“Ciindi Cakwe Teecalinasika”

“Taakwe muntu uwakamujata, nkaambo ciindi cakwe teecalinasika.”—JOHANE 7:30.

1. Nzintu nzi zyobile zyakeendelezya bukkale bwa Jesu?

JESU KRISTO wakaambila baapostolo bakwe kuti: “Mwana a-Muntu tazide kuti abelekelwe, wakeza kuti abeleke, alimwi akwaaba buumi bwakwe, bube cinunuzyo cabanji.” (Matayo 20:28) Kumweendelezi waba Roma Pontiyo Pilato, wakati: “Ncendakazyalilwa, ncendakasikila ansi ano, kuti nkalungulule bwini.” (Johane 18:37) Jesu wakalizi kabotu-kabotu ncaakeelede kufwida alimwi amulimo ngwaakeelede kucita katanafwa. Alimwi wakalicizi aciindi ncaakali kuyootola ikutegwa azuzikizye mulimo wakwe oyu. Imulimo wakwe anyika kali Mesiya wakali kuyootola buyo myaka yotatwe acisela. Wakatalika eelyo naakabbapatizigwa mumeenda mu Mulonga wa Jordano (mu 29 C.E.) kumatalikilo aamvwiki yacikozyanyo ya 70 alimwi wakamana naakafwa aacisamu cakupenzezya akati-kati kamvwiki eyo (mu 33 C.E.). (Daniele 9:24-27; Matayo 3:16, 17; 20:17-19) Aboobo mumbazu zyoonse, buumi bwa Jesu anyika bwakeendelezyegwaa zintu zyobile: imulimo ngwaakaboolela alimwi akuyandisya kucita mulimo oyo muciindi cini ncowakeelede kucitwa.

2. Mbuti Jesu Kristo mbwaambwa mu Makani Mabotu, alimwi mbuti mbwaakatondezya kuti wakaubikkila maanu mulimo wakwe?

² Zibalo zya Makani Mabotu zitondezya kuti Jesu Kristo wakali mwaalumi munkutwe iwakeendeenda koonse mucisi ca Palestaini kakambauka makani mabotu aa Bwami bwa Leza alimwi akucita maleele manji. Kujatikizya cibeela cakumatalikilo kwamulimo wa Jesu mupati, makani aajatikizya nguwe aamba kuti: “Ciindi cakwe teecalinasika.” Jesu lwakwe wakati: “Ciindi cangu tacinazyulila.” Kumamanino aamulimo wakwe, wakabelesya majwi aakuti “ciindi casika.” (Johane 7:8, 30; 12:23) Ikubikkila maanu kapati kwa Jesu kuciindi ncakeelede kucita mulimo ngwaakapedwe, kubikkilizyaa lufwu lwakwe lwacituuzyo, kulangilwa kuti nkukwakamukulwaizya kwaamba nzyaakaamba anzyaakacita. Ikucizyiba eci kulakonzya kutugwasya kuzyiba bube bwakwe alimwi akuyeeya kwakwe, zyalo zikonzya kutugwasya ‘kwiitobelesya mikondo yakwe.’—1 Petro 2:21.

Ikukanza Kucita Kuyanda kwa Leza

3, 4. (a) Ncinzi cacitika kupobwe lyabwiinga ku Kana? (b) Nkaambo nzi Mwanaa Leza ncaakaka muzeezo wa Mariya wakuti acite cintu cimwi kujatikizya waini wamana, alimwi ncinzi ncotwiiya kumakani aya?

³ Muumwaka wa 29 C.E. Kwainda buyo mazuba masyoonto kuzwa leelyo Jesu lwakwe naakasala basikwiiya bakwe bakusaanguna. Ono boonse bali mumunzi wa Kana mucooko ca Galilaya baboola kupobwe lyabwiinga. Abalo banyina Jesu, ba Mariya nkobali oko. Waini wamana. Kapa muzeezo wakuti acite cintu cimwi, Mariya waambila mwanaakwe ulaamba: “Tabajisi waini.” Pele Jesu waingula ulaamba: “Yoo mwanakazi, ndili enzi [a]yebo? Ciindi cangu tacinasika.”—Johane 1:35-51; 2:1-4.

⁴ Ibwiinguzi bwa Jesu bwakuti, “Yoo mwanakazi, ndili enzi [a]yebo?” nkukanana kwansiku munzila yamubuzyo ikutondezya kukaka ceeco cilombwa kuti cicitwe. Nkaambo nzi Jesu ncaakaka kulomba kwa Mariya? Ono ulaa myaka yakuzyalwa ili 30. Imvwiki zisyoonto buyo musyule, wakabbapatizigwa, wakananikwaa muuya uusalala alimwi Johane Mubapatizi wakamwaamba kuti “Mwanaambelele wa-Leza, uugwisya cibi cenyika.” (Johane 1:29-34; Luka 3:21-23) Aboobo, ono busololi bwakwe boonse buyandika kuzwa ku Bweendelezi Bupati ibwayooyo wakamutuma. (1 Ba-Korinto 11:3) Kunyina muntu naba wamumukwasyi wakwe wakeelede kulekelwa kusinkilizya mulimo Jesu ngwaakaboolela kuzyoocita anyika.  Takuliboteli kaka kukanza kucita kuyanda kwa Wisi ikwatondezyegwa mubwiinguzi bwa Jesu kuli Mariya! Aswebo atukanze kuzuzikizya “ceelelo [cesu] coonse” kuli Leza.—Mukambausi 12:13.

5. Mmaleele nzi ngaacita Jesu Kristo ku Kana, alimwi ino bamwi abakulwaizya kucita nzi?

⁵ Naakateelela kaambo ncaambila boobo mwanaakwe, ndilyonya Mariya watantamuka akwaambila basikugwasilizya kuti: “Zyoonse nzyati mwaambile, kamuzicita.” Mpoonya Jesu walimanizya penzi elyo. Walailila basikugwasilizya kuzuzya maanzi mumatalo, mpoonya maanzi ayo waasandula kuba waini mubotu kapati. Eci cacitika kacili matalikilo buyo aanguzu Jesu nzyajisi zyakucita maleele, citondezyo cakuti muuya wa Leza wakali anguwe. Basikwiiya bapya nobaabona maleele aya, lusyomo lwabo lwayumizyigwa.—Johane 2:5-11.

Ikusungwaalila Ŋanda ya Jehova

6. Nkaambo nzi Jesu ncaanyema akaambo kazintu nzyaabona kuntempele mu Jerusalemu, alimwi ino nintaamu nzi njaabweza?

⁶ Ndilyonya nkuumatalikilo aamupeyo mumwaka wa 30 C.E., aboobo Jesu abeenzinyina bali mulweendo lwakuya ku Jerusalemu kupobwe lya Pasika. Kabali kooko, basikwiiya bakwe babona Musololi wabo kacita zintu munzila ambweni njobatanamubwene kacita boobo. Basambazi balyatu iba Juda bali mukusambala banyama abayuni ibazituuzyo mukati mwini mutempele. Alimwi bali mukubbadelesya bakombi basyomeka iba Juda imali manji kapati. Kanyemede kapati, Jesu wabweza ntaamu. Wapanga mukkwilo waloozi akubatanda basambazi boonse. Wamwaya mali aabasikucinca mali, wasandamuna matafwule aabo. Waambila baabo bauzya nziba ategwa: “Amuzigwisye ezi zintu”! Basikwiiya ba Jesu nobamubona kacita zintu cabusungu boobo, bayeeya businsimi bwaamba Mwanaa Leza kuti: “Busungu bwakuŋanda yako bwandilya kundimaninina.” (Johane 2:13-17; Intembauzyo 69:9) Aswebo cabusungu tweelede kukazya tumpenda twanyika tuli toonse itusofwaazya bukombi bwesu.

7. (a) Ncinzi cakulwaizya Nikodemo kuswaya Mesiya? (b) Ncinzi ncotwiiya kujatikizya mbwaakakambaukila mukaintu muna Samariya Jesu?

⁷ Kacili ku Jerusalemu, Jesu wacita zitondezyo zigambya alimwi bantu banji bamusyoma. Naba Nikodemo umwi wamu Nkuta Mpati yaba Juda wamulombozya akumulemenezya Jesu alimwi waunka kulinguwe imasiku kutegwa aiye zintu zimbi. Mpoonya Jesu abasikwiiya bakwe bakkala “kucisi ca-Judaya” kwamyezi ili lusele kabakambauka akugwasya bantu kuba basikwiiya. Pele Johane Mubapatizi naangwa, bazwa mu Judaya akuya ku Galilaya. Nobali mucooko caku Samariya, Jesu wajana ciindi cakukambaukila mukaintu muna Samariya. Eci caba nenzila yapa kuti bana Samariya banji basyome. Aswebo lyoonse katubikkila maanu kuziindi zili zyoonse ikupa bumboni kujatikizya Bwami.—Johane 2:23; 3:1-22; 4:1-42; Marko 1:14.

Ikuyiisya Kupati mu Galilaya

8. Mmulimo nzi ngwaatalika Jesu ku Galilaya?

⁸ Kacitanasika “ciindi” cakuti Jesu afwe, ulijisi zintu zinji zyakucita mumulimo wa Wisi wakujulu. Mu Galilaya, Jesu watalika mulimo mupati kwiinda ngwaakacita mu Judaya amu Jerusalemu. Weendeenda “moonse mu-Galilaya, kaya bwiisya muzikombelo zyabo akukambauka makani mabotu aa-Bwami akuponya malwazi oonse amalengwa oonse akati kabantu.” (Matayo 4:23) Imajwi aakwe aakulwaizya kubweza ntaamu aakuti: “Amweempwe, nkaambo Bwami bwakujulu buli afwiifwi” amvwugwa kubantu mucooko coonse. (Matayo 4:17) Nokwainda myezi misyoonto, basikwiiya ba Johane Mubapatizi nobaboola kuzyoolibonena zintu zyali kwaambwa kujatikizya Jesu, wabaambila kuti: “Kamuya mukamwaambile Johane zintu ezi nzomwabona anzomwamvwa, kuti boofu babona, abatyokede beenda, basicinsenda basalazigwa, basinke-matwi bamvwa, abafwide babusigwa, abacete bakambaukilwa Makani Mabotu. Uli acoolwe uutajani kulindime icimulebya.”—Luka 7:22, 23.

9. Nkaambo nzi makamu-makamu aabantu ncaayobolokela kuli Kristo Jesu, alimwi nciiyo nzi ncotwiiya kuli ceeci?

⁹ ‘Kwakamwayika mpuwo mbotu kujatikizya Jesu mucisi coonse cizingulukide,’ alimwi makamu-makamu aabantu bayobolokela kulinguwe—kuzwa ku Galilaya, Dekapole, Jerusalemu, Judaya alimwi amutala lya Mulonga wa Jordano.  (Luka 4:14, 15; Matayo 4:24, 25) Baboola kulinguwe ikutali buyo akaambo kamaleele aakuponya ngacita pele kubikkilizyaa njiisyo zyakwe zibotu kapati. Imulumbe wakwe mmubotu alimwi ulakulwaizya. (Matayo 5:1–7:27) Imajwi aa Jesu ngabusongo alimwi alakondelezya. (Luka 4:22) Imakamu aabantu “akakankamana kukwiisya kwakwe,” nkaambo upandulula Magwalo cabwami. (Matayo 7:28, 29; Luka 4:32) Nguni watakali kunga wakulwaizigwa kuswenenena kumuntu uli boobo? Aswebo atube aluzibo lwakuyiisya ikutegwa ibabombe myoyo bakayande kasimpe.

10. Nkaambo nzi bantu bamumunzi wa Nazareta ncobasola kumujaya Jesu, alimwi ino nkaambo nzi ncobakakilwa?

¹⁰ Pele tabali boonse bamuswiilila Jesu ibatobela nzyaamba. Nokuba kumatalikilo kwamulimo wakwe nali mukuyiisya mutempele lyamumunzi mwaakakomenena ku Nazareta, kuli basola kuti bamujaye. Nokuba kuti bantu bamumunzi bagambwa kujatikizya ‘mbwaakanana cabusongo,’ baciyanda kubona maleele. Pele muciindi cakucita maleele manji kubusena obo, Jesu wabasinsa kujatikizya kuliyanda alimwi akubula lusyomo kwabo. Kabanyemede kapati, aabo ibali mutempele bayumuka bajata Jesu akumutola atala acilundu kutegwa bamutonkele mujeleele atole camutwe aansi. Pele wabapuzyuka ngooyo waandulula akati lyabo akutija kakunyina kulicisa. “Ciindi” calufwu lwakwe tacinasika pe.—Luka 4:16-30.

11. (a) Nkaambo nzi basololi bazikombelo bamwi ncobaboola kuzooswiilila Jesu? (b) Nkaambo nzi Jesu ncaapegwa mulandu wakutyola mulawo wa Sabata?

¹¹ Basololi bazikombelo—balembi, ba Farisi, ba Saduki alimwi abamwi—abalo lyoonse inga nkobali kufwumbwa ooko Jesu nkwakambaukila. Ibanji mpobali, tiibajanika ikutegwa baswiilile akwiiya pe, pele kutegwa bamujanine mulandu akusola kumuca. (Matayo 12:38; 16:1; Luka 5:17; 6:1, 2) Mucikozyanyo, mukuswaya Jerusalemu kwakwe ilya Pasika mu 31 C.E., Jesu waponya mwaalumi wali mulwazi kwamyaka iili 38. Basololi bacikombelo caba Juda bamupa mulandu Jesu wakutyola mulawo wa Sabata. Waingula kuti: “Mbubonya Taata mbwacibeleka ambuli sunu, amebo ncebeleka.” Ono ba Juda bamupa mulandu wakusampaula akaambo kakulyaamba kuti Mwanaa Leza kwiinda mukwamba Leza kuti Taata. Bayandaula nzila yakumujaya Jesu,  pele walo abasikwiiya bakwe bazwa mu Jerusalemu akuya ku Galilaya. Aswebo mbubwenya buyo inga twacita camaanu ikuti tweeleba nzila zyabasikukazya zibyaabi mbotubeleka canguzu mumulimo wakukambauka Bwami akugwasya bamwi kuba basikwiiya.—Johane 5:1-18; 6:1.

12. Ino Jesu wakambauka kwaciindi cili buti mucilawo camu Galilaya?

¹² Mumwaka omwe acisela watobela, Jesu wacita mulimo wakwe ikapati mu Galilaya, wali kuswaya Jerusalemu kuya kujanika buyo kumapobwe aaba Juda otatwe aacitwaa mwaka. Aciindi ncoona eco wacita nyendo zyakukambauka zyotatwe mu Galilaya: yakusaanguna kali abasikwiiya bapya bone, yabili kali aabaapostolo bali 12 alimwi anyendo yakajatikizya zyooko zinjaanji njaakacita abaapostolo bayiisidwe mbaakatuma. Tabulikomeneni kaka bumboni bwapegwa mu Galilaya!—Matayo 4:18-25; Luka 8:1-3; 9:1-6.

Ikukambauka Cabusicamba mu Judaya amu Pereya

13, 14. (a) Mpaacakucitika cili buti bama Juda mpobayanda kumujatila Jesu? (b) Nkaambo nzi bamapulisa ncobakakilwa kumwaanga Jesu?

¹³ Ncilimo mu 32 C.E., alimwi “ciindi” ca Jesu cicili kumbele. Ipobwe Lyazilawo lilaafwaafwi. Ibanabokwabo Jesu ono bamwaambila kuti: “Zwa kuno, uye ku-Judaya.” Bayanda kuti Jesu akatondezye nguzu zyakwe zyamaleele kuli baabo boonse ibabungene kupobwe mu Jerusalemu. Pele Jesu uliibwene ntenda iiliko. Aboobo waambila banabokwabo kuti: “Mebo nsikooinka eneeno kupobwe eli, nkaambo ciindi cangu tacinazyulila.”—Johane 7:1-8.

¹⁴ Naamana kuwayawaya mu Galilaya kwaciindi cili mbocibede, Jesu waunka ku Jerusalemu “kutali kuya kulidunauna pele k[a]yubaila.” Bama Juda ncobeni balamulangaula kupobwe, kabati: “Uli kuli?” Ipobwe nolyaasika akati, Jesu waunka mutempele alimwi cabusicamba watalika kuyiisya. Basola kumujata, ambweni kabayanda kumubikka muntolongo naa kumujaya. Pele bakakilwa akaambo kakuti ‘ciindi cakwe tacinasika pe.’ Ibanji ono bamusyoma Jesu. Nobaba bamapulisa ibatumwa aba Farisi kuti bamujate bapiluka acinkwa maanza, kabaamba kuti: “Takunabede muntu uuamba bobuya.”—Johane 7:9-14, 30-46.

15. Nkaambo nzi ba Juda ncobabweza mabwe aakuti bamufwuse Jesu, alimwi ino mulimo nzi wakukambauka ngwaatalisya kuzwa ciindi eco?

¹⁵ Ikutamvwana akati ka Jesu alimwi abasikumukazya iba Juda kwazumanana nayiisya makani aajatikizya Usyi muntempele lyapobwe. Mubuzuba bwamamanino bwapobwe, kabanyemede akaambo katwaambo ntwaakaamba Jesu kuti wakali muumi katanaba muntunsi, ba Juda babweza mabwe kuti bamufwuse ngawo. Pele wayuba akutija kataliciside. (Johane 8:12-59) Kakkede kunze aamunzi wa Jerusalemu, Jesu wakambaukila bantu cabusungu mu Judaya. Wasala basikwiiya bali 70 alimwi naamanizya kubayiisya, wabatuma bobile-bobile kuti babeleke mucilawo. Bali kumbele lyakwe, elyo banjilauka muzyooko zyoonse amuminzi ooko Jesu antoomwe abaapostolo bakwe nkobakanzide kuunka.—Luka 10:1-24.

16. Mmapenzi nzi Jesu ngaakaloboka lya Pobwe Lyakusalazya tempele, alimwi ino mmulimo nzi ngwaabindaanina alimwi?

¹⁶ Mumupeyo mu 32 C.E., “ciindi” ca Jesu ciyaabukkwana. Waboola ku Jerusalemu ku Pobwe Lyakusalazya tempele. Iba Juda baciyandaula nzila yakumujaya. Nayaabweenda Jesu mukkota lyatempele, bamuzinga kakamu. Alimwi bamupa mulandu wakusampaula, babweza mabwe kuti bamujaye. Pele mbubwenya mbwaakacita muziindi zyamusule, Jesu waloboka. Ndilyonya uli mumugwagwa ulayiisya, lino uyaabuyiisya mudolopo adolopo alimwi mumunzi amunzi mucooko ca Pereya mutala lya Jordano kuzwa ku Judaya. Alimwi banji bamusyoma. Pele imakani aajatikizya mweenzinyina uuyandwa Lazaro amupa kuti apilukile ku Judaya.—Luka 13:33; Johane 10:20-42.

17. (a) Mmulumbe nzi mubyaabi Jesu ngwaatambula kakambauka ku Pereya? (b) Ncinzi citondezya kuti Jesu ulaazyi makanze aamulimo ngwayelede kucita alimwi aciindi cini nozyeelede kucitwa zintu ezyo?

¹⁷ Imulumbe wamakani mabi wazwa kuli Marta a Mariya, ibacizi ba Lazaro ibakkala ku Betaniya mucooko ca Judaya. Mutumwa wapandulula ulaamba: “Omwami, langa, oyo ngoyanda ulaciswa.” Jesu waingula ulaamba: “Bulwazi obu tabuli bwalufu lwamuntu, pele mbwakulemeka Leza, kuti Mwana a-Leza alemezegwe ambubo.” Ikutegwa eci cicitike, acaali Jesu wazumanana kukkala ooko nkwabede kwamazuba obile. Mpoonya waambila basikwiiya bakwe kuti: “Atubweede ku-Judaya.”  Cakuwayawaya bayingula kuti: “Rabi, ba-Juda eneeno bazwa akuyanda kukufusa mabwe, sena u[la]bweeda alimwi nkukonya?” Pele Jesu ulizi kuti ‘ziindi zyamasikati’ zicisyeede naa ciindi Leza ncabikkide cakuti acite mulimo wakwe waanyika caceya. Ulicizi cini ncayelede kucita akaambo nceelede kucicita.—Johane 11:1-10.

Imaleele Aatakali Kukonzya Kukazigwaa Muntu Naba Omwe

18. Ino zintu zili buti Jesu naasika ku Betaniya, alimwi ino ncinzi cacitika naasika?

¹⁸ Ku Betaniya, Marta nguwasaanguna kucinga Jesu, ulaamba: “Omwami, kuti nowakali kokuno, mwanaakwesu naatakafwa.” Mariya abaabo ibakali kuŋanda batobela abalo. Boonse balalila. Jesu wabuzya kuti: “Ino nkuli nkomwakamuzikila?” Baingula kuti: “Omwami, koboola ubone.” Nobasika kucuumbwe, impangala lisinkidwe abbwe, Jesu waamba kuti: “Amugwisye bbwe.” Katazyi ncayandoocita Jesu, Marta wakazya ulaamba: “Omwami, kuciindi cino ulanunka, nkaambo ulifwide mazuba one.” Pele Jesu wabuzya kuti: “Sena nsikwe nendakwaambila kuti, Na wasyoma ulabona bulemu bwa-Leza?”—Johane 11:17-40.

19. Nkaambo nzi Jesu ncaapaila mubuleya katanamubusya Lazaro?

¹⁹ Ibbwe lijalide acuumbwe ca Lazaro nolyagusigwa, Jesu wapaila cakupozya ikutegwa bantu bazyibe kuti ncayanda kucita cilacitwa kwiinda munguzu zya Leza. Mpoonya woongolola ajwi pati wati: “Lazaro, kozwa omo”! Lazaro wazwa imaulu amaboko alimwi abusyu bwakwe kabucizambaidwe azisani zyakuzikkwaa zyalo. Jesu waamba kuti: “Amumwaangunune, mumuleke aende.”—Johane 11:41-44.

20. Ino batyani aabo ibalibonena Jesu nkwabusya Lazaro?

²⁰ Nobabona maleele aaya, iba Juda banji ibaboola kuzyooumbulizya Marta a Mariya bamusyoma Jesu. Ibamwi baunka kuyooambila ba Farisi kujatikizya cacitika. Ino balimvwa buti? Ndilyonya balo abapaizi bapati bacita muswaangano wacibbulumukila wa Nkuta Mpati. Cakuzyingwa balilauka balaamba: “Tucite buyani? Nkaambo muntu  oyu ulacita malele manji. Kuti twamuleka buyo, boonse balasyoma nguwe, abalo ba-Roma balasika bazootunyanga busena bwesu amusyobo wesu.” Pele Mupaizi Mupati uutegwa Kayafa wabaambila kuti: “Tamukwe ncomuzi, nokuba kweezeezya kuti ncibotu kulindinywe kuti muntu omwe afwide bantu, kuti musyobo woonse utafwidilili.” Aboobo kuzwa buzuba obo bakakanza kumujaya Jesu.—Johane 11:45-53.

21. Ino maleele aakubusigwa kwa Lazaro mmatalikilo aanzi?

²¹ Aboobo akaambo kakuti wamuka kusika ku Betaniya, Jesu wakonzya kucita maleele aatakonzyi kukazigwaa muntu naba omwe. Kwiinda munguzu zya Leza, Jesu wabusya muntu wafwide kwamazuba one. Mane abalo babetesi bamu Nkuta Mpati ibalisumpula basungilizigwa kumupa mulandu wakuti oyu Simaleele ajaigwe! Aboobo imaleele aya aba ngamatalikilo aakucinca kupati mumulimo wa Jesu—ikucinca kuzwa ‘iciindi nocatakalinasika’ kuya ‘kuciindi nocasika.’

Ino Inga Mwaingula Buti?

• Mbuti Jesu mbwaakatondezya kuti wakaluuzyi mulimo ngwaakapedwe aa Usyi?

• Nkaambo nzi Jesu ncaatayanda kwaambilwaa banyina kujatikizya makani aawaini?

• Ncinzi ncotwiiya kujatikizya mbwaakali kubeendelezya Jesu lyoonse aabo ibakali kumukazya?

• Nkaambo nzi Jesu ncaawayawaya kucita ncaalombwa kujatikizya bulwazi bwa Lazaro?

[Mibuzyo yaciiyo]

[Zifwanikiso izili apeeji 10]

Jesu wakaucita canguzu imukuli Leza ngwaakamupede kuti acite