Ikulengulula Zintu Zyoonse Kuti Zibe Zipya—mbubwenya Mbukwakasinsimwa

“Oyo uukede acuuno cabwami wakati, Amubone, ndalengulula zintu zyoonse, zibe zipya. Alimwi [waamba] kuti, . . . majwi aya a[la]syomeka, alisini[zi]zye.”—CIYUBUNUZYO 21:5.

1, 2. Nkaambo nzi bantu banji ncobeenkeenka kulanga-langa makani aajatikizya bukkale bwakumbele?

SENA kuli nomwakaambide naa kuyeeya kuti, ‘Ino nguni uuzi mbokuya kuca juunza?’ Inga mulakateelela kaambo ibantu ncobeenkeenkela nokuba kuzumbauzya mbobuyooba buumi bwakumbele—naa ikusyoma baabo ibalyaamba kuti balakonzya kusinsima zyakumbele. Ibantunsi tabakonzyi kuzisinsima kabotu-kabotu izintu ziyoocitika kumbele kakucili myezi naa myaka iili mbwiibede.

² Imagazini imwi yiitwa kuti Forbes ASAP yakagama kubandika buyo makani aajatikizya ciindi. Mumagazini eyi, sikuleta pulogilamu imwi yaa TV wazina lya Robert Cringely wakalemba kuti: “Toonse tulatyompezegwa aciindi, pele kwiina uuinda kupenga kumakani aciindi kwiinda basikusinsima. Ikusoleka kweezeezya mboziyooba zintu kumbele ncintu ncotutazwidilili kucita lyoonse. . . . Pele abo bategwa mbaahaazibwene balazumanana kusinsima.”

3, 4. (a) Mbulangizi nzi bwabuumi bubotu bamwi mbobajisi kujatikizya cuulu camyaka cipya? (b) Mbulangizi nzi bwamaanu bamwi mbobajisi kujatikizya bukkale bwakumbele?

³ Ambweni mwalibonena kuti bantu bali kubikkila maanu kapati kumakani aajatikizya cuulu  camyaka cipya, aboobo cilibonyaanga bunji bwabantu bali mukuyeeya bukkale bwakumbele. Kumatalikilo kwamwaka wainda, imagazini iitegwa Maclean’s yakati: “Kubunji bwabana Canada, imwaka wa 2000 unooli mwaka mbuli myaka imwi yoonse akkalenda, pele ulakonzya waba mwaka uuyootalika munzila iimbi mpya.” Professor waku Yunivesiti ya York wazina lya Chris Dewdney wakaamba kaambo kamwi ncokuli bulangizi bwabuumi bubotu naakati: “Ikunjila mumwaka wa 2000 caamba kwaanguluka kuzwa mumwaanda wamyaka wamapenzi uutaambiki.”

⁴ Sena kaambo ako kalimvwisya mbuli kuti nkulombozya buyo? Ikubuzya-buzya kwakacitwa mu Canada kwakatondezya kuti ibantu basika buyo ku 22 pasenti “mbabasyoma kuti imwaka wa 2000 uyooleta matalikilo mabotu kunyika.” Atwaambe kuti, ibantu batandila kucisela “balangila mapenzi aambi mapati munyika”—inkondo imbi yanyika yoonse kaitanainda myaka iili 50. Ibanji balibwene kuti icuulu camyaka cipya tacikonzyi kumanizya mapenzi esu nokuba kulengulula zintu zyoonse kuti zibe zipya. Iwakali mweendelezi mucibeela cimwi cilanga-langa lwiiyo lwasayaansi ku Britain wazina lya Sir Michael Atiyah wakalemba kuti: “Ikucinca kwazintu calubilo ooku . . . kutondezya kuti imwaanda wamyaka wa 21 uyooleta buyumuyumu kapati kulusumpuko lwesu loonse. Imapenzi aakuvwula kwabantu, kuceya kwamali, ikusofwaazigwa kwazilawo motukkala alimwi abucete zili mukutupenzya kale kuciindi cino, aboobo zyeelede kulanganizigwa cakufwambaana.”

5. Nkuukuli nkotunga twajana makani aagwasya kujatikizya buumi bwakumbele?

⁵ Pele mulakonzya kuzumbauzya kamuti, ‘Mbwaanga bantunsi tabakonzyi kusinsima zintu mboziyooba kumbele, sena inga tacigwasyi kuleka kulibilika kujatikizya buumi bwakumbele?’ Ibwiinguzi mbwakuti, peepe! Ibantu tabakonzyi kuzisinsima kabotu-kabotu zintu mboziyooba kumbele, pele tutayeeyi kuti kunyina uukonzya kucita boobo. Ino nguni uukonzya kucita boobo alimwi nkaambo nzi ncotweelede kubaa bulangizi bwabukkale bwakumbele bubotu? Mulakonzya kujana bwiinguzi bukkazika moyo mubusinsimi bone. Bulembedwe mubbuku lijanika kubantu boonse alimwi iliinda kubalwa pele lili ndebbuku ndyobatamvwisyi banji alimwi ndyobatabikkili maanu—Ibbaibbele. Kufwumbwa naa muliyeeyela buti Bbaibbele alimwi naa muzizi buti izili mulindilyo muyoogwasigwa kapati ikuti mwalanga-langa zibalo ezi zyone iziyandika kapati. Zibalo eezi zisinsima buumi bwakumbele bwini-bwini bukondelezya kapati. Kunze lyaboobo, businsimi bone obu buyandika kapati bulatondezya mbobukonzya kuba buumi bwanu bwakumbele alimwi abwabayandwa banu.

6, 7. Ino ndiilili Isaya naakasinsima, alimwi ino businsimi bwakwe bwakazuzikizigwa buti munzila iigambya?

⁶ Businsimi bwakusaanguna buli kubbuku lya Isaya caandaano ca 65. Kamutanabala zyakasinsimwa, amubone mbuzyakabede zintu naakalembwa makani aya alimwi abukkale bwakali kubandikwa. Isaya, imusinsimi wa Leza iwakalemba majwi aya wakali kupona kakucili myaka iinda kumwaanda omwe kuti bunyonyoonwe bwami bwa Juda. Imamanino akasika eelyo Jehova naakaleka kukwabilila bama Juda batasyomeki akulekela bana Babuloni kuti banyonyoone Jerusalemu akubweza bantu bakwe kubatola mubuzike. Ezi zyakacitika kakwiindide myaka iinda kumwaanda omwe kuzwa ciindi naakazisinsima Isaya.—2 Makani 36:15-21.

⁷ Ikujatikizya zintu zimwi zyakacitika musyule, amuyeeye kuti kwiinda mukusololelwaa Leza, Isaya wakasinsima zina lini-lini lyamuna Persia watakainazyalwa—Koresi, walo wakazoosaala akuzunda cisi ca Babuloni. (Isaya 45:1) Koresi wakabamba nzila yakuti bama Juda bapilukile kumunzi wabo mu 537 B.C.E. Nokuba boobo, ngu Isaya iwakasinsima makani aakupilusigwa mbubwenya mbotubala kucaandano ca 65. Wakagama kwaamba mbubwakali kuyooba bukkale bwabana Israyeli kumunzi wabo.

8. Mbukkale nzi bwakumbele bubotu Isaya mbwaakasinsima, alimwi nkaambo nzi ikayandika kubikkila maanu kapati?

⁸ Kubbuku lya Isaya 65:17-19 tubala kuti: “Ndalenga ijulu ipya anyika impya. Ezyo zyakusaanguna tazikooyooibalukwa limbi nikuba kuyeeyegwa. Pele amukondwe akusekelela lyoonse nkaambo kaceeci ncinsi lenge, nkaambo ndalenga Jerusalemu, ube cikondelezyo, abantu bawo, babe cibotezyo. Njoosekelela Jerusalemu akukondelwa bantu bangu. Tamukooyoomvwigwa limbi mulinguwo ijwi lyakulila niliba ijwi lyakupenga.” Tatweelede  kudooneka kuti ibukkale mbwaakasinsima Isaya bwakali kuyooinda kubota kuli boobo mbubakazyi bama Juda mu Babuloni. Wakasinsima kuti kwakali kuyooba kusekelela alimwi akukondwa. Lino atulange kaambo aka kakuti “ijulu ipya anyika impya.” Awa mpokalembedwe kaambo aka kwaciindi cakusaanguna mumasena aali one mu Bbaibbele alimwi ezi zibalo zyone zilaamboziswaangane abuumi bwesu bwakumbele mane akubusinsima.

9. Ino ba Juda bansiku bakajatikizidwe buti mukuzuzikizigwa kwa Isaya 65:17-19?

⁹ Ikuzuzikizigwa kwakusaanguna kwabbuku lya Isaya 65:17-19 kwakali kujatikizya bama Juda bansiku balo ibakapilukila kuyookkala kumunzi wabo akutalisya bukombi bwakasimpe alimwi, mbubwenya mbwaakasinsima kabotu-kabotu Isaya. (Ezara 1:1-4; 3:1-4) Mulizi kuti bakapilukila kumunzi wabo uuli anyika njiyonya ino ikutali kubusena bumbi pe. Oolo luzibo lulakonzya kutugwasya kulanga-langa ncaakali kwaamba Isaya naakati ijulu ipya anyika impya. Tatuyandiki kweezeezya pe swebo mbuli mbobacita bamwi kujatikizya businsimi butamvwiki kabotu bwa Nostradamus naa basinsimi bambi bantunsi. Ibbaibbele ndilyonya lilasalazya ncaakali kwaamba Isaya.

10. Ino tweelede kwiiteelela kuti ncinzi “nyika” impya njaakasinsima Isaya?

¹⁰ Ibbala lyakuti “nyika” ilibelesyegwa mu Bbaibbele talili lyoonse nolyaamba nyika motukkala. Mucikozyanyo, ibbuku lya Intembauzyo 96:1 lyaamba kuti: ‘Amwiimbile Jehova nonyika yoonse.’ Tulizi kuti inyika yesu, nkokuti—inyika njumu alimwi alwaanje lupati—tazikonzyi kwiimba pe. Ibantu mbabaimba. Inzya, Intembauzyo 96:1 yaamba bantu ibalaa nyika. * Pele ibbuku lya Isaya 65:17 lilaamba amakani aa “julu ipya.” Ikuti naa “nyika” yiiminina nkamu mpya yabantu ibapilukide kumunzi wabo bama Juda, ino mbuti kujatikizya “julu ipya”?

11. Ino kaambo kakuti “julu ipya” kakali kwaamba nzi?

¹¹ Ibbuku lya Cyclopedia of Biblical, Theological, and Ecclesiastical Literature ililemekwa kapati ilyakalembwaa M’Clintock alimwi a Strong lyaamba kuti: “Kufwumbwaawo mpolyaambwa julu mucilengaano cabusinsimi liiminina . . . mbungano yoonse yabeendelezi . . . ibali muzyuuno zyaatala akweendelezya balelwa mbubwenya ijulu lini-lini mbolili atala akweendelezya nyika.” Mpoonya ikwaambilwa antoomwe kwakuti “julu anyika,” eyi Cyclopedia ipandulula kuti ‘mumwaambo wabusinsimi aka kaambo kaiminina ciimo cabantu balaa zyuuno zyaandeene-andeene  kumakani aatwaambo twacisi. Ijulu mbulelo; inyika mbalelwa, ibantu beendelezyegwaa bulelo.’

12. Ino muunzila nzi bama Juda bansiku mobakajisi “julu ipya anyika impya”?

¹² Nobakapilukila kwabo bama Juda, bakajana ncomunga mwaamba kuti mbweende bwazintu bupya. Bakabaa kabunga keendelezya ikapya. Zerubabeli, iwaluzubo lwa Mwami Davida nguwakali mweendelezi elyo Joshua nguwakali mupaizi mupati. (Hagai 1:1, 12; 2:21; Zekariya 6:11) Aba mbibakali kubamba “julu ipya.” Ino lyakali atalaa nzi? “Ijulu ipya” lyakali atalaa “nyika impya,” ibantu basalazidwe ibakapiluka kunyika yabo ikutegwa bakayakulule Jerusalemu atempele lyawo imwakukombela Jehova. Aboobo, munzila eyi mukuzuzikizigwa kwakajatikizya bama Juda bakuciindi eco, kwakaba ijulu ipya anyika impya.

13, 14. (a) Ino nkuukuli kumwi ikujanika kaambo kakuti “ijulu ipya anyika impya” nkotweelede kulanga-langa? (b) Nkaambo nzi businsimi bwa Petro ncobuyandika kapati sunu?

¹³ Amucenjele kuti mutaamvwidi mumbi makani aya. Oku takuli kusoleka kupandulula Bbaibbele naa ikwiide kulanga-langa buyo makani aansiku. Mulakonzya kucibona eco kwiinda mukulanga waawo mpokajanika alimwi kaambo ako kakuti “julu ipya anyika impya.” Kubbuku lya 2 Petro caandano ca 3 mulakajana kaambo aka alimwi mulabona mbuli mbokaswaangene abuumi bwesu bwakumbele.

¹⁴ Mwaapostolo Petro wakalemba lugwalo lwakwe olu kakwiindide myaka iyiinda ku 500 kuzwa ciindi bama Juda nobakapiluka kumunzi wabo. Alimwi mbwaakali mwaapostolo wa Jesu, Petro wakali kulembela basikutobela Kristo, “Mwami” iwaambidwe kuli 2 Petro 3:2. Mukapango ka 4, Petro waamba makani ‘aakuboola kwa Jesu kwakasyomezegwa,’ ikaambo kapa kuti businsimi buyandike kapati sunu. Kuli bumboni bunji butondezya kuti kuzwa lya Nkondo ya Nyika Yakusaanguna, Jesu waliko mukuti walijisi nguzu zyabweendelezi kali Mwami mu Bwami bwa Leza bwakujulu. (Ciyubunuzyo 6:1-8; 11:15, 18) Eci cibaa bupanduluzi bumbi bulibedelede akaambo kacintu cimwi Petro ncaakasinsima mucaandano eci.

15. Mbuti businsimi bwa Petro bujatikizya “julu ipya” mbobuli mukuzuzikizigwa?

¹⁵ Kuli 2 Petro 3:13, tubala kuti: “Pele swebo tulangila ijulu ipya anyika impya, mbubonya mbuli mbwaakatusyomezya. Mulinzizyo momukala bululami.” Mulakonzya kamuzi kale kuti Jesu walo uubikkidwe acuuno cabwami kujulu lino ngo Mweendelezi mupati mu “julu ipya.” (Luka 1:32, 33) Pele izibalo zimwi zya Bbaibbele zitondezya kuti taleli alikke pe. Jesu wakasyomezya kuti ibaapostolo bakwe alimwi abantu bambi bakali kuyoobaa busena kujulu. Kubbuku lya Ba-Hebrayo, imwaapostolo Paulo wakabapandulula kuti ‘bakasalilwa bukalilo bwakujulu.’ Alimwi Jesu wakaamba kuti abo ibali munkamu eyi bayookkala azyuuno zyabwami kujulu antoomwe anguwe. (Ba-Hebrayo 3:1; Matayo 19:28; Luka 22:28-30; Johane 14:2, 3) Ikaambo kaliko awa nkakuti nkobali bambi bayoolela kujulu a Jesu kabali lubazu lwajulu ipya. Pele ino “nyika impya” njaamba Petro ninzi?

16. ‘Ninyika nzi impya’ iiliko kale?

¹⁶ Mbubwenya mbuli kuzuzikizigwa kwansiku—nobakapiluka bama Juda kumunzi wabo—ikuzuzikizigwa kwasunu kwabbuku lya 2 Petro 3:13 kujatikizya bantu ibalibombya kubweendelezi bwajulu ipya. Kuli tuulunzuma twabantu sunu ibalibombya kubweendelezi oobu. Bali mukugwasigwaa pulogilamu eyo yakwiiya alimwi bali mukusoleka kutobela milawo iijanwa mu Bbaibbele. (Isaya 54:13) Abo mbebabamba ntalisyo ‘yanyika impya’ mukuti babamba nkamu yanyika yoonse kuzwa muzisi zyoonse, myaambo alimwi amisyobo alimwi babelekela antoomwe mukulibombya kubweendelezi bwa Mwami uuli mukulela, Jesu Kristo. Masimpe ngakuti, anywebo mulakonzya kuba lubazu lwankamu eyi!—Mika 4:1-4.

17, 18. Nkaambo nzi majwi aali kuli 2 Petro 3:13 ncaatupa kaambo kakulangila bukkale bwakumbele?

¹⁷ Mutalimvwi kuti kucinyina cimbi cijatikizidwe pe akuti kunyina makani ambi aacaala kujatikizya buumi bwakumbele. Ikuti mwalanga-langa makani aayengelede bbuku lya 2 Petro caandaano ca 3 mulajana zitondezyo zyakucinca kupati ikuyooba kumbele. Mukapango ka 5 alimwi a 6, Petro wakalemba makani aajatikizya Zambangulwe lyakumazubaa Nowa, lyalo lyakamanizya nyika mbyaabi kuciindi eco. Mukapango ka 7, Petro waamba kuti “ijulu anyika nzitubona sunu,” ibweendelezi alimwi abantu, ziyobwedwe ‘lubeta alimwi akunyonyoonwa ikwabantu basikasampusampu.’ Aboobo eci cisinizya kuti ikaambo kakuti “ijulu  anyika nzitubona sunu” kaamba bantu abweendelezi bwabo ikutali nyika yesu motukkala.

¹⁸ Mutupango tutobela, Petro ulapandulula kuti ibuzuba bwa Jehova ibuboola bunooli buzuba bwakusalazya kupati, ikupa kuti ijulu ipya anyika impya izyaambidwe kukapango ka 13 ziboole. Amuyeeye mbokamana kapango ako—“Mulinzizyo momukala bululami.” Sena eco tacitutondezyi kuti kuli kucinca kupati kumwi kubotu ikweelede kucitika kumbele? Sena tacitupi bulangizi bwazintu zipya, iciindi bantu nobatikabe aabuumi bubotu kwiinda mbobajisi lino? Ikuti kamukonzya kutubona twaambo, nkokuti mwajana busongo muzintu nzyolyakasinsima Bbaibbele, icintu ncobatajisi banji.

19. Muubukkale buli buti ibbuku lya Ciyubunuzyo molyaamba “julu ipya anyika impya” izicili kumbele?

¹⁹ Pele atuye kumbele kulanga-langa makani aya. Twali kulanga mpokajanika kaambo kakuti “ijulu ipya anyika impya” mucaandano ca 65 ca Isaya alimwi aambi mpokajanwa kuli 2 Petro caandaano ca 3. Lino atulange kubbuku lya Ciyubunuzyo caandaano ca 21 bomwe bumbi kujanwa kaambo aka mu Bbaibbele. Alimwi ikuteelelesya bukkale cilatugwasya kapati. Ku Ciyubunuzyo caandaano 19, izyandaano zyobile musyule aacaandaano ca 21 tujana nkondo yacikozyanyo kaipandululwa kabotu-kabotu—pele taili nkondo yaakati kamasi aazwangana pe. Munkondo eyi, kulubazu lomwe kuli “Ijwi lya-Leza.” Cakutadooneka mulilizyi kuti eli ndizina lyabulemu libelesyegwa kwaamba Jesu Kristo. (Johane 1:1, 14) Uli kujulu alimwi cilengaano eci cimutondezya kuti uli ampi yabasinkondo bakujulu. Ino balwana bani? Eci cibalo cibandauka “bami,” “basinkondo bapati” alimwi abantu bajisi zyuuno zyaandeene-andeene “baniini nibaba bapati.” Inkondo eyi ijatikizya kuboola kwabuzuba bwa Jehova, ikunyonyoonwa kwabubi abantu babucita. (2 Ba-Tesalonika 1:6-10) Icaandaano citobela ca Ciyubunuzyo 20 citalikaa bupanduluzi bujatikizya mbwiiyoogwisigwa “nzoka yaciindi iitegwa Diabolosi a-Saatani.” Eci cijaluda nzila makani aa Ciyubunuzyo caandaano 21.

20. Nkucinca nzi kupati kuyoocitika kumbele ibbuku lya Ciyubunuzyo 21:1 nkolitondezya?

²⁰ Imwaapostolo Johane watalika amajwi aakondelezya ategwa: “Ndakabona ijulu ipya anyika impya, nkaambo ijulu lyakusaanguna anyika yakusaanguna zyoonse zyakamaninina, alwalo lwizi talukooyoobako limbi.” Ikweelana anzitwabona kujatikizya bbuku lya Isaya caandaano ca 65 alimwi a 2 Petro caandaano ca 3 tuli masimpe kuti eci tacaambi kuleta limbi julu lini-lini alimwi anyika yesu kubikkilizya alwizi luli alinjiyo. Mbubwenya mbutwabona kale kuzyaandaano zyamusyule, ibantu babyaabi alimwi abweendelezi bwabo kubikkilizya amweendelezi wabo uutalibonyi Saatani bayoogwisigwa. Inzya, ncotusyomezyegwaawa, mbweende bwazintu bupya bujatikizya bantu anyika.

21, 22. Nzilongezyo nzi nzyatusyomezya Johane, alimwi ino kusindulwa kwamisozi kwaamba nzi?

²¹ Eco cilasinizigwa mbotuyaabuya kumbele mubusinsimi obu bukondelezya. Ikapango ka 3 kalamana amajwi aamba kuti Leza uyookkala akati kabantu, nkokuti uyoobabikkila maanu bantu bacita kuyanda kwakwe munzila iigwasya. (Ezekieli 43:7) Johane wazumanana mukapango ka 4 a 5 kuti: “[Jehova Leza] uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina. Mpawo oyo uukede acuuno cabwami wakati, Amubone, ndalengulula zintu zyoonse, zibe zipya. Alimwi wandaambila kuti, Lemba kuti majwi aya a[la]syomeka, alisinizye.” Bulakulwaizya kaka businsimi obu!

²² Atwiime kusaanguna kutegwa tuciteelelesye ncolisinsima awa Bbaibbele. ‘Leza uyoosindula misozi yoonse kumeso aabo.’ Eco tacaambi misozi  yalyoonse iisanzya meso esu noiba misozi yakukondwa pe. Imisozi njayoosindula Leza njiyeeyo iiboola akaambo kakupenga, buumba, kutyompwa, macise alimwi amakatazyo. Ino inga twacisyoma buti eco? Icisyomezyo ca Leza eci cibotu cakusindula misozi ciswaangene aa ‘lufwu, kuomoka, kulila alimwi akumanizigwa kwamacise.’—Johane 11:35.

23. Nkumanizigwa kwabukkale buli buti businsimi bwa Johane nkobusinizya?

²³ Sena eci tacisinizyi kuti kkansa, kulebukilwa, bulwazi bwamoyo bwacaanga bafwa alimwi mane alufwu ziyoozwisigwa? Nguni uutanafwidwa muyandwa akati kesu kubulwazi bumwi, intenda yamumugwagwa naa ntenda iimbi buyo? Aawa Leza usyomezya kuti lufwu talukabi limbi, eci caamba kuti bana ibayoozyalwa kuciindi eco tabakalangilwi kukomena akucembaala mpoonya akufwa pe. Businsimi obu alimwi bwaamba kuti takukabi limbi bulwazi bwakumizeezo bwakuluba akaambo kakucembaala bwa (Alzheimer), kukomena akulebauka kwazifwuwa (osteoporosis), izikoto mumilambi (fibroid tumors), ikubaya (glaucoma) nobuba bulwazi bwameso (cataracts)—alo aadumide kapati kubucembele.

24. Mbuti “ijulu ipya anyika impya” mboziyooba cilongezyo, alimwi ino ncinzi ncotuciyanda kulanga-langa?

²⁴ Cakutadooneka mulazumina kuti kuomoka alimwi akulila zilakonzya kuceya ikuti naa lufwu antoomwe akucembaala alimwi amalwazi zyagwisigwa. Pele ino mbuti kumakani aabucete butaambiki, kupenzya bana alimwi akusalaulana kwiinda mukudyaaminina akaambo kakwiimpana kwambuli mbotwakakomena alimwi amusyobo walukanda? Ikuti naa zintu zili boobu zyalo zidumide kapati sunu zyazumanana, kunyina nokunga kwamana kuomoka alimwi akulila. Aboobo buumi mubweendelezi bwa “ijulu ipya anyika impya” tabukanyonganizigwi azintu ezi zyoonse izileta mause. Nkubotu kaka kucinca oku! Pele twalanga-langa buyo masena otatwe muli one mpokajanika ikaambo kakuti “ijulu ipya anyika impya” mu Bbaibbele. Kucili busena bomwe ibweendelana amakani ngotwabandika alimwi ibusinizya ncotulaa kaambo kakusyoma ciindi ambwaayoozuzikizya cisyomezyo cakwe Leza ‘cakulengulula zintu zyoonse kuti zibe zipya.’ Icibalo citobela cibandika businsimi obo alimwi ambobuswaangene abukkale bwesu bwalukkomano.

Bupanduluzi buyungizidwe

Ncinzi Ncomwiibaluka?

• Nkuumasena aali otatwe Ibbaibbele nkolisinsima “julu ipya anyika impya”?

• Ino bama Juda bansiku bakajatikizidwe buti mukuzuzikizigwa kwa “julu ipya anyika impya”?

• Nkuzuzikizigwa nzi ikwateelelwa kujatikizya “julu ipya anyika impya” izyakaambwaa Petro?

• Muunzila nzi Ciyubunuzyo 21 mocitumunikila bukkale bwakumbele bubotu kapati?

[Mibuzyo yaciiyo]

[Cifwanikiso icili apeeji 10]

Koresi wakabamba nzila yakuti bama Juda bapilukile kumunzi wabo mu 537 B.C.E., mbubwena Jehova mbwaakasinsimide