Lulayo Lwamutumbu Lwabusongo

“Swiilila, mwanaangu, lulayo lwauso, alimwi utataalazyi mulao wabanyoko.”—Tusimpi 1:8.

IBAZYALI besu, mbantu bakonzya kutukulwaizya, akutugwasya alimwi akutupa lulayo. Ibbuku lyamu Bbaibbele ilya Tusimpi litwaambila zyamakani aamwami umwi mwana-mwana Lemueli iwakatambula “cilengano ncebakamwiiyisya” banyina. Imajwi aaya alilembedwe ku Tusimpi caandaano 31, alimwi aswebo tulakonzya kugwasigwa alulayo olu lwamutumbu lwabusongo.—Tusimpi 31:1.

Lulayo Ilweelede Mwami

Banyina Lemueli batalika kwaamba twaambo itutukondelezya kapati ategwa: “Webo mwanaangu! Webo mwana ngundakazyala! Webo mwana wazikonke zyangu!” Ikwiinduluka kulomba nkobakacita ziindi zyotatwe kutondezya kuti bakalilibilikide kapati akuyandisisya kuti mwanaabo abikkile maanu kumajwi aabo. (Tusimpi 31:2) Ikubikkila maanu kuzintu zyakumuuya zyabana babo ncitondezyo cibotu ceelede kutobelwaa bazyali Banakristo sunu.

Kujatikizya bukkale bwamwana wakwe, ncinzi cinga calibilisya mutumbu kapati kunze lyankolwi abutaka mumakoko aadumide, ikuyanda bamakaintu alimwi anyimbo? Banyina Lemueli bakakagama buya kaambo nobakati: “Utaabili banakazi inguzu zyako.” Baamba kuti ibwaamu ‘mbobunyonyoona bami.’—Tusimpi 31:3.

Ikunywa bukoko cakwiindizya ncimwi cazintu zyeelede kulangwa-langwa. Banyina bakamucenjezya kuti: “Tacili cibotu kubami, O Lemueli, tacili cibotu kubami kunywa waini.” Ino mwami inga waakosola buti makani munzila mbotu alimwi iisalede, alimwi sena inga ‘waabeteka kabotu makani aabantu bapengede’ naa kakoledwe bukoko lyoonse?—Tusimpi 31:4-7.

Kulubazu lumbi, ikwiinda mukutajatikizigwa muzintu zibi zili boobo, imwami uyookonzya ‘kubeteka cakululama; uyoobeteka makani aabacete abapengede.’—Tusimpi 31:8, 9.

Nokuba kuti bakubusi Banakristo sunu tabalangilwi kuyooba “bami,” ilulayo lwabusongo lwabanyina Lemueli lulabeleka asunu mbubwena mbuli kaindi, akwiinda mboolwaali kubeleka elyo. Ikukolwa bukoko, ikufweba tombwe alimwi abwaamu zilidumide kapati akati kabakubusi mazubaano, aboobo cilayandika kapati kuti bakubusi Banakristo babikkile maanu kapati ibazyali babo ‘nobabalaya.’

Mwanakazi Mubotu Mbwabede

Bamatumbu balalibilika kujatikizya lukwatano lwabana babo balombe ibali mukusika aciimo cabupati. Banyina Lemueli ono baamba zyaciimo ceelede kubaa mwanakazi mubotu. Kakunyina kudooneka,  imulombwana inga wagwasigwa kapati kwiinda mukulanga-langa zintu nzyayandisya mwanakazi kumakani aaya mapati.

Mukapango ka 10, “mwanakazi mubotu” wakozyanisigwaa mabwe aa rubi, alo kuciindi ca Bbaibbele aakali kujanwa muntu aabeleka ncobeni. Mbubwenya buyo, ikujana mukaintu mubotu kuyandika kubeleka canguzu. Muciindi cakwiile kubindila kukwata, mulombwana inga wacita kabotu kujana ciindi cakuti asale kabotu. Mpoonya inga cauba-uba ikulemeka mukaintu oyo mubotu ngwayoojana.

Kujatikizya mukaintu mubotu, Lemueli waambilwa kuti: “Moyo wamulumaakwe ulamusyoma.” (Kapango 11) Munzila imwi, tayelede kunoolindila kuti lyoonse mukaintu wakwe kamulomba muzintu zyoonse nzyayanda kucita. Ee, banabukwetene beelede kuzibisyanya kabatanacita cintu cimwi cipati, mbuli zeezyo zijatikizya kuula zintu zyamali manji naa kulela bana babo. Ikwaambaula makani muzibeela ezi kukulwaizya kumvwana kubotu akati kabo.

Imukaintu mubotu ulijisi zintu zyakucita zinji. Mutupango 13 kusikila ku 27 kundandamikidwe lulayo anjiisyo eezyo bamakaintu bamuzyalani lili lyoonse nzyobanga babelesya izikonzya kugwasya mikwasyi yabo. Mucikozyanyo, akaambo kakudula kwazyakusama alimwi azimwi zyamuŋanda, imukaintu mubotu ulaiya kubelesya maanzaakwe cabusungu ikutegwa ibamukwasyi wakwe kabasama kabotu alimwi kabali balondo. (Tupango 13, 19, 21, 22) Ikutegwa kucesyegwe mali aabelesyegwa kuula zyakulya, ulalilimina zintu nzyakonzya alimwi uula zintu ziyandika ncobeni.—Tupango 14, 16.

Icamasimpe ncakuti, imukaintu oyu “talyi cilyo cabutolo.” Ulabeleka canguzu alimwi ulazyeendelezya munzila iili kabotu zintu zyamukwasyi wakwe. (Kapango 27) “Ulaanga cikungu cakwe anguzu,” icaamba kuti ulalibambila kubeleka milimo yamaanza miyumu. (Kapango 17) Ulafwuma kubuka kalitanapasula zuba kubeleka milimo yakwe yabuzuba, alimwi ulabeleka cabusungu mane do kusikila mangolezya. Cili mbuli kuti ilampi ilimunikila mulimo wakwe tiilyakali kuzima pe.—Tupango 15, 18.

Icipati kwiinda ncakuti, mukaintu mubotu mmuntu uubikkila maanu kapati kuzintu zyakumuuya. Mmukaintu uuyowa Leza alimwi uumukomba cabulemu kapati akuyoowa kumubisizya. (Kapango 30) Alimwi ulamugwasya mulumaakwe mukuyiisya bana babo kuti abalo bakomene munzila njimunya. Ikapango ka 26 kaamba kuti ulayiisya bana bakwe “cabusongo,” alimwi “mulao waluzyalo uli kululimi lwakwe.”

Mulumi Mubotu Mbwabede

Ikutegwa ayandwe amukaintu mubotu, Lemueli wakeelede kuzuzikizya mikuli yamulumi mubotu. Banyina Lemueli bakamuyeezya kujatikizya mikuli minjaanji njaakeelede kucita.

Imulumi mubotu wakeelede kubaa mpuwo mbotu kuzwa “[ku]bapati banyika.” (Tusimpi 31:23) Eci caamba kuti wakeelede kuba muntu uukonzya, uusyomeka alimwi uuyoowa Leza. (Kulonga 18:21; Deuteronomo 16:18-20) Akaambo kaceeci, wakali “zibidwe kumilyango,” kwalo ikwakali kujanika baalumi bapati kabeendelezya zintu zyamumunzi. Ikutegwa ‘azyibwe’ kuti mmuntu uuyoowa Leza, wakeelede kuba muntu uumvwa alimwi uubelekela antoomwe abapati “banyika,” nkokuti cilikiti naa cooko.

Kabasinizizye kwaamba akaambo kazintu zyakabacitikila, banyina Lemueli bayeezya mwaanaabo mbokuyandika kutondezya kulumba kumwanakazi wakali kulangilwa kuba mukaintu wakwe. Kunyina muntu uumbi ngwaakali kuyooyanda mbuli nguwe. Aboobo amuyeeyele mbwaakacitondezya eci mujwi lyakwe naakaamba kumeso aabantu boonse kuti: “Banakazi banji bacita kabotu, pele yebo wabainda boonse.”—Tusimpi 31:29.

Cakutadooneka Lemueli wakalutobela lulayo lwabanyina lwabusongo. Mucikozyanyo, mukapango 1 imajwi aabanyina waamba kuti mmajwi aakwe mwini. Aboobo ‘kuyiisya’ kwabanyina wakakutobela camoyo woonse alimwi wakagwasigwa kapati kululayo lwabo. Aswebo atugwasigwe ‘amulumbe oyu mupati’ kwiinda mukutobela njiisyo zyawo mubukkale bwesu.

[Zifwanikiso izili apeeji 31]

Mwanakazi mubotu talyi “cilyo cabutolo”