“Amuyandaule Jehova Anguzu Zyakwe”

“Nkaambo Jehova, meso aakwe alalanga-langa moonse munyika, kuti aliyumye kukugwasya abo balulama mumoyo kumeso aakwe.”—2 MAKANI 16:9.

1. Ino nguzu ncinzi, alimwi ino bantu bazibelesya buti?

NGUZU ndibbala lyaamba zintu zinjaanji mbuli bweendelezi, bulelo naa kuyunga bamwi; ikukonzya kucita cintu cimwi; bukozu; naa busongo nobuba bukkale bupa kuti kucitike zintu zimwi. Ibantunsi banyina mpuwo mbotu caboola kubweendelezi. Naakali kwaamba bweendelezi bwabasitwaambo twacisi, Lord Acton, sikuluula makani aansiku wakati: “Inguzu zyabweendelezi zilanyonganya alimwi ikubaa nguzu zyabweendelezi cakumaninina kunyonganizizya limwi.” Imakani aasunu ajisi zikozyanyo zinji izitondezya kululama kwamajwi aa Lord Acton. Mumwaanda wamyaka wa 20, ‘imuntu weendelezya muntunyina cakumubisizya’ munzila mbyaabi kwiinda lyoonse. (Mukambausi 8:9) Ibeendelezi basinkazi baindila buya kuzibelesya bubi inguzu zyabo alimwi balobya maumi aabantu babalilwa kutuulunzuma tuli mbotubede. Inguzu ziteendelezegwi aluyando abusongo alimwi abululami ziletela ntenda mbyaabi kapati.

2. Amupandulule ibube bwa Leza bumbi mbobujatikizidwe kujatikizya mbwabelesya nguzu zyakwe Jehova.

² Mukwiimpana abantunsi banji, Leza lyoonse ubelesya nguzu zyakwe munzila iigwasya. “Nkaambo Jehova, meso aakwe alalanga-langa moonse munyika, kuti aliyumye kukugwasya abo balulama mumoyo kumeso aakwe.” (2 Makani 16:9) Jehova ulazyeendelezya nguzu zyakwe munzila iili kabotu. Ikukkazika moyo nkokumulesya Leza kuti atanyonyooni basizibi nkaambo uyanda kuti abape ciindi cakweempwa. Nduyando ilumupa kuti apasuzye zuba kubantu boonse, baluleme abataluleme. Kumamanino ibululami buyoomukulwaizya kubelesya nguzu zyakwe ziteeli ikunyonyoona yooyo wakaleta lufwu, Saatani Diabolosi.—Matayo 5:44, 45; Ba-Hebrayo 2:14; 2 Petro 3:9.

3. Nkaambo nzi inguzu zya Leza ziteeli ncokali kaambo ncotweelede kumusyoma?

³ Inguzu zya Taateesu wakujulu izigambya nkekaambo kapati ncotweelede kusyoma muzisyomezyo alukwabililo lwakwe. Imwana muniini inga uliliibide mubantu mbatazyi najisi janza lyawisi nkaambo inga ulizyi kuti usyi takonzyi kulekela cintu cimwi kuti cimucise. Mbubwenya buyo, Taateesu wakujulu ooyo “uuli anguzu zyakufutula,” uyootukwabilila kumacise aali woonse aatamani kufwumbwa kuti twazumanana kweendaanguwe. (Isaya 63:1; Mika 6:8) Alimwi mbwaanga ngu Taata mubotu, Jehova lyoonse ulazizuzikizya zisyomezyo zyakwe. Inguzu zyakwe ziteeli zisinizya kuti ‘ijwi lyakwe liyoozuzikizya makanze aakwe akucita kabotu makani ngaakalitumina.’—Isaya 55:11; Tito 1:2.

4, 5. Ncinzi cakacitika eelyo Mwami Asa naakasyoma muli Jehova cakumaninina? (b) Ncinzi cinga cacitika ikuti twasyoma bantunsi ikuti mbabakonzya kumanizya mapenzi esu?

⁴ Nkaambo nzi ncociyandika kapati kuti tubikkile maanu kulukwabililo lwa Taateesu wakujulu? Nkaambo kakuti tulakonzya kunyonganizigwaa bukkale, aboobo eci inga catupa kuti tulube kwini nkotukonzya kujana lukwabililo. Eci cilalibonya mucikozyanyo ca Mwami Asa, imwaalumi kumatalikilo iwakasyoma muli Jehova. Mubweendelezi bwa Asa, impi yabasikalumamba ibali kaulunzuma komwe yaba Kusi yakasaala Juda. Naakabona kuti basinkondonyina bakali banji kapati cakuti bakali kunoobazunda, Asa wakapaila ulaamba: “O Jehova, taakwe uumbi uuli mbuli nduwe  uukonzya kuvuna bakompeme kumaanza aabasinguzu. Kotugwasya, O Jehova Leza wesu, nkaambo tulasyoma nduwe, alimwi muzina lyako tweza kuzoolwisya bantu aba banji loko. O Jehova, nduwe Leza wesu. Bantu baansi ano batakusampauli.” (2 Makani 14:11) Jehova wakaingula kulomba kwa Asa elyo wakamupa kuzunda.

⁵ Pele nokwakainda myaka minji kabeleka cakusyomeka, lusyomo lwa Asa munguzu zya Jehova zyakufwutula lwakanyongana. Ikutegwa alikwabilile kumpi zyabulelo bwakunyika bwa Israyeli, wakalomba lugwasyo kuzwa kuba Aramu. (2 Makani 16:1-3) Nokuba kuti ikuula makulo kwakwe ku Mwami wa Aramu Benihadadi kwakazwidilila mukukwabilila bana Juda kubulwani bwaba Israyeli, icizuminano ca Asa aba Aramu cakatondezya kubula lusyomo muli Jehova. Musinsimi Hanani cakaanzambwene wakamubuzya kuti: “Sa ba-Kusi aba-Lubi teebakali impi impati? Sa teebakajisi inkalaki zinji abasimbizi banji loko? Pele mbuwakasyoma Jehova, wakabaaba mumaanza aako.” (2 Makani 16:7, 8) Pele Asa wakalukaka lulayo olu. (2 Makani 16:9-12) Notuli mumapenzi, tutasyomi mulugwasyo lwabantunsi pe. Muciindi caboobo, atutondezye lusyomo lwesu muli Leza, nkaambo ikusyoma nguzu zyabantunsi masimpe kuyootuusya nsoni.—Intembauzyo 146:3-5.

Amuyandaule Nguzu Nzyapa Jehova

6. Nkaambo nzi ncotweelede ‘kuyandaula Jehova anguzu zyakwe’?

⁶ Jehova ulakonzya kubapa nguzu alimwi akubakwabilila balanda bakwe. Ibbaibbele lilatukulwaizya ategwa “amuyandaule Jehova anguzu zyakwe!” (Intembauzyo 105:4) Nkaambo nzi? Nkaambo notucita zintu munguzu zya Leza, inguzu zyesu ziyoobelesyegwa munzila iigwasya bamwi muciindi cakubacisa. Icikozyanyo ciinda kubota ncotujisi nceeco ca Jesu Kristo, iwakacita maleele manji-manji “[mu]nguzu zya-Jehova.” (Luka 5:17) Naakayanda Jesu naakalitakata kutegwa avwube, abe ampuwo nokuba kuba mwami wiinda boonse kunguzu. (Luka 4:5-7) Pele wakabelesya nguzu ezyo Leza nzyaakamupa kutegwa ayiisye akugwasya alimwi akuponya bantu. (Marko 7:37; Johane 7:46) Aboobo ncikozyanyo cibotu kapati kaka kulindiswe!

7. Mbube nzi buyandika kapati mbotukomezya notucita zintu munguzu zya Leza muciindi cakuzicita munguzu zyesu tobeni?

⁷ Kunze lyaboobo, eelyo notucita zintu ‘kunguzu nzyatupa Leza,’ ciyootugwasya kuba bantu balicesya. (1 Petro 4:11) Ibantu ibaintilide kubaa bweendelezi tabayandi kutobela mulawo uuli woonse. Icikozyanyo camuntu wakalisumpula nceeco ca Mmwami waba Aramu Esarihadoni iwakati: “Ndime singuzu, ndime singuzu ziteeli, ndimulombwana uucita milimo miyumu, kunyina weelene andime kunguzu.” Pele walo Jehova “ulisalide zintu zifubafuba zyanyika kuti ausye insoni basongo.” Aboobo ikuti Munakristo wakasimpe walisumpula, ulisumpwida muli Jehova nkaambo ulizyi kuti nzyaacita tiizyacitwa munguzu zyakwe mwini. ‘Ikulibombya kujanza lya-Leza lyanguzu’ kuyootuletela kusumpulwa kwini-kwini.—1 Ba-Korinto 1:26-31; 1 Petro 5:6.

8. Ncinzi ncotweelede kusaanguna kucita ikutegwa tutambule nguzu zya Jehova?

⁸ Ino nguzu zya Leza tuzijana buti? Cakusaanguna tweelede kuzilomba mumupailo. Jesu wakasyomezya basikwiiya bakwe kuti Wisi wakali kuyoopa muuya uusalala kuli baabo ibaulomba. (Luka 11:10-13) Amubone mbocakabapa nguzu eci basikwiiya ba Kristo nobakasala kumvwida Leza  kwiinda basololi bazikombelo ibakabalailide kuleka kukambauka makani aa Jesu. Nobakalomba lugwasyo lwa Jehova, imupailo wabo wamoyo woonse wakaingulwa alimwi muuya uusalala wakabapa inguzu zyakuzumanana kukambauka makani mabotu cabusicamba.—Incito 4:19, 20, 29-31, 33.

9. Amwaambe busena bwabili nkotukonzya kujana nguzu zyakumuuya, alimwi amupe cikozyanyo camu Magwalo citondezya mbocibeleka eci.

⁹ Icabili, tulajana inguzu zyakumuuya kuzwa mu Bbaibbele. (Ba-Hebrayo 4:12) Inguzu zyajwi lya Leza zyakalibonya kuciindi cabweendelezi bwa Mwami Josiya. Nokuba kuti oyu mwami waku Juda wakalizigusizye kale zimpangaliko zyamituni mucisi eco, ikujanika kwa Mulawo wa Jehova ikwatakali kulangilwa mutempele kwakamukulwaizya kuyaambele mumulimo oyu wakusalazya. * Josiya lwakwe naakamana kuubala Mulawo kubantu, ibantu bamucisi coonse bakatangana cizuminano a Jehova, elyo ilwabili kwakatalisigwa mulimo wakugusya bukombi bwamituni icabusungu kapati. Icakacitika kumamanino kujatikizya mulimo wa Josiya wakucinculula ncakuti “mazuba oonse ngaakapona teebakaleka kutobela Jehova.”—2 Makani 34:33.

10. Ninzila nzi yatatu njotunga twajana nguzu kuzwa kuli Jehova, alimwi nkaambo nzi ncoiyandika kapati?

¹⁰ Catatu, tulajana inguzu kuzwa kuli Jehova kwiinda mukuyanzanaa Banakriso. Paulo wakakulwaizya Banakristo kuti kabajanika kumiswaangano lyoonse ikutegwa ‘kababusyanya-busyanya mukuyandana akucita milimo mibotu’ alimwi akukulwaizyanya. (Ba-Hebrayo 10:24, 25) Petro naakagusigwa muntolongo camaleele, wakayandisya kuyanzanaa banabokwabo, aboobo wakagama kuŋanda yabanyina Johane Marko, ooko “nkobakali kubungene banjibanji balakomba.” (Incito 12:12) Ee, nobakayanda aumwi naakakkala kumunzi wakwe akukomba. Pele bakasala kubungana kuti bakombe akukulwaizyanya kuciindi eco cikatazya. Katandila kumamanino aalweendo lwa Paulo lulamfwu alimwi lukatazya kugama ku Roma, wakaswaangana bakwesu bamwi ku Putiyolo alimwi kumbele wakaswaangana abambi ibakeendede musinzo mulamfwu kuzoomucinga. Ino wakalimvwa buti? “Paulo ababone buyo [aaba bakamucinga], wa[ka]lumba Leza, wakalika moyo.” (Incito 28:13-15) Wakayumizigwa naakayanzanaa Banakristonyina alimwi. Aswebo tulayumizigwa notuyanzanaa Banakristoma. Kufwumbwa leelyo notwaangulukide anotukonzya kuyanzana antoomwe, tatweelede kusola kulyeendelezya tolikke munzila iimanikide iisololela kubuumi.—Tusimpi 18:1; Matayo 7:14.

11. Amubandauke bukkale bumwi “inguzu zigambya” moziyandika kapati.

¹¹ Kwiinda mumipailo njotucita lyoonse, akwiiya Jwi lya Leza alimwi akuyanzanaa basyomima,  tulazumanana ‘kuyuma mu-Mwami amunguzu zyakwe impati.’ (Ba-Efeso 6:10) Cakutadooneka toonse tuyandika ‘kuyuma mu-Mwami.’ Bamwi baciswa malwazi aabakompamya alimwi ibamwi mbucembele naa kufwidwa muyandwa wabo wamubuumi. (Intembauzyo 41:3) Ibamwi balaliyumya nobakazigwaa beenzinyina bamulukwatano ibatasyomi. Ibazyali, ikapati aabo ibalela bana kabali balikke, mukuli wakulanganya mukwasyi kumwi kababeleka mulimo wabuzuba boonse ulakonzya kubabeda cintu ciyumu kapati. Banakristo bakubusi bayandika nguzu zyibagwasilizya kuti bakazye kuyungwaa beenzinyina akukaka misamu iikola alimwi abwaamu. Kunyina muntu weelede kweenkeenka kulomba Jehova kuti amupe “inguzu zigambya” kutegwa aliyumye mubuyumuyumu buli boobo.—2 Ba-Korinto 4:7.

“Ulakatalusya Bakateede”

12. Ino Jehova utugwasya buti mumulimo wa Bunakristo?

¹² Kunze lyaboobo, Jehova ulapa inguzu kubabelesi bakwe nobacita mulimo wabo. Kubusinsimi bwa Isaya tubala kuti: “Ulakatalusya bakateede, abaabo batakwe inguzu ulabayumya. . . . Abo babikide myoyo yabo kuli-Jehova balabukulusya inguzu zyabo, balaya butanta amababa mbuli basikwaze, balazuzaana akutakataala, balaya bweenda cakutawizuka.” (Isaya 40:29-31) Mwaapostolo Paulo lwakwe wakatambula nguzu kutegwa acite mulimo wakwe. Aboobo wakazwidilila mumulimo wakwe. Banakristo bana Tesalonika wakabalembela kuti: “Makani Mabotu ngitukambauka naakasika kulindinywe, teeakasika amajwi alike pe, akeza anguzu a-Muuya Uusalala.” (1 Ba-Tesalonika 1:5) Ibukambausi anjiisyo yakwe zyakajisi nguzu zyakucitya kucinca kupati mumaumi aabaabo ibakamuswiilila.

13. Ncinzi cakamuyumya Jeremiya nokuba kuti wakali kukazigwa?

¹³ Ibantu nobatabikkili maanu mucilawo cesu, omo ambweni motwakambauka ziindi zinji kwamyaka iili mbwiibede pele ibanji kabatazumini, tulakonzya kutyompwa. Mbubwenya buyo, awalo Jeremiya wakatyompwa akaambo kakukazyigwa akusekwa alimwi akutabikkila maanu kwabantu nkwaakayaanaankuko. Wakalyaambauzya ulaamba: “Nsikooyeeya limbi makani aa [Leza], nsikooyooamba limbi muzina lyakwe.” Pele wakakakilwa kuumuna buyo. Mulumbe wakwe ‘wakabaanga mulilo uuyakisya uujalilidwe mukati kazifuwa zyakwe.’ (Jeremiya 20:9) Ino ncinzi cakabweedezya nguzu zyakwe akati kamapenzi ayo mapati? Jeremiya wakati, “Jehova uli ambe, ngusinguzu uuyoosya.” (Jeremiya 20:11) Ikuzyiba Jeremiya nkwaakazyiba mbouyandika mulumbe wakwe alimwi amukuli wakamupede Leza kwakamucitya kuti amvwide kukulwaizya kwa Jehova.

Inguzu Zyakucisizya Anguzu Zyakuponya

14. (a) Ino lulimi ncibelesyo cijisi nguzu zipati buti? (b) Amwaambe zikozyanyo zitondezya lunyonyooko lunga lwacitwaa lulimi.

¹⁴ Teensi nguzu zyoonse nzyotujisi izizwa cakaanzambwene kuli Leza. Ilulimi, mucikozyanyo lulijisi inguzu zyakucisizya alimwi azyakuponya. Solomoni ucenjezya kuti: “Lufu abuumi, zyoonse zili mujanza lyalulimi.” (Tusimpi 18:21) Icakacitika mumubandi mufwaafwi buyo akati ka Saatani a Eva zitondezya lunyonyooko lunga lwaletwa amajwi. (Matalikilo 3:1-5; Jakobo 3:5) Aswebo tulakonzya kuleta lunyonyooko lupati kapati alulimi. Itwaambo tubyaabi kujatikizya kuneneya kwamusimbi umwi kulakonzya kucitya kuti atalike kutakkomanina zyakulya kwaciindi cilamfwu. Ikwiinduluka-induluka makani amwi aakubeja kulakonzya kunyonyoona cilongwe cibotu. Inzya, lulimi lweelede kweendelezyegwa.

15. Ino lulimi inga twalubelesya buti kukuyaka bamwi akubaponya?

¹⁵ Pele lulimi lulakonzya kuyaka alimwi akumwaya. Ikasimpi kamu Bbaibbele kaamba kuti: “Majwi aabantu bamwi alayasa mbuli ipanga, pele lulimi lwabasongo lulaponya.” (Tusimpi 12:18) Banakristo basongo babelesya nguzu zyalulimi mukuumbulizya baabo batyompedwe bakafwidwa bayandwa babo. Imajwi aalubomba alakonzya kukulwaizya bakubusi ibali mukuliyumya kukazya kuyungwaa beenzinyina. Imakani aambwaa lulimi camaanu alakonzya kusinizya bakwesu abacizi bacembeede kuti baciyandika alimwi balayandwa. Imajwi aaluzyalo alakonzya kubotya buzuba bwabaabo ibaciswa. Kwiinda zyoonse, tulakonzya kubelesya lulimi lwesu mukwaambilizya mulumbe wa Bwami kuli baabo ibayooswiilila. Tulakonzya kwaambilizya Jwi  lya Leza ikuti myoyo yesu kaili mulindilyo. Ibbaibbele lyaamba kuti: “Utakasyi lugwasyo kubantu balweelede, na ulakonzya kucita.”—Tusimpi 3:27.

Ikuzibelesya Kabotu Inguzu

16, 17. Ino inga bamwiiya buti Jehova ibaalu abazyali abalumi alimwi abamakaintu mukubelesya bweendelezi mbobapedwe a Leza?

¹⁶ Nokuba kuti ngusinguzuzyoonse, Jehova weendelezya mbungano caluyando. (1 Johane 4:8) Balangizi Banakristo balamwiiya kwiinda mukulanganya butanga bwa Leza caluyando, ikububelesya kabotu ibweendelezi bwabo ikutali munzila mbyaabi. Ee, zimwi ziindi balangizi bayandika “kulaya akutapatila akukombelezya,” pele balacita obo ‘cakukkazikisya loko moyo mukuyiisya kwabo.’ (2 Timoteo 4:2) Aboobo nobaalu kamwaayeeyesya lyoonse cakuzinzibala imajwi aamwaapostolo Petro ngaakalembela baabo ibajisi bweendelezi mumbungano aakuti: “Amweembele butanga bwa-Leza buli akati kanu, alimwi kutabi kwakusinikizigwa, pe, akube camoyo omwe. Kutabi kwakuunya kulubono lwaansi, pele kwamoyo uutuba. Mutabaciti kamikami abeembelwa ndinywe, pele amubabede citondezyo cakutobela.”—1 Petro 5:2, 3; 1 Ba-Tesalonika 2:7, 8.

¹⁷ Abalo bazyali abalumi balijisi bweendelezi mbobakapegwaa Jehova alimwi inguzu ezi zyeelede kubelesyegwa kubagwasya akubalailila akubakkomanisya banamukwasyi. (Ba-Efeso 5:22, 28-30; 6:4) Cikozyanyo ca Jesu citondezya kuti bweendelezi bulakonzya kucitwa munzila iigwasya yaluyando. Ikuti lulayo kaluli lwaakati-kati alimwi lupegwa lyoonse, ibana kunyina nobanga basululwa. (Ba-Kolose 3:21) Imakwatano alayuma balumi Banakristo nobabelesya busilutwe bwabo caluyando amukaintu namulemeka kapati mulumaakwe silutwe muciindi cakuzwa mububambe mbwabikkide Leza cakuyanda kudyaaminina naa kunyansya.—Ba-Efeso 5:28, 33; 1 Petro 3:7.

18. (a) Ino inga twamwiiya buti Jehova mukweendelezya bukali bwesu? (b) Ncinzi aabo ibajisi bweendelezi ncobeelede kusoleka kubaancico muli baabo mbobalanganya?

¹⁸ Aabo ibajisi bweendelezi mumukwasyi alimwi amumbungano beelede kubikkila maanu kapati ikweendelezya bukali bwabo, mbwaanga bukali bucitya bamwi kucita zintu cakuyoowa muciindi camuluyando. Imusinsimi Nahumu wakati: “Jehova tafwambi kunyema, alimwi inguzu zyakwe nzipati.” (Nahumu 1:3; Ba-Kolose 3:19) Ikweendelezya bukali bwesu ncitondezyo cakuti tulisimide munguzu, pele ikutalyeendelezya kutondezya kukompama. (Tusimpi 16:32) Mumukwasyi alimwi amumbungano imbaakani njakukomezya luyando, iluyando lwa Jehova alwakuyandana alimwi aluyando lwanjiisyo ziluleme. Luyando ncecaanzyo ciinda kuyuma calukamantano alimwi ndolwiinda kukulwaizya kucita zintu ziluleme.—1 Ba-Korinto 13:8, 13; Ba-Kolose 3:14.

19. Ncisyomezyo nzi cuumbulizya ncapa Jehova, alimwi ino tweelede kucita nzi kujatikizya ncico?

¹⁹ Ikuzyiba Jehova caamba kuzyiba inguzu zyakwe. Kwiinda muli Isaya, Jehova wakati: “Sa tona kuziba? Sa tona kumvwa? Leza uuteeli, Jehova, iwakalenga magolelo oonse aanyika, tawizuki, takataali pe.” (Isaya 40:28) Inguzu zya Jehova tazikonzyi kumana pe. Ikuti twasyoma nguwe muciindi cakulisyoma tobeni, takatulekelezyi pe. Utusyomezya kuti: “Utayoowi, nkaambo ndili ayebo. Utakankami, nkaambo ndime Leza wako. Njookuyumya, njookugwasya, ncobeni njookutabilila ajanza lyalulyo lyabululami bwangu.” (Isaya 41:10) Ino ncinzi ncotweelede kucita akaambo kakulanganya kwakwe kwaluyando? Mbubwenya buyo mbuli Jesu lyoonse atubelesye kufwumbwa nguzu nzyatupa Jehova ikugwasya akuyumya bamwi. Atweendelezye lulimi lwesu ikutegwa lube loolo luponya muciindi cakuba loolo lucisizya. Alimwi lyoonse katupakamene munzila yakumuuya, atukakatile mulusyomo alimwi atuyume munguzu zya Mulengi wesu Mupati, Jehova Leza.—1 Ba-Korinto 16:13.

Bupanduluzi buyungizidwe

Sena Inga Mwapandulula?

• Ino Jehova uzibelesya buti nguzu zyakwe?

• Muunzila nzi motunga twajana inguzu zya Jehova?

• Ino inguzu zijisi lulimi inga zyabelesyegwa buti?

• Ino bweendelezi bupedwe aa Leza inga bwaba buti cilongezyo?

[Mibuzyo yaciiyo]

[Cifwanikiso icili apeeji 25]

Jesu wakabelesya nguzu zya Jehova kugwasya bamwi

[Cifwanikiso icili apeeji 26]

Tulakonzya kwaambilizya Jwi lya Leza ikuti myoyo yesu kaili mulindilyo