Amuziswiilile Izyaamba Muuya
Amuziswiilile Izyaamba Muuya
“Matwi aako ayoomvwa ijwi kusule lyako liti, Njeeyi inzila, amweende mulinjiyo, kufumbwa ciindi nimuleya nikuba kululyo nikuba kulumwensi.”—ISAYA 30:21.
1, 2. Muunzila nzi Jehova mwaali kwaambaula abantunsi kuzwa kaindi?
INSUMBU ya Puerto Rico njoijisi muncini wa telescope mupati kapati alimwi uubeleka kabotu kwiinda yoonse mincini munyika yoonse mbwiizulwa. Kwamakumi aamyaka aali mbwaabede, basayaansi bali kusyoma kuti balakonzya kutambula milumbe kuzwa kumasena aambi aatali anyika kwiinda mukubelesya muncini oyu mupati. Pele kunyina milumbe ili boobo yakatambulwa kale. Icigambya ncakuti nkoili milumbe iizizilwe iizwa kule ikutali kooko kukkala bantunsi njakonzya kutambula umwi aumwi wesu ciindi cili coonse kakunyina kubelesya mincini iikatazya boobo. Eeyi milumbe Izwa kubusena buli kule kapati kwiinda masena oonse aazizilwe aatali aanyika. Ino milumbe iili boobo Izwa kulini, alimwi ino mbaani ibaitambula? Ino milumbe eyo yaamba nzi?
2 Imakani aamu Bbaibbele ajisi zibalo zinji zyaamba ziindi milumbe iizwa kuli Leza noyakamvwugwa abantunsi. Zimwi ziindi imilumbe eeyi yakali kuletwaa zilenge zyamuuya kazili batumwa ba Leza. (Matalikilo 22:11, 15; Zekariya 4:4, 5; Luka 1:26-28) Ijwi lya Jehova mwini lyakamvwugwa abantu kwaziindi zyotatwe. (Matayo 3:17; 17:5; Johane 12:28, 29) Kunze lyaboobo, Leza alimwi wakabandika kwiinda mubasinsimi bakwe bantunsi, ibunji bwabo bali akati kabaabo ibakalemba zintu nzyaakabalailila kwaamba kwiinda munguzu zyamuuya. Mazubaano tujisi Bbaibbele, lyalo libikkilizyaa makani aalembedwe aamilumbe eyi alimwi anjiisyo zya Jesu abasikwiiya bakwe. (Ba-Hebrayo 1:1, 2) Jehova ncobeni wali kutuma milumbe kuzilenge zyakwe, ibantunsi.
3. Ino milumbe ya Leza ijisi mulimo nzi, alimwi ino ncinzi ncotweelede kucita?
3 Imilumbe eeyi yoonse yakasololelwaa muuya kuzwa kuli Leza yaamba buyo makani masyoonto kujatikizya bubumbo bulibonya. Igaminide amakani aayandika kapati aayo aajisi mulimo mupati kujatikizya buumi bwesu lino alimwi akumbele. (Intembauzyo 19:7-11; 1 Timoteo 4:8) Jehova ubelesya milumbe eeyi kutuzyibya kuyanda kwakwe alimwi akutusololela munzila zyakwe. Ninzila yomwe oomo majwi aamusinsimi Isaya mwaali mukuzuzikizigwa aakuti: “Matwi aako ayoomvwa ijwi kusule lyako liti, Njeeyi inzila, amweende mulinjiyo, kufumbwa ciindi nimuleya nikuba kululyo nikuba kulumwensi.” (Isaya 30:21) Jehova kunyina natusungilizya kuswiilila “ijwi” lyakwe. Cili kulindiswe kutobela busolozi bwa Leza akweenda munzila njayanda. Akaambo kaceeci, Magwalo atulailila kuti twiiswiilile milumbe iizwa kuli Jehova. Ikukulwaizya kwakuti ‘amuswiilile muuya ncowaamba’ kulajanika ziindi zili ciloba mubbuku lya Ciyubunuzyo.—Ciyubunuzyo 2:7, 11, 17, 29; 3:6, 13, 22.
4. Sena ncamaanu mazubaano ikulangila kuti Leza uuyoobandika andiswe munzila yakaanzambwene kuzwa kujulu?
4 Sunu, Jehova tabandiki andiswe kuzwa kujulu cakaanzambwene. Nokuba kuciindi ca Bbaibbele, ikubandika kwamaleele kwakali kucitika buyo muziindi, zimwi ziindi mane kwakali kwiinda myaanda yamyaka buya. Kuzwa kaindi, kanjikanji Jehova wali kubandika abantu bakwe munzila zimwi zitali zyakaanzambwene. Oobo mbwacita amazubaano. Atulange-lange nzila zyotatwe oomo Jehova mwabandika andiswe sunu.
“Magwalo Aya Oonse Akazwa Kuli-Leza”
5. Ino ncibelesyo nzi ncabelesya kapati Jehova kukanana abantu sunu, alimwi ino inga twagwasigwa buti ancico?
5 Ibbaibbele ncecibelesyo cipati cibelesegwa mukukanana akati ka Leza abantunsi. Lyakazwa kuli Leza alimwi zyoonse nzyolyaamba zilakonzya kutugwasya. (2 Timoteo 3:16) Ibbaibbele lilizwide zikozyanyo zyabantu beni-beni ibakalisalila beni kuswiilila jwi lya Jehova naa kutaliswiilila. Izikozyanyo zili boobo zituyeezya ncociyandika kapati kuswiilila izyaamba muuya wa Leza. (1 Ba-Korinto 10:11) Alimwi Ibbaibbele lilijisi busongo bubeleka, litupa lulayo ndotukonzya kubelesya eelyo notuyandika kucita kusala kumwi kuyandika kapati mubuumi. Cili mbuli kuti Leza uli kusule lyesu katwaambila majwi aakuti: “Njeeyi inzila, amweende mulinjiyo.”
6. Nkaambo nzi Bbaibbele ncolisumpukide kwiinda mabbuku aambi oonse?
6 Ikutegwa tuswiilile izyaambwaa muuya mu Bbaibbele, tweelede kulibala lyoonse. Ibbaibbele talili bbuku buyo ilyakalembwa kabotu, lidumide alimwi lili akati kamabbuku aambi aaliko sunu. Ibbaibbele lyakasololelwaa muuya alimwi lijisi miyeeyo ya Leza. Ibbuku lya Ba-Hebrayo 4:12 lyaamba kuti: “Ijwi lya-Leza lili abuumi, lili anguzu, lilabosya kwiinda iceba ilijisi mabemba obile, lilayasa mane kukwaanzaanya buumi amuuya, aalo maswaanganino aazifuwa amooma, alimwi lilabeteka kuyeeya akuyanda kwamoyo.” Notubala Bbaibbele, imakani aali mulindilyo alatunjila mumizeezo mbuli buyasa panga, lilabuyubununa bukkale bwesu mbobweendelana akuyanda kwa Leza.
7. Nkaambo nzi kubala Bbaibbele ncokuyandika kapati, alimwi tukulwaizigwa kunoolibala ziindi zyongaye?
7 “Kuyeeya akuyanda kwamoyo” kulakonzya kucinca ciindi mbociya kumbele alimwi zitucitikila mubuumi zilatunyonganya—zibe zintu zibotu naa zikatazya. Ikuti Jwi lya Leza katutaliiyi ciindi coonse, imizeezo yesu, mbotuzilanga zintu alimwi ambotulimvwa kuyooleka kweendelana anjiisyo zyabunaleza. Akaambo kaceeci, Ibbaibbele litulaya kuti: “Amulisukusye nubeni na muliimvwi mulusyomo, amulilingule nubeni.” (2 Ba-Korinto 13:5) Ikuti katuyanda kuzumanana kunooswiilila izyaamba muuya, tweelede kutobela lulayo lwakubala Jwi lya Leza abuzuba.—Intembauzyo 1:2.
8. Mmajwi nzi aamwaapostolo Paulo aatugwasya mbotweelede kulilingaula kujatikizya kubala Bbaibbele?
8 Iciyeezyo ciyandika kapati kubabali ba Bbaibbele nceeci: Amujane ciindi cinji cakuzinzibala kuyeeya azintu nzyomubala! Notusoleka kutobela lulayo lwakubala Bbaibbele abuzuba, tatuyandiki kunoobala buyo zibalo cakufwambaana kakunyina kuziteelela zintu nzyotubala. Ee, ikubala Bbaibbele abuzuba kulayandika kapati, pele luyando lwesu talweelede kuba buyo lwakuyanda kweendelaamwi amulongo wakubala ngotupedwe; tweelede kubaa luyandisisyo lwini-lwini lwakuyanda kwiiya makani aajatikizya Jehova amakanze aakwe. Mumakani aaya, inga cabota kubelesya majwi aamwaapostolo Paulo kutegwa tulilingaule tobeni. Kalembela Banakristonyina, wakati: “Ndafugama kuli-Wisi, ndakomba kuti . . . Kristo akale mumyoyo yanu nkaambo kalusyomo, kuti muzyate akubombomana muluyandisyo, aboobo mulakonzya kumvwisya, antoomwe abasalali boonse, mbububede busasa abulamfu, abulamfu bwamunyika abulamfu bwakujulu, akuziba luyando lwa-Kristo ilwiinda luzibo loonse, kuti muzule luzulo loonse lwa-Leza.”—Ba-Efeso 3:14, 16-19.
9. Mbuti mbotunga twakomezya luyandisisyo lwesu mukuyiisigwaa Jehova?
9 Ee, ibamwi akati kesu tabakukkomanini pe kubala, pele bamwi mbasungu kapati kukubala. Kunyina makani ambotubede, tulakonzya kukomezya luyandisisyo lwesu lwakuyiisigwaa Jehova. Imwaapostolo Petro wakapandulula kuti tweelede kuyandisisya luzibo lwamu Bbaibbele alimwi wakalizi kuti luyandisisyo luli boobo luyandika kukomezyegwa. Wakalemba kuti: “Amukozye mbuli bavwanda kukuyandisya mukupa wamuuya uutavwelwi acintu, kuti mukomene anguwo mulufutuko.” (1 Petro 2:2) Ikulyeendelezya kulayandika kapati ikuti naa ‘tulakuyandisisya’ kwiiya Bbaibbele. Mbubwenya mbotunga twaciyandisisya cilyo ncotutazyi twamana kucilya kwaziindi zili mbozibede, kulanga kwesu kujatikizya makani aakubala alimwi akwiiya kulakonzya kucinca munzila mbotu ikuti twalyeendelezya kutobela cilengwa eco lyoonse.
“Zilyo . . . Kuciindi Ceelede”
10. Mbaani ibapanga “muzike musyomesi uucenjede,” alimwi ino Jehova ubabelesya buti sunu?
10 Inzila imbi njabelesya Jehova kukanana andiswe sunu wakayaamba Jesu kuli Matayo 24:45-47. Ooko wakaamba mbungano Yabunakristo iinanikidwe amuuya, kutegwa yaabile “zilyo . . . kuciindi ceelede.” Omwe-omwe waciinga eci wiitwa kuti ‘ngwamuŋanda’ ya Jesu. Aaba antoomwe aba “inkamu impati” ba “imbelele zimwi,” lyoonse balakulwaizigwa akusololelwa. (Ciyubunuzyo 7:9; Johane 10:16) Ibunji bwazilyo ezi zyakuciindi ceelede zilatambulwa kazili mabbuku, mbuli Ngazi Yamulindizi, magazini ya Awake! alimwi amabbuku aambi. Icakulya cakumuuya cimbi cilaabilwa kwiinda mumakani alimwi azitondezyo ciindi camiswaangano mipati, misyoonto alimwi alyamiswaangano yambungano.
11. Ino tutondezya buti kuti tulaziteelela izyaamba muuya kwiinda ‘mumuzike musyomesi uucenjede’?
11 Imakani aabilwaa “muzike musyomesi uucenjede” ngakuyumya lusyomo lwesu akuyiisya miyeeyo yesu. (Ba-Hebrayo 5:14) Ilulayo luli boobo lulakonzya kalujatikizya makani manji aakuti umwi aumwi wandiswe aabelesye mubuumi bwakwe. Alimwi ciindi aciindi tulapegwa lulayo ilugaminide mbazu zimwi zyabukkale bwesu. Ino tweelede kulubona buti lulayo olo ikuti katuziswiilila ncobeni izyaamba muuya kwiinda muciinga camuzike? Imwaapostolo Paulo wiingula kuti: “Kamubaswiililisya baalu banu, mulitesye kulimbabo.” (Ba-Hebrayo 13:17) Mmasimpe, boonse ibajatikizidwe mububambe obu mbaalumi batalondokede. Nokuba boobo, ncintu ncayandisisya Jehova ikubelesya babelesi bakwe bantunsi kuti batusololele kuciindi eci cakumamanino, nokuba kuti tabalondokede pe.
Busolozi Bwamanjezeezya Esu
12, 13. (a) Ncinzi cimbi Jehova ncaatupa nkotunga twajana busolozi? (b) Nzintu nzi izibotu imanjezeezya aabantu ibatajisi luzibo lwini-lwini lwa Jwi lya Leza nzyaanga abakulwaizya kucita?
12 Kuli cimbi Jehova ncaatupa cakutusololela—manjezeezya esu. Wakalenga muntu munzila yakuti kakonzya kuzyiba cintu ciluzi acitaluzi. Oobo mbotulengedwe. Mulugwalo ndwaakalembela ba Roma, imwaapostolo Paulo wakapandulula kuti: “Bamasi batakwe Mulao nibacita camumoyo makani aamu-Mulao, elyo aba batakwe Mulao balibeda Mulao beni. Aba balatondezya mulimo wa-Mulao uulembedwe mumyoyo yabo, nkabela kuciindi nciconya manjezeezya aabo aalo alazumina, amiyeeyo yabo ilabapa milandu nanka kubalubusya.”—Ba-Roma 2:14, 15.
13 Munzila imwi, aabo ibatamuzyi kabotu Jehova balakonzya kweendelanya miyeeyo yabo alimwi amicito anjiisyo zyabunaleza zijatikizya zintu ziluzi azitaluzi. Ciba mbuli kuti bali mukumvwa jwi litalimvwisyi kapati ilibasololela munzila iiluzi. Ikuti eci kacicitika kuli baabo ibatajisi luzibo lwini-lwini lwa Jwi lya Leza, nkokuti jwi eelyo lilalimvwisya kapati ku Banakristo bakasimpe! Mmasimpe, manjezeezyaa Munakristo aayiisidwe kabotu aluzibo lwini-lwini lwa Jwi lya Leza alimwi aabeleka kweendelana amuuya wa Jehova uusalala alakonzya kupa busolozi busyomeka.—Ba-Roma 9:1.
14. Ino manjezeezya esu aayisidwe njiisyo zyamu Bbaibbele inga atugwasya buti kutobela busolozi bwamuuya wa Jehova?
14 Imanjezeezya mabotu, nkokuti aayiisidwe njiisyo zyamu Bbaibbele alakonzya kutuyeezya kujatikizya nzila imuuya mouyanda kuti tweende. Kuli ziindi zimwi eelyo Magwalo alimwi amabbuku aapandulula Bbaibbele naataambi cacigaminina kujatikizya bukkale bumwi mbotujisi. Nokuba boobo, imanjezeezya esu akakonzya kupa kucenjezya kumwi, ikutucenjezya kuti tuli mubukkale bumwi bunga bwatunjizya muntenda. Muziindi zili boobu, ikukazya caamba manjezeezya esu inga kwaamba kuti tatuli mukuswiilila izyaambwaa muuya wa Jehova. Kulubazu lumwi, kwiinda mukwiiya kusyoma manjezeezya esu aayiisidwe munzila ya Bunakristo, zintu zyoonse nzyotunoocita zinooli zyamaanu neliba leelyo nokutakwe busolozi bugaminide ibulembedwe. Pele cilayandika kapati lyoonse kunooyeeya kuti eelyo nokutakwe njiisyo naa mulawo uuli woonse uuzwa kuli Leza, inga taceeleli pe kusinikizya zyaamba manjezeezya esu kuti zicitwe a Banakristoma mumakani aakulisalila buyo tobeni.—Ba-Roma 14:1-4; Ba-Galatiya 6:5.
15, 16. Ncinzi cinga capa kuti manjezeezya esu atabeleki kabotu, alimwi ino inga twalikwabilila buti kuti eco citatucitikili?
15 Imanjezeezya aasalala alimwi aayisidwe njiisyo zyamu Bbaibbele ncipego cibotu kuzwa kuli Leza. (Jakobo 1:17) Pele cipego eci tweelede kucikwabilila kuzintu zibyaabi ikuti katuyanda kuti cizumanane kubeleka kabotu kacili cibelesyo citucenjezya kujatikizya ntenda yamubukkale. Zilengwa zyankotuzwa izicitwaa bantu azyakasiya basikale iziteendelani azyeelelo zya Leza zilakonzya kunyonganya mane akulesya manjezeezya esu kunootwiibalusya kutobela nzila iiluzi ikuti naa twazitobela. Tulakonzya kwaalilwa kwaalanga munzila iiluzi makani amwi alimwi mane tulakonzyaa kulyeena kwiinda mukusyoma kuti cintu cimwi cibyaabi ncibotu.—Amweezyanisye Johane 16:2.
16 Ikuti twazumanana kutaswiilila kucenjezya kwamanjezeezya esu, ijwi lyawo linooyaabuceya kusika nkolyuumunina limwi, elyo tuyooleka kuziyoowa zintu zibi. Sintembauzyo wakabaamba bantu bali boobo naakati: “Moyo wabo ulizwide mafuta.” (Intembauzyo 119:70) Bamwi ibatakuswiilili kukulwaizya kwamanjezeezya aabo inga balaleka kuyeeya kabotu. Tabaceendelezyegwi aanjiisyo zyabunaleza alimwi balakakilwa kusala camaanu. Ikutegwa tutabi muciimo cili boobo, tweelede kunoofwambaana kapati kuswiilila busolozi bwamanjezeezya esu aa Bunakristo neliba leelyo nokuboneka kuti twaambo tujatikizidwe tatuli tupati pe.—Luka 16:10.
Balaacoolwe Aabo Ibaswiilila Akucita
17. Ino tuyoolongezyegwa buti ikuti katuswiilila ‘ijwi lili kusule lyesu’ alimwi akutobela manjezeezya esu aayiisidwe njiisyo zyamu Bbaibbele?
17 Mbotuyaabwiizyibila inzila eyo yakuswiilila ‘ijwi lili kusule lyesu’ mbubonya mbuli mbolyaambidwe kwiinda mu Magwalo alimwi amumuzike musyomesi uucenjede alimwi ambotukutobela kwiibalusigwa kucitwaa manjeezeezya esu aayiisidwe njiisyo zyamu Bbaibbele, Jehova uyootulongezya amuuya wakwe. Mpoonya muuya uusalala uyootukulwaizya kutambula alimwi akuteelelesya zyoonse Jehova nzyatwaambila.
18, 19. Mbuti busolozi bwa Jehova mbobukonzya kutugwasya mumulimo wesu alimwi amubukkale bwesu?
18 Alimwi muuya wa Jehova uyootuyumya kuti tube basongo alimwi basicamba mubukkale buli boonse bukatazya. Mbubwenya mbocakacitikila baapostolo, muuya wa Leza ulakonzya kukulwaizya miyeeyo yesu akutugwasya kucita alimwi akwaamba zintu zyeendelanaa njiisyo zyamu Bbaibbele. (Matayo 10:18-20; Johane 14:26; Incito 4:5-8, 13, 31; 15:28) Imuuya wa Jehova alimwi akusoleka kwesu ziyoopa kuti tuzwidilile eelyo notucita kusala kumwi kupati mubuumi, ziyootupa busicamba bwakutobelezya makani aayo aasalwa. Mucikozyanyo, ambweni muyeeya mbomunga mwacinca bukkale bwanu kutegwa mujane ciindi cinji cakucita zintu zyakumuuya. Ambweni kuli kusala kumwi kupati kwalo kujatikizya buumi bwanu nkomuyanda kucita, mbuli kusala mweenzinyoko wamulukwatano, ikulanga-langa mbounga wamugwasya mulimo ngomuyaandootalika naa kuula ŋanda. Muciindi cakulekela kuyeeya kwesu kwabuntunsi kuti kutweendelezye mukusala oko, tweelede kuswiilila izyaamba muuya wa Leza alimwi akucita kweelana abusolozi bwawo.
19 Ilulayo alimwi aziyeezyo nzyotutambula kuzwa ku Banakristoma alimwi abaalu zilatugwasya kapati. Pele tatweelede kuti lyoonse katulindila bamwi kutwaambila makani amwi ngotweelede kubikkila maanu. Ikuti katwiizyi nzila mbotu njotweelede kutobela alimwi akucinca nkotweelede kucita mukuyeeya kwesu alimwi abukkale bwesu kutegwa tukkomanisye Leza, atucite obo. Jesu wakati: “Mwanoozizi zintu ezi, muli acoolwe mwanoozicita.”—Johane 13:17.
20. Ncilongezyo nzi ncobajana aabo ibaliswiilila ‘ijwi lili kusule lyabo’?
20 Ee, ikutegwa bazyibe mbobanga bamukkomanisya Leza, Banakristo tabeelede kumvwa jwi lini kuzwa kujulu nokuba kuswaigwaa mungelo. Balilongezyedwe akaambo kakuti balijisi Jwi lya Leza lilembedwe alimwi abusolozi buzwa kuciinga cabananike anyika. Ikuti babikkila maanu kukutobela ‘ijwi eli lili kusule lyabo’ alimwi abusolozi bwamanjezeezya aabo aayiisidwe njiisyo zyamu Bbaibbele, bayoozwidilila mukucita kuyanda kwa Leza. Mpoonya bayoolibonena ncobeni cisyomezyo camwaapostolo Johane kacizuzikizigwa eco cakuti: “Oyo uucita makanze aa-Taata ulakalilila kukabe kutamani.”—1 Johane 2:17.
Ikwiinduluka
• Nkaambo nzi Jehova ncabandikaa bantunsi mbaakalenga?
• Ino bubambe bwakubala Bbaibbele lyoonse inga bwatugwasya buti?
• Ino malailile aazwa kuciinga camuzike tweelede kwaatambula buti?
• Nkaambo nzi ncotuteelede kuleka kuswiilila kukulwaizya kwamanjezeezya aayiisidwe njiisyo zyamu Bbaibbele?
[Mibuzyo yaciiyo]
[Cifwanikiso icili apeeji 24]
Ibantu tabayandiki mincini iisumpukide buya kutegwa batambule milumbe kuzwa kuli Leza
[Kulumba]
Courtesy Arecibo Observatory/David Parker/Science Photo Library
[Cifwanikiso icili apeeji 26]
Jehova ulatukananina kwiinda mu Bbaibbele alimwi akwiinda mu “muzike musyomesi uucenjede”