabona?

⁶ Alimwi Habakuku waamba kuti: “Bulemu bwakwe [Jehova] bwavumba ijulu lyoonse, ayalo nyika yalizwide kutembaulwa kwakwe. Kumweka kwakwe kwakali mbuli mumuni.” Ma! Elo bulemu bwakwe bwakali kugambya kaka! Masimpe, bantunsi kwiina nobanga Jehova Leza bamubona akucaala kabacipona. (Kulonga 33:20) Nokuba boobo, kubabelesi ba Leza ibasyomeka, imeso aamyoyo yabo alagambwa cakumaninina ciindi nobatelaika aabulemu bwakwe. (Ba-Efeso 1:18) Alimwi kulaacimbi Banakristo bapakamene ncobabona kunze lyabulemu bwa Jehova. Habakuku 3:4 ilamanizya amajwi aakuti: “Kali amitungazuba iizwa kubbazu lyakwe, nkukonya oko inguzu zyakwe nkuzyakayubide.” Inzya, twabona kuti Jehova ulilibambilide kulwana, kabelesya ijanza lyakwe lyalulyo lijisi bukozu anguzu.

7. Ikufwoola Leza nkwayoocita kuyooamba nzi kuli baabo ibamuzangila?

⁷ Ikufwoola nkwafwoola Leza kwakuzunda nkwakunyonyoona bamuzangila. Habakuku 3:5 yaamba kuti: “Bulwazi bulamusololela, amulilo uutenta ulamutobela kusule.” Mumwaka wa 1473 B. C. E, ibana Israyeli nobakali afwaafwi kusika kuminyinza Yanyika Yakasyomezyegwa, ibanji bakazanga, bakacita bwaamu akukomba mituni. Aboobo ibainda ku 20,000 bakajaigwa abulwazi Leza mbwaakabatumina. (Myeelwe 25:1-9) Onoono Jehova aakufwoola kuya “kunkondo yabuzuba bupati bwa-Leza Singuzuzyoonse,” aabo ibamuzangila bayoonyonyoonwa akaambo kazibi zyabo. Bamwi mane bayoofwaa bulwazi bwini-bwini.—Ciyubunuzyo 16:14, 16.

8. Ncinzi ciyoocitikila basinkondo ba Leza kweelana a Habakuku 3:6?

⁸ Ono amuswiilile musinsimi mbwamupandulula kabotu-kabotu Jehova wamakamu mbwali mukutola ntaamu. Kuli Habakuku 3:6, tubala kuti: “[Jehova Leza] wakaima, wakeeleka nyika. Wakabona, wakatanda masi. Zilundu ziteeli zyakamwaika, mapili aaciindi akakotama. Inzila zyakwe nzezyaciindi.” Lutaanzi Jehova ‘waima nji,’  mbuli mupati wabasikalumamba uulanga-langa busena bwakulwanina. Basinkondonyina bazyangama kuyoowa kwalo. Bamubona ngobatilwane limwi alimwi bagambwa, basotauka kabayoowede cini-cini. Jesu wakasinsima ciindi “misyobo yoonse yaansi [no]iyoolila.” (Matayo 24:30) Bayoomuka kuziba kuti kwiina uunga wakazya kuyanda kwa Jehova. Imbunga zyabantu—kubikkilizyaa zeezyo zilibonya kuti inga tazizungaanisigwi mbuli “zilundu ziteeli” alimwi ambuli “mapili aaciindi”—ziyookolomoka akumwaika. Aboobo kuyooba mbuli ‘inzila zyakwe Leza zyaciindi’ mbubwena mbuli mbwaakacita mazuba aansiku.

9, 10. Ncinzi ncotuyeezyegwa kuli Habakuku 3:7-11?

⁹ ‘Bukali bwa-Jehova bwaindila’ kujatikizya basinkondonyina. Ino nzilwanyo nzi Jehova nzyatikabelesye munkondo yakwe mpati? Amuswiilile mbwayabuzipandulula musinsimi naamba kuti: “Buta bwako bwakasupuka, ijwi ndowakakonkezezya mikowa lyakaba lyakusinizya. Nyika wakaipanduzya milonga. Malundu akakubona, akapengesya. Izambangulwe lyamaanzi lyakainda. Intinti yakalizya ijwi lyayo, akusumpula maanza aayo. Izuba amwezi, zyoonse zyakaima nkuzikede, nizyakabona mumuni wamivwi yako ileenda, akumweka kwasumo lyako libeka-beka.”—Habakuku 3:7-11.

¹⁰ Kuciindi ca Joshua, Jehova wakacitya kuti izuba amwezi ziime nji kutondezya nguzu zyakwe zigambya. (Joshua 10:12-14) Majwi aa Habakuku atuyeezya kuti inguzu nzimunya ezi ziyoobelesyegwa ciindi ca Harmagedoni. Mu 1513 B.C.E., Jehova wakatondezya mbocili citete kulinguwe kweendelezya intinti naa maanzi aavwuuma aamilonga naakabelesya Lwizi Lusalala kunyonyoona impi zya Farao. Kakwiindide myaka iili 40 kuzwa leelyo, imulonga wa Jordano nokuba kuti wakali payide cini-cini kwiina nowakabakasya bana Israyeli kuzumanana alweendo lwabo lwakuzunda nobakali kuya Kunyika Yakasyomezyedwe. (Joshua 3:15-17) Kuciindi camusinsimi mukaintu Debora, imvwula impati yakatola inkalaki zyasinkondonyina abana Israyeli, nkokuti Sisera. (Babetesi 5:21) Inguzu eezi nzizyonya zyakupaya kwamaanzi, imvwula mpati alimwi antinti yamaanzi ziyoobelesyegwaa Jehova ciindi ca Harmagedoni. Ikudilima andabo azyalo ulazyeendelezya mbubwena mbuli sumo naa inkomo iizwide mivwi.

11. Ncinzi ciyoocitika Jehova aakutondezya inguzu zyakwe zyoonse zipati?

¹¹ Masimpe, kuyooyoosya kapati ciindi Jehova aakutondezya inguzu zyakwe zyoonse zipati. Imajwi aa Habakuku atondezya kuti ibusiku buyoosanduka kuba sikati alimwi sikati kuyootuba buu kwiinda mumuni uuzwa kuzuba. Kunyina makani naa bupanduluzi bwabusinsimi obu ibwaamba Harmagedoni buyoocitika cini-cini naa kuli ncobwiiminina, icintu cizizilwe ncakuti—Jehova  uyoozunda alimwi takazumizyi sinkondonyina naba omwe ikuloboka.

Lufwutuko Lulisinizidwe Kubantu ba Leza!

12. Ncinzi Leza ncayakucita kuli basinkondonyina, pele ino mbaani ibayoofwutuka?

¹² Musinsimi wazumanana kupandulula mbuli Jehova mbwatikabanyonganye basinkondonyina aciindi cakubanyonyoona. Kuli Habakuku 3:12, tubala kuti: “Mubukali bwako wakainda akati kanyika, wakalyataula zisi cakunyema.” Nokuba boobo, Jehova takaile kunyonyoona cinyonyoone-nyonyoone. Bantu bamwi bayoofwutuka. Habakuku 3:13 yaamba kuti: “Wakainka kuyoofutula bantu bako, kuyoofutula munanike wako.” Inzya, Jehova uyoofwutula babelesi bakwe basyomeka. Elyo lunyonyooko lwa Babuloni Mupati lunoocitikide cakumaninina. Pele mazubaano izisi zili mukusoleka kuzimaazya bukombi busalala. Onoono babelesi ba Jehova bayoolwanwa ankamu zya Gogo waku Magogi. (Ezekieli 38:1–39:13; Ciyubunuzyo 17:1-5, 16-18) Sena kulwanwa oko kubyaabi kuyoozwidilila? Peepe! Jehova cabukali uyoobalyataula, ikubavwinyauna basinkondonyina kunsi lyamaulu aakwe mbuli nseke aacibuye cakupupulwida. Pele aabo ibamukomba mumuuya amubwini uyoobafwutula.—Johane 4:24.

13. Ino Habakuku 3:13 iyoozuzikizigwa buti?

¹³ Ilunyonyooko lwabasizibi lumaninide lulasinsimwa mumajwi aaya aakuti: “[Jehova] wakapwaya mutwe muŋanda yabasizibi, wakavumbulula zitalisyo akusikila kunsingo.” (Habakuku 3:13) Eyi “ŋanda” mbweende bwazintu bubyaabi ibwakatalika kwiinda munguzu zya Saatani Diabolosi. Buyoopwayaulwa. “Mutwe” naa basololi bazangila Leza, bayoovwinyaunwa. Ibwaanda boonse buyookolomonwa mane do kusikila mpubwakatalikila. Tabukaimi limbi. Elo ciyooba ciindi cikatalusya kaka eco!

14-16. Ncinzi ciyoocitika kubantu ba Jehova alimwi akuli basinkondonyina kweelana a Habakuku 3:14, 15?

¹⁴ Lyankondo ya Harmagedoni, aabo ibayoosola kunyonyoona “munanike” wa Jehova bayoonyongana. Kweelana a Habakuku 3:14, 15, musinsimi waambila Jehova, ategwa: “Watuluzya masumo mitwe yabasilumamba bakwe. Bakeza mbuli kambizi kuzoondimwaya. Kulya batengwana kumbali nkokwakababotela. Mabbiza aako wakaalyatauzya lwizi.”

¹⁵ Habakuku naamba makani aakuti “basilumamba . . . bakeza mbuli kambizi kuzoondimwaya,” musinsimi uli mukwaambilila babelesi ba Jehova bananike. Mbubwena mbuli bantu bayubilila akubbida bantu mumigwagwa, izisi ziyoofwumpa bakombi ba Jehova cakufwambaana kuti zibanyonyoone. Aabo basinkondo ba Leza abantu bakwe ‘banookkomene’ kabasyomede kuti bayoozwidilila. Banakristo basyomeka bayooboneka mbuli kuti balikompeme mbubwena mbuli “bantengwana.” Pele inkamu zikazya Leza zyaakulwana bantu bakwe, Jehova uyoocitya kuti zikabelesye zilwanyo zyazyo kulwana mulicabo-cabo. Bayoobelesya zilwanyo zyabo naa “masumo,” ikulwana basikalumamba babo beni.

¹⁶ Pele kuli azimbi ziyoocitika. Jehova uyoobelesya inkamu zyamuuya zilaanguzu kwiinda bantu kuti zimaninizye kunyonyoona basinkondonyina. Kwiinda mukubelesya “mabbiza” aankamu zyakujulu zyeendelezyegwaa Jesu Kristo, uyoozunda mu “lwizi” “[amu]bbonze lyamaanzi manji,” nkokuti imakamu-makamu aabantu basinkondonyina. (Ciyubunuzyo 19:11-21) Mpoonya basizibi bayoogusigwa anyika. Elo cilagambya kaka citondezyo eco canguzu abululami bwabuleza!

Buzuba bwa Jehova Buyoosika Ncobeni!

17. (a) Nkaambo nzi ncotweelede kusyoma kuti majwi aa Habakuku ayoozuzikizigwa? (b) Ino mbuti mbotunga twaba mbuli Habakuku mbotulindila buzuba bwa Jehova bupati?

¹⁷ Tulakonzya kusyoma kuti majwi aa Habakuku  ayoozuzikizigwa onoono. Kwiina naayoomuka pe. Ino mulimvwa buti kujatikizya luzibo oolu lwazintu ziyoocitika kumbele? Mutalubi kuti Habakuku wakalemba kwiinda mukumunikilwaa muuya wa Leza. Jehova uuyocita obo, alimwi kuyooba mapenzi aatanabwenwe caakucitika eci. Anu musinsimi ncaakalembela makani aakuti: “Nindakamvwa, mala aangu akali kukankama. Milomo yangu yakabwibwima kujwi lyao. Bubole bwakandinjilila muzifuwa. Ndakakankama mpondakabede. Ndakalindila buzuba bwamapenzi, buti sikile bantu babasaala.” (Habakuku 3:16) Inzya, Habakuku wakeelede kuyoowa kapati. Pele sena lusyomo lwakwe alwalo lwakanyonganizigwa? Peepe! Wakalilisungwide kulindila buzuba bwa Jehova bupati. (2 Petro 3:11, 12) Sena oobo teensyi mbotulimvwa aswebo? Masimpe mbotulimvwa! Tulaalusyomo luyumu lwakuti businsimi bwa Habakuku buyoozuzikizigwa. Pele kusikila leelyo, tunoolindila cakukkazika moyo.

18. Nokuba kuti Habakuku wakali kwaalangila mapenzi, ino nciimo nzi ncaakajisi?

¹⁸ Inkondo lyoonse ileta mapenzi nokuba kuli baabo ibazunda. Zyakulya zilakonzya kubamanina. Balakonzya kusweekelwa mpasya zyabo. Bucete bulakonzya kutalika. Ino tuyoolimvwa buti kuti naa eci catucitikila? Habakuku wakajisi ciimo cibotu ciyandika kutobela, nkaambo wakati: “Nekuba kuti mukuyu topampanuki, amumisaansa tamukwe micelo, micelo yamaolifa tiibonwi, amyuunda tiijisi zilyo, imbelele zyamana mubbondo, amucimpati tamukwe iŋombe, nsileki kubotelwa muli-Jehova, noocikondwa muli-Leza walufutuko lwangu.” (Habakuku 3:17, 18) Habakuku wakali kwaalangila mapenzi kalibambilide, ambweni yakali nzala. Nekuba boobo, kwiina naakaleka kukondwa muli Jehova kwalo ikwakali kuzwa lufwutuko lwakwe.

19. Mmapenzi nzi ngobacitikilwa Banakristo banji, pele ncinzi ncotukonzya kusyomezyegwa ikuti twabikka Jehova kumbele mumaumi eesu?

¹⁹ Neciba ciindi cino, inkondo ya Jehova yakulwana basizibi noitanasika, ibanji bali mumapenzi mapati. Jesu wakasinsima kuti inkondo, inzala, mizuzumo yanyika alimwi amalwazi zyakali kuzooba akati kazintu ‘zyacitondezyo cakubako’ kwakwe munguzu zyabwami. (Matayo 24:3-14; Luka 21:10, 11) Ibunji bwabasyomima bakkala mumanyika imajwi aa Jesu mwaali mukuzuzikizigwa, elyo balimukupenga kapati. Banakristo bambi bayoonjila mumapenzi aali boobo abalo kumbele. Ibunji bwesu notusyeede kulangilwa kuti ‘imukuyu tuukoopampanuka’ pe mamanino kaatanasika. Pele tulizi zintu ezi ncozili mukucitikila, alimwi eco citupa nguzu zyakuzumanana. Kunze lyaboobo, tulaankotuyaama. Jesu wakasyomezya kuti: “Pele amusaangune kuyandaula Bwami bwa-Leza abululami bwakwe, elyo zintu ezi zyoonse mulaziyungizizigwa azyalo.” (Matayo 6:33) Eeci tacisyomezyi bukkale bubotu lyoonse, pele citusyomezya kuti, ikuti Jehova twamubikka kumbele, uyootukwabilila.—Intembauzyo 37:25.

20. Nokuli mapenzi aali mbwaabede, ncinzi ncotweelede kukanza kucita?

²⁰ Aboobo kwiina makani amapenzi aaliko ngotulwanaangawo ono, tatukoyootyompwa nokuba kuleka kusyoma munguzu zya Jehova zifwutula. Ibunji bwabakwesu abacizi mu Afulika, ku Eastern Europe alimwi amasena aambi balapenga cini-cini, pele balazumanana “kubotelwa muli-Jehova.” Aswebo mbubonya mbuli mbabo, atuzumanane kucita mbubwena. Lyoonse kamuyeeya kuti Mwami Mupati Jehova ‘nenguzu zyesu.’ (Habakuku 3:19) Takatulekelezyi pe. Harmagedoni ncobeni iyoosika ayalo inyika mpya yakasyomezyegwa ncobeni iyootobela. (2 Petro 3:13) Mpoonya “nyika iyoozula luzibo lwabulemu bwa-Jehova, mbubonya mbuli maanzi mbwaazuzya lwizi.” (Habakuku 2:14) Kusikila kuciindi eco citaliboteli, atutobele cikozyanyo cibotu ca Habakuku. Lyoonse katuzumanana ‘kubotelwa muli-Jehova akukondwa muli-Leza walufwutuko lwesu.’

Sena Mulayeeya?

• Mbuti mupailo wa Habakuku mboweelede kutujatikizya?

• Nkaambo nzi Jehova ncafwoola?

• Ncinzi businsimi bwa Habakuku ncobwaamba kujatikizya lufwutuko?

• Nciimo nzi ncotweelede kubaancico notulindila buzuba bwa Jehova bupati?

[Mibuzyo yaciiyo]