Ikulilemeka Kuyaabumana

“ICINTU cili boobo kunyina nocakali kucitika pe,” mbwaakaamba oobo Helmut Schmidt iwakali umwi wabeendelezi balupati-pati mucisi ca Germany. Wakausa akaambo kamilandu mipati yakutasyomeka yakacitwaa nkumekume zyamfwulumende akalembwa mumitwe yamakani yakadumide. Wakati: “kulilemeka kwanyonyoonwa akaambo kabulyato.”

Bantu banji balaazuminizya majwi aakwe. Kulilemeka kujanwa mu Jwi lya Leza Ibbaibbele kwali kutambulwaa koonse-koonse kabuli busolozi bwakuziba cintu cibotu acibi, aboobo lino kubonwa kuti takucikwe mulimo pe. Ooku mbokubede nomuba mumasi aategwa nga Bunakristo.

Sena Kulilemeka Kujanika mu Bbaibbele Kulagwasya?

Kulilemeka kujanika munjiisyo zya Bbaibbele kubikkilizya kusyomeka. Nokuba boobo, ikubeja, ilweeno alimwi abumpelenge nzyezivwulide kapati. Imuteende waku London uutegwa The Times uluula kuti, basikuvwuntauzya milandu bamwi “baambwa kuti bajana mali aabalilwa ku £100,000 umwi aumwi aciindi comwe kwiinda mukusambala misamu iikola yakajatwa kuzigwebenga naa kwiinda mukuzimaazya bumboni bwamilandu eyi mipati. Mucisi ca Austria, bukwabilizi bucitwa cabumpelenge buluulwa kuti ncintu cidumide kapati. Alimwi mucisi ca Germany, ikabunga kabasayaansi bakayoowa kapati ciindi basikuvwuntauzya caino-ino nobakabona “mulimo wabumpelenge butaambiki ibwakacitwa abasisayaansi yaku Germany.” Haazibwene umwi waku Germany mukabunga kabasikwiiya mbozizyalana zintu zyuumi ,” wakatamikizigwa kuti wakalemba makani manji aakubeja naa kuti wakatalisya makani manji aateelede.

Ikulilemeka kujanika mu Bbaibbele kulabikkilizyaa kusyomeka mulukwatano, ibulongwe bwakabambilwa kuti bube bwalyoonse. Pele mweelwe wabanabukwetene balekana munkuta uyaabuvwula.

 Imuteende wa Bakatolika uutegwa Christ in der Gegenwart (Munakristo Wasunu) wakaluula kuti, “nomuba mucisi ca Switzerland muli ‘bukkale buli kabotu,’ imakwatano manji ayaabumana.” Mucisi ca Netherlands, imweelwe uusika ku 33 pasenti wabanabukwetene oonse balalekana. Mukaintu umwi wakabona kucinca kwabukkale mucisi ca Germany mumyaka misyoonto yainda wakalemba kalilauka kuti: “Mazubaano lukwatano caba cintu cibonwa kuti ncakaindi alimwi tacijisi mulimo pe. Ibantu kunyina nobacikwatana kutegwa bakkale antoomwe mubuumi bwabo boonse pe.”

Kulubazu lumwi, tuulunzuma twabantu tubona kuti ikulilemeka kuyiisyigwa mu Bbaibbele kulasyomeka alimwi akuti kulagwasya mubuumi bwesu munyika eyi. Banabukwetene bakkala kumunyinza wacisi ca Switzerland a Germany bakabona kuti kutobela kulilemeka kujanika mu Bbaibbele kwakabajanya lukkomano. Kweelanaa mbuli mbobalimvwa, “kuli buyo busolozi bomwe bugwasya mumbazu zyoonse zyabuumi. Busolozi oobo ndi Bbaibbele.”

Ino muyeeya buti? Sena Ibbaibbele lilakonzya kuba busolozi bulaampindu? Sena kulilemeka kujanika mu Bbaibbele kulagwasya mazubaano?