Izipaizyo Zyakulumba Izimukkomanisya Jehova
Izipaizyo Zyakulumba Izimukkomanisya Jehova
“Mutuule mibili yanu, ibe cipaizyo cuumi, cisalala, ciyandisi kuli-Leza.”—Ba-roma 12:1.
1. Ncinzi Bbaibbele ncolyaamba kujatikizya mpindu yaaciindi buyo cisyoonto yazipaizyo zyakatuulwa mu Mulawo wa Musa?
“MULAO uli cifwanisyo buyo cacoolwe ciza, tacili cinkozya cini cazintu ezyo, aboobo tuukonzyi kulomya baabo baswena afwaafwi azipaizyo zyamyaaka yoonse zituulwa lyoonse lyoonse.” (Ba-Hebrayo 10:1) Mukaambo aako komwe kadumide, imwaapostolo Paulo ulasinizya kuti zipaizyo zyoonse zyakali kutuulwa mu Mulawo wa Musa tiizyakajisi mpindu ini caboola kulufwutuko lwabantu.—Ba-Kolose 2:16, 17.
2. Nkaambo nzi ncocitali cabuyo ikusoleka kuteelela makani oonse aali mu Bbaibbele kujatikizya zituuzyo azipaizyo zyamu Mulawo?
2 Sena eci caamba kuti imakani aajatikizya zipaizyo azituuzyo aali mu Mabbuku aamu Bbaibbele Aakusaanguna Osanwe anyina mpindu ku Banakristo sunu? Mubwini, muciindi ciinda-inda buyo kumwaka omwe, ibantu balembedwe mu Cikolo Camulimo Wateokrasi mumbungano zya Bakamboni ba Jehova nyika yoonse mbwiizulwa bakaabala mabbuku aaya aakusaanguna osanwe aamu Bbaibbele. Ibamwi bakasungwaala kwaabala alimwi akwaamvwisisisya makani oonse aajatikizidwe. Sena kusola-sola koonse oko nkobakacita kwakali kwabuyo? Eco tacikonzyi kuba boobo pe mbwaanga “makani aali boobo aakalembwa kalekale, nkukwiiya kwesu nkwaakalembelwa, kuti kubukakatilo akubukombelezyo bwamalembe tujane bulangizi bwakutontozya moyo.” (Ba-Roma 15:4) Aboobo imubuzyo ngotweelede kubuzya ngwakuti, Ino ‘nkwiiya’ nzi alimwi ‘nkukombelezya’ kuli buti nkotunga twajana kuzwa kumakani aali mu Mulawo kujatikizya zituuzyo azipaizyo?
Ngakutuyiisya Alimwi Akutukombelezya
3. Ncintu nzi ciyandika kapati ncotuyandika?
3 Nokuba kuti tatuyandiki kutuula zipaizyo zini mbuli mbokulailidwe mu Mulawo, tuciciyanda kapati eco zipaizyo ncozyakacitila bana Israyeli munzila nsyoonto, nkokuti, ikutegwa zibi zyesu zilekelelwe alimwi akubaa cilongwe a Leza. Ino mbuti mbotunga twatambula lugwasyo olo mbwaanga tatucituuli zipaizyo zini? Naamanizya kwaamba zintu zimwi zyatakali kukonzyeka kucitwa kwiinda muzipaizyo zyabanyama, Paulo waamba kuti: “Ncaambila bobuya naboola ansi [Jesu] kuti, Cipaizyo nociba cituuzyo enzyo nzyoyanda pe, pele mubili ngowandibambila. Alimwi tokondwi zipaizyo zitentwa azipaizyo zipaililwa zibi. Eno mebo ndakati, Mebo mpaawa, ndaboola, (Ndilivungidwe mubbuku lilembedwe makani aamba ndime), Ndeza kuzoocita luyando lwako, O Leza.”—Ba-Hebrayo 10:5-7.
4. Mbuti Jesu mbwabelesya ibbuku lya Intembauzyo 40:6-8 ikwaamba Jesu Kristo?
4 Kazubulula kuzwa ku Intembauzyo 40:6-8, Paulo waamba twaambo twakuti Jesu kunyina naakaboolela kuzoocita kuti “cipaizyo nociba cituuzyo,” “zipaizyo zitentwa azipaizyo zipaililwa zibi” zizumanane, mbwaanga zyoonse ezi kuciindi Paulo naakalemba makani aya tanaakacili kuzikkomanina pe Leza. Muciindi caboobo, Jesu wakaboola amubili iwakabambidwe a Usyi wakujulu, walo wakeelene mumbazu zyoonse amubili Leza ngwaakabamba naakalenga Adamu. (Matalikilo 2:7; Luka 1:35; 1 Ba-Korinto 15:22, 45) Mbwaanga wakali Mwanaa Leza uulondokede, Jesu wakajisi mulimo wa “lunyungu” lwamwanakazi mbubonya mbokwakasinsimwa ku Matalikilo 3:15. Wakali kuyoobweza ntaamu ‘zyakuuma Saatani kumutwe,’ nokuba kuti Jesu lwakwe awalo wakali ‘kuyoolumwa kukasindi.’ Munzila eyi, Jesu wakaba njenzila yakapegwaa Jehova ibantu mobakali kunoofwutukila, yalo baalumi basyoma kuzwa kuciindi ca Abelo njobakali kulangila.
5, 6. Ninzila nzi iisumpukide yakusikila Leza iiliko ku Banakristo?
5 Kaamba mulimo ooyu uulibedelede Jesu ngwaakacita, Paulo waamba kuti: “Oyo iwatakazi zibi Leza wakamucitya kuti abe zibi nkaambo kandiswe, kuti swebo tube bululami bwa-Leza mulinguwe.” (2 Ba-Korinto 5:21) Ikaambo ka “kuti abe zibi” munzila imbi kalakonzya kusandululwa kuti ‘wakaba cituuzyo cazibi.’ Imwaapostolo Johane waamba kuti: “Ngomulungo wazibi zyesu, alimwi teensi kulindiswe akulike, pele kuzibi zyanyika yoonse.” (1 Johane 2:2) Aboobo, nokuba kuti bana Israyeli bakalijisi nzila yaaciindi buyo yakusikila Leza kwiinda muzipaizyo zyabo, Banakristo bajisi nzila iisumpukide yakusikila Leza—icituuzyo ca Jesu Kristo. (Johane 14:6; 1 Petro 3:18) Ikuti twasyoma mucituuzyo cacinunuzyo ncaakapa Leza alimwi ikuti twamumvwida, aswebo tulakonzya kulekelelwa zibi zyesu akukkomanisya Leza alimwi akutambula zilongezyo kuzwa kulinguwe. (Johane 3:17, 18) Sena eco tacituumbulizyi? Pele ino inga twatondezya buti kuti tulacisyoma cituuzyo cacinunuzyo?
6 Naakamana kupandulula kuti Banakristo bajisi nzila iisumpukide yakusikila Leza, imwaapostolo Paulo wakandandamika nzila zyotatwe mbotunga twatondezya lusyomo lwesu akulumba kucipego ncaakapa Leza mbubwenya mbuli mbotubala ku Ba-Hebrayo 10:22-25. Nokuba kuti ilulayo lwa Paulo ikapati lwakageme baabo ‘banjila mu-Busena Busalala Bwini,’ nkokuti Banakristo bananike ibajisi bwiite bwakujulu, mubwini ibantu boonse beelede kubikkila maanu kumajwi aa Paulo aakasololelwaa muuya ikuti kabayanda kugwasigwa kuzwa kucituuzyo ca Jesu cakuboozya bulongwe.—Ba-Hebrayo 10:19.
Atutuule Zipaizyo Zisalala Alimwi Zitakwe Kampenda
7. (a) Mbuti bbuku lya Ba-Hebrayo 10:22 mbolitondezya cakali kucitwa lyakutuula cipaizyo? (b) Ncinzi cakeelede kucitwa kutegwa kusinizigwe kuti cipaizyo eeco nceeco citambulwaa Leza?
7 Cakusaanguna, Paulo ukulwaizya Banakristo kuti: “Atuswene afwaafwi amoyo winiwini mukusyoma kutakwe kampenda, ayalo myoyo yesu kiisansailidwe kusalala kwakuziba zibi, ayalo mibili yesu kiisambide amaanzi aanjoloma.” (Ba-Hebrayo 10:22) Imabala aabelesyegwaawa cakululama atondezya cakali kucitika cini nokwakali kucitwa zipaizyo zini mu Mulawo. Eci cileelela akaambo kakuti ikutegwa cipaizyo citambulwe, cakeelede kutuulwa kumoyo kakusalala alimwi kacisalala, kacitakwe kampenda pe. Imunyama wakali kutuulwa wakali kuzwa kubutanga bwaŋombe naa mbelele, nkokwaamba kuti ibanyama basalala, alimwi “balondokede,” ibatakwe kampenda. Ikuti cipaizyo cakali cabayuni, cakeelede kuba canziba naa bana bankwilimba. Ikuti malailile aya atobelwa, eco cakeelede “[ku]tambulika kukumanya milandu yakwe.” (Levitiko 1:2-4, 10, 14; 22:19-25) Icituuzyo cabusu cakanyina bumena, bwalo ibwiiminina kubola; alimwi tiibwakeelede kubaa buci, cilangilwa kuti cakali kwaamba musinza wamicelo iilweela, yalo iipa kusasa. Izipaizyo zyabanyama naa zyabusu nozyakali kutuulwa acipaililo, kwakali kulungwa munyo walo wakali kukasya kuti zitaboli.—Levitiko 2:11-13.
8. (a) Ino muntu uutuula cituuzyo wakeelede kuba muntu uuli buti? (b) Mbuti mbotunga twasinizya kuti bukombi bwesu bulamukkomanisya Jehova?
8 Ino mbuti walo muntu uutuula cituuzyo? Mu Mulawo kwaambidwe kuti imuntu uuli woonse uusika kubusyu bwa Jehova wakeelede kusalala alimwi uunyina kampenda. Imuntu wakasofweede munzila iili yoonse cakusaanguna wakeelede kutuula cituuzyo cazibi naa candubizyo kutegwa aboozye kusalala kwakwe kumeso aa Jehova alimwi akuti cipaizyo cakwe citentwa naa cakutontozya citambulwe kuli Leza. (Levitiko 5:1-6, 15, 17) Aboobo, sena tulakubikkila maanu kuyandika kwakuzumanana katujisi cilongwe cibotu a Jehova? Ikuti katuyanda kuti bukombi bwesu kabumukkomanisya Leza, tweelede kuba bantu bafwambaana kululamika nsotoko zyoonse kumilawo ya Leza. Tweelede kufwambaana kujana lugwasyo ndotupedwe a Leza—“baalu bambungano” alimwi aku “mulungo wazibi zyesu,” Jesu Kristo.—Jakobo 5:14; 1 Johane 2:1, 2.
9. Nkwiimpana nzi kupati kuliko akati kazipaizyo zyakali kutuulilwa Jehova azeezyo zyakali kutuulilwa baleza bakubeja?
9 Ikukankaizya kwakutasofwaala kuli koonse mubwini ncecintu cipati cakapa kwiindana akati kazipaizyo zyakali kutuulwa kuli Jehova alimwi azeezyo zyakali kutuulilwa baleza bakubeja abantu bamuzisi zyakazingulukide cisi ca Israyeli. Kalyaamba kwiimpana kwacibeela eci cazipaizyo zyamu Mulawo wa Musa, ibbuku limwi lyaamba kuti: “Kujatikizya zipaizyo tulakonzya kubona kuti kunyina nozyakaswaangene abuniini akusonda; bukombi bwakubee nkugauka, kulinengaula naa bwaamu bwamumatempele, izilengwa zyabuzyazi zyakali kukasilwa limwi; kunyina nokwakali kutuulwa bantu; kwakanyina zituuzyo zituulilwa bafwide.” Zyoonse zyaamba kaambo komwe buyo kakuti: Jehova ulasalala alimwi taakwe nalekela naa kuzumizya zibi naa bumpelenge buli boonse. (Habakuku 1:13) Bukombi alimwi azipaizyo nzyapegwa zyeelede kazisalala alimwi kazitakwe kampenda—munzila yakumubili, yakulilemeka alimwi ayakumuuya.—Levitiko 19:2; 1 Petro 1:14-16.
10. Nkulilingaula kuli buti nkotweelede kucita kweelanaa zilembedwe ku Ba-Roma 12:1, 2?
10 Akaambo kaceeci, tweelede kulilingaula tobeni mumbazu zyoonse zyabuumi ikutegwa tusinizye kuti mulimo wesu kuli Jehova ulamukkomanisya. Tatweelede kuyeeya kuti kufwumbwa kuti katutola lubazu mumiswaangano ya Bunakristo alimwi amumuunda, cinyina makani azintu nzyotucita cakusisikizya. Alimwi tatweelede kulimvwa kuti ikutola lubazu nkotucita mumilimo ya Bunakristo munzila imwi kulatwaangulula kukutobela milawo ya Leza mumbazu zimbi zyabukkale bwesu. (Ba-Roma 2:21, 22) Kunyina notukonzya kulangila zilongezyo zya Leza alimwi acilongwe anguwe ikuti twazumizya cintu cimwi cisofweede naa cijisi kampenda mumeso aakwe ikusofwaazya kuyeeya amicito yesu. Lyoonse katubikkila maanu kumajwi aa Paulo aaya aakuti: “Bakwesu, ndamukumbila kuti kuluzyalo lwa-Leza mutuule mibili yanu, ibe cipaizyo cuumi, cisalala, ciyandisi kuli-Leza, mbubonya bukombe bwanu bwakumoyo. Alimwi mutakozyanizigwi aziyanza zyaciindi ecino, pele amusanduke kukucitululwa kwamyoyo yanu, kuti mukasimpikile makani ngaayanda Leza, makani mabotu aatambulika aalondokede.”—Ba-Roma 12:1, 2.
Amutuule Zipaizyo Zyakulumba Camoyo Woonse
11. Ncinzi cibikkilizidwe mubbala lyakuti “buzumino” ilyaambwa ku Ba-Hebrayo 10:23?
11 Mulugwalo ndwaakalembela bana Hebrayo, Paulo ono wabikkila maanu kulubazu luyandika kapati lwabukombi bwakasimpe ategwa: “Atujatisye buzumino bwabulangizi bwesu, kuti kutabi notuzungaana, nkaambo walo oyo uwakasyomezya ulisyomekede.” (Ba-Hebrayo 10:23) Ibbala lyakuti “buzumino” lyaamba “kulyaambilila,” alimwi Paulo waamba “cipaizyo cakulumba.” (Ba-Hebrayo 13:15) Eci cituyeezya musyobo wazipaizyo ibaalumi mbuli Abelo, Nowa alimwi a Abrahamu nzyobakatuula.
12, 13. Ncinzi muna Israyeli ncaakazuminizya naakali kutuula cipaizyo citentwa, alimwi ino ncinzi ncotunga twacita ikutegwa tutondezye muuya ngoona oyo?
12 Imuna Israyeli naakatuula cipaizyo citentedwe, wakacita obo cakuliyandila “kuti citambulike kuli-Jehova.” (Levitiko 1:3) Kwiinda mucipaizyo cili boobo, cakulisungula wakatondezya buzumino naa kuzuminizya kujatikizya zilongezyo zya Jehova zinji alimwi aluzyalo kubantu bakwe. Amuyeeye kuti cibeela ciimpene kujatikizya cipaizyo citentwa ncakuti cituuzyo coonse mbocibede cakali kuumpwa acipaililo—icizibyo ceelela cakulitakata akulyaaba kumaninide. Munzila iikozyenye, tulatondezya lusyomo ndotujisi mucituuzyo cacinunuzyo alimwi akulumba kwesu kujatikizya cipego eelyo cakulisungula alimwi camoyo woonse notupaila lyoonse “cipaizyo cakulumba, nkokuti micelo yamilomo iilumba,” kuli Jehova.
13 Nokuba kuti Banakristo tabatuuli zipaizyo zini zibe zyabanyama naa zyacisyumani, balijisi mukuli wakupa bukamboni kumakani mabotu aa Bwami alimwi akugwasya bantu kuba basikwiiya ba Jesu Kristo. (Matayo 24:14; 28:19, 20) Sena mulacibelesya kabotu coolwe ncomujisi kutola lubazu mukwaambilizya makani mabotu aa Bwami bwa Leza kubuleya ikutegwa ibantu banji bambi bazyibe zintu zitaliboteli Leza nzyasyomezezye bantu bamumvwida? Sena cakulisungula mulatola ciindi alimwi mulalitakata anguzu zyanu zyoonse mukuyiisya bantu bajisi luyandisisyo alimwi akubagwasya kuti babe basikwiiya ba Jesu Kristo? Ikutola lubazu mumulimo cabusungu kulamukkomanisya kapati Leza mbubwenya mbuli bweema bubotu bwacipaizyo citentwa.—1 Ba-Korinto 15:58.
Amukukkomanine Ikuyanzanaa Leza Alimwi Abantu
14. Mbuti majwi aa Paulo ku Ba-Hebrayo 10:24, 25 mbwaapa muzeezo uukozyenye acipaizyo cakutontozya?
14 Camamanino, Paulo waamba makani aaluyanzano lwesu a Banakristoma notukomba Leza. “Katunga katuyeeyana, katubusyanya-busyanya mukuyandana akucita milimo mibotu. Tutanoonga katuleka kulibunga-bunga, mbuli bamwi mbubaleka, anu kamucenjezyanya twaambo, kamucita obuya lyoonse mbomukubwene kuti buzuba bwa-Kristo buli afwaafwi.” (Ba-Hebrayo 10:24, 25) Itwaambo twakuti ‘kubusyanya-busyanya mukuyandana akucita milimo mibotu,’ “kulibunga-bunga” alimwi akuti “kamucenjezyanya twaambo” toonse tutuyeezya ncocakabacitila bantu ba Leza mu Israyeli icituuzyo cakutontozya.
15. Nkukozyanya nzi nkotubona akati kacipaizyo cakutontozya alimwi amiswaangano ya Bunakristo?
15 Ikaambo kakuti “zipaizyo zyakutontozya” zimwi ziindi kasandululwa kuti “zipaizyo zyaluumuno.” Ibbala lya Cihebrayo lyaamba “luumuno” aawa lijisi muzeezo wamubunji, ambweni nkokwaamba kuti ikutola lubazu muzipaizyo zili boobo ciletela luumuno a Leza alimwi aluumuno abakombima. Kaamba cipaizyo cakutontozya, sikwiiya umwi waamba kuti: “Eci ncobeni cakali ciindi cakuyanzana kwalukkomano a Leza wa Cizuminano, oomo walo mwaakalifwiinsya kuti abe Mweenzu wa Israyeli aciindi cacakulya cacituuzyo, mbubwenya walo alimwi lyoonse mbwaakali Simeenzaabo.” Eci cituyeezya cisyomezyo ca Jesu cakuti: “Nkubabede bantu bobile nanka botatwe babungene muzina lyangu, nkukonya oko nkumbede ambebo akati kabo.” (Matayo 18:20) Lyoonse notujanika kumuswaangano wa Bunakristo, tulagwasigwaa kuyanzana kuyumya, imalailile aakulwaizya alimwi akuziba kuti Mwami wesu Jesu Kristo mpali akati kesu. Eci cipa kuti muswaangano wa Bunakristo ube ciindi calukkomano lwini-lwini alimwi ciyumya lusyomo lwesu.
16. Ncinzi cipa kuti miswaangano ya Bunakristo kaikkomanisya kapati twayeeya cipaizyo cakutontozya?
16 Lyacipaizyo cakutontozya, imafwuta oonse—aajanwa kumala, kunsa, kumuni alimwi akucibuno kubikkilizyaa mucila wambelele wamafwutazyakali kutuulwa kuli Jehova kwiinda mukuzitenta, zyakali kucitwa kuti zisuke busi aacipaililo. (Levitiko 3:3-16) Imafwuta akali kubonwa kuti ncibeela cinona alimwi cibotu kwiinda zibeela zyoonse zimbi zyamunyama. Ikwaatuula aacipaililo cakali kwiiminina ikupa Jehova cintu cibotu kwiinda. Icipa kuti miswaangano ya Bunakristo kaikkomanisya kapati ncakuti kumiswaangano tutambula malailile pele taciyiili buyo waawo pe, nkukonya oko alimwi nkotulumbaizizya Jehova. Eci tulacicita kwiinda mukutola lubazu kusikila mpotukonzya pele cakulicesya, mukwiimba camoyo woonse, mukuswiililisya alimwi amukwiingula nokuyandika kucita boobo. Sintembauzyo wakakankamuka ulaamba: “Amutembaule Jehova! Amwiimbile Jehova lwiimbo lupya, akumutembaula mumbungano yabasalali bakwe.”—Intembauzyo 149:1.
Kuli Zilongezyo Zinji Nzyatubambilide Jehova
17, 18. (a) Ncipaizyo nzi cipati Solomoni ncaakatuula lyakwaaba tempele ku Jerusalemu? (b) Nzilongezyo nzi nzyobakajana bantu kupobwe aciindi cakwaaba tempele?
17 Lyakwaaba tempele ku Jerusalemu, mumwezi waciloba wamwaka wa 1026 B.C.E., Mwami Solomoni wakatuula “zipaizyo kubusyu bwa-Jehova,” izyakabikkilizya “cipaizyo cabusu amafuta aazituuzyo zyakutontozya.” Kunze lyazintu zyakatuulwa muzipaizyo zyabusu, iŋombe zili 22,000 alimwi ambelele zili 120,000 zyakatuulwa aciindi capobwe elyo.—1 Bami 8:62-65.
18 Sena inga mweezeezya mali aakabelesegwa alimwi amilimo yakajatikizidwe mupobwe elyo pati boobo? Nokuba boobo, izilongezyo nzyobakajana bana Israyeli zyakalaampindu kwiinda mali aakabelesegwa. Kumamanino aapobwe elyo, Solomoni “wakamwaisya bantu. Nkabela bakalumba mwami akuya kumaanda aabo cakukondwa acakusekelela mumyoyo yabo nkaambo kabubotu boonse Jehova mbwaakacitila Davida mulanda wakwe aba-Israyeli bantu bakwe.” (1 Bami 8:66) Masimpe, mbubwenya Solomoni mbwaakaamba, “lulongezyo lwa-Jehova lulavubya, alimwi tayungizyi mause kulindulo.”—Tusimpi 10:22.
19. Ncinzi ncotweelede kucita ikutegwa tutambule zilongezyo ezyo zipati kuzwa kuli Jehova lino alimwi mane kukabe kutamani?
19 Tukkede kuciindi eelyo “cifwanisyo buyo cacoolwe ciza” nocanjililwa busena a “cinkozya cini cazintu ezyo.” (Ba-Hebrayo 10:1) Jesu Kristo, kabeleka mulimo wa Mupaizi Mupati waanyika wakanjila kale kujulu alimwi wakaupa muulo wabulowa bwakwe mwini kutegwa amanye milandu kuli baabo boonse ibasyoma mucipaizyo cakwe. (Ba-Hebrayo 9:10, 11, 24-26) Kwiinda mucipaizyo eco cipati kapati alimwi akwiinda mukutuula kuli Leza zipaizyo zyakulumba izisalala alimwi zinyina kampenda, aswebo tulakonzya kuyaabuya “cakukondwa acakusekelela mumyoyo,” kumwi katulangila zilongezyo zinji kapati kuzwa kuli Jehova.—Malaki 3:10.
Ino Inga Mwaingula Buti?
• Mmalailile nzi alimwi nduumbulizyo luli buti ndotunga twajana mumakani aamu Mulawo aajatikizya zipaizyo azituuzyo?
• Ncinzi ciyandika lutaanzi ikutegwa cipaizyo citambulwe, alimwi ino eco caamba nzi kulindiswe?
• Ncinzi ncotunga twatuula iceelene acituuzyo cakulisungula citentwa?
• Muunzila nzi miswaangano ya Bunakristo moinga yeelanisigwaa cituuzyo cakutontozya?
[Mibuzyo yaciiyo]
[Cifwanikiso icili apeeji 14]
Ikutegwa mulimo wesu umukkomanisye Jehova, tatweelede kubaa kampenda kali koonse
[Cifwanikiso icili apeeji 15]
Tulatondezya caantangalala kuti tulalukkomanina lugwasyo ndwapa Jehova notutola lubazu mumulimo
[Cifwanikiso icili apeeji 16]
Cituuzyo ca Jesu cacinunuzyo cakapegwaa Jehova ikutegwa bantu bafwutulwe