Tuyandika Mbunga ya Jehova

SENA kuli nomwakamvwide kale muntu umwi kaamba kuti: “Ndilasyoma muli Leza pele kutali mumbunga yabukombi”? Kuyeeya kwamusyobo oyu kulaakati kamizeezo yabantu bamwi cimwi ciindi ibakazuunyene kwiinka kucikombelo pele kumbele ibakazi kutyompwa akaambo kakwaalilwa kwabukombi obo kubaabila zintu zyakumuuya nzyobayandika. Nokuba kuti balityompedwe ambunga zyabukombi, ibanji baciyanda kukomba Leza. Pele basyoma kuti ncibotu kuti kabamukomba munzila njobayanda beni ikutali kwiinda kujatikizyigwaa cikombelo niiba mbunga ili yoonse.

Ino Bbaibbele lyaamba nzi? Sena Leza uyanda kuti Banakristo kabayanzana ambunga imwi?

Kuba Mumbunga Kwakabagwasya Banakristo Bakusaanguna

Lya Pentekoste mu 33 C.E., Jehova wakatila Muuya Uusalala kutali ali basikusyoma bakali mumasena aaindene-indene pele kubaalumi abamakaintu bakabungene “antoomwe” muŋanda yamujulu mumunzi wa Jerusalemu. (Incito 2:1) Aciindi awo, imbungano ya Banakriso iyakazikuba mbunga iijatikizya masi oonse yakatalika. Eeci cakaba cilongezyo cini-cini kuli basikwiiya bakusaanguna. Nkaambo nzi? Nkaambo kakuti bakapedwe mulimo uuyandika kapati oyo wakukambauka Makani Mabotu aa Bwami bwa Leza kumbele wakali kuyoocitwa “munyika yoonse.” (Matayo 24:14) Mumbungano basikusanduka bapya bakali kukonzya kwiiya mulimo wabukambausi mboweelede kucitwa kuzwa kubasyominyina ibakazyibide.

Muciindi cisyoonto buyo, imulumbe wa Bwami wakamwaigwa mane akunze lyabwaanda bwa Jerusalemu. Akati kamyaka ya 62 a 64 C.E., imwaapostolo Petro wakalemba lugwalo lwakwe lutaanzi ku Banakristo ‘ibakamwaikide koonse ku-Ponto aku-Galatiya aku-Kapadokiya aku-Asiya aku-Bituniya,’ zyoonse izili mucisi ca Turkey mazubaano. (1 Petro 1:1) Alimwi kwakali basyomi bambi ku Palesitaini, Lebanoni, Siliya, Kupro, Gilisi, Krete aku Italiya. Paulo naakazi kulembela bana Kolose mu 60-61 C.E., Makani Mabotu ‘akalikambaukidwe kubantu boonse baansi ano.’—Ba-Kolose 1:23.

Ikaambo kabili kakujatikizyigwa mumbunga nkukulwaizyanya Banakristo nkobakali kucitilana umwi amweenzinyina. Kwiinda mukuswaangana mumbungano, Banakristo bakali kuswiilila makani ayumya-yumya akwiiya Magwalo Asetekene antoomwe akwaabilana luzibo luyumya lusyomo, amukukomba antoomwe. (1 Ba-Korinto caandano 14) Alimwi ibaalumi basimide mbabakali ‘kweembela butanga bwa Leza.’—1 Petro 5:2.

Kabali cibeela cambungano, Banakristo alimwi bakazyibana umwi amweenzinyina calo cakapa kuti bayandane. Muciindi cakuubona kuminya mulimo wakuyanzanaa mbungano, Banakristo bakusaanguna bakayakwa akuyumizyigwa.—Incito 2:42; 14:27; 1 Ba-Korinto 14:26; Ba-Kolose 4:15, 16.

Ikaambo akambi kakapa kuti kubungana kwambungano munyika yoonse naa mumbunga kuyandike kakali kakusumpula lukamantano. Banakristo bakaiya ‘kwaamba cintu comwe.’ (1 Ba-Korinto 1:10) Eeci cakali kuyandika kapati. Basimbungano bakajisi lwiiyo abukkale bwiindene-indene.  Milaka njibakali kwaambaula yakaliindene-indene alimwi bakaliindene bube. (Incito 2:1-11) Ziindi zimwi kwakali kuba kwiimpana mumizeezo. Nokuba boobo, Banakristo bakali kugwasigwa kumana mazwangaayo mumbungano.—Incito15:1, 2; Ba-Filipi 4:2, 3.

Mibuzyo mipati njibatakali kukonzya kwiingula baalu banyenzi yakali kutolwa kubalangizi beendeenda basimide mbuli Paulo. Twaambo tupati-pati tujatikizya bukombi twakali kutolwa kukabunga keendelezya ikakali ku Jerusalemu. Kumatalikilo kabunga keendelezya kakajisi buyo baapostolo ba Jesu Kristo, pele kumbele kwakazi kubikilizigwa abaalu bamumbungano yaku Jerusalemu. Imbungano zyoonse zyakali kuzuminizya inguzu Leza nzyakapede kabunga kendelezya abaiminizi bankako kutegwa beendelezye mulimo, akubikka baalumi beelede kubeleka mu milimo eeyo alimwi akusalazya makani aabukombi. Kuti kaambo kakosolwaa bakabunga keendelezya, mbungano zyakali kukutambula kusala oko ‘akubotelwa kukulaililwa oko. ‘—Incito15:1, 2, 28, 30, 31.

Ee, Jehova wakabelesya mbunga mumwaanda wamyaka wakusaanguna. Pele ino mbuti mazubaano?

Tuyandika Mbunga Mazubaano

Mbubwena mbuli bwakacita Bakamboni bamumwaanda wamyaka wakusaanguna, Bakamboni ba Jehova bamazubaano baubweza cabusungu imukuli wakukambauka Makani Mabotu a Bwami. Nzila imwi mbobaubeleka mulimo ooyu nkwiinda mukumwaya ma Bbaibbele amabbuku aagwasya kwiiya Bbaibbele. Kutegwa eeci cicitwe, kuyandika bweendelezi bwamumbunga.

Imabbuku a Bunakristo ayelede kulembwa kabotu-kabotu, kulangwa-langwa kuti aliluzi, eelede kusimbwa alimwi akutuminwa kumbungano. Mpoonya Munakristo umwi aumwi weelede kulyaaba kutolela baabo bayanda kwaabala mabbuku aaya. Munzila eeyi tuulunzuma twabantu twasikilwaa mulumbe wa Bwami. Basikumwaya makani mabotu balasolekesya kuubeleka mulimo wabukambausi munzila yeendelezyegwa kabotu, babona kuti kunyina cibeela cacilawo cibelekwa kapati kakuli zimwi zilalekelezyegwa. Zyoonse eezi ziyanda bweendelezi bwamumbunga.

Mbwaanga “Leza tasalululi,” ma Bbaibbele alimwi amabbuku aagwasya kwiiya zyamu Bbaibbele ayelede kusandululwa. (Milimo10:34 BT) Sunu eeyi magazini ilajanika mumilaka iisika ku 132, ayalo Awake! igwasilizya, ilamwaigwa mumilaka ili 83. Kutegwa kucitwe boobo, kuyandika tukamu twabasikusandulula tweendelezyedwe kabotu munyika yoonse mbwiizulwa.

Basimbungano balakulwaizigwa ciindi nobajanika kumiswaangano ya Bunakristo alimwi amiswaangano mipati. Kumiswaangano eyo balaswiilila makani aayumya-yumyaa kwiiya Magwalo antoomwe, akwaabilana luzibo amuzyakuluula zyakabacitikila bamwi alimwi akusangana abakombinyina mumupailo. Alimwi mbubonya mbuli ibanabokwabo bamumwaanda wamyaka wakusaanguna, balaswaigwaa balangizi beendeenda basiluyando, elyo mukuswaigwa oku lusyomo lwabo lulayumizyigwa. Aboobo Banakristo mazubaano babamba “itanga lyomwe asikweembela omwe.”—Johane 10:16.

Mmasimpe kuti Bakamboni ba Jehova mbantu batalondokede, mbubwena buyo mbuli bwakali beenzinyina bakusaanguna. Nokuba boobo, balabeleka calukamantano. Akaambo kaceeci, mulimo wakukambauka Bwami uli mukuzuzikizigwa munyika yoonse.—Incito 15:36-40; Ba-Efeso 4:13.

[Cifwanikiso icili apeeji 31]

Banakristo mazubaano babamba “itanga lyomwe asikweembela omwe”