“Zintu Ziyandisi” Zili Mukuzuzya Ŋanda Ya Jehova
“Zintu Ziyandisi” Zili Mukuzuzya Ŋanda Ya Jehova
“[Mebo nde Jehova] njoozungaanya zisi zyoonse, kuti zintu ziyandisi zyazisi zyoonse ziboole, elyo njoozuzya iŋanda eyi bulemu.”—HAGAI 2:7.
1. Muziindi zyantenda, nkaambo nzi ncotusaanguna kuyeeya bayandwa besu?
NZINTU nzi ziyandisi izizwide muŋanda yanu? Sena mujisi zyuuno zibotu kapati, ikkompyuta mpya, imootokala mupya mugalaji yanu? Nokuba kuti mulijisi zintu ezi zyoonse, sena tamuzumini kuti izintu ziyandika kapati muŋanda yanu mbantu ibali muŋanda yanu—ibamukwasyi wenu? Amweezeezye kuti buzuba bumwi imasiku, ikununka kwabusi kwamubbatamuna. Iŋanda yanu ili mukupya, alimwi mujisi buyo ciindi cisyoonto cakutija! Ncinzi ncomuyoosaanguna kubikkila maanu? Sena nzyuuno zyanu? Ikkompyuta? Imootokala wanu? Sena tamukasaanguni kuyeeya bayandwa banu? Eco ncomuyoosaanguna kucita, nkaambo bantu mbayandisi kwiinda zintu buyo.
2. Ino nzyinzi zijatikizidwe muzilenge zya Jehova, alimwi ino ncibeela nzi cazilenge Jesu ncaakali kukondelwa?
2 Ono amuyeeye kujatikizya Jehova Leza alimwi a Mwanaakwe, Jesu Kristo. Jehova “[ng]owakaanza ijulu enyika alwizi, azyoonse izili mulindulo.” (Incito 4:24) Imwanaakwe iwakali “ambali lyakwe” ngomuntu Jehova ngwaakabelesya kulenga zintu zimbi zyoonse buyo. (Tusimpi 8:30, 31; Johane 1:3; Ba-Kolose 1:15-17) Masimpe Jehova a Jesu balaziyanda kapati zintu zyoonse izyakalengwa. (Amweezyanisye Matalikilo 1:31.) Pele ino nzilenge nzi nzyomuyeeya kuti nzezilaampindu kapati kulimbabo—nzintu buyo naa mbantu? Kaiminina busongo muciimo camuntu, Jesu waamba kuti: ‘Ndakali kuyandisya bana ba-Adamu,’ naa mbubwenya busanduluzi bwa William F. Beck mbobwaamba, ategwa Jesu wakali “kukondelwa bantunsi.”
3. Mbusinsimi nzi mbwaakaambilizya Jehova kwiinda muli Hagai?
3 Cakutadooneka Jehova ulabalemeka kapati bantu. Icintu cimwi citondezya ceeci cijanika mumajwi aabusinsimi ngaakaamba mumwaka wa 520 B.C.E. kwiinda mumusinsimi wakwe Hagai. Jehova wakati: “Njoozungaanya zisi zyoonse, kuti zintu ziyandisi zyazisi zyoonse ziboole, elyo njoozuzya iŋanda eyi bulemu. . . . Bulemu busyaalizi bwaŋanda eyi buyooba bupati kwiinda bwakutaanguna.”—Hagai 2:7, 9.
4, 5. Nkaambo nzi ncocinga tacikooba camaanu ikuyeeya kuti ikaambo kakuti “zintu ziyandisi” kaamba bubotu bwazintu zyakumubili? (b) Ino “zintu ziyandisi” inga mwazipandulula buti, alimwi ino nkaambo nzi?
4 Ino ‘nzintu nzi ziyandisi’ izyakali kuyoozuzya ŋanda ya Jehova akwiilemya kapati? Sena nimpasya zyamuŋanda abubotu bwayo? Sena ningolida, insiliva amabwe aambi mayandisi? Tacili camaanu ikuyeeyela zeezi. Amuyeeye kuti itempele lyakaindi ilyakaabwa myaanda yamyaka iili yosanwe musyule, bwakali buyake ibudula kapati ibwakali kunga bwaulwaa zyuulu-zyuulu zyatuulunzuma twamadola! * Ncobeni, Jehova tanaakali kulangila kuti itempele lyakayakwa aba Juda ibasyoonto ibakapilukide kubanaminzyaabo liinde leelyo ilyakayakwaa Solomoni kumakani aabubotu!
5 Aboobo ino “zintu ziyandisi” izyakali kuyoozuzya ŋanda ya Jehova zyakali zintu nzi? Cakutadooneka, mbantu. Kayi icimukkomanisya Jehova taili nsiliva angolida pe, pele mbantu ibamubelekela camoyo woonse. (Tusimpi 27:11; 1 Ba-Korinto 10:26) Inzya, Jehova ulabayanda baalumi abanakazi alimwi abana boonse ibamukomba munzila njayanda. (Johane 4:23, 24) Eezi “[nze]zintu ziyandisi,” alimwi nziyandisi kapati kuli Jehova kwiinda zintu zyoonse zyakali kubotya tempele lya Solomoni.
6. Ino tempele lya Jehova lyansiku lyakabeleka mulimo nzi?
6 Nokuba kuti kukazigwa kwakazumanana, itempele elyo lyakamana mu 515 B.C.E. Itempele lyaku Jerusalemu lyakazumanana kuba busena bwabukombi busalala “[ku]zintu ziyandisi” zinji izyakali kujatikizya bantu baluzubo lwaba Juda alimwi a Bamasi basikusanduka mane do kuzoosika kuciindi cacituuzyo ca Jesu. Pele itempele lyakali kwiiminina cintu cimwi cipati loko mbubwena mbotutibone.
Ikuzuzikizigwa Kwamumwaanda Wamyaka Wakusaanguna
7. (a) Ino tempele lya Leza lyansiku mu Jerusalemu lyakali kwiiminina nzi? (b) Amupandulule milimo njaakali kucita mupaizi mupati mu Buzuba Bwakumanya Milandu.
7 Itempele lyaku Jerusalemu lyakali kwiiminina bubambe bupati bwabukombi. Lyakali kwiiminina tempele lya Leza lyakumuuya lyalo Jehova ndyaakatalisya mu 29 C.E. Jesu Kristo kali ngo Mupaizi Mupati. (Ba-Hebrayo 5:4-10; 9:11, 12) Atulange-lange mboyeelene milimo yamupaizi mupati mu Israyeli amilimo ya Jesu. Mwaka amwaka mu Buzuba Bwakumanya Milandu, imupaizi mupati wakali kuunka kucipaililo mubbuwa lyatempele akutuula mupoho wakumanya zibi zyabapaizi. Mpoonya wakali kunjila mutempele abulowa bwamupoho, wiinda muzitendele izyakali kwaandaanya bbuwa lyatempele a Busena Busalala alimwi akwiinda aacisitilizyo icakali kwaandaanya Busena Busalala a Busena Busalalisya. Anjila buyo mu Busena Busalalisya, imupaizi mupati wakali kusansaila bulowa kumbele aabbokesi lyacizuminano. Mpoonya kabelesya nzila njoonya eyo, wakali kutuula mpongo yakumanya milandu yamisyobo ya Israyeli iitali yabapaizi iili 12. (Levitiko 16:5-15) Ino milimo eyo iswaangene buti atempele lya Leza lyakumuuya?
8. (a) Muunzila nzi Jesu mwaakatuulwa kuzwa mu 29 C.E.? (b) Ncilongwe nzi cilibedelede ncaakalaaco Jesu muciindi coonse camulimo wakwe anyika?
8 Aboobo Jesu wakatuulwa aacipaililo kwiinda mukuyanda kwa Leza eelyo naakabbapatizigwa akunanikwa amuuya Uusalala wa Leza mu 29 C.E. (Luka 3:21, 22) Ee, eci ncecakatalisya bukkale bwa Jesu bwakulyaaba ibwakatola myaka yotatwe acisela. (Ba-Hebrayo 10:5-10) Kuciindi eco, Jesu wakali aacilongwe a Leza cakuzyalwa amuuya. Iciimo eci cilibedelede Jesu ncaakajisi a Wisi wakujulu kunyina nocakateelelwa kabotu abantu bambi. Cakali mbuli kuti kwakali cintu cimwi cakasinkilide meso aabo aakumvwisya, mbubwena mbuli bwakali cisitilizyo icakali kusinkilizya Busena Busalala kuti butabonwi abaabo ibakali mubbuwa lyacikombelo.—Kulonga 40:28.
9. Nkaambo nzi Jesu ncaatakali kukonzya kunjila kujulu muciimo cabuntunsi, alimwi ino penzi eli lyakamanisigwa buti?
9 Nokuba kuti wakali Mwanaa Leza iwakananikidwe amuuya, imwaalumi Jesu taakali kukonzya kupona buumi bwakujulu. Nkaambo nzi? Nkaambo kakuti bantunsi tabakonzyi kuvwuba Bwami bwa Leza bwakujulu. (1 Ba-Korinto 15:44, 50) Mbwaanga imubili wa Jesu wabuntunsi wakali cisinkilizyo, wakaimininwa kabotu-kabotu acisitilizyo icakali kwaandaanya Busena Busalala a Busena Busalalisya mutempele lya Leza lyansiku. (Ba-Hebrayo 10:20) Pele mazuba otatwe naakainda kuzwa ciindi naakafwa, Jesu wakabusigwaa Leza kali muuya. (1 Petro 3:18) Aboobo lino wakali kukonzya kunjila mucibeela ca Busena Busalalisya catempele lya Leza lyakumuuya, nkokuti kujulu kwini. Aboobo eci ncecakacitika ncobeni. Paulo wakalemba kuti: “Nkaambo Kristo teewakanjila mu-Busena Busalala [awa kulangilwa kuti wakali kwaamba Busena Busalalisya] ubwakayakwa amaanza aabantu (ncifwanisyo buyo cabusena bwinibwini), pe, wakanjila kujulu kwini buya, kuti akapompe kubusyu bwa-Leza nkaambo kandiswe.”—Ba-Hebrayo 9:24.
10. Ncinzi ncaakacita Jesu naakapiluka kujulu?
10 Jesu ‘wakasansaila bulowa’ bwacituuzyo cakwe kujulu kwiinda mukupa impindu yacinunuzyo cabulowa bwabuumi bwake kuli Jehova. Pele kuli zintu zimbi Jesu nzyaakacita. Kakusyeede ciindi cisyoonto buyo kuti afwe, wakaambila basikumutobela kuti: “Ndiya kukumubambila busena. Kuti na ndainka kuyoomubambila busena ndiyooboola alimwi, nzoomutolelele, kuti oko nkwembede anywebo mukabe nkuko.” (Johane 14:2, 3) Aboobo kwiinda mukunjila mu Busena Busalalisya naa kujulu, Jesu wakajula nzila yakuti ibambi abalo batobele. (Ba-Hebrayo 6:19, 20) Ibantu aba ibakali kuyooba 144,000 bakali kuyoobeleka kabali bapaizi basyoonto mububambe bwatempele lya Leza lyakumuuya. (Ciyubunuzyo 7:4; 14:1; 20:6) Mbubwenya mupaizi mupati waku Israyeli mbwaakali kusaanguna kubweza bulowa bwamupoho akubunjizya mu Busena Busalalisya kuyoomanya zibi zyabapaizi, ayalo mpindu yabulowa bwa Jesu ibwakatilwa yakasaanguna kubeleka kubapaizi basyoonto ibali 144,000. *
“Zintu Ziyandisi” Zyamazubaano
11. Mbaani mbaakali kutuulila mpongo mupaizi mupati mu Israyeli, alimwi ino eci cakali kwiiminina nzi?
11 Kulibonya kuti kuzikusika mumwaka wa 1935, ikuyobololwa kwabananike kwakamana. * Pele Jehova tanaakamanizide pe ikulemya ŋanda yakwe. Ee, kwakali “zintu ziyandisi” izyakeelede kuletwa mulinjiyo. Amuyeeye kuti mupaizi mupati mu Israyeli wakali kutuula banyama bobile—imupoho wakumanya zibi zyabapaizi alimwi ampongo yakumanya zibi zyamisyobo yatakali yabapaizi. Mbwaanga bapaizi bakali kwiiminina bananike ibayoobaa Jesu mu Bwami bwakujulu, ino misyobo yatakali yabapaizi yakali kwiiminina bani? Ibwiinguzi bulajanwa mumajwi aa Jesu aalembedwe kuli Johane 10:16 aakuti: “Ndijisi mbelele zimwi izitali zyacaanda cino. Azyalo ndyeelede kuzileta, ziyoolimvwa ijwi lyangu, ziyooba itanga lyomwe asikweembela omwe.” Aboobo, ibulowa bwa Jesu ibwakatilwa bugwasya nkamu zyabantu zyobile—kusaanguna bugwasya Banakristo ibajisi bulangizi bwakuyoolela antoomwe a Jesu kujulu, elyo yabili mbaabo ibalangila buumi butamani aanyika yaparadaiso. Aboobo cakutadooneka, eeyi nkamu yabili njeyiimininwaa “zintu ziyandisi” zyamubusinsimi bwa Hagai.—Mika 4:1, 2; 1 Johane 2:1, 2.
12. Mbuti “zintu ziyandisi” zinji mbozili mukukwelelwa kuŋanda ya Leza sunu?
12 Eezi “zintu ziyandisi” zicizuzya ŋanda ya Jehova. Mumyaka yalino-lino, imulimo wa Bakamboni wazumizigwa ku Eastern Europe amuzyooko zimwi zyamu Afulika alimwi amuzisi zimbi, calo capa kuti makani mabotu aa Bwami bwa Leza ibukkazikidwe amwaigwe kusika muzilawo zitanabelekedwe sunu. Ibantu bayandisi mbobaboolela mububambe bwa Leza bwatempele, balasolekesya ikugwasya bambi kuba basikwiiya mukutobela mulawo wa Jesu. (Matayo 28:19, 20) Bacita boobo, balajana bantu banji ibana abapati balo balangilwa kuti inga baba “zintu ziyandisi” iziyoolemya ŋanda ya Jehova. Atulange-lange zikozyanyo zisyoonto zimwi izitondezya mbocili mukucitika eci.
13. Mbuti musimbi umwi kucisi ca Bolivia mbwaakatondezya busungu bwakwe bwakumwaya mulumbe wa Bwami?
13 Kucisi ca Bolivia, imwana musimbi wamyaka yakuzyalwa yosanwe iwakakomezyegwaa bazyali bakwe Bakamboni wakalomba mwiiyi wakwe kuti amuzumizye kutajanika kucikolo mumvwiki naakali kuswaya mulangizi wabbazu. Nkaambo nzi? Wakali kuyanda kuyootola lubazu mumvwiki yoonse eyi yaalubazu. Eci cakabagambya bazyali bakwe, pele bakakkomana kuti wakajisi ciimo cibotu cili boobo. Imusimbi oyu ono ucitya ziiyo zya Bbaibbele zyaaŋanda zyosanwe, alimwi bamwi babasikwiiya aba balajanika kumiswaangano ya Bunakristo. Mane musimbi oyu wakabatola kale abayi bakwe ku Ŋanda ya Bwami. Ambweni kumbele, ibamwi akati kabaabo mbokayiisya Bbaibbele bayoolitondezya kuti “[n]zintu ziyandisi” iziyoolemya ŋanda ya Jehova.
14. Ino ikusungwaala kwamucizi umwi ku Korea kwakalumbulwa buti naakakanana amuntu iwakali kulibonya kuti unyina luyandisisyo?
14 Nobakacili kulindila citima kucitisyini, imukaintu umwi Munakristo ku Korea wakaunka kuli sicikolo umwi iwakali kuswiilila nyimbo kabelesya ma headphone. Wakamubuzya kuti, “Sena ulaacikombelo nkounka?” Sicikolo wakaingula kuti, “Kunyina cikombelo ncondikkomanina.” Imucizi tanaakatyompwa pe. Wakazumanana kwaamba kuti, “Mukwiinda kwaciindi, imuntu ulakonzya kuyanda kusala cikombelo. Pele ikuti kanyina luzibo kujatikizya bukombi, ulakonzya kusala cikombelo citaluzi.” Mpoonya sicikolo wakakkalikila elyo wakatalika kuswiilila ncakali kwaamba mucizi wesu caluyandisisyo. Wakamusiila ibbuku lyakuti, Is There a Creator Who Cares About You? akumwaambila kuti ibbuku eli lilakonzya kumugwasya kapati iciindi eco caakusika nayakuyanda kusala cikombelo. Kakunyina kuwayawaya wakalitambula bbuku. Imvwiki yakatobela, wakatalika kwiiya Bbaibbele a Bakamboni ba Jehova elyo lino ulajanika kumiswaangano yambungano yoonse.
15. Ino musimbi umwi mwana-mwana ku Japan utalisya buti ziiyo zya Bbaibbele, alimwi ino kwalongezyegwa buti kusoleka kwakwe?
15 Kucisi ca Japan, Megumi wamyaka yakuzyalwa iili 12 ubona cikolo cakwe kuti mmuunda mubotu wakukambaukila akuyiisya. Imusimbi oyu mane wakonzya kutalisya ziiyo zya Bbaibbele izinji. Ino Megumi ucikonzya buti? Mbwaanga inga ubala Bbaibbele lyakwe naa kulibambila miswaangano aciindi cakulyookezya masikati, mbociiya limwi mukkilasi kanjikanji balamubuzya kujatikizya ncacita. Bamwi babuzya Megumi kujatikizya ncatatoli lubazu mumilimo imwi iicitwa kucikolo. Megumi ulayiingula mibuzyo yabo akubagwasya kuzyiba kuti Leza ulijisi zina. Eci kanjikanji cibusya luyandisisyo kuli baabo ibamuteelela. Mpoonya ulabaambila kujatikizya ciiyo ca Bbaibbele. Megumi ucitya ziiyo zili 20 ono—izili 18 zijatikizya mbociiya limwi mukkilasi.
16. Mbuti mukwesu umwi wakucisi ca Cameroon mbwaakonzya kutalisya ziiyo zya Bbaibbele kubantu ibakali akati kankamu yabasikusampaula?
16 Kucisi ca Cameroon ikabunga kabaalumi bali lusele ibakali kubeleka abusena mpobayaka bakaita mukwesu umwi iwakali kwaabila mabbuku aapandulula Bbaibbele kuli basimweenda nzila. Kabayanda kuti bamusampaule mukwesu, bakamubuzya kaambo ncaatakali kusyomena muli Leza wa Butatu amumulilo wahelo naa mukutafwika kwabuumi. Imukwesu wakapa bwiinguzi kumibuzyo yabo kwiinda mukubelesya Bbaibbele. Cakatobela ncakuti ibaalumi botatwe akati kabo bakazumina ziiyo zya Bbaibbele. Umwi wabo wazina lya Daniel, wakatalika kujanika kumiswaangano alimwi mane wakazinyonyoona zimpangaliko nzyaakajisi zijatikizya mizimo. (Ciyubunuzyo 21:8) Wakabbapatizigwa kautanainda amwaka.
17. Mbuti bakwesu bamwi ku El Salvador mbobakabelesya bupampu kutegwa bakambaukile mwaalumi umwi iwatakali kuyanda kuswiilila mulumbe wa Bwami kumatalikilo?
17 Kucisi ca El Salvador, umwi mwaalumi wakali kwaanga mubwa wakwe mukali kumulyango uunjililwa kufwumbwa ababona buyo Bakamboni ba Jehova munsi-munsi abusena obo. Imwaalumi oyu waali kulindila kutegwa Bakamboni baindilile mpoonya mbobaindila buyo wakali kumwaangununa mubwa wakwe akumunjizya muŋanda. Kwiina nobakakonzya kwaambaula amwaalumi oyu bakwesu. Aboobo buzuba bumwi bakasoleka kubelesya nzila imbi. Kabazi kuti imwaalumi oyu wakali kukonzya kubamvwa, bakayeeya kuti ncibotu bakambaukile buyo mubwa. Bakaunka kuŋanda akumwaanzya mubwa alimwi akumwaambila kuti bakalikkomene kapati kubaa coolwe cakwaambaula anguwe. Bakaamba zyaciindi nokuya kuba paradaiso anyika nokutakabi muntu naba omwe uunyema—inzya nibaba banyama nobayooba basiluumuno. Nobaamana bakamulaya mubwa cabulemu akutalika kweenda. Cakutayeeyela, ulaaŋanda wakazwaanze akulomba kuti bamulekelele akaambo kakutapa Bakamboni ciindi cakuti baambaule anguwe. Wakabweza mamagazini elyo ciiyo ca Bbaibbele cakatalikwa. Imwaalumi oyu lino mmukwesu—ngumwi wa “zintu ziyandisi”!
“Mutayoowi Pe”
18. Mmapenzi nzi ngobabaangawo Banakristo banji, pele ino Jehova ubabona buti bakombi bakwe?
18 Sena mulatola lubazu mumulimo mupati wakukambauka Bwami akugwasya bantu kuba basikwiiya? Ikuti naa mboobo, mulaacoolwe kapati. Masimpe, nkwiinda mumulimo oyu nguwenya Jehova mwali mukukwelela “zintu ziyandisi” ikunjizya muŋanda yakwe. (Johane 6:44) Masimpe, kunooli ziindi zimwi nomunoolengeene naa kutyompokelwa. Zimwi ziindi bamwi nobaba baabo ibali akati kababelesi ba Jehova basyomeka, balapengana amizeezo yakuti banyina mpindu. Pele mutalengaani pe! Jehova ubabona kuti mbayandisi boonse abo bamukomba alimwi ulayandisisya kuti mukafwutuke.—2 Petro 3:9.
19. Nkukulwaizya nzi nkwaakapa Jehova kwiinda muli Hagai, alimwi ino majwi aaya inga atuyumya buti?
19 Notutyompokelwa akaambo kakukazyigwa naa bukkale bumwi bubyaabi, imajwi aa Jehova ngaakaambila ba Juda ibakapilukide kubanaminzyaabo alakonzya kutuyumya. Kuli Hagai 2:4-6, tubala kuti: “Nekubaboobo koyumya moyo wako, O Zerubabeli, mbwaamba Jehova. Koyumya moyo wako, O Joshua mwana wa-Jehozadaki mupaizi mupati. Anywebo amuyumye myoyo yanu, nubantu boonse bacisi, mbwaamba Jehova. Amubeleke, nkaambo ndi anywebo, mbwaamba Jehova wamakamu, mbubonya mbuli zisyomezyo zyangu nzindakamusyomezya kuciindi eco ncimwakazwa mu-Egepita. Muuya wangu ulikede akati kanu. Mutayoowi pe. Nkaambo mbuboobu mbwaamba Jehova wamakamu. Kusyeede kaindi kaniini buyo, elyo njoozungaanya ijulu anyika alwizi ansi injumu.” Amubone kuti Jehova tatukulwaizyi buyo kuti tuyumye myoyo pele watupa anzila mbotunga twayumizigwa. Munzila nzi? Amubone majwi aakkazika moyo aakuti: “Ndi anywebo.” Cilayumya lusyomo kaka ikuzyiba kuti nozikomena buti zisinkilizyo nzyotuyaanaazyo, Jehova uli andiswe!—Ba-Roma 8:31.
20. Muunzila nzi bulemu mobuli mukuzuzya ŋanda ya Jehova lino?
20 Jehova watondezya ncobeni kuti uli abantu bakwe. Inzya, cili buyo mbuli mbwaakaamba kwiinda mumusinsimi Hagai kuti: “Bulemu busyaalizi bwaŋanda eyi buyooba bupati kwiinda bwakutaanguna . . . alimwi kubusena obuno njoopa luumuno.” (Hagai 2:9) Masimpe, ibulemu bupati sunu bujanwa mutempele lya Jehova lyakumuuya. Ee, myaanda-myaanda yazyuulu yabantu bali mukuyobolokela kubukombi bwakasimpe mwaka amwaka. Aaba bali mukulisigwa kabotu munzila yakumuuya, alimwi nomuba munyika ino yamapenzi bajisi luumuno lwalo iluyooindwa buyo aloolo luyooba munyika ya Leza impya.—Isaya 9:6, 7; Luka 12:42.
21. Ino mmakanze nzi ngotweelede kubaangawo?
21 Ikuzungaanya kwamasi nkwayoocita Jehova lya Harmagedoni kuli afwaafwi kapati. (Ciyubunuzyo 16:14, 16) Aboobo atubelesye ciindi eci cicisyeede ikugwasya kufwutula bantu bambi. Atuyume akusyoma Jehova cakumaninina. Aabe makanzeesu aakuzumanana kukomba mutempele lyakwe lipati ilyakumuuya, tulizuzye a “zintu ziyandisi” zimbi kusikila leelyo Jehova nayootwaambila kuti mulimo wesu wamana.
Bupanduluzi buyungizidwe
^ munc. 4 Izintu zyakasangwa ikutegwa tempele lya Solomoni liyakwe zijisi mweelwe weelene aamadola aatandila ku 40,000,000,000 aaku Amelika mukubala mali kwasunu. Kufwumbwa catakabelesyegwa mukuyaka oku cakabikkwa muciyobwedo camutempele.—1 Bami 7:51.
^ munc. 10 Mukwiimpana amupaizi mupati waku Israyeli, Jesu wakanyina zibi izyakali kuyandika kuti zimanizigwe. Nokuba boobo, ibapaizinyina bakalijisi zibi akaambo kakuti bakafwutulwa kuzwa akati kabantu basizibi.—Ciyubunuzyo 5:9, 10.
^ munc. 11 Amubone Ngazi Yamulindizi yamu March 1, 1998, mapeeji 10-15.
Sena Mulayeeya?
• Ncinzi Jehova ncayanda kapati kwiinda zintu zyakumubili?
• Ninkamu nzi zyobile izigwasigwaa bulowa bwa Jesu ibwakatilwa?
• Ino “zintu ziyandisi” izyakali kuyoozuzya ŋanda ya Jehova abulemu mbaani?
• Mbumboni nzi mbotujisi ibutondezya kuti ibusinsimi bwa Hagai buli mukuzuzikizigwa sunu?
[Mibuzyo yaciiyo]
Citondezyo cili apeeji 10]
(Kutegwa mubone bwini mbwaakkede mabala, amubone bbuku lini)
Sena mulicizi ncolyakali kwiiminina tempele lya Jehova lyansiku?
Busena Busalalisya
Cisitilizyo
Busena Busalala
Kwakunjilila
Cipaililo
Bbuwa
[Cifwanikiso icili apeeji 9]
Imupaizi mupati wakali kutuula mupoho ikumanya zibi zya Bapaizi alimwi ampongo ikumanya zibi zyamisyobo yaba Israyeli yatakali yabapaizi
[Cifwanikiso icili apeeji 12]
Imulimo wakukambauka Bwami wanyika yoonse uli mukukwela makamu-makamu aabantu kuŋanda ya Jehova