Ikuzyiba “Miyeeyo Ya-Kristo”

“Nguni uubwene miyeeyo ya-Jehova, abe mutolokwi wakwe? Pele swebo tulijisi miyeeyo ya-Kristo.”—1 BA-KORINTO 2:16.

1, 2. Ncintu nzi ciyandika Jehova ncaakayubununa kujatikizya Jesu mu Jwi lyakwe?

INO JESU wakajisi ciwa cili buti? Ino masusu aakwe alukanda ameso akali amubala nzi? Ino wakali mulamfwu buti? Wakali kulema makkilogilamu ongaye? Kwamyaanda yamyaka izifwanikiso zizekaulwaa basikuzekaula iziiminina Jesu zilisiyene-siyene kuzwaa cibotu kusikila kuli ceeco cilangilwa kuti ncakubeja buyo. Bamwi bamutondezya kuba mwaalumi sintanze, singuzu pele bamwi bamutondezya kuti mmuntu uukompeme alimwi uutasangaalizyi.

² Pele Ibbaibbele kunyina nolibikkila maanu kapati aaciwa ca Jesu. Pele Jehova wakayubununa cintu cimwi iciyandika kapati kwiinda ciwa: Jesu mbwaakabede. Izibalo zya Makani Mabotu taziluuli buyo zintu Jesu nzyaakaamba anzyaakacita pele zilatondezyaa mbwaakali kulimvwa alimwi akuyeeya ikwakali kweendelaamwi amajwi aakwe amicito. Imakani aya aaluulwa mumbazu zyone aakasololelwaa Leza alatugwasya kuzyiba ceeco mwaapostolo Paulo ncaakali kwaamba naakaamba makani aa “miyeeyo ya-Kristo.” (1 Ba-Korinto 2:16) Ncintu ciyandika kapati ikwiizyiba kabotu mizeezo akulimvwa alimwi ambwaakabede Jesu. Nkaambo nzi? Nkaambo katwaambo tobile.

3. Nduzibo nzi ndotunga twabaalo ikuti twaizyiba kabotu miyeeyo ya Kristo?

 ³ Lutaanzi, ikuzyiba miyeeyo ya Kristo kutupa kuti tuzyibe miyeeyo ya Jehova Leza. Jesu wakalimuzyi kabotu-kabotu Usyi cakuti wakali kukonzya kwaamba kuti: “Taakwe uuzi Mwana na nguni, pele Taata, a-Taata na nguni, pele Mwana, ayooyo ngwakanza Mwana kumuyubulwida.” (Luka 10:22) Cili mbuli kuti Jesu wakali kwaamba kuti, ‘Ikuti kamuyanda kuzyiba mbwabede Jehova, amulange ndime.’ (Johane 14:9) Aboobo mbotwiiya ncaayubununa mabbuku aa Makani Mabotu kujatikizya mbwaakali kuyeeya akulimvwa Jesu, mbubwena buyo tuli mukwiiya mbwayeeya ambwalimvwa Jehova. Iluzibo luli boobo lutugwasya kuswenenena kuli Leza wesu.—Jakobo 4:8.

4. Ncinzi ncotweelede kwiiya lutaanzi ikuti katuyandisya ncobeni kuba mbuli Kristo mumicito, alimwi ino nkaambo nzi?

⁴ Icabili, ikuzyiba miyeeyo ya Kristo kutugwasya ‘kutobela mikondo yakwe.’ (1 Petro 2:21) Ikutobela Jesu tacaambi kwiile kwiinduluka majwi aakwe akwiiya micito yakwe pe. Mbwaanga mibandi alimwi amicito zikulwaizigwaa mizeezo akulimvwa kwamuntu, ikutobela Kristo kuyanda kuti tube ‘aamoyo oyo’ nguwenya ngwaakajisi. (Ba-Filipi 2:5) Atwaambe kuti, ikuti naa ncobeni tuyanda kuba mbuli Kristo mumicito, lutaanzi tweelede kwiiya kuyeeya akulimvwa mbuli nguwe, nkokuti kusolekesya mbuli mbotukonzya mbotuli bantu batalondokede. Aboobo kwiinda mulugwasyo lwabalembi ba Makani Mabotu, atudunamine kulanga miyeeyo ya Kristo. Lutaanzi tulabandika twaambo itwakakulwaizya mbwaakali kuyeeya akulimvwa Jesu.

Ibuumi Bwakwe Katanaba Muntunsi

5, 6. Nzintu nzi balongwe besu nzyobanga batukulwaizya kucita? (b) Ncilongwe cili buti Mwanaa Leza mutaanzi ncaakajisi kujulu katana boola anyika, alimwi ino eci cakamukulwaizya kucita nzi?

⁵ Ibalongwe besu balakonzya kutukulwaizya kucita zintu zimwi, balakonzya kuyunga mizeezo yesu ambotulimvwa alimwi amicito yesu munzila mbotu naa imbi. * (Tusimpi 13:20) Amulange-lange bulongwe Jesu mbwaakajisi kujulu katanaboola anyika. Imakani Mabotu aakalembwaa Johane apandulula ciindi Jesu katana kuba muntunsi kuti wakali “Ijwi,” naa Sikwaambilizya wa Leza. Johane waamba kuti: “Kumatalikilo Ijwi wakaliko, awalo Ijwi wakali antoomwe a-Leza, eno Ijwi oyo wakali Leza. Ngonguwe uwakali kuli-Leza kumatalikilo.” (Johane 1:1, 2) Mbwaanga Jehova wakanyina matalikilo, ikuba a Leza kwa Ijwi kuzwa “kumatalikilo” kwaamba matalikilo aamilimo ya Leza yakulenga. (Intembauzyo 90:2) Jesu “mutaanzi kuzyalwa kuzilenge zyoonse.” Aboobo wakaliko izilenge zimbi abubumbo bulibonya kazitana kulengwa.—Ba-Kolose 1:15; Ciyubunuzyo 3:14.

⁶ Kweelana akutelaika kwabasyaabusongo, ibubumbo bwaliko kwamyaka iisika ku 12,000,000,000. Ikuti kweezeezya oku kakuluzi, nkokuti Mwanaa Leza mutaanzi wakayanzana a Usyi kwamyaka iitabaliki Adamu katanalengwa. (Amweezyanisye Mika 5:2.) Aboobo kwakaba cilongwe cibotu alimwi ciyumu akati kabo. Kali luzibo muciimo camuntu, ooyu Mwanaa Leza mutaanzi katanaba muntunsi waambwa kuti wakati: “Ndakali muyandwi wa [Jehova] mazuba oonse, ndakali kusekelela lyoonse kubusyu bwakwe.” (Tusimpi 8:30) Masimpe, ikupona kwamyaka iitabaliki mucilongwe awooyo Ikuzwa luyando kwakamukulwaizya kucita zintu zibotu Mwanaa Leza! (1 Johane 4:8) Imwanooyu wakaizyiba akwitondezya miyeeyo anzila zya Wisi munzila yatakali kukonzyeka kucitwaa muntu uumbi.—Matayo 11:27.

Ibuumi Bwakwe Kali Aanyika Alimwi Ambwaakakulwaizya Bantu

7. Nkaambo nzi kamwi ncocakali kuyandika kuti Mwanaa Leza mutaanzi aboole anyika?

⁷ Imwanaa Leza wakajisi zintu zinji zyakwiiya akaambo kakuti makanze aa Jehova akali aakuyiisya Mwanaakwe kuba Mupaizi Mupati silubomba, walo ‘uukonzya kutweetelela mukulengauka kwesu.’ (Ba-Hebrayo 4:15) Ikutegwa azuzikizye mulimo oyu nkekamwi katwaambo Mwanaa Leza ncaakaboolela anyika kali muntunsi. Naakali anyika, kali muntunsi, Jesu wakalijana mubukkale akuyungwa koonse musyule nkwaakali kubona buyo kali kujulu. Ono wakali kukonzya kwiinda mumacise alimwi akulimvwa mbuli mbobalimvwa bantu mumizeezo. Zimwi ziindi wakali kukatala akufwa  nyota alimwi anzala. (Matayo 4:2; Johane 4:6, 7) Kunze lyaboobo, wakaliyumya mumakataazyo amapenzi aayindene-indene. Aboobo “wakaiya kumvwa” alimwi wakeelela cakumaninina kubeleka mulimo wakwe kali Mupaizi Mupati.—Ba-Hebrayo 5:8-10.

8. Mmakani nzi ngotuzyi kujatikizya buumi bwa Jesu bwakubwana anyika?

⁸ Ino mbuti kujatikizya zyakacitikila Jesu naakali anyika? Imakani aajatikizya mbwaakakomena masyoonto kapati. Ncobeni, alikke Matayo a Luka mbabakapandulula zintu zyakacitika Jesu naakazyalwa. Ibalembi ba Makani Mabotu bakalizyi kuti Jesu wakapona kujulu katanaboola anyika. Bulikke buumi obo mbwaakajisi katanaba muntunsi mbobwakapandulula mbwaakazyikuba. Nokuba boobo, Jesu wakali muntunsi wini-wini. Nokuba kuti wakalilondokede, wakacili kuyandika kukomena kuzwa kubuvwanda kusikila kubwana akukukubuka mane do kubupati, moonse omo wakali kwiiya. (Luka 2:51, 52) Ibbaibbele lilaziyubununa zintu zimwi zijatikizya buumi bwa Jesu bwakubwana bwalo ibwakamupa kuti abe aciimo ncaakalaaco.

9. (a) Ncinzi citondezya kuti Jesu wakazyalilwa mumukwasyi wabacete? (b) Muubukkale buli buti Jesu mwalangilwa kuti mwaakakomenena?

⁹ Kweelana abumboni buliko, Jesu wakazyalilwa mumukwasyi wabucete. Eci cilalibonya mucituuzyo ca Josefa a Mariya ncobakatola kuntempele nokwakainda mazuba aali 40 Jesu kazyedwe. Muciindi cakutola mwanaa mbelele kuti abe cituuzyo citentwa alimwi ankwilimba naa nziba zicili ziniini kuti cibe cituuzyo cazibi, bakatola buyo “inziba zyobile, neziba nkwilimba zyobile izicili ziniini.” (Luka 2:24) Kweelana a Mulawo wa Musa, eco cakali cituuzyo cabacete. (Levitiko 12:6-8) Muciindi, imukwasyi oyu wabacete wakakomena. Josefa a Mariya nibakamana kuzyala Jesu munzila yamaleele, bakazyala bana bambi ibasika kucisambomwi munzila yalukwatano. (Matayo 13:55, 56) Aboobo Jesu wakakomenena mumukwasyi mupati, mubukkale bwakupenga-penga.

10. Ncinzi citondezya kuti ba Josefa a Mariya bakali bantu bayoowa Leza?

¹⁰ Jesu wakakomezyegwaa bazyali bakwe ibakali kuyoowa Leza alimwi ibakamulanganya kabotu. Ba Mariya, banyina Jesu bakali bakaintu balibedelede. Amuyeeye kuti imungelo Gabriyeli naakamwaanzya, wakati: “Wabonwa oopedwe luzyalo, Jehova uli ayebo.” (Luka 1:28) Awalo Josefa wakali mwaalumi musungu kukukomba. Mwaka amwaka wakali kweenda lweendo lwamakkilomita aali 150 kuya ku Jerusalemu kupobwe lya Kwiindilila. Awalo Mariya wali kujanika nokuba kuti mbaalumi buyo ibakeelede kucita obo. (Kulonga 23:17; Luka 2:41) Cimwi ciindi, ba Josefa a Mariya nobakamana kuyandaula kapati, bakamujana Jesu muntempele akati kabamayi, ciindi eco wakali aamyaka yakuzyalwa iili 12. Kubazyali bakwe ibakalibilikide kapati, Jesu wakati: “Sena tamuzi kuti ndileelede kuba muŋanda ya-Taata?” (Luka 2:49) “Taata”—ibbala elyo kulangilwa kuti lyakali kwaamba zintu zibotu kumwana Jesu. Kulangilwa kuti bakali mwaambilide kuti Jehova ngowakali Wisi wini-wini. Kunze lyaboobo, Josefa weelede kuti wakali wisi sikujana mubotu kapati kuli Jesu. Masimpe kunyina Jehova naakali kunga wasala muntu mukali kuti alele Mwanaakwe uuyandwa!

11. Mmulimo nzi Jesu ngwaakaiya, alimwi ino kuciindi ca Bbaibbele ikubeleka mulimo oyu kwakali kujatikizya nzi?

¹¹ Naakakkede ku Nazareta, Jesu wakaiya mulimo wakubeza, kuzwa kuli bausyi bakujana ba Josefa. Jesu wakaba haazibwene mumulimo oyo cakuti awalo mane wakali kwiitwa kuti “mubezi.” (Marko 6:3) Kuciindi ca Bbaibbele, ibabezi bakali kubeleka mulimo wakuyaka maanda, ikufwala zyuuno amakkabati (kubikkilizyaa matafwule, zyuuno zyacimbwalakasa amabbenci), alimwi bakali kupangaa zyakulimya. Ikujatikizya Jesu, mubbuku lyakwe litegwa Dialogue With Trypho, Justin Martyr wamumwaanda wamyaka wabili C.E. wakalemba kuti:  “Wakalaa cilengwa cakubeleka kali mubezi naakali aabantu bambi, wakali kupanga maamba amajokwe.” Imulimo oyo tiiwakali muuba-uba pe, nkaambo mubezi wansiku ambweni kunyina naakali kunga waile kulyuulila buyo mapulanga. Kulangilwa kuti wakali kuunka musyokwe akusala cisamu cipati akucigonka akuyumuna mapulanga kutola kumunzi. Aboobo Jesu kulangilwa kuti wakalibuzyi buyumuyumu bwabukkale, ibwakali kujatikizya kujana basikuula alimwi akujanina mukwasyi mali aakuligwasya.

12. Ncinzi citondezya kuti Josefa wakafwa Jesu kacipona, alimwi ino eci cilangilwa kuti cakamupa mukuli nzi Jesu?

¹² Mbwaanga ngowakali mwana musankwa mupati, Jesu kulangilwa kuti wakagwasilizya kulanganya mukwasyi, ikapati nobakasyaala balikke mbwaanga kulibonya kuti Josefa wakafwa Jesu kacipona. * Imagazini ya Zion’s Watch Tower yamu January 1, 1900 yakati: “Imakani aansiku aamba kuti Josefa wakafwa Jesu kacili mwana, akuti Jesu wakabweza mulimo wakubeza akugwasilizya mukwasyi. Eci cilijisi bumboni muli zeezyo zyaambwaa Magwalo ooko Jesu mwini nkwaambwa kuti mmubezi alimwi banyina abanabokwabo nkobabandaukwa pele walo Josefa nkwataambwi pe. (Marko 6:3) . . . Aboobo kulibonya kuti imyaka yoonse iili 18 yakabelesyegwa mumilimo yabukkale kuzwa ciindi nocaacitika [icaambwa kuli Luka 2:41-49] kuzikusika kuciindi naakabbapatizigwa.” Mariya abana bakwe kubikkilizyaa Jesu, kulangilwa kuti bakalizyi mbocicisa imulumi uuyandwa alimwi ausyi bana nafwa.

13. Nkaambo nzi Jesu ncaakajisi luzibo abusongo ambwaakali kulimvwa mumoyo ikwatakajisi muntu uumbi ciindi naakatalika mulimo wakwe?

¹³ Cilasalala kuti Jesu tanaakazyalilwa mubukkale bwakulikwaya buyo. Pele wakalibonena mbobubede buumi bwabantu buyo. Mpoonya mu 29 C.E., ciindi cakasika cakuti Jesu acite mulimo wa Leza ngwaakali kulindila. Kumamanino aamwaka oyo, Jesu wakabbapatizigwa mumaanzi alimwi wakazyalwa kali Mwana wa Leza wamuuya. “Ijulu lyakaba bukwazi,” icitondezya kuti ono wakali kukonzya kuyeeya buumi bwakwe bwakujulu katanaba muntunsi kubikkilizyaa mizeezo akulimvwa nkwaakalaako musyule. (Luka 3:21, 22) Aboobo iciindi Jesu naakatalika mulimo wakwe, wakalijisi luzibo abusongo ambwaakali kulimvwa mumoyo ikwatakajisi muntu uumbi uuli woonse. Aboobo cakweelela ibalembi ba Makani Mabotu mumalembe aabo bakabikkila maanu kapati kuzintu zyakacitika lyamulimo wa Jesu. Pele kunyina nobakali kukonzya kuzilemba zyoonse nzyaakacita. (Johane 21:25) Pele eezyo nzyobakamunikilwa amuuya kuti balembe zilatugwasya kudunamina kulanga miyeeyo yamuntu mupati kwiinda iwakaponede.

Jesu Mbwaakabede Kali Muntunsi

14. Ino Makani Mabotu amutondezya buti Jesu kuti wakali mwaalumi uujisi moyo mubotu alimwi silubomba?

¹⁴ Ibube bwa Jesu ibutondezyedwe mu Makani Mabotu mbwamwaalumi uusamausya siluyando alimwi uujisi moyo mubotu. Wakatondezya lubomba munzila zinji: wakamufwida luzyalo sicinsenda (Marko 1:40, 41); wakalila kujatikizya  bantu ibatakasyoma (Luka 19:41, 42); wakanyema alunyemo lwabululami kujatikizya basikucinca mali ibalyatu (Johane 2:13-17). Mbwaanga wakali mwaalumi silweetelelo, Jesu wakali kulila alimwi wakacita obo caantangalala. Imulongwaakwe ngwaakali kuyandisya Lazaro kafwide, naakabona Mariya imucizi wa Lazaro kalila, cakamunjila kapati Jesu cakuti mane wakalila caantangalala bantu boonse kabalangilila.—Johane 11:32-36.

15. Mbuti lubomba lwa Jesu mbolwakalibonya kujatikizya mbwaakali kubalanga akubeendelezya bantu?

¹⁵ Ilubomba lwa Jesu lwakalibonya caantangalala ikapati kujatikizya mbwaakali kulanga akweendelezya bantu bamwi. Ibacete abadyaaminidwe wakabagwasya kutegwa ‘abakatalusye mumyoyo yabo.’ (Matayo 11:4, 5, 28-30) Kunyina naakabindide kapati cakubula ciindi cakulanganya zintu zijatikizya bantu bakali mumapenzi, naba mukaintu wakali kuciswa kalobola iwakaguma cakusama cakwe cakuyubilila naba sikulombelela moofwu iwatakali kuumuzyika. (Matayo 9:20-22; Marko 10:46-52) Jesu wakali kulanga buyo zintu zibotu mubantu alimwi akubalumbaizya; pele alimwi wakalilisungwide ikupa lulayo nolwakali kuyandika. (Matayo 16:23; Johane 1:47; 8:44) Kuciindi banakazi nobakali kusulaikwa, Jesu wakabalemeka. (Johane 4:9, 27.) Anu ikakamu kabamakaintu ncokakalisungula kumukutaukila kwiinda mukubelesya mbono zyabo.—Luka 8:3.

16. Ncinzi citondezya kuti Jesu wakalaa bulangizi bubotu kujatikizya buumi azintu zyakumubili?

¹⁶ Jesu wakapona buumi buuba-uba. Taakabikkila maanu kapati kuzintu zyakumubili. Munzila yakumubili, kulangilwa kuti nzisyoonto zintu nzyaakajisi. Wakaamba kuti ‘taakwe nkwaakali kooneka mutwe wakwe.’ (Matayo 8:20) Pele alimwi Jesu wakali kuyungizya kulikondelezya kwabamwi. Naakajanika kupobwe lyamucado, kwalo ikwakali kulizyigwa akwiimbwa nyimbo akusekelela, taakaunkila kuyoonyonganya bubotu bwapobwe elyo. Ee, oko mane Jesu nkwaakacitila maleele aakwe aakusaanguna. Waini nowakamana, wakasandula maanzi kuba waini mubotu, icakunywa ‘cibotezya moyo wamuntu.’ (Intembauzyo 104:15; Johane 2:1-11) Aboobo ikusekelela kwakazumanana, alimwi sibwiinga anabwiinga kunyina nobakausigwa nsoni. Ikulanga kwaakati-kati kumbi nkwaakatondezya kulatondezyegwa alimwi mukuti kuli zyakacitika zinji izyaambwa oko Jesu nkwaakabeleka cabusungu kwaciindi cilamfwu mumulimo wakwe.—Johane 4:34.

17. Nkaambo nzi ncocitagambyi kuti Jesu wakali Mwiiyi Haazibwene, alimwi ino njiisyo zyakwe zyakatondezya nzi?

¹⁷ Jesu wakali Mwiiyi Haazibwene. Ibunji bwanjiisyo zyakwe zyakali kujatikizya zicitika zini mubuumi bwabuzubaa buzuba, zyalo nzyaakazyibide. (Matayo 13:33; Luka 15:8) Inzila yakwe yakuyiisya kunyina muntu umbi nkoyakali kunga yeelanisigwa, yakali salede, iitakatazyi kumvwa alimwi iigwasya. Iciinda kugwasya nzintu nzyaakayiisya. Injiisyo zyakwe zyakatondezya kuyandisisya kwamumoyo nkwakajisi kuti azibye baswiilizi bakwe kujatikizya miyeeyo ambwaakali kulimvwa anzila zya Jehova.—Johane 17:6-8.

18, 19. (a) Ino Jesu wakamupandulula buti Wisi munzila yazikonzyanyo iisalala? (b) Ncinzi ciyoobandikwa mucibalo citobela?

¹⁸ Ikanjikanji kwiinda mukubelesya zitondezyo, Jesu wakayubununa Wisi mbwabede kwiinda muzikozyanyo zyatakali kulubika. Ikulwaamba buyo luse lwa Leza ciliindene akukozyanisya Jehova kuli wisi uujatila uunjilwa mumoyo kapati nabona mwanaakwe iwapiluka cakuti mane ‘wakatijaana akuwida kunsingo yakwe akumumyontesya.’ (Luka 15:11-24) Naakali kukaka cilengwa cakutanyoneka oomo basikweendelezya babukombi mobakali kunyansya bantu buyo, Jesu wakapandulula kuti Wisi wakali Leza nkobakonzya kusikila bantu iwakabikkila maanu kapati kukukombelezya kwasimutelo iwakalicesya kwiinda kumupailo wakulitondezya bululami wamu Farisi sikuliyanda. (Luka  18:9-14) Jesu wakatondezya kuti Jehova ngu Leza uubikkila maanu kapati uuzyi neciba ciindi kayuni kaniini nokajaigwa. Jesu wakasyomezya basikwiiya bakwe kuti: “Mutayoowi, mulayandika kwiinda tuyuni tunji.” (Matayo 10:29, 31) Aboobo cakali kweelela kuti bantu bakakankamana “kukwiisya” kwa Jesu elyo ibanji bakamuyanda kapati. (Matayo 7:28, 29) Cimwi ciindi, “makamu manji aabantu” bakazumanana anguwe kwamazuba otatwe, mane bakalisungula kukkala nokuba kuti bakafwide nzala!—Marko 8:1, 2.

¹⁹ Atulumbe kuti Jehova watuyubunwida miyeeyo ya Kristo mu Jwi lyakwe! Pele ino inga twaivwuzya buti akwiitondezya miyeeyo ya Kristo notucitilana zintu abamwi? Eci ciyoobandikwa mucibalo citobela.

Bupanduluzi buyungizidwe

Sena Mulayeeya?

• Nkaambo nzi ncociyandika kuti twiizyibe kabotu “miyeeyo ya—Kristo”?

• Nkuyanzana nzi Jesu nkwaakajisi naakali kupona katanaba muntunsi?

• Mbukkale nzi alimwi nzintu nzi izyakacitikila Jesu mubuumi bwakwe bwaanyika?

• Ino Makani Mabotu aamba nzi kujatikizya mbwabede Jesu?

[Mibuzyo yaciiyo]

[Cifwanikiso icili apeeji 3]

Jesu wakakomenena mumukwasyi mupati, mubukkale bwakupenga-penga

[Zifwanikiso izili apeeji 6]

Bamayi bakagambwa kukuziba akwiingula kwa Jesu kwabusongo kalaa myaka yakuzyalwa iili 12