Bwiinga Bwalukkomano Ibupa Bulemu Kuli Jehova

Welsh Alimwi A Elthea Bakakwatana Ku Soweto Mucisi Ca South Africa Mu 1985. Lyoonse Balazilanga Zifoto Zyabo Amwanaabo Musimbi Wazina Lya Zinzi Nzibakafotolwa Buzuba Bwabwiinga Bwabo Calo Cipa Kuti Kababuyeeya Buzuba Obo Bwalukkomano. Zinzi Ulayandisya Kuziba Beenzu Bakatambidwe Kubwiinga Oobu Alimwi Ulakondwa Kulanga Zifoto Zitondezya Banyina Kabasamide Kabotu Mubuzuba Oobo.

OOBU bwiinga bwakatalika a makani aalukwatano akapedwa muŋanda yabuleya ku Soweto. Mpoonya bakubusi basikwiimba Ibanakristo bakaimba nyimbo zyakutembaula Leza cakweendelana mumajwi one. Kumanawaawo beenzu bakatalika kulya kumwi ooku inyimbo zya malimba zyateepu zya Bwami kazilila kabotu-kabotu caansaansi. Kunyina makoko akaliko, alimwi nyimbo teezyakali kusabila alimwi kwakanyina kuzyana. Muciindi caboobo, ibantu boonse bakakondwa kuyanzana antoomwe akulumbaizya basikukwatana. Zyoonse zintu zyakacitwa mumawoola otatwe. Mwaalu umwi Munakristo wazina lyakuti Raymond wakati: “Obo bwakali bwiinga bubotu mbondinooyeeya lyoonse.”

Nobwakacitika bwiinga oobu, ba Welsh alimwi a Elthea bakali babelesi balisungwide kumutabi wa Watch Tower Bible and Tract Society waku South Africa. Teebakakonzya kucita pobwe pati liinda waawo. Ibanakristo bamwi basala kuleka mulimo waciindi coonse akutalika mulimo wakumubili kutegwa bakonzye kujana zyoonse ziyandika kubwiinga busumpukide. Pele ba Welsh alimwi a Elthea kunyina a mbobalimvwa kumakani akucita pobwe isyoonto buyo nkaambo lyakabapa kuti bazumanane kubelekela Leza mumulimo waciindi coonse kusikila leelyo nibakazi kubaa mwana Zinzi.

Ino mbuti kuti basikukwatana nibasala kuti kubwiinga bwabo kukabe nyimbo zitali zya Bunakristo alimwi akuzyana? Ino mbuti naa basala kuti kukabe makoko aindene-indene? Ino mbuti naa kabakonzya kucita pobwe pati alimwi lisumpukide? Inga basinizya buti kuti bwiinga oobu bunookkomanisya alimwi bweelela bakombi ba Leza? Eeyi mmibuzyo iiyandika kulanga-langa kabotu, nkaambo Ibbaibbele lyaamba kuti: “Kufumbwa zintu nzimucita, nikuba kulya nikuba kunywa niciba cintu cimwi, amuzicite zyoonse cakuti kube bulemu kwa-Leza.”—1 Ba-Korinto 10:31.

Ikweeleba Budakwi

Cilakatazya kweezyeezya bwiinga butakondelezyi. Pele kuli mapenzi mapati kuti naa mwaciindizya kukondwa alimwi akutalyeendelezya mubudakwi. Kubwiinga bunji butali bwa Bakamboni, kuli zintu zinji zicitika zitapi bulemu kuli Leza. Atwaambe mbuli kunywa bukoko kusikila nkobakolwa bantu kulidumide kapati. Cilausisya kuti mumwi mubwiinga bwa Banakristo zintu zili boobu zyacitika.

Ibbaibbele licenjezya kuti “zyakunywa zikola zilapilinganya.” (Tusimpi 20:1) Ibbala lya Cihebrayo lisanduludwe kuti “kupilinganya” lyaamba “kuyobeka kapati.” Kuti bukoko kabukonzya kupa kuti muntu omwe ayobeke, amwezeezye mbobukonzya kucitya bantu banji babungene alimwi ibali mukuciindizya kunywa bukoko! Masimpe ziindi eezi inga zyategwa ‘nzyakukolwa abudakwi azimwi zili boobo’ zyaambidwe mu Bbaibbele kuti “milimo yanyama.” Micito iili boobu ipa kuti muntu uuli woonse uteempwi ateeleli kuyookona buumi butamani mubweendelezi bwa Bwami bwa Leza.—Ba-Galatiya 5:19-21.

 Ibbala lya Cigiliki lyakuti “budakwi” lyakabelesegwa kupandulula kukuyobeka kwakwiimba akuzyana alimwi akulizya nyimbo cakusabila kwakali kucitwaa bakubusi bakakoledwe mumigwagwa. Ikuti bukoko kabunyugwa kufwumbwa aumwi mbwayanda alimwi akuti naa nyimbo kazililisya akuzyana kakuzyanwa akulikwaya aumwi mbwayanda, kuletela penzi pati akuti ciindi eco ciyooba mbuli cabudakwi. Muciimo cili boobu, ibakompeme munzila yakumuuya balakonzya kusunkwa kucita milimo imwi yanyama mbuli “bwaamu, busofwaazi, zisusi zibi [naa kutalika kunyemezyanya.]” Ino ncinzi cinga cacitwa kutegwa eeyi milimo yanyama itanyonganyi lukkomano lwabwiinga bwa Bunakristo? Ikutegwa twiingule mubuzyo ooyu, atulange-lange ncolyaamba Bbaibbele kujatikizya bwiinga bumwi.

Ibwiinga Jesu Nkwaakajanika

Jesu alimwi abasikwiiya bakwe bakatambwa kubwiinga ku Kana mu Galilaya. Bakazumina kuunka kubwiinga oobu alimwi Jesu wakagwasilizya kuti ciindi eco cibe cakukondwa. Waini niwakabamanina, Jesu kwiinda mumaleele wakababambila uumbi imubotu kapati. Bwiinga nibwakamana, waini wakacaala kumamanino abwiinga wakabelesegwaa sibwiinga antoomwe abamukwasyi wakwe kabakkomene.—Johane 2:3-11.

Tulakonzya kwiiya ziiyo zinji kubwiinga Jesu nkwaakajanika. Kusaanguna tubona kuti Jesu abasikwiiya bakwe kunyina nibakaunka kupobwe lyabwiinga kakunyina kutambwa. Ibbaibbele lilacisalazya kuti bakatambwa buya. (Johane 2:1, 2) Mbubonya buyo amuzikozyanyo zyobile zyabwiinga, Jesu cakwiindulula-indulula wakaamba kuti kwakali beenzu ibakajanika a kaambo kakuti bakatambwa.—Matayo 22:2-4, 8, 9; Luka 14:8-10.

Mumanyika amwi ncilengwa buya kubanyenzi boonse kuunka kubwiinga kunyina makani naa bakatambwa naa pe. Nokuba boobo, eeci ciletela penzi lyamali. Inga capa kuti basikweeba ibatavwubide batalike kukweleta mali kutegwa bakonzye kujana zyakulya azyakunywa zyakusanina nkamu mpati loko iilangilwa kuyoojanika. Aboobo, ikuti naa basikukwatana Banakristo basala kubaa pobwe lisyoonto buyo lyabasikutambwa bali mbobabede, eeci ceelede kuteelelwa akulemekwaa Banakristo ibatatambwa. Imulombwana umwi wakakwatila ku Cape Town ku South Africa ulayeeya kuti wakatambide buyo bantu ibali 200 kubwiinga bwakwe. Pele bakasika bakali 600 eelyo muciindi cisyoonto buyo cakulya cakamana. Akati kabaabo batakatambidwe kwakali baabo ibakali kuswaya dolopo lya Cape Town kumamanino ansondo ibazwide bbaasi, mubuzuba bwa bwiinga obo. Iwakali kusololela basikweendeenda ibakali mubbaasi wakali musazinyina anabwiinga aboobo, tanaakalindila kutambwa buya alimwi wakayeeya kuti ulakonzya kuletelela nkamu eeyi yoonse kakunyina kubuzya kuli nabwiinga naa kuli sibwiinga!

Ccita kuti kwaambwa kuti kufwumbwa uyanda inga wajanika, biyo-biyo basikutobela Jesu bakasimpe inga tabaunki kupobwe lyabwiinga kakunyina kutambwa alimwi inga tabalyi akunywa zyakunywa zyabaabo batambidwe. Aabo balimvwa kuti inga baunka kubwiinga kakunyina kutambwa beelede kulibuzya kuti, ‘Sena kujanika kwangu kupobwe lyabwiinga kakunyina kutambwa takuko kutondezya kuti ndinyina luyando kuli basikukwatana? Sena tandiko kunyonganya zintu alukkomano luliko ciindi eci?’ Muciindi cakucimwa a kaambo kakuti tanaatambwa, caluyando Imunakristo uyeeya ulakonzya kutuma mulumbe wakulumbaizya basikukwatana akubasyomezya lulongezyo lwa Jehova. Alimwi mane ulakonzya kubagwasya basikukwatana kwiinda mukubatumina cipego cakuyungizya lukkomano lwabuzuba bwabwiinga bwabo.—Mukambausi 7:9; Ba-Efeso 4:28.

Ino Mmukuli Wani?

Mumbazu zimwi zyamu Afulika, ncilengwa buya kuti bamukowa balupati-pati basolole mbabo kucita bubambe bwabwiinga. Basikukwatana balalumba kapati nkaambo kakulemununwa kumukuli wamali aayandika. Alimwi balakonzya kulimvwa kulemununwa kujatikizya cintu cili coonse cikonzya kucitika. Nokuba boobo, kabatana kuluzumina lugwasyo luli loonse kuzwa kuli bamukowa, basikukwatana beelede kusinizya kuti nzyobalombozya ziyootobelwa.

Nokuba kuti Jesu wakali Mwanaa Leza ‘uwakazwa kujulu,’ kwiina atondezyedwe kuti wakanyanga bantu bakabikkidwe mikuli inamunji akwiicita nguwe kubwiinga bwaku Kana. (Johane 6:41) Muciindi caboobo, Ibbaibbele litwaambila kuti kwakasalidwe muntu uumbi kuti abe ‘simwaaba  kulya kupobwe.’ (Johane 2:8) Ooyu mwaalumi nguwakeelede kwiingula mibuzyo yoonse imutwe wamukwasyi mupya, nkokuti sibwiinga.—Johane 2:9, 10.

Ibanakristo bamukowa baleelede kumulemeka imuutwe wamukwasyi mupya iwasalwaa Leza. (Ba-Kolose 3:18-20) Nguujisi mikuli kuli zyeezyo zyoonse zyeelede kucitwa kubwiinga bwakwe. Mbuli cilengwa sibwiinga weelede kuba muntu uuyeeya kabotu kutegwa naa kwayandika akaswiilile ciyooamba bazyali bakwe a nabwiinga abazyali bakwe. Pele ikuti bamukowa bazumanana kubamba bubambe bwiimpene akuyeeya kwabasikukwatana, basikukwatana abo beelede kulukaka lugwasyo olo cabulemu akulibbadelela kubwiinga bwabo beni mbuli mbubakonzya. Munzila ili boobu kunyina ciyoopa kuti basikukwatana kabatakkomani baibaluka kubwiinga bwabo mbubwakabede. Mucikozyanyo kubwiinga bumwi mu Afulika, iwakabikkidwe kuti abe ngomweendelezi wabwiinga watakali musyomi wakajatikizyaa kulemeka basikale!

Ziindi zimwi basikukwatana inga bayumuka kuya kukulyookezya ipobwe lyabwiinga kalitanamana. Izintu nozili boobo, sibwiinga weelede kusinizya kuti wasala bamwi batiibone kwaamba kuti zyeelelo zya Bbaibbele zyatobelwa kabotu akuti pobwe lyamana muciindi cibotu.

Kulibambila Kabotu Alimwi Akutaciindizya

Kulibonya kuti kwakali zyakulya zibotu zinji kubwiinga Jesu nkwaakajanika nkaambo Ibbaibbele libwaamba kuti lyakali pobwe lyalukwatano. Mbuli mbutwabona kale, kwakali awaini munji. Kakunyina a kudooneka, kwakali nyimbo zyeelede alimwi akuzyana cabulemu nkaambo ncicakali cilengwa cabukkale bwaba Juda. Jesu wakacitondezya eeci mucikozyanyo cakwe cizizilwe kapati camwana mutaka. Mucaano eeco, wisi iwakali muvwubi wakakukkomanina kapati kupiluka kwamwanaakwe iwakeempwa cakuti wakati: “Tulye tusekelele.” Mbubwenya Jesu mbwaamba, kupobwe eeli kwakali “kwiimba akuzyana.”—Luka 15:23, 25.

Pele Ibbaibbele kwiina nolyaamba cacigaminina kuti kwakali nyimbo alimwi akuzyana kubwiinga bwaku Kana. Bwini mbwakuti kuzyana kwiina nokwaambidwe muzibalo zya Bbbaibbele zyoonse izijatikizya bwiinga. Kulibonya kuti akati kababelesi ba Leza basyomeka bakuciindi ca Bbaibbele, kuzyana kwakali kuba buyo muziindi pele tiicakali ncecintu ciyandika kapati kubwiinga bwabo. Sena kuli ncetukonzya kwiiya kuli ceeci?

Mubwiinga bumwi bwa Banakristo mu Afulika, kubelesyegwa zilimba zipati loko zyamagesi. Zilajalulwa cakusabila cakuti bantu baliko kunyina nobakonzya kubandika kabotu. Muziindi zimwi cakulya cilabulila pele kwalo kuzyana kwakutalyeendelezya kwiina anokubulika. Muciindi cakuti libe pobwe lyabwiinga, ziindi ezyo ziba mapobwe aakuzyana buyo. Kunze lyaboobo, nyimbo zilizigwa cakusabila cipa kuti bantu ibatalilemeki alimwi abantu bamwi buyo baboole kakunyina kutambwa.

Mbwaaga mumagwalo aa Bbaibbele aajatikizya bwiinga kunyina aakankaizyigwa nyimbo alimwi akuzyana, sena eeci inga tacikonzi kusololela baabo balibambila bwiinga bulemeka Jehova? Nokuba boobo, mukulibambila bwiinga busiyene-siyene mu Afulika nkoili kumusanza, ibakubusi Banakristo aabo bakasalwa kuba basikusindikila basikukwatana balasowa mawoola manji kwiiya nzila zyakuzyana zikatazya kapati. Kwamyeezi iili mbwiibede, ciindi cabo cinji bakali kucibelesya kucita boobo. Pele Banakristo beelede ‘kujatisya loko ciindi’ kuzintu “ziinda kubota” mbuli mulimo wakukambauka, ciiyo caumwi aumwi alimwi akujanika kumiswaangano ya Bunakristo.—Ba-Efeso 5:16; Ba-Filipi 1:10.

Bwiinga bwakali ku Kana bulibonya kuti kwakali bantu banji kuti twalanga bunji bwawaini Jesu ngwaakababambila. Pele tulakonzya kuba masimpe kuti tiicakali ciindi cakupilingana alimwi akuti beenzu tiibakakolwa makoko mbuli mbucakali kuba kubwiinga bumwi bwaba Juda. (Johane 2:10) Ino makani aya inga twaasinizya buti? Nkaambo Mwami Jesu Kristo wakajanika oko. Akati kabantu boonse, Jesu weelede kuti nguwakaindide kutobela mulawo wa Leza uujatikizya kuyanzana  kubyaabi wakuti: “Utakali akati kabacakolwa.”—Tusimpi 23:20.

Aboobo, ikuti basikukwatana basala kuti kubwiinga bwabo kukabe amisyobo-misyobo yabukoko, beelede kubona kuti kwasalwa bantu bayoobona kwaamba kuti bwanyugwa cakutaindilizya. Alimwi ikuti basala kuti kukabe nyimbo, beelede kusala nyimbo zibotu alimwi amuntu weendelezya kulila kwanyimbo. Beenzu tabeelede kulekelwa kweendelezya naa kuleta nyimbo zibyaabi nokuba kujalula cilimba cakusabila buya. Kuti kwaba kuzyana, kweelede kuba kwabulemu, kwakutaciindizya. Ikuti naa bamukowa batasyomi antela Banakristo batasimide batalika nzyanino mbyaabi naa iibusya mizeezo italuzi, sibwiinga ulakonzya kulailila kuti kucincwe lwiimbo naa kulesyela limwi buya kuzyana. Biyo-biyo bwiinga inga bwazwa mumulawo akufwumpula bamwi.—Ba-Roma 14:21.

Akaambo kantenda ziliko munzyanino zyamazubaano akulila kapati kwanyimbo alimwi akuteendelezyegwa kabotu kwamakoko, capa kuti Banakristo banji basikukwatana basala kuti zintu zili boobu kazitacitwi pe abwiinga bwabo. Nokuba kuti bamwi balavwiigwa a kaambo kaceeci, pele beelede kulumbaizigwa akaambo kakusola kwabo kweeleba zintu zikonzya kuleta masampu kuzina lya Leza lisetekene. Kulubazu lumwi, basikukwatana bamwi balasala nyimbo zimwi zyeelede aciindi cakuzyana alimwi akubwaabila bukoko cansazi. Mumbazu zyoonse, sibwiinga nguulaa mukuli kuzintu zyoonse nzyazumizya kuti zicitwe kubwiinga bwakwe.

Mu Afulika ibantu bamwi batasimide nibabona bulemu buliko kubwiinga bwa Bunakristo baamba kuti bukozyanya buyo akujanika kudilwe. Nokuba boobo, ooko takuli kuzilanga kabotu zintu pe. Milimo yanyama mibi ilakonzya kuleta lukkomano kwaciindi cisyoonto buyo, pele ipa kuti Banakristo bapenzyegwe amanjezeezyaabo alimwi eci cipa kuti zina lya Leza lisampaulwe. (Ba-Roma 2:24) Kulubazu lumwi, muuya uusalala wa Leza upa kukondwa kwini-kwini. (Ba-Galatiya 5:22) Ibanakristo banabukwetene banji balakondwa nobaibaluka bwiinga bwabo akujana kuti cakali ciindi cikkomanisya kutali ‘cakufwumpula.’—2 Ba-Korinto 6:3.

Welsh alimwi a Elthea bacaayeeyede majwi manji mabotu abasazinyina batasyomi ibakajanika kubwiinga bwabo. Umwi wakati: “Atulemya mainga azwide kuyobeka aacitwa mazubaano. Cali kukondelezya kujanika kubwiinga bwiindene alimwi bwabulemu.”

Icintu ciyandika kwiinda zyoonse ncakuti mainga aa Banakristo alakondelezya alimwi alacitwa cabulemu alemeka Sikwaanza lukwatano Jehova Leza.

Kabbokesi/[Cifwanikiso icili apeeji 32]

ZIYANDIKA KUBIKKILA MAANU KUJATIKIZYA POBWE LYABWIINGA

• Ikuti naa mwatamba musazinyoko utasyomi kutegwa abandike makani amwi, sena mwasinizya kuti takoojatikizya zilengwa zimwi zitali zya Bunakristo?

• Ikuti naa kuyoolizigwa nyimbo, sena mwasala buyo nyimbo zyeelede?

• Sena nyimbo ziyoolizyigwa munsaizi kutali cakusabila?

• Ikuti naa kuyooba kuzyana, sena kuyoocitwa cabulemu?

• Sena bukoko buyooabilwa buyo cansaizi?

• Sena kunooli bamwi banoobikkidwe kuti babone kwaamba kuti bukoko bwaabilwa munsaizi?

• Sena mwabikka ciindi cibotu ipobwe lyabwiinga noliyoomana?

• Sena kunooli bantu bajisi mikuli yakubona kwaamba kuti kuli luumuno kusikila kumamanino?