Ino Mbaani Basimilimo Ba Leza Sunu?
Ino Mbaani Basimilimo Ba Leza Sunu?
“Buzulizi bwesu buzwa kuli-Leza. Nguwe watuzulizizya milimo yamulongo mupya.”—2 BA-KORINTO 3:5, 6.
1, 2. Mmukuli nzi Banakristo boonse bamumwaanda wamyaka wakusaanguna mobakatola lubazu, pele ino zintu zyakacinca buti?
MUMWAANDA wamyaka wakusaanguna wa Ciindi Cesu, Ibanakristo boonse bakatola lubazu mumulimo uuyandika kapati—imukuli wakukambauka makani mabotu. Boonse buyo bakali bananike alimwi bakali basimilimo bacizuminano cipya. Ibamwi bakalijisi amikuli iimbi, mbuli yakuyiisya mumbungano. (1 Ba-Korinto 12:27-29; Ba-Efeso 4:11) Ibazyali bakajisi mikuli mipati mumukwasyi. (Ba-Kolose 3:18-21) Pele boonse bakatola lubazu mumulimo mutaanzi alimwi uuyandika kapati wakukambauka. Mumwaambo mutaanzi wa Cigiliki wamu Magwalo aa Banakristo, imukuli oyu utegwa di·a·ko·niʹa—naa kuti imulimo.—Ba-Kolose 4:17.
2 Iciindi mbocakali kuyaabuya, azyalo zintu zyakacinca. Kwakabuka nkamu yabantu yakali kutegwa mbasololi bazikombelo, ibakalyaamba kuti balikke mbabeelede kukambauka. (Incito 20:30) Basololi bazikombelo bakali basyoonto akati kabaabo bakali kulyaamba kuti Mbanakristo. Ibunji bwabantu bakali kutegwa mbantu buyo. Nokuba kuti ibantu buyo bali kuyiisigwa kuti kuli zyeelelo nzyobajisi zyalo zibikkilizyaa kupa milumbo yakugwasya basololi bazikombelo, ibunji bwabo mbaswiilizi buyo, tabatoli lubazu mukukambauka pe.
3, 4. (a) Mbuti bantu mu Kristendomu mbobaba babelesi? (b) Ino nguni waambwa kuti mmubelesi mu Kristendomu, alimwi ino nkaambo nzi ncozitali boobo zintu akati ka Bakamboni ba Jehova?
3 Ibasololi bazikombelo balyaamba kuti mbaasimilimo (naa kuti minister, ibusanduluzi bwaci Latini bwabbala lya Cigiliki lya di·aʹko·nos, ilyaamba “mulanda”). * Aboobo baunka kumakkoleji naa zikolo zyabweendelezi bwamuzikombelo, eelyo nobamanizya bapegwa zyuuno ezyo. Ibbuku litegwa The International Standard Bible Encyclopedia lyaamba kuti: “‘Kubikkwaa cuuno’ caamba kupegwa nguzu zilibedelede zipegwa babelesi naa bapaizi kwiinda muzilengwa zyaalubazu, eezyo zyalo zibikkila maanu kapati aanguzu zyakwaambilizya Jwi naa kucita zintu zimwi zisetekene nokuba kucita zyoonse zyobile.” Ino nguni uubabikkaa zyuuno kuti babe babelesi? Ibbuku litegwa The New Encyclopædia Britannica lyaamba kuti: “Muzikombelo zicijisi bamabbishopo mbuli kaindi, uubabikkaa zyuuno ezi lyoonse inga ngubbishopo mupati. Muzikombelo zyaci Protesitanti izinyina bubambe buli boobo, kubikkwa muzyuuno oku inga kucitwaa kabunga kababelesi beendelezya basololi bazikombelo.”
4 Aboobo muzikombelo zya Kristendomu, icoolwe cakuba mubelesi cipegwa buyo bamwi ikutali boonse pe. Pele teensi mbocibede akati ka Bakamboni ba Jehova pe. Nkaambo nzi? Nkaambo teensi mbocakabede mumbungano ya Bunakristo yamumwaanda wamyaka wakusaanguna.
Ino Babelesi ba Leza Beni-Beni Mbaani?
5. Mbaani babikkilizyidwe akati kabaabo babeleka kabali babelesi kweelanaa caamba Bbaibbele?
5 Kweelanaa ncolyaamba Bbaibbele, bakombi ba Jehova boonse buyo—kujulu alimwi aanyika—mbabelesi. Ibangelo bakamubelekela Jesu. (Matayo 4:11; 26:53; Luka 22:43) Alimwi ibangelo ‘balababelekela aabo ibayoojana lufwutuko.’ (Ba-Hebrayo 1:14; Matayo 18:10) Jesu wakali mubelesi. Wakati: “Mwana a-Muntu tazide kuti abelekelwe, wakeza kuti abeleke.” (Matayo 20:28; Ba-Roma 15:8) Aboobo mbwaanga basikumutobela Jesu bakeelede ‘kutobela mumikondo yakwe,’ tacigambyi pe kuti abalo beelede kuba babelesi.—1 Petro 2:21.
6. Mbuti Jesu mbwaakatondezya kuti basikwiiya bakwe bakeelede kuba babelesi?
6 Kakusyeede buyo asyoonto kuti apiluke kujulu, Jesu wakaambila basikwiiya bakwe kuti: “Kamuya mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala, alimwi amubaiisye kuti bajatisye makani oonse ngendakamulailila.” (Matayo 28:19, 20) Basikwiiya ba Jesu bakeelede kuba basikugwasya bantu kuba basikwiiya—bakeelede kuba babelesi. Basikwiiya bapya mbobakagwasya bakeelede kwiiya kujatisya makani oonse ngaakalailila Jesu, kubikkilizyaa mulawo wakugwasya bantu kuba basikwiiya. Kunyina makani naa mwaalumi, mwanakazi, mupati naa mwana, sikwiiya wa Jesu Kristo mwini-mwini weelede kuba mubelesi.—Joeli 2:28, 29.
7, 8. (a) Mmagwalo nzi aatondezya kuti Banakristo beni-beni boonse mbabelesi? (b) Mmibuzyo nzi iibuzyigwa kujatikizya kupegwa mukuli?
7 Kweelanaa ceeci, mubuzuba bwa Pentekoste mu 33 C.E., basikwiiya ba Jesu boonse ibakajanika, baalumi abanakazi bakasangana mukwaambilizya “milimo mipati ya-Leza.” (Incito 2:1-11) Kunze lyaboobo, imwaapostolo Paulo wakalemba kuti: “Kumoyo kulasyomwa kuti kube bululami, akumulomo kulazuminwa kuti kube lufutuko.” (Ba-Roma 10:10) Imajwi aayo Paulo tanaakaambila ciinga cabasololi bazikombelo buyo pe, pele kuli baabo ‘boonse bakali mu-Roma, bayandwa ba-Leza.’ (Ba-Roma 1:1, 7) Ncimwi buyo, ‘basalali boonse bakali ku-Efeso aboonse bazumini bamuli-Kristo Jesu’ bakeelede kuti ‘zituta zyabo zibambwe kukusamikwa a-Makani Mabotu aaluumuno.’ (Ba-Efeso 1:1; 6:15) Alimwi boonse ibakaluteelela lugwalo lwakalembelwa ba Hebrayo bakeelede ‘kujatisya buzumino bwabulangizi bwabo cakutazungaana.’—Ba-Hebrayo 10:23.
8 Pele ino ndilili muntu naba mubelesi? Atwaambe kuti, ndilili napegwa mukuli oyu? Alimwi ino nguni uumupa?
Ikupegwa Mukuli Wabubelesi—Ndilili Nokucitika?
9. Ndilili Jesu naakapegwa mukuli alimwi nguni wakamupa mukuli oyo?
9 Kujatikizya makani aakuti ndilili alimwi nkwiinda muli ni muntu mwapegwa mukuli, amulange-lange cikozyanyo ca Jesu Kristo. Kunyina naakajisi pepa litondezya kuti wakalipedwe mukuli naa pepa lyadigili kuzwa kucikolo cabukombi cimwi ikutegwa bantu bamuzyibe kuti wakali mubelesi, alimwi kunyina naakabikkwaa muntu uuli woonse uulya maila. Aboobo, ino nkaambo nzi ncotunga twaamba kuti wakali mubelesi? Nkaambo akazuzikizigwa muli nguwe majwi aa Isaya aakasololelwaa muuya aakuti: ‘Muuya wa-Jehova uli alindime, nkaambo wandinanika kuti ndikambauke makani mabotu.’ (Luka 4:17-19; Isaya 61:1) Imajwi aayo aligaminide kuti Jesu wakatumwa buya kuti aambilizye makani mabotu. Ino nguni wakamutuma? Mbwaanga muuya wa Jehova wakamunanika kuti abeleke mulimo, nkokuti Jesu wakabikkwaa Jehova Leza. Ino eci cakacitika lili? Imuuya wa Jehova wakamusikila Jesu naakali kubbapatizigwa. (Luka 3:21, 22) Aboobo eelyo naakali kubbapatizigwa, naakapegwa mukuli.
10. Nguni ‘uumuzulizya’ mubelesi Munakristo kuti abeleke?
10 Ino mbuti balo basikutobela Jesu bamumwaanda wamyaka wakusaanguna? Abalo ikusalwa kwabo kuba babelesi kwakazwide kuli Jehova. Paulo wakati: “Buzulizi bwesu buzwa kuli-Leza. Nguwe watuzulizizya milimo yamulongo mupya.” (2 Ba-Korinto 3:5, 6) Ino Jehova ubazulizya buti bakombi bakwe kutegwa babe babelesi? Amulange-lange cikozyanyo ca Timoteo ooyo Paulo ngwaakati ngu “similimo wa-Leza wamu Makani Mabotu aa-Kristo.”—1 Ba-Tesalonika 3:2.
11, 12. Mbuti Timoteo mbwaakayaambele kusikaa kuba mubelesi?
11 Imajwi aatobela aakalembelwa Timoteo alatugwasya kuteelela mbwaakaba mubelesi: “Eno yebo kojatisya makani ngowakaiya azintu nzozuminisya, nkaambo ulibezi abo abakakwiisya ngao, alimwi ulizi kuti kuzwa kuciindi niwakacili mwana ulyeezi magwalo aasalala aakonzya kukusongwaazya mukufutulwa kulusyomo luli muli-Kristo Jesu.” (2 Timoteo 3:14, 15) Intalisyo yalusyomo lwa Timoteo ilwakali kuyoomukulwaizya kwaambilizya makani kubuleya lwakali luzibo lwamu Magwalo. Sena nkulibalila buyo kwakali kuyandika kutegwa eci cicitike? Peepe. Timoteo wakali kuyandika kugwasigwa ikutegwa ajane luzibo lwini-lwini alimwi akumvwisisisya kwakumuuya kwazintu nzyaakali kubala. (Ba-Kolose 1:9) Aboobo Timoteo ‘wakazuminisya.’ Mbwaanga wakalaazi Magwalo ‘kuzwa kuciindi naakacili mwana,’ bamayi bakwe bakusaanguna beelede kuti bakali banyina alimwi abakaapanyina, mbwaanga kulangilwa kuti bausyi tiibakali basyomi pe.—2 Timoteo 1:5.
12 Pele nzinji zyakajatikizidwe kutegwa Timoteo abe mubelesi. Kunze lyazeezyo, ilusyomo lwakwe lwakayumizyigwa kwiinda mukuyanzanaa Banakristo mumbungano zyakalaafwaafwi. Ino tuzyi buti obo? Nkaambo iciindi Paulo naakaswaanganya Timoteo kusaanguna, imulombwana oyu “wakali empuwo mbotu kulibabunyina bamu-Lustra amu-Ikoniyo.” (Incito 16:2) Kunze lyaboobo, kuciindi eco ibakwesu bamwi bakali kulembela mbungano magwalo ikutegwa bayumye-yumye banyina. Alimwi ibalangizi bakali kubaswaya ikutegwa babakulwaizye. Izintu ezi zyoonse zyakagwasya Banakristo mbuli Timoteo kuyaambele munzila yakumuuya.—Incito 15:22-32; 1 Petro 1:1.
13. Ndilili Timoteo naakapegwa mukuli wakuba mubelesi, alimwi ino nkaambo nzi ncomunga mwaamba kuti ikuyaambele kwakwe munzila yakumuuya tiikwakagolela waawo pe?
13 Kweelanaa malailile Jesu ngaakaamba kuli Matayo 28:19, 20, tulisinizizye kuti aciindi cimwi lusyomo lwa Timoteo lwakamukulwaizya kwiiya Jesu alimwi akubbapatizigwa. (Matayo 3:15-17; Ba-Hebrayo 10:5-9) Eci ncecakali citondezyo cakulyaaba kwa Timoteo kumaninide kuli Leza. Naakabbapatizigwa, Timoteo wakaba mubelesi. Kuzwa ciindi eco, ibukkale bwakwe, inguzu zyakwe alimwi azyoonse nzyaakajisi zyakaba zya Leza. Eeci ncecakali cibeela ciyandika kapati cabukombi bwakwe, ‘mulimo uusetekene.’ Nokuba boobo, tanaakalimvwa kuti camanina waawo mbwaanga lino wakali mubelesi. Wakazumanana kuyaambele munzila yakumuuya, wakaba mubelesi Munakristo uusimide. Eci cakacitika akaambo kakuyanzana lyoonse a Banakristo basimide mbuli Paulo, kubaa ciiyo cakwe mwini alimwi akwiinda mukubeleka mulimo wakukambauka cabusungu.—1 Timoteo 4:14; 2 Timoteo 2:2; Ba-Hebrayo 6:1.
14. Mbuti sunu muntu ‘uusalilidwe buumi butamani’ mbwayaambele kukuba mubelesi?
14 Ikupegwa mukuli wamulimo wa Bunakristo kulikozyenye asunu. Imuntu ‘uusalilidwe buumi butamani’ ulagwasigwa kwiiya Leza alimwi amakanzaakwe kwiinda muciiyo ca Bbaibbele. (Incito 13:48) Imuntu ooyo utalika kubelesya njiisyo zyamu Bbaibbele mubukkale bwakwe alimwi akupaila mipailo iigwasya kuli Leza. (Intembauzyo 1:1-3; Tusimpi 2:1-9; 1 Ba-Tesalonika 5:17, 18) Ulayanzanaa basyominyina bambi alimwi ulazibikkila maanu zipego alimwi abubambe bucitwaa “muzike musyomesi uucenjede.” (Matayo 24:45-47; Tusimpi 13:20; Ba-Hebrayo 10:23-25) Aboobo uyaambele munzila yalwiiyo yeelede.
15. Ncinzi cicitika muntu naabbapatizigwa? (Amubone akagwalo kakunsi.)
15 Mukuya kwaciindi, sikwiiya Bbaibbele uujisi luyando kuli Jehova Leza alimwi alusyomo luyumu mucituuzyo cacinunuzyo, ulombozya kulyaaba cakumaninina kuli Wisi wakujulu. (Johane 14:1) Ulakucita kulyaaba oko kwiinda mumupailo wakwe mwini alimwi mpoonya ulabbapatizigwa ikutondezya kubuleya intaamu eyo njaakacita kali alikke. Ikubbapatizigwa kwakwe nceciindi ncaapegwa mukuli nkaambo nazyibwa kuti mmubelesi uulyaabide cakumaninina, kuti lino ngu di·aʹko·nos wa Leza. Weelede kuzumanana kulyaandaanya kuziyanza zyanyika. (Johane 17:16; Jakobo 4:4) Walyaaba cakumaninina ‘kutuula mubili wakwe, kauli cipaizyo cuumi, cisalala, ciyandisi’ kuli Leza kakunyina kupilukila munsi naa kucinca mizeezo. (Ba-Roma 12:1) * Waba mubelesi wa Leza uuyiya Kristo.
Ino Mulimo wa Bunakristo Ninzi?
16. Mmikuli nzi imwi njaakajisi Timoteo kali mubelesi?
16 Ino mulimo wa Timoteo wakali kubikkilizya nzi? Wakajisi mikuli yaalubazu kali mweenzinyina ngwaakali kweendaanguwe Paulo. Alimwi naakaba mwaalu, Timoteo wakabeleka canguzu kukuyiisya alimwi akuyumya-yumya Banakristonyina. Pele musemu wamulimo wakwe mbubwenya mbocakabede kuli Jesu a Paulo wakali wakukambauka makani mabotu alimwi akugwasya bantu kuba basikwiiya. (Matayo 4:23; 1 Ba-Korinto 3:5) Paulo wakaambila Timoteo kuti: “Pele yebo kolibamba kuzintu zyoonse, kofwabalika, kosungwaalila milimo yabukambausi, kokondezesya mulimo ngowakapegwa.”—2 Timoteo 4:5.
17, 18. (a) Ino mmulimo nzi ngobacita Banakristo? (b) Ino mulimo wakukambauka uyandika buti kumubelesi Munakristo?
17 Ncimwi buyo akubabelesi Banakristo sunu. Balatola lubazu mumulimo wabuleya, mulimo wabukambausi, ikusololela bamwi kulufwutuko kwiinda mucituuzyo ca Jesu alimwi akuyiisya babombe myoyo ikulilila zina lya Jehova. (Incito 2:21; 4:10-12; Ba-Roma 10:13) Balatondezya kwiinda mu Bbaibbele kuti Bwami mbobulangizi bulikke kubantu bali mumapenzi alimwi balatondezya kuti noliba lino izintu zyeenda kabotu ikuti naa bukkale bwesu kabuyeeme aanjiisyo zyabunaleza. (Intembauzyo 15:1-5; Marko 13:10) Pele mubelesi Munakristo takambauki mulumbe wambozibelesyegwa njiisyo zya Bunakristo kumanizya mapenzi aabukkale pe. Muciindi caboobo, uyiisya kuti ‘bukkale bwabukombi bujisi cisyomezyo cabuumi bwasunu abwaciindi ciciza.’—1 Timoteo 4:8.
18 Masimpe, ibabelesi banji bajisi nzila zimbi zyakubeleka izikonzya kwiimpana ku Munakristo umwi aumwi. Ibanji bajisi mikuli yakulanganya mukwasyi. (Ba-Efeso 5:21–6:4) Baalu abakutausi bajisi mikuli mumbungano. (1 Timoteo 3:1, 12, 13; Tito 1:5; Ba-Hebrayo 13:7) Banakristo banji balagwasilizya mukuyaka Maandaa Bwami. Ibamwi bajisi coolwe citaliboteli cakubeleka kabali bagwasilizyi balisungwide muminzi imwi ya Beteli ya Watch Tower Society. Nokuba boobo, babelesi Banakristo boonse balatola lubazu mukukambauka makani mabotu. Kunyina uuteelede kucita ceeci. Nkutola lubazu mumulimo oyu ikuzyibya muntu umwi aumwi kubuleya kuti mmubelesi Munakristo wini-wini.
Mbwayelede Kulimvwa Mubelesi Munakristo
19, 20. Ino babelesi Banakristo beelede kulimvwa buti?
19 Ibanamunji bategwa mbabelesi mu Kristendomu balangila kupegwa bulemu bumwi bulibedelede, alimwi baitwa mazina aabulemu mbuli lyakuti “mufundisi” (reverand) akuti “fwala” (father). Pele mubelesi Munakristo ulizyi kuti Jehova alikke nguuyelede kupegwa bulemu bwaalubazu. (1 Timoteo 2:9, 10) Kunyina mubelesi Munakristo uutaminina kubaa bulemu bwaatala naa uulombozya mazina aabulemu aalubazu. (Matayo 23:8-12) Ulizyi kuti ibupanduluzi butaanzi bwabbala lyakuti di·a·ko·niʹa mboobo bujatikizya “mulimo wabukambausi.” Ibbala cciti ndyoliswaangene alyalo zimwi ziindi lilabelesegwa mu Bbaibbele ikwaamba milimo mbuli yasikuyobolola zintu zibelesyegwa abaabo bali mukulyaa matafwule. (Luka 4:39; 17:8; Johane 2:5) Nokuba kuti ikubelesyegwa kwandilyo ikujatikizya mulimo wa Banakristo kulisumpukide, ooyo uutegwa ngu di·aʹko·nos inga ucitegwa mmubelesi.
20 Aboobo kunyina mubelesi Munakristo weelede kulisumpula. Ibabelesi Banakristo beni-beni—nobaba baabo ibajisi mikuli yaalubazu mumbungano—mbazike balicesya. Jesu wakati: “Umwi aumwi uuyanda kuba mupati akati kanu uzooba mulanda wanu, alimwi umwi aumwi uuyanda kuba mutaanzi akati kanu uzooba muzike wanu.” (Matayo 20:26, 27) Jesu naakali kutondezya mbubakeelede kulimvwa basikwiiya bakwe wakasanzya matende aabo, ee wakacita mulimo uucitwaa muzike uulicesya ncobeni. (Johane 13:1-15) Elo kaka ngwakulicesya mulimo oyo! Aboobo, babelesi Banakristo cakulicesya babelekela Jehova Leza alimwi a Jesu Kristo. (2 Ba-Korinto 6:4; 11:23) Balalicesya kapati nobabelekela beenzinyina. Alimwi nobakambauka makani mabotu, kakunyina kulisumpula babelekela basimukobonyina batasyomi.—Ba-Roma 1:14, 15; Ba-Efeso 3:1-7.
Amuliyumye Mumulimo
21. Mbuti Paulo mbwaakalumbulwa akaambo kakuliyumya mumulimo?
21 Kuli Paulo, ikuba mubelesi kwakali kuyandika kuti aliyumye. Wakaambila bana Kolose kuti wakapenga kapati ikutegwa abakambaukile makani mabotu. (Ba-Kolose 1:24, 25) Pele akaambo kakuti wakaliyumya, ibanji bakaazumina makani mabotu alimwi bakaba babelesi. Bakaba bana ba Leza abanabokwabo a Jesu Kristo kabajisi bulangizi bwakuba zilenge zyamuuya antoomwe anguwe kujulu. Mbwabulemu kaka bulumbu obo akaambo kakuliyumya!
22, 23. (a) Nkaambo nzi babelesi Banakristo ncobayandika kuliyumya sunu? (b) Mmicelo nzi iitaliboteli iiboola akaambo kakuliyumya kwa Bunakristo?
22 Ikuliyumya kulayandika sunu kubabelesi ba Leza beni-beni. Ibanji balapengaa buzuba amalwazi naa macise aaboola akaambo kakucembaala. Bazyali balabeleka canguzu—ibunji bwabo bakomezya bana babo kakunyina mweenzinyina wamulukwatano. Cabusicamba, ibana kucikolo balazyeeleba izintu zyoongelezya zicitika oko. Banakristo banji bajisi mapenzi mapati aakujana mali aakubelesya. Alimwi ibambi balapenzyegwa naa kupenga akaambo ‘kaziindi zikataazya’ zyamazubaano! (2 Timoteo 3:1) Inzya ibabelesi ba Jehova sunu batandila kutuulunzuma tuli cisambomwi mbubwenya mbuli mwaapostolo Paulo mbwaamba kuti: “Muzintu zyoonse tulatondezya kuti tuli basimilimo benibeni ba-Leza, mulukakatilo lupati.” (2 Ba-Korinto 6:4) Babelesi Banakristo tabacileki pe. Mmasimpe bayandika kulumbaizya akaambo kakuliyumya kwabo.
23 Alimwi mbubwenya mbocakabede kuli Paulo, kuliyumya kuletela micelo iitaliboteli. Kwiinda mukuliyumya, tulacikwabilila cilongwe cesu a Jehova alimwi tulaukkomanisya moyo wakwe. (Tusimpi 27:11) Tulaluyumya lusyomo lwesu alimwi tulabagwasya bamwi kuba basikwiiya, balo bayungizya bukwesu bwa Bunakristo. (1 Timoteo 4:16) Jehova wabagwasya babelesi bakwe alimwi walongezya mulimo wabo kuciindi ecino camazubaa mamanino. Akaambo kaceeci, ibasyaalizi akati kaba 144,000 bayobololwa, alimwi atuulunzuma tumbi tulaalusyomo lwakuyoobaa buumi butamani muparadaiso anyika. (Luka 23:43; Ciyubunuzyo 14:1) Mmasimpe, imulimo wa Bunakristo ncitondezyo calweetelelo lwa Jehova. (2 Ba-Korinto 4:1) Toonse atuukkomanine mulimo oyu alimwi akulumba kuti micelo yanguwo iyoozumanana kukabe kutamani.—1 Johane 2:17.
Bupanduluzi buyungizidwe
^ munc. 3 Ibbala lya Cigiliki lyakuti di·aʹko·nos nkokwakazwa bbala lyakuti “dikoni” naa “dikonesi,” imuntu uujisi bweendelezi mucikombelo. Muzikombelo ibanakazi mobapegwa cuuno eci, balo baitwa kuti mbaamadikonesi.
^ munc. 15 Nokuba kuti lugwalo lwa Ba-Roma 12:1 lugeme kapati ku Banakristo bananike, injiisyo njoonya ilabeleka aku “mbelele zimwi.” (Johane 10:16) Aaba ‘balaliswaanganya kuli Jehova kuti bamumanine milimo, ikuti bayandisye izina lya-Jehova akuba balanda bakwe.’—Isaya 56:6.
Sena Inga Mwapandulula?
• Mmukuli nzi Banakristo bamumwaanda wakusaanguna boonse mobakatola lubazu?
• Ndilili Munakristo napegwa mukuli wabubelesi alimwi ino nguni uumubikka?
• Ino mubelesi Munakristo weelede kulilemeka buti?
• Nkaambo nzi mubelesi Munakristo ncayelede kuliyumya ciindi nali mumapenzi?
[Mibuzyo yaciiyo]
[Cifwanikiso icili apeeji 15]
Lubbapatizyo lutondezya kulyaaba kwamuntu kuli Leza alimwi lutalisya bukkale bwakuti wapegwa mukuli wabubelesi
[Zifwanikiso izili apeeji 16, 17]
Timoteo wakayiisigwa Jwi lya Leza kuzwa kubuvwanda. Wakapegwa mukuli wabubelesi naakabbapatizigwa
[Cifwanikiso icili apeeji 18]
Babelesi Banakristo balilisungwide kubeleka