Ikuyandaula Jehova Amoyo Uupangikide

IMUPAIZI muna Israyeli wazina lya Ezara wakali muvwuntauzyi uyiide amulembi alimwi asikuyiisya Mulawo imubotu. Ucili cikozyanyo cibotu kapati ku Banakristo sunu mukucita mulimo camoyo uumaninide. Munzila nzi? Akaambo kakuti wakazumanana kukomba noliba leelyo naakali kukkala ku Babuloni, imunzi wakajisi baleza bakubeja banji abukombi bwamadaimona.

Ibusungu bwa Ezara kukukomba tiibwakaile kulitalikila pe. Wakabeleka canguzu kutegwa abujane. Ncobeni, utwaambila kuti “wakapangika moyo wakwe kukuyandaula mulao wa-Jehova, akuucita.”—Ezara 7:10.

Mbubwenya mbuli Ezara, bantu ba Jehova sunu bayanda kucita kufwumbwa nzyayanda Jehova kuti bacite nobakkede munyika iilwana bukombi bwakasimpe. Aboobo atulange-lange nzila oomo aswebo motunga twapangika moyo wesu, nkokuti ikulimvwa kwesu kwamukati ikubikkilizya mizeezo, ndangilo yazintu, kulombozya alimwi atwaambo ncotucitila zintu ikutegwa ‘tuyandaule mulawo wa Jehova akuucita.’

Ikupangika Moyo Wesu

“Ikupangika” caamba “kulibambililila limwi kujatikizya makanze amwi: ikucibamba kabotu cintu kujatikizya mulimo umwi, kutobela naa ikulisungula kwamumoyo.” Ee, ikuti mulaa luzibo lwini-lwini lwakasimpe ka Jwi lya Leza alimwi ikuti mwakalyaaba kuli Jehova, nkokuti moyo wanu ulipangikide alimwi inga wakozyanisigwaa ‘vwu libotu’ ndyaakaamba Jesu mucikozyanyo cakwe casikuminza.—Matayo 13:18-23.

Pele moyo wesu uyandika kubikkila maanu ciindi coonse alimwi akuyiisigwa. Nkaambo nzi? Kuli twaambo tobile. Kakusaanguna nkakuti izilengwa zibyaabi, mbubwenya mbuli nsaku mumuunda zilakonzya kuvwula, ikapati “kumazuba aakumamanino” ano eelyo “muuwo” wabweende bwa Saatani noujisi mbuto zyamizeezo yakunyama zinji kwiinda lyoonse. (2 Timoteo 3:1-5; Ba-Efeso 2:2) Ikaambo kabili kajatikizya ivwu lini. Ikuti kalitalimwi, ivwu lilakonzya kuyuma mpoonya-mpoonya, lilakonzya kuba cimpayuma alimwi akubula cisyango cimena. Naa ibantu banji loko balakonzya kwiinda cabuyamba mumuunda akulyataula vwu mane lyaba ciyumayuma. Ivwu lyamoyo wesu lilikozyenye. Talikonzyi kubaa mbolezi ikuti twalilekelezya naa ikuti kalilyataukwaa bantu batabikkili maanu kubukkale bwesu bwakumuuya.

Aboobo cilayandika kapati kuti toonse tutobele kulaya kwa Bbaibbele oku kwakuti: “Bamba moyo wako cakucenjela loko, nkaambo mulinguwo mobuzwa buumi.”—Tusimpi 4:23.

Imbazu Zisumpula “Vwu” lya Moyo Wesu

Atulange-lange mbazu zimwi naa bube bukonzya kusumpula “vwu” lyamoyo wesu ikutegwa ukomene kabotu. Ee, kuli zintu zinji zikonzya kubotya moyo wesu, pele tulabandika buyo zili cisambomwi eezi: ikuzyiba zintu zyakumuuya nzyotuyandika, kulicesya, kusyomeka, kuyoowa Leza, lusyomo alimwi aluyando.

Jesu wakati: “Bali acoolwe bacete mumuuya.” (Matayo 5:3) Mbubwenya nzala yacakulya mboituyeezya kuti tuyandika kulya, ikuzyiba nzyotuyandika munzila yakumuuya kutupa nzala yacakulya cakumuuya lyoonse. Ncakuzyalwaacalo buya kuti bantunsi lyoonse kabayandisisya cakulya cili boobo nkaambo ncecipa kuti bukkale bwabo bube aampindu alimwi akubaa makanze kujatikizya buumi bwakumbele. Imapenzi aaletwaa  bweende bwa Saatani bwazintu naa kutolwaala caboola kumakani aakwiiya kulakonzya kucesya luyandisisyo ndotujisi kujatikizya ceeci. Nokuba boobo, Jesu wakati: “Teensi insima ilike njaaponena muntu, ulaponena amajwi oonse aazwa kumulomo wa-Leza.”—Matayo 4:4.

Munzila ini-ini, ikulya zyakulya zibotu ciindi coonse kupa kuti mubili kuuboneka kabotu alimwi kucitya kuti muntu kayandisisya kulya cilyo citobela mbocasikila ciindi eco. Ncimwi buyo amakani aakumuuya. Ambweni mulibona kuti muli bantu batayandisisya kwiiya, pele ikuti mwacicita kuba cilengwa kubala Jwi lya Leza abuzuba alimwi naa kamubala mabbuku aambi aagwasya kuteelela Bbaibbele ciindi coonse, muyoobona kuti inzala yakuyanda kubala iyooindila kuyaambele. Atwaambe kuti, munoolangila cakuyandisisya kuziindi nomucita ciiyo ca Bbaibbele. Aboobo mutacileki; amusoleke canguzu kubaa nzala yazintu zyakumuuya.

Ikulicesya Kubombya Moyo

Kulicesya ncibeela ciyandika kapati kukubaa moyo uupangikide akaambo kakuti citupa kuti tube bantu bakonzya kwiiya alimwi citugwasya kutobela lulayo akululamikwa kwaluyando kakunyina kuwayawaya. Amulange-lange cikozyanyo cibotu ca Mwami Josiya. Mubweendelezi bwakwe kwakajanika bbuku lyakajisi Mulawo wa Leza iwakapedwe kwiinda muli Musa. Josiya naakamvwa majwi aa Mulawo akubona mbuli mbobakazandukide bamawisi kubukombi busalala, wakazapaula zyakusama zyakwe akulilila Jehova. Ino nkaambo nzi Jwi lya Leza ncolyakamunjila loko mwami? Imakani aamba kuti imoyo wakwe “wakabomba” cakuti wakalicesya naakamvwa majwi aa Jehova. Jehova wakaubona moyo wa Josiya wakulicesya alimwi uuteelela, eelyo wakamulongezya akaambo kaceeci.—2 Bami 22:11, 18-20.

Nkulicesya ikwakapa kuti basikwiiya ba Jesu ibakali “bantu buyo abatakaiya” bateelele akutobela twaambo twakumuuya twakasimpe itwatakamvwugwa pe kuli baabo ibakali “basongo abaabo abaziba” buyo “kumeso aabantu.” (Incito 4:13; Luka 10:21; 1 Ba-Korinto 1:26) Aabo ibakali basongo buyo kumeso aabantu tiibakalibambilide kutambula jwi lya Leza akaambo kakuti myoyo yabo yakali miyumu akaambo kakulisumpula. Sena cilagambya kuti Jehova ulakusulaika kulisumpula?—Tusimpi 8:13; Daniele 5:20.

Ikusyomeka Akuyoowa Leza

Imusinsimi Jeremiya wakalemba kuti “moyo wamuntu uleena kwiinda zintu zyoonse, ulijisi bulwazi bukaka kupona, taakwe uukonzya kuzibisya mbuubede.” (Jeremiya 17:9) Ikweena oku kulalibonya munzila zinjaanji, mbuli notujana twaambo twakulilekelela eelyo notwacita cintu cimwi cibyaabi. Kulalibonya alimwi eelyo notusola kubotya-botya tumpenda tubyaabi ntotujisi. Pele kusyomeka kuyootugwasya kuzunda moyo weena kwiinda mukutugwasya kubona bwini-bwini mbotubede ikutegwa tucince. Sintembauzyo wakatondezya kusyomeka kuli boobo naakapaila kuti: “Undilingule, O Jehova, ubone mbombede: Undisunke kumiyeeyo akumoyo.” Ee, sintembauzyo wakapangikide moyo wakwe kutegwa azumine kululamikwa akusolwa a Jehova nokuba kuti cakali kunoojatikizya kuzyiba kuti wakajisi tumpenda tumwi tubyaabi ntwaakeelede kuzunda.—Intembauzyo 17:3; 26:2.

Ikuyoowa Leza, calo cibikkilizya “kusula bubi,” ndugwasyo luyandika kapati mukucinculuka oku. (Tusimpi 8:13) Nokuba kuti inga uliluzyi luzyalo lwa Jehova abubotu bwakwe, imuntu uumuyoowa ncobeni Jehova lyoonse ulizyi kuti Jehova ulijisi nguzu zyakusubula nokuba kujaya baabo ibatamumvwi. Jehova wakatondezya kuti aabo ibamuyoowa bakeelede kumumvwida eelyo kujatikizya cisi ca Israyeli naakati: “Necili cibotu nebalijisi moyo uuli boobu lyoonse, moyo wakundiyoowa awakubamba milazyo yangu yoonse, kuti kube kabotu kulimbabo akubana babo lyoonse.”—Deuteronomo 5:29.

Aawa imakani aakuyoowa Leza taali aakutucita kuti katulibombya cakukankama pe, pele atukulwaizya kumvwida Taateesu siluyando, oyo ngotuzyi kuti uyandisisya kuti katupona kabotu. Atwaambe kuti, ikuyoowa Leza kuli boobo kulasumpula alimwi kulakkomanisya, kwakatondezyegwa kapati a Jesu Kristo lwakwe.—Isaya 11:3; Luka12:5.

Imoyo Uupangikide Uzwide Lusyomo

Imoyo uusyoma ulizyi kuti kufwumbwa eeco Jehova ncayanda naa ncalailila kwiinda mu Jwi  lyakwe ncintu ciluzi lyoonse alimwi cilakonzya kutugwasya. (Isaya 48:17, 18) Imuntu uujisi moyo uuli boobu ulikkomene kapati alimwi uliibwene mpindu yakutobela lulayo luli kubbuku lya Tusimpi 3:5, 6, ilyaamba kuti: “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako.” Pele imoyo uunyina lusyomo taunoolibambilide kusyoma Jehova ikapati kucita boobo nokujatikizya kuleka zintu zimwi, mbuli kuubya-ubya bukkale ikutegwa muntu oyo abikkile maanu kuzintu ziyandika zya Bwami. (Matayo 6:33) Aboobo imoyo wamuntu uunyina lusyomo, Jehova uubona kuti “mubi.”—Ba-Hebrayo 3:12.

Lusyomo ndotujisi muli Jehova lulalibonya mumbazu zinjaanji, kubikkilizyaa zintu nzyotucita mumaanda esu. Mucikozyanyo, amubone njiisyo iili ku Ba-Galatiya 6:7 yakuti: “Mutalubi, Leza tacapwi. Kufumbwa ncabyala muntu, ulatebula eco nciconya.” Ilusyomo lwesu mukutobela njiisyo eyi luyootondezyegwa muzintu mbuli mabbasikopo ngotweebela, mabbuku ngotubala, iciindi ncotutola kwiiya Bbaibbele alimwi amumipailo yesu. Inzya, ilusyomo luyumu ilutugwasya kubyala “zintu zyamuuya” nembazu iiyandika kapati kutegwa tube aamoyo uupangikide kutambula Jwi lya Leza akulitobela.—Ba-Galatiya 6:8.

Luyando—Mbube Buyandika Kapati

Kwiinda bube bumbi boonse, luyando ndolucitya kuti ivwu lyamoyo wesu liliyandisye ncobeni Jwi lya Jehova. Aboobo mwaapostolo Paulo naakali kulweezyanisyaa lusyomo abulangizi, wakalupandulula kuti akati kabube obu “cipati nduyandisyo.” (1 Ba-Korinto 13:13) Imoyo uuzwide luyando lwa Leza ulakkomana kapati akukondwa mukumvwida Leza; kunyina noutongooka kujatikizya zintu nzyayanda Leza. Imwaapostolo Johane wakati: “Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.” (1 Johane 5:3) Munzila njoonya eyi, Jesu wakati: “Na muntu ulandiyanda unoobamba ijwi lyangu, awalo Taata ulamuyanda.” (Johane 14:23) Amubone kuti luyando luli boobo lulapilusigwa. Inzya, Jehova ulabayandisya aabo ibaswenenena kulinguwe muluyando.

Jehova ulizyi kuti tuli bantu batalondokede alimwi tulamubisizya lyoonse. Nokuba boobo, kunyina nalitantamuna kulindiswe. Ncayandaula Jehova mubabelesi bakwe ‘mmoyo uumaninide,’ walo uutukulwaizya kumubelekela cakulisungula “camiyeeyo iizuminisya.” (1 Makani 28:9) Ee, Jehova ulizyi kuti citola ciindi cilamfwu alimwi ciyanda kusolekesya ikutegwa tube aabube bubotu mumoyo wesu akuzyala micelo mibotu yamuuya. (Ba-Galatiya 5:22, 23) Aboobo ulatukkazikila moyo, “nkaambo ulizi mbububede buntu bwesu, ulaibulukwa kuti tuli bulongo buyo.” (Intembauzyo 103:14) Kajisi ciimo nciconya, Jesu kunyina naakabasinsa basikwiiya bakwe akaambo kakulubizya kwabo pele cakukkazika moyo wakabagwasya akubakulwaizya. Sena luyando, lweetelelo alimwi akukkazika moyo kwa Jehova a Jesu ikuli boobu takumukulwaizyi kubayandisisya kwiinda lyoonse?—Luka 7:47; 2 Petro 3:9.

Ikuti naa zimwi ziindi cilamukatazya kugusya ziyanza zimwi zili mbuli nsaku zisimpide miyanda naa kunyonyoona tumpenda tumwi, mutatyompwi pe. Muciindi cakutyompwa, amuzumanane kusoleka kuzizunda “akujatisya kukomba,” kubikkilizyaa kukombelezya kuti Jehova amupe muuya wakwe. (Ba-Roma 12:12) Kwiinda mulugwasyo lwakwe ndwapa cakulisungula, mbubwenya mbocakacitikila Ezara anywebo muyoozwidilila mukubaa moyo uumaninide kupangika “kukuyandaula mulao wa-Jehova, akuucita.”

[Cifwanikiso icili apeeji 31]

Ezara wakabamba bukombi bwakwe neliba leelyo naakali ku Babuloni

Nkotwakajana cifwanikiso icili apeeji 29]

Garo Nalbandian