Sena Bbala Lyakuti “Munakristo” Liyaabubula Bulemu?

INO kuba Munakristo caamba nzi? Mbuti mbomunga mwayingula? Ibantu bakasalwa-salwa kuzwa mumasi ayindene-indene bakabuzigwa mubuzyo ngoona ooyu, lino bwiinguzi bwabo bumwi mboobu:

“Nkutobela Jesu alimwi akumwiiya.”

“Nkuba muntu uli kabotu alimwi akuli bamwi.”

“Nkutambula Kristo kali Mwami alimwi a Munununi.”

“Kuunka ku Misa akwaamba Mipailo yabulungu alimwi akutambula Mulalilo Uusetekene.”

“Tandisyomi kuti muntu weelede kaunka kucikombelo buya ikutegwa ayitwe kuti Mmunakristo.”

Naaba madikisyinali aalo apa bupanduluzi bunji bunyonganya kapati. Ibbuku limwi lijisi bupandulizi buli kkumi bwabbala lyakuti “Munakristo” kutalikila kuli bwakuti “nkusyoma akuba umwi wacikombelo ca Jesu Kristo” kusikila kukuba “muntu uulilemeka naa uulombozyeka.” Tacigambyi pe kujana kuti bantu banji cilabaalila kupandulula ncicaamba kuba Munakristo.

Icilengwa Cakwaanguluka Kucita Zintu

Mazubaano, akati kabaabo baambwa kuti Mbanakristo—nobaba baabo mbubakkala limwi muzyuuno muzikombelo—umwi ulakonzya kujana mizeezo yiindene-indene aamakani aamba kuti Bbaibbele lyakamunikilwaa Leza, njiisyo yakusanduka, kutola lubazu kwacikombelo mutwaambo twacisi alimwi akwaambila bambi kujatikizya zintu nzyasyoma. Makani aajatikizya bukkale bubotu mbuli kubija kwakugusya da, bunasodoma alimwi akukkala antoomwe kwabantu batakwetene kanjikanji ngaakulwaizya mazwanga. Icilengwa ciliko nkuduma kwakwaanguluka kucitila zintu aumwi nzyayanda.

Mucikozyanyo, inkamu yabasikukosola makani iba cikombelo cimwi caba Protestanti, ino-ino aawa bakazumizya kuti cikombelo cilakonzya “kusala mwaalu uudumide kukucita zintu zyabunasodoma kuba umwi wamunkamu yabo yeendelezya,” mbokwakaambilizigwa oobu mumagazini iitegwa Christian Century. Bahaazibwene bamwi mulwiiyo lwabukombi bapa muzeezo wakuti lusyomo muli Jesu taluli ngomusemu pe walufwutuko. Balo basyoma kuti ba Juda, aba Mozilemu abamwi buyo “balakonzya kuyoonjila kujulu [mbubona buyo mbuli Banakristo],” mbokwakaambwa mumuteende wa The New York Times.

Amweezyeezye buyo muntu uukulwaizya kuti makwebo kaayendelezyegwaa mfwulumende pele kasumpula makwebo ateendelezyegwi amfwulumende naa muntu uuli mubulelo bwamfwulumende iisalwaa bantu kasumpula mfwulumende yakusinikizya naa muntu ulanganya zilawo mukkala bantu kakulwaizya kugonka masamu oonse. “Ooyo muntu masimpe tali sikukulwazya makwebo aacisi ayendelezyegwaa mfwulumende naa tali umwi wamfwulumende iisalwaa bantu naa tali sikulanganya zilawo mukkala bantu,” oobo mbomukonzya kwaamba alimwi inga kamuluzi. Kuti naa mwalanga-langa kwiindana kwamizeezo yabaabo bategwa Mbanakristo, mulakonzya kubona kuti lusyomo lwabo lulaandeene kapati mbuli julu anyika alimwi lulakazyanya aceeco ncaakayiisya Uwakaanza Bunakristo Jesu Kristo. Ino ooku kwiindana kwamizeezo kwaamba nzi kujatikizya Bunakristo bwabo?—1 Ba-Korinto 1:10.

Ikukulwaizya kucinca njiisyo zya Banakristo kutegwa zyeendelane amizeezo yabukkale bwabantu kwakatalika kaindi kapati mbuli mbotutiibone. Ino Leza alimwi a Jesu Kristo balimvwa buti kujatikizya kucinca ooku? Sena zikombelo zikulwaizya njiisyo zyatakatalisigwaa Kristo zililuzi kulyaamba kuti nzya Banakristo? Eeyi mibuzyo ilalangwa-langwa mucibalo citobela.