Sena Cilakonzyeka Kuba Mulongwe a Leza Uutalibonyi?

Mulakonzya kulibuzya kuti: ‘Ino inga ndaba buti acilongwe amuntu ngonditakonzyi kubona?’ Oyu mmubuzyo ulimvwisya kuti ngwamaanu. Pele amweezeezye:

INO kubona kuyandika buti ikutegwa mube aazilongwe zyaluyando alimwi zitamani? Sena zintu zitalibonyi taziyandiki kapati azyalo? Zilayandika! Akaambo kaceeci, ibantu bamwi babaa zilongwe zibotu abantu bambi kwiinda mukulembelana lyoonse—ikanjikanji mumagwalo aabo inga balalembaa zintu nzyobayanda, izibacima, imbaakani zyabo, zintu nzyobasyoma mubuumi, zintu nzyobakkomanina alimwi azintu zimbi zijatikizya bube bwabo naa nzyobayandisya.

Abalo boofwu balatondezya kuti ikubona tacili ncecintu ciyandika kapati kutegwa mube acilongwe cibotu amuntu uumbi. Amulange-lange cikozyanyo ca Edward alimwi a Gwen, banabukwetene iboofwu. * Edward a Gwen bakayaanina kucikolo cabapati caboofwu nkobakali basicikolonyina. Edward wakabukkomanina bube bwa Gwen ikapati akaambo kakusyomeka kwakwe mukukanana akulilemeka alimwi abusungu bwakwe kumilimo. Awalo Gwen wakamukkomanina Edward akaambo kakuti, kweelanaa mbwaamba mwini “wakatondezya bube boonse buyandika mbweekakomezegwaa mbubo.” Bakeebana, elyo nokwakainda myaka yotatwe, bakakwatana.

Edward waamba kuti, “Nomuli antoomwe, iboofwu kunyina nobusinkilizya kuyaka cilongwe amuntu uumbi. Inga kamutakonzyi kubonana pe, pele mulakonzya kuzyiba umwi mbwalimvwa kujatikizya mweenzinyina.” Lino kakwiindide myaka iili 57, baciyandana kapati. Baamba kuti, ikaambo kapati kapa kuti cilongwe cabo cibotu cizumanane kajatikizya zintu zyone: (1) ikuteelela bube bwamuntu uumbi, (2) ikubuyeeyela alimwi akubuyandisisya bube obo, (3) ikwaambauzyanya munzila mbotu alimwi (4) akucita zintu antoomwe.

Itwaambo ootu tone tulayandika kapati mukubaa cilongwe cibotu, cibe cabweenzinyina buyo, cabanabukwetene naa ikapati akati kabantunsi a Leza.

Bupanduluzi buyungizidwe