Amwaambilizye Makani Mabotu Cabusungu
Amwaambilizye Makani Mabotu Cabusungu
“Myoyo yanu ipye kukumanina Mwami milimo.”—BA-ROMA 12:11.
1, 2. Nciimo nzi Banakristo ncobasoleka kubaa ncico mbobali bakambausi bamakani mabotu?
IMULOMBWANA umwi ulikkomene amulimo wakwe mupya. Buzuba bwakusaanguna kumulimo, cakuyandisisya ulindila kupegwa malailile kuzwa kuli sikumulemba milimo. Ulangila mulimo wakusaanguna alimwi ulipakamene kapati. Ukanzide kubeleka canguzu kapati.
2 Munzila eyi njoona, swebo Tobanakristo tulakonzya kulibona kuti tuli babelesi batalika ino-ino mulimo. Mbwaanga bulangizi bwesu mbwakupona kukabe kutamani, kulakonzya kwaambwa kuti twatalika lino-lino awa kubelekela Jehova. Masimpe Mulengi wesu ujisi milimo minji mumizeezo njayanda kuti twiibeleke iiyootupa kujata bubi mane do kukabe kutamani. Pele mulimo mutaanzi ngotwakatambula ngooyo wakukambauka makani mabotu aa Bwami bwakwe. (1 Ba-Tesalonika 2:4) Ino tulimvwa buti kujatikizya mulimo oyu wakazwa kuli Leza? Mbubwenya mbuli mulombwana oyu, tuyanda kuti tuucite munzila mbotu kapati kusikila mpotugolela, cabunkutwe, cakukondwa—inzya, icabusungu!
3. Ncinzi ciyandika ikutegwa tuzwidilile katuli mubelesi wamakani mabotu?
3 Masimpe, ncintu ciyumu kuzumanana aciimo cili boobo. Kunze lyamulimo wesu, kuli mikuli minji iimbi njotucita, tulakatala kapati twamana kucita milimo imwi akati kayeeyi. Pele kanjikanji tulakonzya kuzilanganya zintu ezi kumwi katubikkila maanu kumulimo wesu. Nokuba boobo, ikucita boobo ninkondo iizumanana. (Marko 8:34) Jesu wakakankaizya kuti ikutegwa tuzwidilile katuli Banakristo, tuyandika kusolekesya.—Luka 13:24.
4. Mbuti kulibilika kwabuumi bwabuzubaa buzuba mbokunga kwanyonganya kupakamana kwesu kwakumuuya?
4 Ncuuba-uba kapati kulimvwa kuti twazundwa ziindi zimwi akaambo kakuvwula kwazintu nzyotweelede kucita. “Makataazyo aabuumi” alakonzya kumanizya busungu akulumba nkotujisi kujatikizya milimo yateokrasi. (Luka 21:34, 35; Marko 4:18, 19) Akaambo kakuti tuli bantunsi batalondokede, tulakonzya ‘kuleka luyando lwesu lwakusaanguna.’ (Ciyubunuzyo 2:1-4) Imbazu zimwi zyamulimo ngotubelekela Jehova zilakonzya kucitwa cakwiinzya buyo mulawo. Ino mbuti Bbaibbele mbolipa kukulwaizya kuyandika kutegwa tuzumanane cabusungu mumulimo wesu?
Mbuli “Mulilo Uuyakisya” Mumyoyo Yesu
5, 6. Ino mwaapostolo Paulo wakacibona buti coolwe cakukambauka ncaakajisi?
5 Imulimo ngwaatupa Jehova mmubotu kapati cakuti taweelede kucitwa cakwiinzya buyo mulawo. Imwaapostolo Paulo wakabona mulimo wakukambauka makani mabotu kuba coolwe cipati kapati, alimwi wakalibona kuti tanaakeelede kupegwa mulimo uli boobo pe. Wakati: “Ime ndi muniini kwiinda bacece boonse babasalali, nekubaboobo ndime ndakapegwa olu luzyalo, kuti nkakambauke akati kabamasi buvubi butaambiki bwa-Kristo, akucita kuti bantu babonesye mbuzibede ezyo zintu zisisidwe izyakasisidwe kuzwa kumatalikilo aanyika muli-Leza, iwakalenga zintu zyoonse.”—Ba-Efeso 3:8, 9.
6 Ibulangizi bubotu mbwaakajisi Paulo kujatikizya mulimo wakwe ncikozyanyo cibotu kapati kulindiswe. Mulugwalo ndwaakalembela ba Roma, wakati: “Mebo ndayandisya kumukambaukila Makani Mabotu.” Tanaakabaa nsoni kujatikizya makani mabotu. (Ba-Roma 1:15, 16) Wakaubona munzila mbotu alimwi wakalisungweede kuuzuzikizya mulimo wakwe.
7. Ncinzi Paulo ncaakacenjezya mulugwalo ndwaakalembela ba Roma?
7 Imwaapostolo Paulo wakalizyi mbokuyandika kuzumanana cabusungu, aboobo wakalailila Banakristo ku Roma kuti: “Mutabi batolo kubusungu, pele myoyo yanu ipye kukumanina Mwami milimo.” (Ba-Roma 12:11) Ibbala lya Cigiliki lyakasandululwa kuti “butolo” lijisi muzeezo wakuba mbuli muntu “uulebukidwe.” Nokuba kuti inga tiitwatolwaala boobo buya kujatikizya mulimo wesu, toonse tweelede kucenjela kujatikizya zitondezyo zyabutolo munzila yakumuuya alimwi tweelede kucinca ikuti twazibona zitondezyo ezyo kazicitika.—Tusimpi 22:3.
8. (a) Ncinzi cakaba mbuli “mulilo uuyakisya” mumoyo wa Jeremiya, alimwi nkaambo nzi? (b) Nciiyo nzi ncotunga twaiya kuli ceeco cakacitikila Jeremiya?
8 Awalo muuya wa Leza ulakonzya kutugwasya notutyompedwe. Mucikozyanyo, cimwi ciindi musinsimi Jeremiya wakatyompwa, mpoonya wakayeeya kuti aleke buyo kucita mulimo wakwe wabusinsimi. Mane kujatikizya Jehova wakati: “Nsikooyeeya limbi makani aakwe, nsikooyooamba limbi muzina lyakwe.” Sena eci cakali citondezyo cakuciswa kupati ikwa Jeremiya munzila yakumuuya? Peepe. Atwaambe kuti, kuyuma kwa Jeremiya munzila yakumuuya, aluyando ndwaakajisi kuli Jehova alimwi abusungu bwakwe kujatikizya kasimpe zyakamupa nguzu zyakuti azumanane kusinsima. Upandulula kuti: “Mumoyo wangu [ijwi lya Jehova liba]anga mulilo uuyakisya uujalilidwe mukati kazifuwa zyangu, mane lumwi candikataazya kundikasya, amoyo wangu waata.” (Jeremiya 20:9) Kunyina mbocicitwa, ciindi aciindi babelesi ba Jehova basyomeka balatyompwa. Pele nobapaila kuli Jehova kuti abagwasye, uyoolingula zili mumyoyo yabo alimwi uyoobapa cakulisungula muuya wakwe uusalala ikuti naa mbubwenya mbuli Jeremiya kabajisi jwi lyakwe mumyoyo yabo.—Luka 11:9-13; Incito 15:8.
“Mutazimyi Muuya”
9. Ncinzi cinga casinkilizya muuya uusalala kuti utabeleki mulindiswe?
9 Imwaapostolo Paulo wakalailila bana Tesalonika kuti: “Mutazimyi Muuya.” (1 Ba-Tesalonika 5:19) Inzya, micito alimwi amizeezo iiteendelani anjiisyo zyabunaleza ilakonzya kusinkilizya mulimo wamuuya uusalala kulindiswe. (Ba-Efeso 4:30) Sunu Banakristo bajisi mulimo wakukambauka makani mabotu. Icoolwe eci tulacilemeka kapati. Tacitugambyi pe kuti aabo ibatamuzi Leza balausulaika mulimo wesu wakukambauka. Pele eelyo Munakristo acaali naleka kuubikkila maanu mulimo wakwe, eci cilakonzya kuzima mulimo wamuuya wa Leza uutukulwaizya.
10. (a) Ino kulanga kwabantuma inga kwatunyonganya buti? (b) Nkulanga nzi kusumpukide kujatikizya mulimo wesu ikwaambwa ku 2 Ba-Korinto 2:17?
10 Bamwi ibatajatikizidwe ambungano ya Bunakristo balakonzya kubona mulimo wesu kuba buyo wakumwaya mabbuku. Bamwi cakulubila balakonzya kuyeeya kuti tulaunka kuŋanda aŋanda katubikkilide buyo maanu aakutambula kusanga. Ikuti twalekela kuyeeya kubyaabi kuli boobu kweendelezya kulanga kwesu, kulakonzya kucesya busungu bwesu mumulimo. Muciindi cakulekela mizeezo ili boobo kutunyonganya, atuzumanane kulanga mulimo wesu mbubwena Jehova alimwi a Jesu mbobaulanga. Imwaapostolo Paulo wakakwaamba kulanga oko kusumpukide naakati: “Tatuli mbuli banjibanji babisizya makani aa-Leza, pe, tuli bantu benibeni, tuli bantu ba-Leza, tulaamba cakusinizya makani aa-Kristo mbuli kumeso aa-Leza.”—2 Ba-Korinto 2:17.
11. Ncinzi cakagwasya Banakristo bakusaanguna kuzumanana kabali basungu nokuba kuti bakali kupenzyegwa, alimwi ino cikozyanyo cabo ceelede kutukulwaizya kucita nzi?
11 Kwiinde buyo kaindi kasyoonto kuzwa ciindi Jesu naakafwa, basikwiiya bakwe mu Jerusalemu bakatalika kupenzyegwa. Bakakongwa akulaililwa kuti baleke kukambauka. Pele, Ibbaibbele lyaamba kuti boonse “bakazuzigwa Muuya Uusalala, nkabela bakatalika kwaamba makani aa-Leza akaanzambwene.” (Incito 4:17, 21, 31) Imajwi aa Paulo kuli Timoteo kakwiindide myaka iili mbwiibede atondezya ciimo cibotu Banakristo ncobeelede kubaancico lyoonse. Paulo wakati: “Leza takatupede muuya wabukandu, pe, wakatupa muuya wanguzu awakuyandana awakulibamba. Utafwi bweeme kubumboni bwa-Mwami wesu, nokuba kulindime ndemwaange wakwe, pele kogamine kuba mupenzima wamu-Makani Mabotu kunguzu zya-Leza.”—2 Timoteo 1:7, 8.
Mmulimo nzi Ngotweelede Kucitila Simukoboma?
12. Nkaambo nzi kapati ncotukambaukila makani mabotu?
12 Ikutegwa tube aakulanga kweelede kujatikizya mulimo wesu, tweelede kubaa makanze mabotu. Ino tukambaukila nzi? Ikaambo kapati kalalibonya mumajwi aasintembauzyo iwakati: “Basalali bako bayookulongezya [Jehova]. Bayooluula bulemu bwabwami bwako; bayookanana inguzu zyako; kuti bazibye bana ba-Adamu maleele aakwe, abulemu bwabupati bwabwami bwakwe.” (Intembauzyo 145:10-12) Inzya, tulakambauka ikutegwa tutembaule Jehova kubuleya alimwi akusalazya izina lyakwe kubantu boonse. Neliba leelyo nokutuswiilila buyo bantu basyoonto, tutembaula Jehova eelyo notuzumanana kwaambilizya mulumbe walufwutuko cakusyomeka.
13. Ncinzi citukulwaizya kwaambila bamwi makani aabulangizi bwalufwutuko?
13 Alimwi tulakambauka akaambo kaluyando ndotujisi kubantu alimwi nkaambo tatuyandi kubaa mulandu wabulowa. (Ezekieli 33:8; Marko 6:34) Imakani aayendelana ayaaya ngaayo ngaakaamba Paulo naakali kwaambila baabo ibakali kunze lyambungano ya Bunakristo naakati: “Ndijisi ceelelo cakucitila boonse, nibaba ba-Helene nibaba bamisyobo imbi, nibaba basongo nibaba bataiyide.” (Ba-Roma 1:14) Paulo wakalimvwa kuti wakajisi mulimo wakukambaukila bantu makani mabotu, mbwaanga nkuyanda kwa Leza kuti “bantu boonse bafutulwe.” (1 Timoteo 2:4) Aswebo sunu tujisi luyando amulimo wakubelekela simukoboma. Luyando ndwajisi Jehova kubantu lwakamukulwaizya kutuma Mwanaakwe anyika kutegwa azoobafwide. (Johane 3:16) Ooko kwakali kulyaaba kupati cini-cini. Tulalwiiya luyando ndwajisi Jehova notulitakata ikwaambila bamwi makani mabotu aalufwutuko luyeeme aacituuzyo ca Jesu.
14. Ino Bbaibbele libapandulula buti bantu bali kunze lyambungano ya Bunakristo?
14 Bakamboni ba Jehova babona bantunyina boonse kuti balakonzya kuba cibeela cabunyina bwa Bunakristo. Tweelede kukambauka cabusungu, pele busungu bwesu tabuli bwakukazyanya abantu pe. Inzya, Ibbaibbele lini libelesya majwi aakusinizya mumwi nolyaamba bantu boonse munyika. Ibbala lyakuti “nyika” lilabelesyegwa munzila yakusinganya Paulo naamba “busongo bwaansi [naa anyika]” alimwi a “zisusi zibi zyaa[nyika].” (1 Ba-Korinto 3:19; Tito 2:12) Alimwi Paulo wakayeezya Banakristo baku Efeso kuti nobakajisi bukkale bwakutobela “ziimbo zyaansi ano,” ‘bakalifwide’ munzila yakumuuya. (Ba-Efeso 2:1-3) Itwaambo otu alimwi atumbi tukozyenye tuleendelana amajwi aamwaapostolo Johane aakuti: “Nyika yoonse iikede muzibi.”—1 Johane 5:19.
15. Ncinzi ncotutaciti kujatikizya bantu bali kunze lyambungano ya Bunakristo, alimwi ino nkaambo nzi?
15 Pele kamuyeeya kuti itwaambo oto twaamba bantu boonse ibazandukide kuli Leza, ikutali muntu omwe kumugama. Banakristo kunyina nobabeteka muntu uuli woonse kujatikizya mbwayooingula kumulimo wakukambauka. Tabajisi nguzu zyakwaamba muntu uli woonse kuti nimpongo. Tatuli ndiswe notweelede kwaamba ciyoocitika aakuboola Jesu kuzyooandaanya “imbelele [ku]mpongo.” (Matayo 25:31-46) Jesu ngomubetesi uubikkidwe; tatupedwe nguzu ezyo swebo pe. Kunze lyaboobo, ibantu bamwi ibakajatikizidwe kapati mubukkale bubyaabi bautambula mulumbe wa Bbaibbele, bacinca alimwi baba Banakristo bajisi bukkale busalala. Aboobo, nokuba kuti inga tatuyanzani pe abantu bamwi, tatweenkeenki pe kubakananina makani aabulangizi bwa Bwami kufwumbwa nokwajanika ciindi cakucita boobo. Ibbaibbele lyaamba zyabantu bamwi balo, neliba leelyo nobatakaninga kusyoma kuti, ‘bakasalidwe buumi butamani.’ Mukuya kwaciindi bakasyoma. (Incito 13:48) Kunyina notunga twamuzyiba muntu uusalilidwe buumi butamani ccita kuti twamukambaukila—ambweni ziindi zinji. Katuciyeeyede eci, aabo ibatana kuutambula mulumbe walufwutuko tubeenzya “camoyo mubombe” alimwi ‘cabulemu,’ katusyomede kuti bamwi akati kabo balakonzya kuyoouzumina mulumbe wabuumi kumbele.—2 Timoteo 2:25; 1 Petro 3:15.
16. Nkaambo nzi kamwi ncotweelede ‘kucizyiba kuyiisya’?
16 Ikubaa luzibo lubotu katuli bamayi kuyoosumpula busungu bwesu bwakukambauka makani mabotu. Mucikozyanyo: Icisobano cimwi cibotu cilakonzya kacitakondelezyi pe kumuntu uutacizyi mbocisobanwa. Pele kuli yooyo uucizyi kabotu mbocisobanwa, cilamukkomanisya. Ncimwi buyo, Banakristo ‘ibacizyi mukuyiisya kwabo’ balaluyungizya lukkomano lwabo mumulimo. (2 Timoteo 4:2; Tito 1:9) Paulo wakalailila Timoteo kuti: “Kolisungwaazya kukonda Leza, mbuli similimo uutakwe cintu cimuusya insoni, uupandulula makani aalusinizyo mbukweelede.” (2 Timoteo 2:15) Ino inga twaluyungizya buti luzibo lwesu lwakuyiisya?
17. Ino inga ‘twaluyandisisya’ buti luzibo lwa Bbaibbele, alimwi ino luzibo luli boobo inga lwagwasya buti mumulimo wesu?
17 Inzila imwi nkwiinda mukuyungizya kwiiya luzibo lwini-lwini. Imwaapostolo Petro utukulwaizya kuti: “Amukozye mbuli bavwanda kukuyandisya mukupa wamuuya uutavwelwi acintu, kuti mukomene anguwo mulufutuko.” (1 Petro 2:2) Imwana muvwanda utacisidwe ulauyandisisya mukupa, tasungilizigwi buya pe. Pele Munakristo inga wayandika kulizibizya ‘kuyandisisya’ luzibo lwa Bbaibbele. Eci inga cacitwa kwiinda mukubaa ciyanza cibotu cakuyanda kwiiya alimwi akubala. (Tusimpi 2:1-6) Kusolekesya alimwi akulyeendelezya zilayandika ikuti katuyanda kuba bamayi bahaazibwene iba Jwi lya Leza, alimwi kusoleka kuli boobo kulaampindu. Ilukkomano ndotujana kwiinda mukulingaula Jwi lya Leza luyootupa kumweka amuuya wa Leza, katusungweede kwaambila bamwi izintu nzyotwiiya.
18. Mbuti miswaangano ya Bunakristo mboinga yatugwasya ikupandulula jwi lyakasimpe mbukweelede?
18 Imiswaangano ya Bunakristo ayalo ilayandika kapati mukutuyiisya kubelesya Jwi lya Leza munzila mbotu. Izibalo zyamu Bbaibbele nozibalwa nokubandikwa makani aabuleya alimwi amibandi imbi iijatikizya Magwalo, inga cabota ikuti naa twatobelezya muma Bbaibbele esu. Tunooli basongo ikuti naa twabikkila maanu kuzibeela zyamuswaangano, kubikkilizyaa zeezyo izyuugama buya mulimo wesu wakukambauka. Tatweelede kucesya mpindu iijanwa muzitondezyo, ambweni kunoocita zintu zimwi nozicitwa ezi. Awa, ikulyeendelezya alimwi akubikkila maanu kulayandika. (1 Timoteo 4:16) Imiswaangano ya Bunakristo iyaka lusyomo lwesu, itugwasya kuyandisisya Jwi lya Leza alimwi ituyiisya kuba basikwaambilizya bamakani mabotu ibasungu.
Tulakonzya Kusyoma Lugwasyo lwa Jehova
19. Nkaambo nzi ikutola lubazu mumulimo wakukambauka lyoonse ncokuyandika kapati?
19 Ibanakristo ‘ibapya myoyo’ alimwi ibasungu kukukambauka makani mabotu balasolekesya kutola lubazu lyoonse mumulimo. (Ba-Efeso 5:15, 16) Masimpe, tujisi bukkale bwiindene-indene alimwi tacikonzyeki kuti toonse tubeleke mweelwe omwe waciindi mumulimo oyu wakufwutula bantu. (Ba-Galatiya 6:4, 5) Pele iciyandika kwiinda mweelwe waciindi ngotubeleka mumulimo wakukambauka mbunji bwaziindi nzyotubandika abantu kujatikizya bulangizi bwesu. (2 Timoteo 4:1, 2) Mbotuzumanana kukambauka, tuyoomvwisya ncuuli mulimo uyandika kapati oyu. (Ba-Roma 10:14, 15) Tuyoovwuzya lubomba alweetelelo eelyo notuswaangana abantu basinizizye ibali mukulila akutongela alimwi ibanyina bulangizi.—Ezekieli 9:4; Ba-Roma 8:22.
20, 21. Mmulimo nzi ngotuciyandika kucita? (b) Ino Jehova uli mukutugwasilizya buti mukusoleka kwesu?
20 Jehova watupa mulimo wakukambauka makani mabotu. Ooyu ngomulimo mutaanzi ngotutambula kuzwa kulinguwe mbotuli “basimilimonyina.” (1 Ba-Korinto 3:6-9) Tulisungweede kuuzuzikizya camoyo woonse mukuli oyu wakazwa kuli Leza kusikila mpotukonzya. (Marko 12:30; Ba-Roma 12:1) Kucili bantu banji ibeelela munyika ibalaa nzala yakasimpe. Kuli milimo minji yakucita, pele tulakonzya kusyoma mulugwasyo ndwapa Jehova mbotumanizya mulimo wesu.—2 Timoteo 4:5.
21 Jehova ulatupa muuya wakwe alimwi watupa “apanga lya-Muuya,” Jwi lya Leza. Kwiinda mulugwasyo ndwapa, tulakonzya kwaasama amilomo yesu “akuzibya kaanzambwene zintu zisisidwe zya-Makani Mabotu.” (Ba-Efeso 6:17-20) Acaambwe akulindiswe eco mwaapostolo Paulo ncaakalembela Banakristo ku Tesalonika kuti: “Makani Mabotu ngitukambauka naakasika kulindinywe, teeakasika amajwi alike pe, akeza anguzu a-Muuya Uusalala akulamwa kunji kwamumoyo.” (1 Ba-Tesalonika 1:5) Inzya, atukambauke makani mabotu cabusungu!
Ikwiinduluka
• Ncinzi cinga cacitika kubusungu bwesu mumulimo akaambo kakulibilika zyabukkale?
• Muunzila nzi kuyandisya kwesu kwakukambauka makani mabotu mokweelede kuba mbuli “mulilo uuyakisya” mumyoyo yesu?
• Nkulanga nzi kutyompya kujatikizya mulimo wesu nkotweelede kweeleba?
• Ino tweelede kubabona buti bantu boonse ibatasyomi zeezyo swebo nzyotusyoma?
• Mbuti Jehova mbwatugwasya kutegwa tuzumanane abusungu bwesu mumulimo wakukambauka?
[Mibuzyo yaciiyo]
[Zifwanikiso izili apeeji 23]
Ibanakristo baiya busungu bwa Paulo alimwi a Jeremiya
[Zifwanikiso izili apeeji 24]
Ibusungu bwesu mumulimo bukulwaizigwaa luyando ndotujisi kuli Leza akuli basimukoboma