Atusumpule Njiisyo Zyabunaleza

“Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako.”—TUSIMPI 3:5, 6.

1. Muunzila nzi motubikkilidwe luzibo lwabantunsi lunji sunu kwiinda lyoonse?

SUNU kuli miteende iitandila ku 9,000 iisimbwa akumwaigwa buzubaa buzuba munyika yoonse mbwiizulwa. Amwaka ku United States kulikke kulamwaigwa mabbuku mapya aatandila ku 200,000. Kweelana akubala kumwi kwakacitwa, kuzyoosika mu March 1998, kwakali masena aakubala makani aa Internet aatandila kutuulunzuma tuli 275. Kwaambwa kuti mweelwe oyu uli mukuyungizyigwaa masena aambi aali tuulunzuma tuli 20 mwezi amwezi. Kunyina ciindi cimbi bantu nobakajisi makani aabandika zintu zyoonse mbuli sunu. Nokuba kuti kuba mubukkale buli boobu kulagwasya munzila zimwi, ikuvwuzyanya kwamakani kuli boobu kwaleta mapenzi.

2. Mmapenzi nzi aakonzya kujanika kwiinda mukubaa makani manji kapati?

² Ibantu bamwi baba bazike kukulanga-langa makani aya, lyoonse bayanda buyo kulikondelezya kwiinda mukujana makani mapya kumwi kabalekelezya zintu ziyandika kapati. Bamwi baba buyo aluzibo luniini lwazintu zikatazya kumvwisya kumane balibona kuti mbaahaazibwene. Kabasyomede luzibo lusyoonto ndobajisi, balakonzya kucita zintu zimwi zikonzya kubaletela mapenzi ilwabo naa bamwi. Alimwi icintu ciliko lyoonse nintenda yakubala makani aakubeja naa aataluzi. Kunyina nzila iisyomeka yakusinizya kuti imakani aaya manji boobu aliluleme alimwi ali kabotu.

3. Nkucenjezya nzi kujatikizya kutobela busongo bwabantunsi ikujanika mu Bbaibbele?

³ Ikuyandisisya kuzyiba cali cilengwa cabantunsi kuzwa kaindi. Intenda zyakusowa ciindi cinji mukuyandaula makani aatagwasyi naaba yaayo aakonzya kutuletela mapenzi yakazyibwa ikaindi mumazubaa Mwami Solomoni. Wakati: “Cenjela . . . Kulemba mabbuku manji takumani, akwiiya kunji kulakataazya mubili.” (Mukambausi 12:12) Nokwakainda myaanda yamyaka, mwaapostolo Paulo wakalembela Timoteo kuti: “Kobamba makani aabikidwe kulinduwe, futatila kwaamba kwakasankusanku akukazyanya kwaceeco caambwa cakubeja kuti nduzibo, ndobaamba bamwi kuti tuli alo, anu balileede kulusyomo.” (1 Timoteo 6:20, 21) Inzya, Banakristo sunu beelede kutantamuka mizeezo mibyaabi.

4. Ninzila nzi yomwe mbotunga twatondezya kuti tulamusyoma Jehova anjiisyo zyakwe?

⁴ Alimwi ibantu ba Jehova inga bacita kabotu ikuti batobela majwi aa Tusimpi 3:5, 6 aakuti: “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako.” Ikusyoma Jehova kubikkilizya kukazya mizeezo iili yoonse iyiimpene a Jwi lya Leza, kunyina makani naa nkuyeeya kwesu naa kwabantuma. Ikutegwa tukwabilile bukkale bwesu bwakumuuya, cilayandika kapati kuti tuyiisye miyeeyo yesu ikutegwa tuzyibe makani mabyaabi akwaafwutatila. (Ba-Hebrayo 5:14) Atubandike masena amwi ikuzwa makani aali boobo.

Inyika Yeendelezyegwaa Saatani

5. Nkuukuli ikuzwa mizeezo mibyaabi, alimwi ino nguni mweendelezi wayo?

⁵ Inyika mbobusena buzwide mizeezo mibyaabi kapati. (1 Ba-Korinto 3:19) Kapailila basikwiiya  bakwe, Jesu Kristo wakakumbila Leza kuti: “Nsikumbili kuti ubagwisye munyika, pele kuti ubavune kulooyo mubi.” (Johane 17:15) Ikulomba kwa Jesu nkwaakalomba kuti basikwiiya bakwe bakwabililwe “[ku]mubi” kutondezya nguzu Saatani nzyajisi munyika. Taacaambi kuti tuyookwabililwa kukuyunga kwanyika ino kubyaabi akaambo kakuti tuli Banakristo. Johane wakalemba kuti: “Tulizi kuti tuli bakwe Leza, nikuba kuti bantunsi boonse mba Mubi.” (1 Joni 5:19, Ci) Kulangilwa kuti Saatani amadaimona aakwe bayooizuzya nyika yoonse amakani mabyaabyi ikapati kuciindi cino cakumamanino.

6. Ino kulikondelezya kwanyika inga kwatucita buti kuba bantu batayoowi bukkale bubyaabi?

⁶ Alimwi kulangilwa kuti imakani mabyaabi aya amwi alakonzya kaalibonya kuti ali buyo kabotu. (2 Ba-Korinto 11:14) Mucikozyanyo, amutelaike makani aakulikondelezya aazipekupeku zitondezyegwaa TV, mabbasikopo, nyimbo amabbuku alimwi amamagazini. Ibanji balizyi kuti kanjikanji ikulikondelezya kunji ikucitwa kusumpula zintu zibyaabi kapati mbuli bwaamu, kulwana alimwi akubelesya misamu munzila iitali kabotu. Iciindi cakusaanguna ibantu nobatondezyegwa musyobo wakulikondelezya umwi mubyaabi kapati, balatilimuka. Pele ikuti kulangilila zintu zili boobo kakucitwa lyoonse, kulakonzya kupa kuti muntu aleke kuziyoowa. Ikulikondelezya kusumpula mizeezo mibyaabi tutakuboni kuti kunyina mbokubede naa ikuti kunyina penzi.—Intembauzyo 119:37.

7. Mbusongo nzi bwabantunsi ibunga bwamana lusyomo ndotujisi mu Bbaibbele?

⁷ Amulange-lange busena bumbi kulangilwa kuzwa makani mabyaabi—imizeezo iitalivwulili iimwaigwaa basayaansi abasilwiiyo lwaatala kapati ibakazya kululama kwa Bbaibbele. (Amweezyanisye Jakobo 3:15.) Imakani aali boobo alajanwa lyoonse mumamagazini aadumide kapati amumabbuku alimwi alakonzya kumana lusyomo ndotujisi mu Bbaibbele. Ibantu bamwi balalidunda kuti bazwidilila kukazya kululama kwa Jwi lya Leza kwiinda mukulengelezya kutamani nkobacita. Intenda iikozyenye ayeeyi yakaliko kumazuba aabaapostolo, mbubwenya majwi aamwaapostolo Paulo mbwaatondezya aakuti: “Amucenjele kuti kutabi muntu naba omwe uumuyunga kukusongwaalasongwaala akukwaamba makani aatawo aazwa kutunsiyansiya twabantu, aazwa kuzilenge zitaanzi, aatazwi kuli-Kristo pe.”—Ba-Kolose 2:8.

Basinkondo Bakasimpe

8, 9. Ino luleyo lulibonya buti mazubaano?

⁸ Basiluleyo balakonzya kuleta ntenda iimbi kubukkale bwesu bwakumuuya. Imwaapostolo Paulo wakasinsima kuti iluleyo lwakali kuzoobako akati kabantu bakali kulyaamba kuti Mbanakristo. (Incito 20:29, 30; 2 Ba-Tesalonika 2:3) Mbubwenya mbuli mbwaakasinsimide, iluleyo lupati lwakapa kuti kutalike Kristendomu ibaapostolo nobakamaninina kufwa. Sunu kunyina luleyo lupati lucitika akati kabantu ba Leza. Nokuba boobo, nkobali bamwi ibazanduka, alimwi bamwi akati kabaaba bakanzide kusampula Bakamboni ba Jehova kwiinda mukumwaya makani aakubeja aapilingene. Bamwi babeleka aankamu zimwi mukukazya bukombi busalala. Mukucita boobo, batobela siluleyo mutaanzi, Saatani.

⁹ Basiluleyo bamwi bali mukubelesya nzila zisiyene-siyene zyamuli sikapepele, kubikkilizyaa Internet ikutegwa bamwaye makani aakubeja kujatikizya Bakamboni ba Jehova. Akaambo kaceeci, ibantu babombe myoyo nobavwuntauzya kujatikizya zintu nzyotusyoma, balakonzya kuswaanganyaa makani aakubeja aakamwaigwaa basiluleyo. Mane a Bakamboni bamwi cakutazyiba baabala makani aaya mabyaabi. Kunze lyaboobo, ciindi aciindi basiluleyo balajatikizyigwa mumapulogilamu aa TV naa aawailesi. Ino ninzila nzi yabusongo njotweelede kutobela akaambo kamakani aya?

10. Nzintu nzi zyabusongo nzyotunga twacita kujatikizya kumwaigwa kwamakani aakubeja aabasiluleyo?

¹⁰ Imwaapostolo Johane wakalailila Banakristo kuti batanikutambuli basiluleyo mumaandaabo. Wakalemba kuti: “Kuti umwi waboola kuli ndinywe kataiisyi eezi, mutamutambuli muŋanda yanu. Mutamujuzyi akumujuzya. Ooyo uumujuzya ulazumina micito yakwe mibi.” (2 Joni 10, 11, BT) Ikweeleba kuyanzana munzila ili yoonse abalwani aba kuyootukwabilila kukunyonganizigwaa  mizeezo yabo mibyaabi. Ikuswiilila naa kubala njiisyo zyabasiluleyo kwiinda munzila zyamazubaano zyakumwaya makani ncimwi buyo akutambula siluleyo wini mumaanda esu. Tutazumizyi kuyandisisya kuziba kutoongelezya kunjila mubukkale bwamapenzi buli boobo!—Tusimpi 22:3.

Mumbungano

11, 12. (a) Nkuukuli kwakali kuzwa mizeezo mibyaabi mumbungano yamumwaanda wakusaanguna? (b) Muunzila nzi Banakristo bamwi mobakakakilwa kusumpula njiisyo zyeendelanaa bukombi bwabunaleza?

¹¹ Alimwi amulange-lange busena bumbi kunga kwazwa mizeezo mibyaabi. Nokuba kuti inga katakanzide kuyiisya zintu zyakubeja, Munakristo uulyaabide ulakonzya kubaa cilengwa cakukanana majwi mabi aayasa. (Tusimpi 12:18) Akaambo kakuti tatulondokede, toonse zimwi ziindi tuyoolubizya mumajwi ngotukanana. (Tusimpi 10:19; Jakobo 3:8) Kulangilwa kuti, kuciindi camwaapostolo Paulo kuli bantu bamwi mumbungano ibakakakilwa kweendelezya lulimi lwabo, aboobo bakajatikizigwa mumakani aakuzwangana kwiinda mukubelesya majwi. (1 Timoteo 2:8) Kuli bamwi ibakali kulisyoma kapati mumizeezo kuti bakaliluzi alimwi mane bakabukazya bweendelezi bwakajisi Paulo. (2 Ba-Korinto 10:10-12) Imuuya uuli boobo wakabusya mazwanga aatakeelede.

¹² Zimwi ziindi ikuzwangana oku kwakakomena mane kwakali kuba “kunyemezyanya akati kabantu bali aamizeezo iisofweede,” calo cakanyonganya luumuno lwambungano. (1 Timoti 6:5, BT; Ba-Galatiya 5:15) Kujatikizya bantu bakaleta mazwanga aaya, Paulo wakalemba kuti: “Kwanooli muntu uufundisya bumbi, kufundisya kutajanene amakani aaelede ngaakaamba Mwami wesu Jesu Kristo alwiisyo lwabukombi bwinibwini, oyo walisumpula taakwe ncazi. Moyo wakwe uli abulwazi bwakuyandisya ibuzyanyo ankondo zyamajwi, nkokuzwida ibbivwe, alukazyanyo, amajwi aakusampaula, akweezeezya kubi.”—1 Timoteo 6:3, 4.

13. Ino bunji bwa Banakristo bamumwaanda wamyaka wakusaanguna bakajisi bukkale buli buti?

¹³ Pele kuciindi cabaapostolo, Banakristo banamunji bakali kusyomeka alimwi lyoonse bakali kubikkila maanu kumulimo wakukambauka makani mabotu aa Bwami bwa Leza. Bakajisi bubi ‘kuswaya bamusyaala abamukabafu mumapenzi aabo’ alimwi bakaliyobola “cakutaba akabala nikaba komwe kaansi,” kunyina nobakasowa ciindi cabo kukazyanya aamakani aanyina mpindu. (Jakobo 1:27) Bakakweeleba ‘kweendaa bamineme’ nomuba mumbungano ya Bunakristo ikutegwa batanyonganyi bukkale bwabo bwakumuuya.—1 Ba-Korinto 15:33; 2 Timoteo 2:20, 21.

14. Ino kupana maanu ikuli kabotu inga kwacinca buti kuba makani aakuzwangana imabyaabi ikuti tiitwacenjela?

¹⁴ Mbubwenya buyo, ibukkale bupandulwidwe mumuncali wa 11 tabudumide pe mumbungano zya Bakamboni ba Jehova sunu. Nokuba boobo, cilainda kubota ikuti twazyibila limwi kuti ikukazyanya kuli boobo ikunyina mpindu kulakonzya kucitika. Ee, cili buyo kabotu kubandika zibalo zyamu Bbaibbele alimwi akutelaika kujatikizya mbazu zimwi zyabukkale zilangilwa munyika mpya yakasyomezyegwa izitana kuyubununwa. Alimwi kunyina cilubide pe mukupana maanu kweelana umwi aumwi mbwalimvwa kujatikizya zintu zimwi, mbuli zyakusama akulibamba naa makani aakusala zyakulikondelezya.  Pele ikuti mizeezo yesu twaicita kuba njiisyo alimwi katunyema eelyo bamwi nobatazuminizyi nzyotuyeeya kuti zililuzi, imbungano inga yaile kwaandaana akaambo kamakani aatali amapati pe. Imakani aatalika kaatali mapati alakonzya kuba mabyaabi cini-cini.

Ikukwabilila Lusyomo Lwesu

15. Ino “mafundisyo aabadaimona” inga abunyonganya buti bukkale bwesu bwakumuuya, alimwi ndulayo nzi lupedwe mu Magwalo?

¹⁵ Imwaapostolo Paulo ucenjezya kuti: “Muuya waamba ncobeni kuti kuciindi ciciza bamwi bayookuzwa kulusyomo, bakagame kumvwa myuuya yakweena amafundisyo aabadaimona.” (1 Timoteo 4:1) Inzya, imizeezo mibyaabi iletela ntenda ini-ini. Akaambo kaceeci, Paulo wakakombelezya mulongwaakwe ngwaakali kuyandisya Timoteo kuti: “Yebo Timoteo, kobamba makani aabikidwe kulinduwe, futatila kwaamba kwakasankusanku akukazyanya kwaceeco caambwa cakubeja kuti nduzibo, ndobaamba bamwi kuti tuli alo, anu balileede kulusyomo.”—1 Timoteo 6:20, 21.

16, 17. Ncinzi Leza ncaatupa, alimwi ino tweelede kucibamba buti?

¹⁶ Ino mbuti mbotunga twagwasigwa sunu akucenjezya oku kwaluyando? Timoteo wakapedwe cintu cimwi—icintu cilaampindu kapati kuti acilanganye akucikwabilila. Ino cakali cinzi? Paulo upandulula kuti: “Kojatisya majwi menimeni oonse ngowakamvwa kulindime, alusyomo akuyandana kuli muli-Kristo Jesu. Cintu eco cibotu ncowakapegwa, kocibamba kabotu kunguzu zya-Muuya Uusalala uutukalilide mukati.” (2 Timoteo 1:13, 14) Inzya cintu ca Timoteo cibotu cakali kujatikizya “majwi menimeni,” ‘kufundisya kujatene amakani aayelede aalwiisyo lwabukombi bwinibwini.’ (1 Timoteo 6:3) Kweelana amajwi aaya, Banakristo sunu bakanzide kukwabilila lusyomo lwabo alimwi amakani aakasimpe ngobapedwe.

¹⁷ Ikukwabilila cintu eco cibotu kubikkilizya kubaa bubambe bubotu bwakwiiya Bbaibbele alimwi akuzumanana mumupailo, kumwi ‘katucitila bantu boonse milimo mibotu, pele kwaambisya kuli baabo baciinga calusyomo.’ (Ba-Galatiya 6:10; Ba-Roma 12:11-17) Alimwi Paulo wazumanana kulaya ategwa: “Kogamine kutobela bululami, akukomba, alusyomo, aluyandano, alukakatilo, alulibombyo. Yasana lumamba lubotu lwalusyomo, jatisya buumi butagoli, mbowakaitilwa, niwakalilungulula lulilungululo lubotu kubusyu bwabantu boonse.” (1 Timoteo 6:11, 12) Ikubelesya Paulo nkwakabelesya twaambo twakuti “yasana lumamba lubotu” alimwi akuti “jatisya” tulaasalazya makani aakuti tweelede kukazya zintu zibyaabi mubukkale bwesu bwakumuuya cabusungu alimwi katuyandide kucita boobo.

Ikuyandika Kwabupampu

18. Ino zintu inga twazilanga buti munzila ya Bunakristo yeelede notulanga-langa makani aamwaigwa?

¹⁸ Ee, notuyasana lumamba lubotu lwalusyomo, kuyandika bupampu. (Tusimpi 2:11; Ba-Filipi  1:9) Mucikozyanyo, tacili camaanu kulekela limwi kwaasyoma makani oonse aamwaigwa. (Ba-Filipi 4:5; Jakobo 3:17) Taili mizeezo yoonse iikazya Jwi lya Leza. Jesu wakalailila kuti bantu baciswa bakeelede kuya kubasilisi beelede—imulimo uutola ciindi kwiiya. (Luka 5:31) Nokuba kuti imisamu yabusilisi tiiyakasumpukide kuciindi ca Jesu, walo wakazuminizya kuti kuli lugwasyo lukonzya kujanwa kuzwa kumusilisi. Banakristo baalanga munzila yeelede makani aamunyika, pele balakaka kujatikizyigwa muzintu zinga zyabanyonganya munzila yakumuuya.

19, 20. (a) Ino baalu babeleka buti cabupampu nobagwasya baabo ibakanana makani mabyaabi? (b) Ino mbungano icita nzi kujatikizya baabo ibazumanana kusumpula njiisyo zyakubeja?

¹⁹ Baalu abalo bayandika kubaa bupampu eelyo nobayandika kugwasya bamwi ibakanana makani mabi. (2 Timoteo 2:7) Zimwi ziindi, basimbungano balakonzya kujatikizyigwa mukukazyanya akuzwangana muzintu zyakuyeeyela buyo. Ikutegwa bakwabilile lukamantano lwambungano, baalu beelede kwaalanganya mapenzi aali boobo cakufwambaana. Pele nobacita boobo tabeelede kuyeeyela ibanyina mizeezo mibyaabi alimwi tabeelede kufwaambana kubabona kuti mbaasiluleyo.

²⁰ Paulo wakapandulula ciimo ceelede kubako nokupegwa lugwasyo. Wakati: “Bakwesu, kuti muntu wajanwa uli mukubisya, nywebo nomuli basimuuya muleelede kumuboozya, nkabela nimucita obo muleelede kuba amyoyo iibombede.” (Ba-Galatiya 6:1) Kagamide Banakristo ibadooneka, Juda wakalemba kuti: “Amubeengelele aabo bacidonaika. . . . Mubayokole cakubakwempa kuzwa kumulilo.” (Judi 22, 23, Ci) Pele naa muntu oyo ucizumanana kusumpula njiisyo zyakubeja neliba leelyo naapegwa lulayo kwaziindi zili mbozibede, baalu beelede kubweza ntaamu ikutegwa bakwabilile mbungano.—1 Timoteo 1:20; Tito 3:10, 11.

Ikuzuzya Mizeezo Yesu Azintu Zitembaulika

21, 22. Nzintu nzi nzyotuyandika kusala, alimwi ino mizeezo yesu tweelede kwiizuzya nzi?

²¹ Imbungano Yabunakristo taijatikizigwi mumajwi mabyaabi “avwemauka mbuli cuute.” (2 Timoteo 2:16, 17; Tito 3:9) Eci balacicita eelyo makani aayo naajatikizya “busongo” bwanyika, naamwaigwaa basiluleyo anaali makani mabyaabi aambwaa bamwi mumbungano. Nokuba kuti ikuyandisisya kwiiya zintu zipya kubotu kulagwasya, ikutalyeendelezya mukuyandisisya oko kulakonzya kutujanya mizeezo mibyaabi kapati. Tulaazi makanze aa Saatani mbwaabede. (2 Ba-Korinto 2:11) Tulizi kuti ulimukusolekesya kapati kutusinkilila ikutegwa tulengaane mumulimo ngotucitila Leza.

²² Mbotuli babelesi babotu, atusumpule njiisyo izyeendelana bukombi bwabunaleza. (1 Timoteo 4:6) Atucibelesye camaanu ciindi ncotujisi kwiinda mukusala makani ngotuyanda kuzyiba. Ikuti twacita oobo, tatukazundwi pe amakani aamwaigwa aajisi miyeeyo ya Saatani. Inzya, atuzumanane kuziyeeyesya “kufumbwa zintu zisinizye, kufumbwa zintu zilemekeka, kufumbwa zintu ziluleme, kufumbwa zintu zisalala, kufumbwa zintu ziyandika, kufumbwa zintu zili ampuwo imbotu, na kuli ciyanza niciba cimwi cibotu nanka cintu niciba cimwi citembaulika.” Ikuti twazuzya mizeezo yesu amyoyo azintu zili boobo, Leza siluumuno uyooba andiswe.—Ba-Filipi 4:8, 9.

Ino Ncinzi Ncotwaiya?

• Muunzila nzi busongo bwanyika mobunga bwanyonganya bukkale bwesu bwakumuuya?

• Ncinzi ncotunga twacita kutegwa tulikwabilile kumakani mabyaabi aabasiluleyo?

• Nkukanana nzi kweelede kweelebwa mumbungano?

• Ino kulanga zintu munzila yeelede kwa Bunakristo kutondezyegwa buti kujatikizya makani aaliko aatalivwulili?

[Mibuzyo yaciiyo]

[Cifwanikiso icili apeeji 21]

Ibunji bwamabbuku amamagazini aadumide alakazyanya azyeelelo zyesu zya Bunakristo

[Cifwanikiso icili apeeji 22]

Banakristo balakonzya kupana mizeezo kakunyina kwiicita kuba milawo buya