Mulakonzya Kuzumanana Abukkale Buli Kabotu

“Oku nkokuyanda Leza, kuti twabamba milazyo yakwe.”—1 JOHANE 5:3.

1. Nkwiindana kuli buti mubukkale ikulibonya mubantu sunu?

IKAINDI, imusinsimi Malaki wakasololelwaa Leza kusinsima ciindi bukkale bwabantu ba Leza nobwakali kunooimpene kapati abwabantu aabo ibatabelekeli Leza. Imusinsimi oyo wakalemba kuti: “Muyoobona lwaandaano akati kabaluleme ababi, aakati kabaabo babelekela Leza abaabo batamubelekeli.” (Malaki 3:18, BT) Ibusinsimi obo buli mukuzuzikizigwa lino. Ikubamba milawo ya Leza, kubikkilizya ayeeyo iijatikizya bukkale buli kabotu nenzila iigwasya alimwi yeelede. Nokuba boobo, talili lyoonse bukkale obu nobuli buuba-uba pe. Aboobo cakweelela, Jesu wakati Banakristo beelede kusolekesya kutegwa bakafwutulwe.—Luka 13:23, 24.

2. Nkoongelezyegwa kuli buti kuliko ikupa kuti bamwi cibayumine kuzumananaa bukkale buli kabotu?

² Ino nkaambo nzi ncocikatazya kuzumananaa bukkale buli kabotu? Ikaambo kamwi nkakoongelezyegwa. Basikupanga zyakulikondelezya batondezya kuti koonana kutali kwamumulawo ncintu cikondelezya kapati, ciininizya alimwi ceelede kucitwaa bantu kufwumbwa balibona kuti mbapati, pele tabazibikkili maanu zintu zibyaabi ziletwaa micito eyi iili boobo. (Ba-Efeso 4:17-19) Ibunji bwabantu batondezyegwa mukoonana oku mbabaabo ibatakwetene. Kanjikanji zipekekupeku alimwi atelevisyoni zitondezya bwaamu buyo. Aboobo lyoonse ikuyanzana kubotu abulemu inga taziko pe. Bukkale buli boobu bulabonwaa bantu banji kuzwa kubwana. Kunze lyaboobo, kuli muuya wakusungilizigwaa beenzinyoko kutobela bukkale bwamazubaano bwakutalyeendelezya mukulilemeka, alimwi aabo ibataciti boobo kanjikanji balaweelwa nokuba kutukilwa.—1 Petro 4:4.

3. Ntwaambo nzi tumwi itupa kuti bantu banji munyika kabajatikizigwa mukutalilemeka?

 ³ Azyalo zintu zicitika mumubili zipa kuti cikatazye kuzumananaa bukkale buli kabotu. Jehova wakalenga bantunsi anguzu zyakuyandisisya koonana, alimwi zimwi ziindi inguzu ezi nzipati kapati. Kuyandisya koonana oku kapati kuyeeme azintu nzyotuyeeya, alimwi ikutalilemeka kuliswaangene akuyeeya zintu ziteendelani amiyeeyo ya Jehova. (Jakobo 1:14, 15) Mucikozyanyo, kweelanaa kuvwuntauzya kwakacitwa lino-lino alimwi ikwakamwaigwa mumagazini ya British Medical Journal, kuluulwa kuti ibanji ibakoonana kwaciindi cakusaanguna bakali kuyandisisya buyo kuzyiba mbokubede koonana. Ibamwi bakali kuyeeya kuti ibunji bwabaabo bamusela wabo bakali koonana, aboobo abalo bakali kuyanda kuti kabatacibalilwi mubunakalindu. Alimwi ibambi bakati bakoongelezyegwaa mbobakali kulimvwa naa nkaambo kakuti “bakalikoledwe asyoonto aciindi eco.” Ikuti katuyanda kukkomanisya Leza lyoonse, tweelede kubaa mizeezo yiimpene. Ino nkuyeeya kuli buti kuyootugwasya kuzumananaa bukkale buli kabotu?

Amuliyumye

4. Ncinzi ncotweelede kucita ikutegwa tuzumanane akulilemeka kwesu kubotu?

⁴ Ikutegwa tuzumanane abukkale buli kabotu, tweelede kuzyiba kuti ikupona munzila iili boobo kulagwasya. Eci cileendelanaa ceeco mwaapostolo Paulo ncaakalembela Banakristo ku Roma naakati: “Mukasimpikile makani ngaayanda Leza, makani mabotu aatambulika aalondokede.” (Ba-Roma 12:2) Ikuzyiba kuti kulilemeka ncintu cigwasya kujatikizya zinji kunze lyakuziba buyo kuti ikutalilemeka kulakasigwa mu Jwi lya Leza. Oku kujatikizya kuteelela twaambo ncokukasigwa kutalilemeka alimwi ambotugwasigwa naa twakutantamuka. Itwaambo tumwi twakabandikwa kale mucibalo camusule.

5. Nkaambo nzi kapati Banakristo ncobayandila kuzumananaa kulilemeka kwabo?

⁵ Pele ku Banakristo, itwaambo tuyandika kapati ncobeelede kweeleba koonana kutali kwamumulawo tujatikizya cilongwe ncotujisi a Leza. Twakaiya kuti ulizizi zintu nzyotuyandika. Iluyando ndotujisi kulinguwe luyootugwasya kusulaika bubi. (Intembauzyo 97:10) Leza Nguupa “zipego zibotu zyoonse azyoolwe zyoonse zilondokede.” (Jakobo 1:17) Ulatuyanda. Kwiinda mukutobela nzyaamba, tutondezya kuti tulamuyanda alimwi tulazilumba zyoonse nzyatucitila. (1 Johane 5:3) Tatuyandi kumutyompya akumukalazya Jehova pe kwiinda mukutyola milawo yakwe iiluleme. (Intembauzyo 78:41) Tatuyandi kubaa bukkale bunga bwapa kuti nzila yakwe yabukombi iisalala alimwi iiluleme isampaulwe. (Tito 2:2; 2 Petro 2:2) Kwiinda mukuzumananaa kulilemeka kwesu, tupa kuti Mupatikampatila akkomane.—Tusimpi 27:11.

6. Ino cigwasya buti kuzyibya bamwi zyeelelo zyesu zyakulilemeka?

⁶ Twakanza kuzumananaa kulilemeka kwesu, ilukwabililo lumbi nkuzibya bamwi zyamakanzeesu. Amubazibye bantu kuti muli mubelesi wa Jehova Leza alimwi akuti mukanzide kuzumananaa zyeelelo zisumpukide. Cijatikizya buumi bwanu, mubili wanu alimwi akusala kwanu. Ino  ncinzi cili muntenda? Ncilongwe canu citaliboteli a Uso wanu wakujulu. Aboobo amucisalazye kuti kusyomeka kwanu mukulilemeka takukonzyi koombolozyegwa pe. Amukukkomanine kwiiminina Leza kwiinda mukusumpula njiisyo zyakwe. (Intembauzyo 64:10) Mutamvwi insoni kubandika nzyomusyoma mumakani aakulilemeka kuli bamwi. Ikutawayawaya kwaamba cabusicamba kulakonzya kumuyumya, kumukwabilila alimwi akukulwaizya bamwi kutobela cikozyanyo canu.—1 Timoteo 4:12.

7. Mbuti mbotunga twayumya makanzeesu kutegwa tuzumanane akulilemeka kwesu?

⁷ Mpoonya, mbwaanga twakanza kuzumanana kutobela zyeelelo zyakulilemeka zisumpukide alimwi mbwaanga twabazyibya bamwi mpotwiimvwi, lino tweelede kubweza ntaamu zyakutugwasya kukakatila kumakanzeesu. Inzila imwi mbotunga twacicita eci nkwiinda mukucenjela notusala balongwe. Ibbaibbele lyaamba kuti: “Uuenda abasongo ulasongwaala.” Amuyanzane abaabo ibalilemeka mbuli ndinywe; bayoomuyumya. Ilugwalo olu ndulonya alimwi lwaamba kuti: “Pele muzwalani wabafubafuba ulabisizigwa.” (Tusimpi 13:20) Amusoleke kusikila mpomukonzya ikweeleba bantu ibakonzya kuubaula makanzaanu.—1 Ba-Korinto 15:33.

8. (a) Nkaambo nzi ncotweelede kubikkila maanu kuzintu zilemekeka? (b) Nzintu nzi nzyotweelede kweeleba?

⁸ Kunze lyaboobo, tweelede kubikkila maanu aazintu zisinizizye, ziyandika, ziluleme, zilemekeka, zili ampuwo mbotu, zibotu alimwi zitembaulika. (Ba-Filipi 4:8) Tulacita obo kwiinda mukusala zeezyo nzyotweebela, nzyotubala alimwi anyimbo nzyotuswiilila. Ikwaamba kuti imabbuku aajisi zintu zibyaabi anyina ntenda, cilikozyenye akwaamba kuti imabbuku mabotu anyina nguzu zyakukulwaizya bukkale buli kabotu. Kamuyeeya kuti ibantu batalondokede balakonzya kuzundwa akunjila mubukkale bwakutalilemeka. Aboobo imabbuku, mamagazini, izipekupeku alimwi anyimbo izibusya luyando lwakoonana zilakonzya kusololela kumizeezo mibyaabi, alimwi imizeezo eyi ilakonzya mukuya kwaciindi kusololela kucibi. Ikutegwa tuzumanane akulilemeka kwesu, tweelede kubikkila maanu kapati kubusongo bwabunaleza.—Jakobo 3:17.

Intaamu Zisololela Kukutalilemeka

9-11. Nintaamu nzi zitobelene izyakasololela mulombwana umwi kubwaamu mbubwenya Solomoni mbwaakapandulula?

⁹ Kanjikanji kuli ntaamu zilibonya izisololela mukutalilemeka. Intaamu imwi aimwi iibwezegwa ipa kuti kaciyaabuyuma kuzyokoloka. Amubone mbocipanduludwe eci ku Tusimpi 7:6-23. Solomoni wabona ‘mulombwana mukubusi uunyina boongo’ naa uunyina maanu. Mulombwana oyo “wakali kwiinda mumugwagwa kucooko [camuvwuule], wakatola inzila yakuya kuŋanda yakwe. Mumutungazuba, ciindi cagoko.” Nkooku kulubizya kwakwe kutaanzi. Kuciindi cakumazuba, moyo wakwe wamusololela ikutali kumugwagwa umbi pele kuli wooyo ngwazi kuti taubuliki muvwuule.

¹⁰ Mpoonya tubala kuti: “Kwakamuswana mwanakazi uusamide mbuli sikuvuula uuongelezya.” Ono wamubona buya! Ulakonzya kuzyuuluka akupiluka kumunzi wakwe, pele eci lino cilakatazya kapati kwiinda musule mbwaanga ono wakompama kale. Mwanakazi oyo wamuvwampila akumumyonta. Mbwaanga wazumina kumyontwa, ono mane wakuswiililaa koongelezya kwakwe kubyaabi. Ulaamba: “Ndakalijisi zipaizyo zyakutontozya, sunu ndaliya zikonke zyangu.” Zipaizyo zyakutontozya zyakali kubikkilizya nyama, busu, mafwuta alimwi awaini. (Levitiko 19:5, 6; 22:21; Myeelwe 15:8-10) Kwiinda mukuzyaamba buya ezi, wakali kwaamba kuti tanaakali muntu uukompeme munzila yakumuuya, alimwi ambweni yakali nzila yakumuzibya kuti kwakali zintu zinji zibotu izyakulya azyakunywa kuŋanda yakwe. Wamukombelezya ulaamba: “Boola, tukute inkumbatano mane buce, tulibotezye amisobano yakuyandana.”

¹¹ Icakatobela tacikatazyi kuyeeyela pe. “Wamusungilizya amilomo yakwe myuuba.” Wamutobela kuŋanda yakwe “mbuli musune wakujaya” alimwi “mbuli muyuni uufwambaana kuya kukakole.” Solomoni wamanizya amajwi aakuusa kapati ategwa: “Tezi kuti kalayanda buumi bwakwe.” Ibuumi bwakwe bulijatikizidwe nkaambo “Leza uyoobeteka baamu abasimalale.” (Ba-Hebrayo 13:4) Tacilikomeneni kaka ciiyo eci kubaalumi abanakazi! Tweelede kuzyeeleba noziba ntaamu zyakusaanguna zisololela kukutakkomaninwaa Leza.

12. (a) Ncinzi caambwa akaambo kakuti, ‘wakanyina boongo’? (b) Mbuti mbotunga twaliyumya mukulilemeka kwesu?

 ¹² Amubone kuti imulombwana wamucibalo eci ‘wakanyina boongo.’ Ikaambo aka katwaambila kuti imizeezo yakwe, ikulombozya kwakwe, zintu nzyaakali kuyandisya, miyeeyo alimwi ambaakani zyakwe mubuumi tiizyakali kweendelana azeezyo nzyakkomanina Leza. Ikukompama kwakwe mukulilemeka kwakamusololela kuzintu zibyaabi. “Kumazuba [aano] aakumamanino,” kuyandika kusolekesya ikuliyumya mukulilemeka. (2 Timoteo 3:1) Leza wapa zintu zikonzya kutugwasya. Ulatupa miswaangano yambungano ya Bunakristo yakutukulwaizya kuzumanana munzila iiluleme alimwi akutuswenya kuli bamwi ibajisi mbaakani nzyotujisi aswebo. (Ba-Hebrayo 10:24, 25) Kuli baalu bamumbungano ibatweembela alimwi akutuyiisya nzila zyabululami. (Ba-Efeso 4:11, 12) Tulijisi Jwi lya Leza, Ibbaibbele ilitusololela akutweendelezya. (2 Timoteo 3:16) Alimwi lyoonse tulaa coolwe cakupailila muuya wa Leza kuti utugwasye.—Matayo 26:41.

Ikwiiya Kuzwa Kukulubizya kwa Davida

13, 14. Mbuti Mwami Davida mbwaakajatikizigwa mucibi cipati?

¹³ Pele mukubula coolwe, nobaba babelesi ba Leza balaampuwo bajatikizigwa mukutalilemeka kwamukoonana. Umwi akati kabaaba wakali Mwami Davida walo kwamakumi aamyaka iwakamubelekelede Jehova cakusyomeka. Cakutadooneka, Davida wakali kumuyanda kapati Leza. Pele nokuba boobo, wakalilekelela mubukkale bwakucita zibi. Mbubwenya mbuli mulombwana ngwaakapandulula Solomoni, kwakali ntaamu zyakasololela Davida kucibi mane kusikila nkwacicita.

¹⁴ Kuciindi eco Davida wakali mupati, ambweni wakajisi myaka yakuzyalwa yiinda-inda buyo kuma 50. Kali aciluli caŋanda yakwe, wakabona Bateseba imubotu ciwa kasamba. Wakabuzya naa wakali ni oyo wakali kusamba, eelyo wakaambilwa. Wakazyiba kuti mulumaakwe Uriya wakalijatikizidwe mukulwisya Raba, imunzi wabana Amoni. Davida wakalailila kuti mukaintu oyo atolwe kuŋanda yakwe yabwami eelyo wakoonana anguwe. Kumbele zintu zyakabija—imukaintu oyo wakamita kuli Davida. Kasyomede kuti Uriya wakali kuzyoowonanaa mukaintu wakwe, Davida wakatuma mulomo kuti Uriya apiluke kuzwa kunkondo. Munzila eyo, cakali kunoolibonya mbuli kuti Uriya ngowisi wamwanaa Bateseba. Pele Uriya tanaakaunka kuŋanda yakwe pe. Kabulide cakucita kutegwa azimaazye cibi cakwe, Davida wakatuma Uriya alimwi ku Raba watumaa lugwalo kumupati wabasikalumamba lwaamba kuti Uriya abikkwe mubusena mwaakali kunga wajaigwa ndilyonya. Eelyo Uriya wakajaigwa, alimwi Davida wakakwata mukamufwu bantu kabatanakuzyiba kuti wakali mitide.—2 Samuele 11:1-27.

15. (a) Ino cibi ca Davida cakazyibwa buti? (b) Ino Davida wakalimvwa buti kujatikizya lulayo ndwaakaambilwaa Natani cabusongo?

¹⁵ Kulangilwa kuti inzila Davida njaakabelesya kuvwumbilila cibi cakwe yakabeleka. Kwakainda myezi ili mbwiibede. Kwakazyalwa mwana mulombe. Ikuti naa Davida wakali kwaayeeya makani aaya naakaimba Intembauzyo 32, mmasimpe imanjezeezyaakwe akamukatazya cini-cini. (Intembauzyo 32:3-5) Pele icibi eco tiicakasisidwe pe kuli Leza. Ibbaibbele lyaamba kuti: “Eci cintu ncaakacita Davida cakabija loko mumeso aa-Jehova.” (2 Samuele 11:27) Jehova wakatuma musinsimi Natani, walo cabusongo wakaambila Davida ncaakacitide. Ndilyonya Davida wakalyaambilila cibi cakwe akukombelezya Jehova kuti amulekelele. Ikweempwa kwakwe kusinizizye kwakamuyanzanisya alimwi kuli Leza. (2 Samuele 12:1-13) Davida tanaakalucimwa lulayo olo. Muciindi caboobo, wakatondezya ciimo cipandululwa ku Intembauzyo 141:5 (BT) kuti: “Muntu uululeme andisubula, nduzyalo, anditapatila ndizi kuti mbulumbu bwangu.”

16. Nkucenjezya nzi alimwi akulaya Solomoni nkwaakapa kujatikizya zibi?

¹⁶ Solomoni, imwana mulombe wabili wa Davida kuli Bateseba ulangilwa kuti wakatelaika aamakani aaya mabyaabi mubukkale bwawisi. Kumbele wakazikulemba kuti: “Uusisa milandu yakwe takooyooba acoolwe pe, pele oyo uulyaambawida akuleka ulafwidwa luzyalo.” (Tusimpi 28:13) Ikuti twacita cibi cipati, tweelede kutobela lulayo olu lwakasololelwaa muuya mbwaanga nkucenjezya alimwi nkulaya. Tweelede kulyaambilila zibi kuli Jehova alimwi akusikila baalu bamumbungano kuti batugwasye. Imukuli mupati wabaalu ngwakugwasya kululamika baabo ibacita zibi.—Jakobo 5:14, 15.

 Ikuliyumya Muzintu Ziletwa Akaambo Kacibi

17. Nkuuzintu zili buti nkwatatukwabilili Jehova nokuba kuti ulalekelela zibi?

¹⁷ Jehova wakamulekelela Davida. Nkaambo nzi? Nkaambo kakuti Davida wakali kusyomeka, wakali silubomba kuli bamwi alimwi ikweempwa kwakwe kwakali kwini-kwini. Nokuba boobo, Davida tanaakakwabililwa kuzintu zibyaabi izyakatobela. (2 Samuele 12:9-14) Ncimwi buyo asunu. Nokuba kuti Jehova tabaleteli mapenzi bantu beempwa, tabakwabilili pe kuzintu zicitika akaambo kakulubizya kwabo. (Ba-Galatiya 6:7) Akati kazintu zicitika akaambo kakoonana kutali kwamumulawo kuli kulekana, mada aamusokwe, malwazi aayambukila kwiinda mukoonana, kutasyomwa alimwi akutalemekwa.

18. (a) Mbuti Paulo mbwaakaambila mbungano yaku Korinto kujatikizya ncobakeelede kucita kumuntu wakajatikizigwa mucibi cipati cakoonana? (b) Mbuti Jehova mbwatondezya luyando alweetelelo kuli basizibi?

¹⁸ Ikuti naa twacita cibi cipati, tulatyompwa kufwambaana notucitikilwa zintu ziboola akaambo kakulubizya oko nkotwakacita. Nokuba boobo, tatweelede kulekela cintu cili coonse kutukasya kweempwa akuyanzanisigwa alimwi a Leza. Mumwaanda wamyaka wakusaanguna, Paulo wakalembela bana Korinto kuti beelede kugusya mumbungano mwaalumi iwakali kulalikana mubusazinyina. (1 Ba-Korinto 5:1, 13) Imwaalumi oyo naakeempwa cakusinizya, Paulo wakalailila mbungano kuti: “Muleelede kulekelela muntu oyo caluzyalo akumuumbulizya [alimwi] . . . mumuboozye muluyando lwanu.” (2 Ba-Korinto 2:5-8) Mululayo olu lwakasololelwaa muuya, tubona luyando lwa Jehova alweetelelo kuli basizibi ibeempwa. Ibangelo kujulu balabotelwa sizibi nayempwa.—Luka 15:10.

19. Nkuuzyoolwe zili buti nkokunga kwasololela ikubijilwa munzila iluzi kujatikizya bukkale bumwi?

¹⁹ Nokuba kuti bukkale bubyaabi butupa kubijilwa, ikuusa nkotubaankuko kulakonzya kutugwasya ‘kucenjela akusiila limwi yoonse miyeeyo mibi.’ (Jobu 36:21) Masimpe, izintu zibyaabi zicitika akaambo kacibi ncotwakacita zyeelede kutulesya kwiinduluka cibi. Kunze lyaboobo, Davida wakabelesya bukkale bubyaabi mbwaakabaa mbubo akaambo kacibi cakwe ikulaya bamwi. Wakati: “Njooiiyisya basinsotoko inzila zyako, abasizibi bayoopiluka kulinduwe.”—Intembauzyo 51:13.

Lukkomano Lujanwa Mukubelekela Jehova

20. Nimpindu nzi zijanwa mukutobela milawo ya Leza iiluleme?

²⁰ Jesu wakati: “Bali acoolwe abaswiilila makani aa-Leza akwaacita.” (Luka 11:28) Ikutobela milawo ya Leza iiluleme kujanya lukkomano lino alimwi mane do kukabe kutamani. Ikuti naa twali kulilemeka mubukkale bwesu kwaciindi cili mbocibede, atuzumanane abukkale obo mboonya kwiinda mukubelesya zipego zyoonse nzyaatupa Jehova zyakutugwasya. Ikuti naa kuli cibi cakutalilemeka ncotwakacita, atuyumizigwe aluzibo lwakuti Jehova tawayiwayi kulekelela baabo ibeempwa cakusinizya, alimwi atukanze kutaciinduluka alimwi pe cibi eco.—Isaya 55:7.

21. Nkutobela lulayo nzi lwamwaapostolo Petro kunga kwatugwasya kuzumanana kulilemeka mubukkale bwesu?

 ²¹ Lino-lino ibantu bataluleme bayoonyonyoonwa kubikkilizyaa ziyanza alimwi amicito yabo mibyaabi. Kwiinda mukuzumananaa kusalala mubukkale bwesu, tuyoogwasigwa lino alimwi mane kukabe kutamani. Imwaapostolo Petro wakalemba kuti: “Nomuyandwa, mbumulangila zintu ezi, amusungwaale ku[yoo]janwa mulikede muluumuno, [ka]mutakwe kabala, [ka]mutakwe kampenda mumeso aa Leza. . . . Mbomweezi kale aya, amukalicenjezye kuti mutalengawidwi kulweeno lwabataka akujatuluzigwa kukujatila kwanu.”—2 Petro 3:14, 17.

Sena Inga Mwapandulula?

• Nkaambo nzi ncocinga cakatazya kuzumananaa bukkale buli kabotu?

• Ninzila nzi ziliko zyakutugwasya mumakanzeesu aakutobela zyeelelo zisumpukide zyakulilemeka?

• Nziiyo nzi nzyotunga twaiya kuzibi zyamulombwana waambwaa Solomoni?

• Ncinzi ncotwiiya kucikozyanyo ca Davida kujatikizya makani aakweempwa?

[Mibuzyo yaciiyo]

[Cifwanikiso icili apeeji 25]

Ncikwabilizyo ikuzyibya bamwi mbomwaalanga makani aakulilemeka

[Zifwanikiso izili apeeji 28, 29]

Jehova wakamulekelela Davida akaambo kakuti wakeempwa camoyo woonse