‘Amulifutule Nobeni Abaabo Ibamumvwa’

“Alimwi kolibonena omwini akufundisya kwako. . . . Nkaambo wanoocita bobuya, inga ulalifutula omwini, abalo bakumvwa ulabafutula.”—1 TIMOTEO 4:16.

1, 2. Ncinzi cikulwaizya Banakristo beni-beni ikuzumanana mumulimo wabo wakufwutula bantu?

MUMUNZI umwi uukkede katungu mucisi ca Thailand nkocili kunyika, banabukwetene bamwi Bakamboni ba Jehova babelesya mwaambo ngobakazwaa kwiiya ikukambaukila musyobo wabantu bakkala muzilundu. Ikutegwa bakambauke makani mabotu aa Bwami bwa Leza kuli basiminzi, banabukwetene aba calino-lino bakatalika kwiiya mwaambo uutegwa Lahu.

² Imulumi upandulula kuti: “Cilakatazya kupandulula lukkomano akukatalukwa nkotujisi akaambo kakubeleka akati kabantu aba babotu kapati. Tulimvwa kuti tulijatikizidwe kapati mukuzuzikizigwa kwa Ciyubunuzyo 14:6, 7, ikukambauka makani mabotu ‘kuli bamasi boonse akumisyobo yoonse akumyaambo yoonse.’ Kusyeede buyo masena masyoonto ooko imakani mabotu nkwaatanasika, elyo busena buno buli akati kayaaya. Tujisi ziiyo zya Bbaibbele zinji kapati cakuti cilakatazya kuzizuzikizya zyoonse.” Masimpe, aaba banabukwetene balombozya kulifwutula lwabo beni alimwi abaabo ibabateelela. Mbotuli Banakristo, sena oko takuli nkokulombozya toonse nkotujisi?

“Alimwi Kolibonena Omwini”

3. Ncinzi ncotweelede kusaanguna kucita swebo ikutegwa tufwutule bamwi?

³ Imwaapostolo Paulo wakalaya Timoteo kuti, “Alimwi kolibonena omwini akufundisya kwako,” alimwi lulabeleka aku Banakristo boonse. (1 Timoteo 4:16) Masimpe, ikutegwa tugwasye bamwi kujana  lufwutuko, swebo lwesu tweelede kusaanguna kulibamba kabotu. Ino inga twacita buti obo? Tweelede kupakamana kujatikizya ciindi ncotupona. Jesu wakapa citondezyo cijisi zicitika zikozyenye zinji nzyobakali kuyoobelesya basikumutobela kuzyiba kuti “mamanino aaciindi” akalisikide. Pele alimwi Jesu wakati kunyina notwakali kunoocizyiba ciindi cini aayo mamanino naakali kuzyoosika. (Matayo 24:3, 36) Ino kaambo aka tweelede kukabona buti?

4. (a) Nkuzilanga munzila iili buti zintu nkotweelede kubaankuko kujatizya ciindi cicisyeede kubweende obu? (b) Nkulanga zintu kuli buti nkotweelede kweeleba?

⁴ Umwi aumwi wandiswe weelede kulibuzya kuti, ‘Sena ciindi eci cicisyeede cabweende obu bwazintu ndili mukucibelesya kutegwa ndilifwutule ndemwini alimwi abaabo ibanditeelela? Naa ambweni ndiyeeya kuti, “Mbwaanga tatucizyi ciindi cini mamanino naayooboola, tandiko kulipenzya kapati kujatikizya makani aya”?’ Ikuzilanga munzila eyi yakucaalizya zintu ciletela mapenzi kapati. Cakaanzambwene ikazya lulayo lwa Jesu lwakuti: “Amulibambe, nkaambo kuciindi ncimutezi nciconya ncazoosika Mwana a-Muntu.” (Matayo 24:44) Masimpe cino tacili nceciindi cakulengaana mumulimo wa Jehova naa kutalika kusyoma zintu zyamunyika kuti nzyezikonzya kutupa kuliiba akukkomana.—Luka 21:34-36.

5. Nzikozyanyo nzi nzyobakasiya bakamboni ba Jehova bamusyule Bunakristo kabutanasika?

⁵ Inzila imbi njotunga twatondezya kuti tulalibamba kabotu nkwiinda mukuliyumya cakusyomeka  katuli Banakristo. Babelesi ba Leza bakaindi bakazumanana kuliyumya, kunyina makani naa lufwutuko lwakali afwaafwi naa pe. Naakamana kwaamba zikozyanyo zyabakamboni bamusyule mbuli ba Abelo, Enoki, Nowa, Abraham alimwi a Sara Bunakristo kabutanasika, Paulo wakati: “Tabakalina kutambula zeezyo izyakasyomezegwa, nekubaboobo bakalizibwene kule, bakali kuzitangalila, eno bakali kulyaamba kuti, Tuli bazwamasi, tuli beenzu buyo ansi ano.” Kunyina nobakalilekelezya kuzundwaa kulikumbuzya buumi bwakuliiba alimwi abukkale bubyaabi bwabantu mbocakali kukkala limwi, taakwe nobakabutobela pe, pele cabusungu bakali kulangila “kutambula zeezyo izyakasyomezegwa.”—Ba-Hebrayo 11:13; 12:1.

6. Ino kulanga Banakristo bamumwaanda wamyaka wakusaanguna nkobakali kulanga lufwutuko kwakabujatikizya buti bukkale bwabo?

⁶ Banakristo bamumwaanda wamyaka wakusaanguna abalo bakalibona kuti bakali “beenzu” buyo munyika ino. (1 Petro 2:11) Neliba leelyo nobakazwaa kufwutulwa mulunyonyooko lwa Jerusalemu mu 70 C.E., Banakristo beni-beni kunyina nobakaleka kukambauka naa kutobelezya buyo bukkale bwabantu bamunyika. Bakalizyi kuti kwakali lufwutuko lupati kuli baabo ibazumanana kabasyomeka. Atwaambe kuti, kuzikusika mumwaka wa 98 C.E., imwaapostolo Johane wakazoolemba kuti: “Nyika ilamana, azisusi zyayo, pele oyo uucita makanze aa-Taata ulakalilila kukabe kutamani.”—1 Johane 2:17, 28.

7. Ino Bakamboni ba Jehova bamazubaano bakutondezya buti kuliyumya kwabo?

⁷ Imazubaano, Bakamboni ba Jehova abalo baliyumya mumulimo wa Bunakristo, nokuba kuti bapenzyegwa citaambiki. Sena kuliyumya kwabo kwali kwabuyo? Peepe, kayi Jesu wakatusyomezya kuti: “Oyo uuliyumya kusikila kumamanino uzoofutuka,” kunyina makani naa mamanino ayo ngabweende obu bubyaabi naa mmamanino aabuumi bwaumwi. Mububuke, Jehova uyoobayeeya akubalumbula babelesi bakwe boonse ibasyomeka ibafwide lino.—Matayo 24:13; Ba-Hebrayo 6:10.

8. Ino inga twatondezya buti kuti tulabalumba Banakristo bamusyule akaambo kakuliyumya kwabo?

⁸ Alimwi tulikkomene kuti Banakristo bakaindi basyomeka tiibakabikkilide buyo maanu kulufwutuko lwabo beni. Masimpe, swebo notwakaiya makani aajatikizya Bwami bwa Leza akaambo kabusungu bwabo tulalumba kuti bakaliyumya kuzuzikizya mulimo ngwaakalailila Jesu kuti: “Nkaambo kaako kamuya mukabaiisye bantu bamisyobo yoonse . . . amubaiisye kuti bajatisye makani oonse ngendakamulailila.” (Matayo 28:19, 20) Kufwumbwa kuti katucijisi coolwe, tulakonzya kutondezya kulumba kwesu kwiinda mukukambaukila bamwi ibatanaamvwa makani mabotu. Pele kukambauka nintaamu yakusaanguna buyo iisololela kukugwasya bamwi kuba basikwiiya.

‘Amulibambe Kabotu Kukufundisya Kwanu’

9. Ino kuzilanga munzila iili kabotu zintu inga kwatugwasya buti kutalisya ziiyo zya Bbaibbele?

⁹ Imulimo wesu taujatikizyi buyo kukambauka, pele ulajatikizya akuyiisya. Jesu wakatulailila kuti tuyiisye bantu kujatisya makani oonse ngaakalailila. Masimpe, muzilawo zimwi mbasyoonto bantu ibaboneka kuti balayanda kwiiya kasimpe ka Jehova. Pele ikusulaika cilawo cesu kulakonzya kututyompya kusoleka nkotuyandika kucita kutegwa tutalisye ziiyo zya Bbaibbele. Imupainiya wazina lya Yvette uuli mucilawo bamwi ncobakali kwaamba kuti cilisampukide, wakabona kuti basikuswaya kubusena obo ibakali kuulanga munzila mbyaabi iili boobo, bakacikonzya kutalisya ziiyo zya Bbaibbele. Yvette awalo naakatobela kulanga zintu munzila ili kabotu, wakajana bantu ibakali kuyanda kwiiya Bbaibbele.

10. Ino mmulimo nzi mupati ngotujisi tobasikuyiisya Bbaibbele?

¹⁰ Banakristo bamwi balakonzya kweenkeenka kubandika makani aaciiyo ca Bbaibbele kubantu bajisi luyandisisyo akaambo kakuti balimvwa kuti inga tabakonzyi kucicitya ciiyo eco. Masimpe, kuyiisya kwaumwi aumwi wandiswe kuliindene. Pele tatweelede kuba bahaazibwene buya kutegwa tucikonzye kuyiisya Jwi lya Leza. Imulumbe wamu Bbaibbele uusalala ulaanguzu kapati, alimwi Jesu wakati, ibantu bali mbuli mbelele balalizyiba ijwi lya Mweembezi wini-wini nobalimvwa. Aboobo, imulimo wesu ngwakwiile kupa buyo mulumbe oyo wa Mweembezi Mubotu, Jesu, munzila iilimvwisya mbubwenya mbuli mbotukonzya.—Johane 10:4, 14.

11. Ino inga mwazwidilila buti mukugwasya sikwiiya Bbaibbele?

¹¹ Ino mulumbe wa Jesu inga mwauyiisya buti munzila iigwasya? Cakusaanguna, amusaangune kulizyiba kabotu-kabotu ncolyaamba Bbaibbele acibalo ncomulanga-langa. Mweelede kuciteelela  kabotu-kabotu cibalo nobeni kamutana kuciyiisya bambi. Alimwi, amusolekesye kubaa bulemu pele cabulongwe ciindi caciiyo. Basikwiiya, ikubikkilizya abana bacili basyoonto kapati balafwambaana kwiiya eelyo nobaliibide alimwi mwiiyi nabalemeka aleelyo nali alubomba.—Tusimpi 16:21.

12. Ino inga mwasinizya buti kuti sikwiiya ulaziteelela zintu nzyomuli mukumuyiisya?

¹² Mbomuli bayi, tamuyandi buyo kupa twaambo twakasimpe kutegwa sikwiiya kapa bwiinguzi bwakupeta buya. Amumugwasye ikuteelela ncali mukwiiya. Ilwiiyo lwasikwiiya, bukkale bwakwe mubuumi alimwi aluzibo ndwajisi kujatikizya Bbaibbele ziyoomugwasya kuteelelesya zintu nzyomwaamba. Aboobo mulakonzya kulibuzya kuti, ‘Sena ulateelela ikaambo ncaabikkilidwe magwalo aatazubuludwe mucibalo ciyiigwa?’ Mulakonzya kuzyiba mbwazilanga zintu kwiinda mukubelesya mibuzyo iitakonzyi kwiingulwa buyo kwiinda mukwaamba kuti inzya naa peepe, pele iiyandika kupandulula buya. (Luka 9:18-20) Kulubazu lumwi, basikwiiya bamwi tabaangulukide kubuzya mwiiyi. Aboobo balakonzya kwiile kutobelezya buyo kakunyinaa kuziteelela kabotu-kabotu nzyobali mukuyiisigwa. Amukulwaizye sikwiiya kubuzya mibuzyo akumwaambila eelyo naatakateelela kabotu kaambo kamwi.—Marko 4:10; 9:32, 33.

13. Ino inga mwamugwasya buti sikwiiya kuti abe mwiiyi?

¹³ Imbazu iiyandika kapati yakucitya ciiyo ca Bbaibbele njakugwasya sikwiiya kuti awalo abe mwiiyi. (Ba-Galatiya 6:6) Akaambo kaceeci, nomwiinduluka ciiyo canu, mulakonzya kumubuzya kuti amupandulwide kaambo kamwi munzila nguba-uba mbuli kuti upandulwida muntu uuli mukukamvwa ciindi cakusaanguna. Mpoonya kumbele, eelyo naayelela kutola lubazu mumulimo, mulakonzya kumutamba kuti muunke limwi mumuunda. Cakutadooneka uyooliiba kubelekaa ndinywe, alimwi ikucita boobo kuyoomugwasya kuzyibila kusikila ciindi eco nayookonzya kuunka mumulimo alikke.

Amumugwasye Sikwiiya Kuti abe Mulongwe wa Jehova

14. Ino nimbaakani nzi ntaanzi njomujisi mbomuli bayi, alimwi ncinzi ciyoomugwasya kuti muzwidilile mukucita boobo?

¹⁴ Imbaakani ntaanzi yamwiiyi woonse Munakristo njakugwasya sikwiiya kubaa cilongwe a Jehova. Eci inga mwacizuzikizya ikutali buyo kwiinda mumajwi ngomukanana pele akwiinda mucikozyanyo canu. Ikuyiisya kwiinda mucikozyanyo kulabakulwaizya kapati mumyoyo basikwiiya. Inzya, imicito ilabeleka kapati kwiinda majwi buyo ikapati caboola kukuyiisya bube bwabukkale bubotu alimwi amukukulwaizya busungu muli sikwiiya. Ikuti wabona kuti majwi aanu alimwi amicito ilacitwa akaambo kakuti mujisi cilongwe cibotu a Jehova, awalo inga wakulwaizigwa kubaa cilongwe cili boobo.

15. (a) Nkaambo nzi ncociyandika kapati kuti sikwiiya abe amakanze mabotu kujatikizya kubelekela Jehova? (b) Mbuti mbomunga mwagwasya sikwiiya kuzumanana kuyaambele munzila yakumuuya?

¹⁵ Muyanda kuti sikwiiya abelekele Jehova, ikutali buyo akaambo kakuti tayandi kuyoonyonyoonwa lya Harmagedoni, pele akaambo kakuti ulamuyanda. Kwiinda mukumugwasya kubaa makanze mabotu aali boobo, munooyaka aziyasyo zitapyi mulilo eezyo ziyoozwidilila mumasunko aalusyomo. (1 Ba-Korinto 3:10-15) Imakanze aataluzi mbuli aakuyandisisya kumwiiya naa kwiiya muntunsi uumbi kunyina naanga amuyumya kukazya kuyungwa kutali kwabunakristo nokuba kumugwasya kuba sicamba mukucita zintu ziluleme. Kamuyeeya kuti, tamunooli bayi bakwe mane kukabe kutamani. Nomucijisi ciindi cibotu, mulakonzya kumukulwaizya kuzumanana kunooswenenena kuli Jehova ciindi coonse kwiinda mukubala Jwi lya Leza abuzuba alimwi akutelaikaa zintu nzyabala mulindilyo. Munzila eyi ulakonzya kuzumanana kunoolijanina “majwi menimeni” kuzwa mu Bbaibbele amumabbuku aapandulula Bbaibbele neliba leelyo kwanooindide ciindi cilamfwu kuzwa nomwakamanizya kwiiya anguwe.—2 Timoteo 1:13.

16. Mbuti mbomunga mwayiisya sikwiiya mbokupailwa kuzwa mumoyo?

¹⁶ Alimwi mulakonzya kumugwasya sikwiiya kuswenenena kuli Jehova kwiinda mukumuyiisya mbwayelede kupaila kuzwa mumoyo. Ino eci inga mwacicita buti? Ambweni mulakonzya kumutondezya mupailo wa Jesu wacikozyanyo, alimwi amipailo iimbi minji yakapailwa camoyo woonse iilembedwe mu Bbaibbele mbuli yeeyo iili kuntembauzyo. (Intembauzyo 17, 86, 143; Matayo 6:9, 10) Kunze lyaboobo, eelyo sikwiiya nateelela mbomupaila nomujula akujala ciiyo, uuyoozyiba mbomulimvwa kujatikizya Jehova. Aboobo,  mipailo yanu lyoonse yeelede kutondezya kuti mulisinizizye alimwi mulaangulukide akuti mulisimide munzila yakumuuya amumizeezo.

Ikubelekela Kuti Mufwutule Bana Benu

17. Ino bazyali inga babagwasya buti bana babo kuzumanana munzila iisololela kulufwutuko?

¹⁷ Akati kabaabo mbotuyanda kugwasya kuti bakafwutuke, mbamukwasyi wesu. Ibana babazyali Banakristo banji balasyomeka alimwi “[m]bayumu mulusyomo.” Pele ibamwi kasimpe kalakonzya kakatasindamina mumyoyo yabo. (1 Petro 5:9; Ba-Efeso 3:17; Ba-Kolose 2:7) Ibakubusi aba banji balaleka kweenda munzila ya Bunakristo mbobayaa bukomenena kusikaa cimo cabupati. Ikuti kamuli bazyali, ncinzi ncomunga mwacita ikutegwa cintu cili boobo citakamucitikili? Lutaanzi mweelede kusoleka kubotezya bukkale bwanu bwamumukwasyi. Ibukkale bwamukwasyi bubotu bujisi ntalisyo mbotu kujatikizya mbobalanga bweendelezi, ikulumba zyeelelo zibotu alimwi akuyanzana kubotu abamwi. (Ba-Hebrayo 12:9) Aboobo, ibulongwe bubotu mumukwasyi bulakonzya kuba busena bubotu oomo icilongwe camwana a Jehova mocinga cakomenena. (Intembauzyo 22:10) Imikwasyi miyumu icita zintu caantoomwe—nokuba kuti ibazyali beelede kwaaba ciindi ncobali kunoobelesya kucita zintu zyabo beni. Munzila eyi, kwiinda mucikozyanyo canu mulakonzya ikuyiisya bana benu kujatikizya mbokusalwa zintu zigwasya mubuumi. Nobazyali, icintu bana benu ncobayandisya kulindinywe tazili zintu zyakumubili pe, pele ndinywe—ciindi canu, inguzu zyanu alimwi aluyando lwanu. Sena bana benu mulabapa zintu ezi?

18. Mmibuzyo nzi bazyali njobeelede kugwasya bana babo kwiingula?

¹⁸ Ibazyali Banakristo tabeelede kuyeeya kuti ibana babo bayooile kuba Banakristo. Daniele, imwaalu alimwi ulaa bana bosanwe waamba kuti: “Ibazyali beelede kujana ciindi cakugusya kudooneka koonse ibana babo nkobabweza kucikolo alimwi amumasena aambi. Cakukkazika moyo beelede kugwasya bana babo kulijanina bwiinguzi kumibuzyo mbuli yakuti: ‘Sena ncobeni tukkede kuciindi cakumamanino? Sena ncobeni kuli buyo cikombelo cakasimpe comwe? Nkaambo nzi sicikolo umwi ngociiya limwi uuboneka kuti uli kabotu ncatakonzyi kuba mulongwe mubotu ngobeelede kuyanzana limwi? Sena lyoonse ncibi koonana ikuti muntu katanakwata naa kukwatwa?’” Nobazyali, kamusyoma Jehova kuti uyookulongezya kusoleka kwanu nkaambo awalo ulabubikkila maanu bukkale bwabana benu.

19. Nkaambo nzi ncociinda kubota kuti bazyali lwabo beni kabaliyiisizya bana babo?

¹⁹ Ibazyali bamwi balakonzya kulimvwa kuti tabeeleli kabotu pe caboola kukwiiyaa bana babo. Pele tamweelede kulimvwa boobo nkaambo kunyina muntu uumbi weelela kuyiisya bana benu kwiinda ndinywe. (Ba-Efeso 6:4) Ikwiiyaa bana benu kuyoomugwasya kuzyiba zili mumyoyo amizeezo yabo munzila yakaanzambwene. Sena twaambo ntobaamba tuzwa mumoyo naa ntwaatala-tala buyo? Sena balazisyoma ncobeni zintu nzyobaiya? Sena Jehova mmuntu wini-wini kuli mbabo? Mulakonzya kujana bwiinguzi kumibuzyo eyi alimwi aimbi iiyandika kapati lilikke nomwiiyaa bana benu.—2 Timoteo 1:5.

20. Mbuti bazyali mbobanga bacita kuti ciiyo camukwasyi kacikkomanisya alimwi kacigwasya?

²⁰ Ino inga mwazumanana buti abubambe bwaciiyo camukwasyi wanu kuzwa leelyo nomwatalika? Joseph, mwaalu alimwi uujisi bana bobilo musankwa amusimbi, waamba kuti: “Mbubwenya mbuli ziiyo zya Bbaibbele zyoonse, ciiyo camukwasyi ceelede kuti kacikkomanisya, ceelede kuba ciindi umwi aumwi ncalangila. Ikutegwa eci cicitike mumukwasyi wesu, tatuyuminini buyo aciindi cimwi. Ciiyo cesu cilakonzya kutola woola lyomwe, pele neliba leelyo notujisi buyo maminiti aali kkumi, tulaiya. Icintu cimwi cipa kuti ciiyo cesu kacikkomanisya kapati kubana mumvwiki amvwiki ncakuti tulazisobana zibeela nzyotubala mubbuku  lya Ibbuku Lyangu Lyamakani Aa-Bbaibbele. * Ikusindamina kwamakani ayo akuteelelwa kujanwa nzezintu ziyandika kapati kwiinda mweelwe wamincali njotwiiya.”

21. Ndiilili bazyali nobeelede kuyiisya bana babo?

²¹ Ee, ikuyiisya bana benu takuyiili buyo aaziindi zini zyakwiiya nzyomubikkide. (Deuteronomo 6:5-7) Kamboni waku Thailand waambwa kumatalikilo aacibalo waamba kuti: “Ndilayeeya kabotu-kabotu bataata nibakali kunditolelezya mumulimo wakukambauka aamacinga esu kuya kumasena aali kule kapati acilawo cambungano yesu. Masimpe, cakali cikozyanyo cabazyali besu cibotu alimwi akutuyiisya nkobakatuyiisya mubukkale boonse izyakatugwasya kusala kubeleka mulimo waciindi coonse. Alimwi ziiyo ezyo zicindigwasya kapati. Ndicibelekela mumasena aamuunda aali kule kapati!”

22. Ncinzi ciyoocitika ikuti naa ‘mwalibamba nobeni anjiisyo nzyomuyiisya’?

²² Bumwi buzuba calino-lino alimwi aciindi cini ceelede, Jesu uyooboola kuzyoonyonyoona bweende obu mulubeta lwa Leza. Mpoonya iciyoocitika eco ciyoozyibwa koonse-koonse, pele babelesi ba Jehova basyomeka bayoozumanana kumubelekela kumwi kabalangila lufwutuko lutamani. Sena mulombozya kuyooba akati kabo, antoomwe abana benu alimwi abasikwiiya Bbaibbele benu? Ikuti naa mboobo, lyoonse kamuyeeya makani aakuti: “Ulibambe kabotu lwako anjiisyo nzyoiisya. Koujisi utaleki pe, nkaambo wacita oobo, inga ulalifutula omwini, abaabo bakuswiilila.”—1 Timoti 4:16, Ci.

Bupanduluzi buyungizidwe

Sena Inga Mwapandulula?

• Ino tweelede kuzilanga buti zintu mbwaanga tatucizi ciindi cini ciyoosika lubeta lwa Leza?

• Muunzila nzi motunga ‘twalibamba kunjiisyo nzyotuyiisya’?

• Mbuti mbomunga mwagwasya sikwiiya kuti abe mulongwe wa Jehova?

• Nkaambo nzi ncociyandika kuti bazyali bajane ciindi cakwiiya abana babo?

[Mibuzyo yaciiyo]

[Cifwanikiso icili apeeji 27]

Kwiiya kulasindamizyigwa eelyo nokucitwa munzila yabulemu alimwi iikkomanisya

[Cifwanikiso icili apeeji 31]

Ikusobana zibalo zimwi zyamu Bbaibbele mbuli ca Solomoni naakabeteka basibwaamu bobile, kupa kuti ziiyo zyamukwasyi kazikkomanisya