Amugwasye Bamwi Kuti Beende Cakubotezya Jehova

“Swebo . . . tatuleki abuniini kumukombela akumukumbilila kuti . . . mweende munzila iielede cakubotezya Mwami [Jehova] muziyanza zyoonse, muzyale micelo yamilimo mibotu yamisyobo yoonse.”—BA-KOLOSE 1:9, 10.

1, 2. Ncinzi cini cinga catupa lukkomano akukkutila?

“TUKKALA muŋanda iilonzyegwa ampulazi imwi. Kwiinda mukuubya-ubya bukkale bwesu, tulaa ciindi cinji cakusikila bantu amakani mabotu. Twalongezyegwa kapati acoolwe cakugwasya bantu banji kulyaaba kuli Jehova.”—Banabukwetene, ibabelesi baciindi coonse kucisi ca South Africa.

² Sena tamuzumini kuti ikugwasya bantu ncintu ciletela lukkomano? Ibamwi lyoonse balasoleka kugwasya balwazi, bapengede naa balendeledwe, elyo mukucita boobo balakkutila. Banakristo bakasimpe balisinizizye kwaamba kuti, ikwaabila luzibo lwa Jehova Leza alimwi a Jesu Kristo nkobacita ndolugwasyo lwiinda ndobanga bapa. Ikucita boobu kulikke nkokunga kwasololela bamwi kuzumina cinunuzyo ca Jesu, ikubaa cilongwe a Leza alimwi akweelela kutambula buumi butamani.—Incito 3:19-21; 13:48.

3. Ndugwasyo luli buti ndotweelede kubikkila maanu?

³ Pele ino mbuti kwalo kugwasya baabo ibali kale mukubelekela Leza, aabo ibali mukutobela “nzila”? (Incito 19:9) Cakutadooneka, iluyandisisyo ndomujisi muli mbabo ndunji kapati mbuli lyoonse, pele ambweni inga mwazyiluba nzila mbomunga mwayaambele naa kuzumanana kupa lugwasyo olo. Ambweni ibukkale bwanu bulakonzya kulezya lugwasyo ndomubapa calo cikonzya kucesya lukkomano ndomujana. (Incito 20:35) Ikujatikizya mbazu ezi zyoonse, kuli ncotunga twaiya kubbuku lyaba Kolose.

4. (a) Mmuubukkale buli buti mwaakabede Paulo naakalembela bana Kolose? (b) Ino Epafra wakajatikizidwe buti?

⁴ Naakalembela Banakristo ku Kolose, imwaapostolo Paulo wakali ku Roma kaangidwe muŋanda, nokuba kuti beenzu bakali kukonzya kumuswaya. Mbubwenya mbomulangila, Paulo wakacibelesya ciindi cili coonse ncaakajisi mukukambauka makani aa Bwami bwa Leza. (Incito 28:16-31) Banakristonyina bakali kumuswaya Paulo, ambweni bamwi zimwi ziindi mane bakali kunga baangwa anguwe. (Ba-Kolose 1:7, 8; 4:10) Umwi akati kabaaba wakali mukambausi munkutwe wazina lya Epafra, ooyu wakali kuzwa kumunzi wa Kolose mu Frugiya, mucisi cinyina malundu kujwe lyaku Efeso mu Asia Minor (sunu citegwa Turkey). Epafra wakagwasya kapati mukutalisya mbungano mu Kolose, alimwi wakalitakata kubelekela mbungano zyakali munsi-munsi lyaku Laodikeya alimwi aku Herapoli. (Ba-Kolose 4:12, 13) Nkaambo nzi Epafra ncaakeenda musinzo mulamfwu kuya kubona Paulo ku Roma, alimwi ino ncinzi ncotunga twaiya kubwiinguzi bwa Paulo?

Lugwasyo Lubeleka Kubana Kolose

5. Nkaambo nzi Paulo ncaakabalembela lugwalo bana Kolose?

⁵ Epafra wakeenda musinzo mulamfwu uukatazya kuya ku Roma ikutegwa akabandike a Paulo kujatikizya bukkale bwamumbungano yaku Kolose. Wakaamba zyalusyomo, luyando alimwi akusoleka kwakacitwa mukukambauka kwa Banakristo aabo. (Ba-Kolose 1:4-8) Pele alimwi kulangilwa kuti wakamwaambila kulibilika kwakwe kujatikizya zintu zibyaabi zyakali kunga zyanyonganya bana Kolose munzila yakumuuya. Paulo wakaingula kwiinda mukulemba lugwalo ndwaakalemba mukusololelwaa muuya ilwakabandika makani aakatondezya kuti mizeezo njobakali kumwaya bamayi babeji yakali mibi. Alimwi wakabikkila maanu kapati aamulimo mupati ngwayelede kubeleka Jesu Kristo. * Sena lugwasyo lwakwe lwakayeeme buyo  aakukankaizya makani mapati aakasimpe kamu Bbaibbele? Ninzila nzi zimbi mwaakali kunga wabagwasya bana Kolose, alimwi nziiyo nzi nzyotunga twaiya kujatikizya kugwasya bamwi?

6. Mmakani nzi Paulo ngaakakankaizya mulugwalo ndwaakalembela bana Kolose?

⁶ Kacili kumatalikilo aalugwalo lwakwe, Paulo wakatondezya makani aalugwasyo lumwi ndotunga twalekelezya cimwi ciindi. Yakali nzila yakupa lugwasyo iibeleka nokuba kuti bantu bakkalene kule, ba Paulo a Epafra bakali kule aku Kolose. Paulo wakasinizya kuti: “Tulalumba Leza Wisi Mwami wesu Jesu Kristo, alimwi tulamukombela lyoonse.” Inzya, eyi yakali mipailo iigaminide yakapaililwa Banakristo baku Kolose. Paulo wakayungizya kuti: “Aboobo aswebo, kuzwa kubuzuba obo mbutwakaamvwa, tatuleki abuniini kumukombela akumukumbilila kuti mukazuzigwe luzibo lwakuziba makanze aakwe mbwaabede, akuba abusongo bunji bwakumvwisya makani aamuuya.”—Ba-Kolose 1:3, 9.

7, 8. Mmakani nzi kanjikanji ngotubikkilizya mumipailo njotupaila tobeni alimwi aya mumbungano?

⁷ Tulakonzya kusyoma kuti Jehova lyoonse ulayandisisya kuswiilila mipailo njotupaila kweelana aluyando lwakwe mbwaanga tulizyi kuti ‘ulaswiilila zikombyo.’ (Intembauzyo 65:2; 86;6; Tusimpi 15:8, 29; 1 Johane 5:14) Pele ino mipailo yesu ili buti notupailila bamwi?

⁸ Kanjikanji tulakonzya kuyeeya alimwi akupailila ‘bunyina bwesu bwamasi oonse.’ (1 Petro 5:9) Ambweni tulakonzya kusikila Jehova mumupailo kujatikizya Banakristo alimwi abamwi bali mucooko cimwi cacitikilwa ntenda imwi. Basikwiiya bamumwaanda wamyaka wakusaanguna ibakali mumasena aambi nobakamvwa nzala yakali kucitika mu Judaya, kulangilwa kuti bakapaila mipailo minji kujatikizya ibanyina bakumuuya kabatana kutuma mali aakugwasilizya. (Incito 11:27-30) Mazubaano, imipailo iijatikizya bunyina boonse bwanyika naa inkamu mpati yabakwesu ilamvwugwa kanjikanji amiswaangano ya Banakristo ooko ibanji nkobeelede kuteelela kutegwa bacikonzye kwaamba kuti “Ameni.”—1 Ba-Korinto 14:16.

Amucigame Buya Ncomuyanda Mumipailo

9, 10. (a) Nzikozyanyo nzi zitondezya kuti kupailila bamwi cakubagama buya ncintu ceelede? (b) Mbuti Paulo mbwaakaba yooyo wakali kupaililwa cacigaminina lyoonse?

⁹ Pele, Ibbaibbele litupa zikozyanyo zyamipailo yakali kupaililwa bamwi iyakagaminide kapati kujatikizya bantu aabo. Amutelaike aamakani aa Jesu aalembedwe kuli Luka 22:31, 32. Wakalaa baapostolo basyomeka bali 11. Boonse bakali kuyandika lugwasyo lwa Leza mumasukusyo aakali kuyoobacitikila kumbele, elyo Jesu wakabapailila. (Johane 17:9-14) Nokuba boobo, Jesu wakazandula buyo Petro, wakapaila mupailo uumugaminide ooyo sikwiiya omwe. Izikozyanyo zimbi: Elisha wakapaila kuti Leza agwasye mwaalumi omwe, sikumukutaukila. (2 Bami 6:15-17) Mwaapostolo Johane wakapaila kuti Gayo kapona kabotu kumubili akumuuya. (3 Johane 1, 2) Alimwi kuli mipailo aimbi yakagaminide tukamu twabantu.—Jobu 42:7, 8; Luka 6:28; Incito 7:60; 1 Timoteo 2:1, 2.

¹⁰ Imagwalo aa Paulo atondezya mbwaayandika makani aakupaila mipailo iigaminide. Wakalomba kuti kapaililwa walo alikke naa antoomwe abeenzinyina. Ku Ba-Kolose 4:2, 3, tubala kuti: “Amujatisye kukomba, musungwaalile nkuko akulumba. Nkabela amutukombele aswebo, kuti Leza atujulile mulyango wakukambauka ijwi lya-Leza, kuti twaambe makani aa-Kristo, ngaonya ngingangilidwe.” Alimwi amulange-lange zikozyanyo azimbi ezi: Ba-Roma 15:30; 1 Ba-Tesalonika 5:25; 2 Ba-Tesalonika 3:1; Ba-Hebrayo 13:18.

11. Mbaani mbaakali kupailila Epafra naakali mu Roma?

¹¹ Mbucakabede akumweenzinyina wa Paulo wakali ku Roma. “Ulamujuzya Epafra, nguumwi wakulindinywe, . . . Ulazumba lyoonse munkombyo zyakwe nkaambo kanu.” (Ba-Kolose 4:12) Ibbala lyakasandululwa kuti “ulazumba” lilakonzya kwaamba “kusolekesya canguzu,” mbubonya mbuli bwakali kucita sikusotoka muzisobano zyansiku. Sena Epafra wakali kupailila basyomi bali munyika yoonse nobaba bakombi bakasimpe mu Asia Minor yoonse? Paulo wakatondezya kuti  Epafra cacigaminina wakali kupailila baabo bakali mu Kolose. Epafra wakalibuzi kabotu bukkale bwabo. Tatubazyi mazinaabo boonse alimwi tatwaazi mapenzi aakali kubacitikila, pele amweezeezye zintu zimwi zilangilwa kuti nzizyakali kucitika. Lino walo iwakacili mwana-mwana ambweni wakali kusoleka kutantamuka makani aaba syaabusongo aakadumide, alimwi Rufo ambweni wakali kuyandika nguzu zyakukazya kuyandisisya nkwaakajisi kwakupilukila kuziyanza nzyaakali kucita zyaba Juda. Mbwaanga Pesida wakakwetwe kumwaalumi watakali musyomi, sena wakali kuyandika kuliyumya abusongo mukulela bana bakwe mu Mwami, alimwi sena Asunikrito iwakali kuciswa calufwu wakali kuyandika kuumbulizya kumbi kulibedelede? Inzya, Epafra wakali bazyi kabotu aabo ibakali mumbungano nkwaakali kuzwa alimwi wakazumba kupailila mbabo nkaambo walo alimwi a Paulo bakali kuyanda kuti bantu balyaabide boobo kabeenda cakubotezya Jehova.

12. Mbuti mipailo yesu njotupaila tobeni mbotunga twaicita kuti ibe yeeyo iigaminina?

¹² Sena mwayibona inzila yacikozyanyo njotweelede kutobela yakugwasya bamwi? Mbubwenya mbokwaambwa kale, imipailo yaabuleya lyamiswaangano ya Bunakristo kanjikanji inga taigaminini pe, mbwaanga aabo ibajanika inga bajisi bukkale bwiindene-indene. Pele mipailo njotupaila tobeni naa njotupaila antoomwe mumukwasyi ilakonzya kugaminina kapati. Nokuba kuti zimwi ziindi tulakonzya kulomba Leza kuti abasololele akubalongezya balangizi beendeenda boonse naa beembezi bakumuuya, sena zimwi ziindi tatukonzyi kuzigama buya nzyotwaamba? Mucikozyanyo, ino mbuti kumubanda zina buya mulangizi wabbazu waswaya mbungano yanu naa mweendelezi wa Ciiyo Cabbuku Cambungano? Kubbuku lya Ba-Filipi 2:25-28 alimwi a 1 Timoteo 5:23 kutondezyegwa kulibilika kugaminide nkwaakajisi Paulo kujatikizya bukkale bwa Timoteo alimwi a Epafrodita. Sena andiswe inga twatondezya kulibilika nkotujisi kubantu baciswa mbotuzi mazina?

13. Mbukkale buli buti mbotunga twabikkilizya mumipailo yesu tobeni?

¹³ Ee, iciindi notupaila tatweelede kujatikizya makani aabamwi ngotuteelede kwaamba, pele mipailo yesu yeelede kutondezya luyandisisyo ndotujisi muli baabo mbotuzi alimwi abaabo bayandika kubikkila maanu. (1 Timoteo 5:13; 1 Petro 4:15) Imukwesu ulakonzya wakatandwaa mulimo, alimwi tatukonzyi kumujanina umbi. Pele tulakonzya kumubanda zina akwaamba penzi ndyajisi notupaila mumipailo yesu tobeni. (Intembauzyo 37:25; Tusimpi 10:3) Sena kuli mucizi uutakwetwe ngotuzi iwakomena katakwe mulumi abana akaambo kakuti ukanzide kukwatwa buyo “[ku]muna-Kristo”? (1 Ba-Korinto 7:39) Ino ncomutamulombeli Jehova mumipailo yanu kuti amulongezye akumugwasya kuti azumanane kasyomeka mumulimo wakwe? Icikozyanyo cimbi, ibaalu bobile balakonzya bakalaya mukwesu umwi wakalubizizye. Ino aabo ncobatamubandi zina oyo mukwesu mumipailo yabo beni ciindi aciindi?

14. Mbuti mipailo iigaminide mboiswaangene akugwasya bamwi?

¹⁴ Kuli zyoolwe zinji notukonzya kubikkilizya bantu mbotuzi ibayandika zintu nzyapa Jehova mbuli lugwasyo, iluumbulizyo, ibusongo alimwi amuuya uusalala naa mucelo wawo uli woonse notupaila. Akaambo kakulampa kwamusinzo naa bukkale bumbi bukatazya, mulakonzya kulimvwa kuti mwalezya mulugwasyo lwakumubili ndomunga mwapa. Pele mutalubi kunoobapailila ibanyoko abacizi. Mulizi kuti bayanda kweenda cakubotezya Jehova, pesi inga kabayandika lugwasyo ikutegwa bazumanane kucita boobo. Ilugwasyo lupati ndomunga mwapa, mmipailo yanu.—Intembauzyo 18:2; 20:1, 2; 34:15; 46:1; 121:1-3.

 Amubelekele Kuyumya Bamwi

15. Nkaambo nzi ncotweelede kucibikkila maanu cibeela camamanino cabbuku lyaba Kolose?

¹⁵ Ee, mupailo uugaminina alimwi uupailwa camoyo woonse tauli nenzila ilikke yakugwasya bamwi, ikapati basazinyoko alimwi abaabo mbomuyandisya. Ibbuku lyaba Kolose lilacisalazya eci. Basilwiiyo lwaatala banji basyoma kuti Paulo naakazwaa kulemba makani aabusolozi munjiisyo alimwi alulayo lugwasya, wakayungizyaa myooni iigaminide bantu mbaakabanda mazina. (Ba-Kolose 4:7-18) Mukwiimpana, twalibonena kale kuti eci cibeela camamanino cabbuku eli cijisi lulayo luyandika kapati alimwi kucili azimbi nzyotunga twaiya mulincico.

16, 17. Ncinzi ncotunga twaamba kujatikizya bakwesu babandaukidwe ku Ba-Kolose 4:10, 11?

¹⁶ Paulo wakalemba kuti: “Ulamujuzya Aristarko mwaangema, alakwe Marko mweenzinyina Barnaba, (Mulitambwide kale mulazyo wakuti, asika oyo, mumususunkanine), alakwe Jesu uutegwa Justo. Aba botatwe mbombabo balike akati kabasibupalule mbutubeleka abo milimo ya-Bwami bwa-Leza. Mbibanduumbulizizya moyo.”—Ba-Kolose 4:10, 11.

¹⁷ Paulo aawa wakaamba zyabakwesu bamwi ibakali kuyandika kubikkila maanu kapati. Wakati bakali akati kabaabo bapaludwe, ibakazwide akati kaba Juda. Kwakali ba Juda banji bapaludwe ku Roma alimwi ibamwi eco ciindi Banakristo. Nokuba boobo, aabo Paulo mbaakabanda mazina bakamugwasya kapati. Kulangilwa kuti tiibakeenkeenka ikuyanzanaa Banakristo Bamasi alimwi kweelede kuti bakakkomana kutola lubazu mukukambaukila Bamasi kabacita boobo antoomwe a Paulo.—Ba-Roma 11:13; Ba-Galatiya 1:16; 2:11-14.

18. Mbuti Paulo mbwaakabalumbaizya bamwi ibakali anguwe?

¹⁸ Amukabikkile maanu kaambo ka Paulo kakuti: “Aba . . . mbibanduumbulizizya moyo.” Wakabelesya  bbala lya Cigiliki lijanika ciindi comwe buyo aawa mu Bbaibbele. Basanduluzi banji balyaamba kuti “luumbulizyo.” Nokuba boobo, kuli bbala limbi lya Cigiliki (pa·ra·ka·le’o) ikanjikanji lisandululwa kuti “luumbulizyo.” Wakalibelesya bbala eli Paulo ikumbi mulugwalo lwakwe olu ndoonya, pele ikutali ku Ba-Kolose 4:11.—Matayo 5:4; Incito 4:36; 9:31; 2 Ba-Korinto 1:4; Ba-Kolose 2:2; 4:8.

19, 20. (a) Ncinzi caambwa mukaambo nkaakabelesya Paulo kwaamba bakwesu bakali kumugwasya ku Roma? (b) Muunzila nzi bakwesu abo mobalangilwa kuti bakamugwasya Paulo?

¹⁹ Aabo Paulo mbaakabanda mazina beelede kuti bakacita azimbi kunze lyakumuumbulizya buyo. Ibbala lya Cigiliki lyakasandululwa kuti “mbibanduumbulizizya moyo” ku Ba-Kolose 4:11 zimwi ziindi lyakali kubelesegwa mumabbuku aakunyika kwaamba musamu uugwasya kucesya kucisa. Mu Bbaibbele litegwa New Life Version tubala kuti: “Elo kaka aaba bandigwasya kapati!” Ilitegwa Today’s English Version libelesya kaambo kakuti: “Balikundigwasya kapati.” Ncinzi aabo bakwesu Banakristo ibakali munsi lya Paulo ncobalangilwa kuti bakacita kutegwa bamugwasye?

²⁰ Kulangilwa kuti Paulo wakali kuswaigwaa beenzu banji, pele kuli zintu zinji nzyaatakali kukonzya kucita mbuli kuula zintu ziyandika—icakulya alimwi azyakusama zyakubelesya mumupeyo. Mbuti mbwaakali kunga wajana mabbuku aakubala naa zyakulembela zimbi? (2 Timoteo 4:13) Sena tamweezeezyi kuti aabo bakwesu bakamugwasya Paulo muzintu nzyaakapengede, ikumucitila zintu ziyandika mbuli kumuulila zintu zimwi naa kumucitila zintu zyakali kubusena bumbi? Ambweni wakali kuyanda kulingula akuyumya-yumya mbungano imwi. Mbwaanga wakali mwaange, kunyina naakali kukonzya kucita boobo pe, aboobo ibakwesu aabo kulangilwa kuti mbebakamucitila nyendo ezyo Paulo, kabatola milumbe alimwi akupilusya malipooti. Elo kaka cakali kuyumya-yumya eco!

21, 22. (a) Nkaambo nzi ncotweelede kwaabikkila maanu majwi aajanika ku Ba-Kolose 4:11? (b) Ninzila nzi zimwi motunga twabelesya cikozyanyo cabaabo mbocakali limwi Paulo?

²¹ Ncaakalemba Paulo kujatikizya kuba ‘basikuumbulizya moyo’ citupa nzila mbotunga twabagwasya bamwi. Balakonzya kabeenda cakubotezya Jehova caboola kuzyeelelo zyakwe zyakulilemeka, kujanika kumiswaangano yambungano alimwi akutola lubazu mumulimo wakukambauka.  Akaambo kaceeci, tweelede kubalumbaizya. Pele sena tulakonzya kwiindilizya mukuba ‘basikuumbulizya myoyo’ mbubwenya mbuli mbobakacita aabo mbocakali limwi Paulo?

²² Ikuti kamuzi mucizi umwi iwakakatila cabusongo kumakani aali ku 1 Ba-Korinto 7:37, pele lino uukkede kule abanamukwasyi, sena inga mwamubikkilizya muzintu zimwi nzyomucita mumukwasyi, ambweni kumutamba kucakulya cimwi naa kukulikondelezya kumwi abalongwe naa basazinyoko? Ino mbuti kumutamba kuunkaa mukwasyi wanu kumuswaangano mupati naa kukulyookezya kubusena bumbi? Ambweni amumulombe kuti mukeende limwi buzuba bumwi mwakuunka kuya kuula zyakulya. Tulakonzya kucita mbubwenya buyo akuli bamukabafwu naa bakafwidwa bakaintu nobaba baaba batacikonzyi kucita zintu zimwi. Ciyoomubeda cintu cilumbula kapati ikumvwa zyakuluula zyabo naa luzibo ndobajisi kujatikizya zintu zimwi mbubwenya mbocitakatazyi kusala zintu zyalyoonse mbuli micelo mibotu naa zyakusama zyabana zibotu. (Levitiko 19:32; Tusimpi 16:31) Muyoobona kuti cilongwe canu ambabo ciyooyumizigwa. Aboobo balakonzya kwaanguluka kulomba lugwasyo kulindinywe ikuti kabayanda kuula musamu umwi kuzintoolo zyamisamu, noziba zintu zimbi buyo. Ibakwesu ibakali a Paulo ku Roma balangilwa kuti bakapa lugwasyo lubeleka, luumbulizya moyo mbubwenya mbomukonzya kucita andinywe. Kuciindi eco alimwi asunu izilongezyo iziletwa nzyakuti zyaanzyo zyaluyando zilayumizigwa alimwi akuti tunookanzide kuzumanana kubelekela Jehova antoomwe cakusyomeka.

23. Ino umwi aumwi wandiswe weleede kutola ciindi cili mbocibede kacita nzi?

²³ Umwi aumwi wandiswe ulakonzya kutelaikaa bukkale bwaambwa mucibalo eci. Nzikozyanyo buyo, pele zilakonzya kutuyeezya bukkale bwini-bwini motunga twayaambele mukuba ‘basikuumbulizya myoyo’ yabakwesu abacizi. Ikaambo awa takali kakuti twiiye bucita bantu bamunyika bayanda kusumpula bukkale bwabaabo bapengede. Eyo tiiyakali nembaakani yabakwesu ibaambwa ku Ba-Kolose 4:10, 11. Bakali ‘babelesinyina mumilimo ya-Bwami bwa-Leza.’ Ikuumbulizya moyo kwakali swaangene kapati amulimo ooyo. Acibe mbubwenya akulindiswe.

24. Nkaambo nzi kapati ncotweelede kubapailila alimwi akujana nzila zyakugwasya bamwi?

²⁴ Tulababanda mazina bamwi mumipailo yesu alimwi tulasoleka kubayumya akaambo kaceeci: Tulaalusyomo lwakuti bakwesu abacizi bayanda ‘kweenda munzila iielede cakubotezya Mwami Jehova.’ (Ba-Kolose 1:10) Ikaambo aka kaliswaangene kucintu cimbi ncaakaamba Paulo naakalemba kujatikizya mipailo ya Epafra njaakapailila bana Kolose, kuti beelede ‘kwiima nji, akusyoma muzintu zyoonse nzyayanda Leza.’ (Bakolose 4:12, Ci) Ino mbuti umwi aumwi wesu mbwanga wacicita eco? Atubone.

Bupanduluzi buyungizidwe

Sena Inga Mwayeeya?

• Mbuti mbotunga twaba bantu bagwasya kapati mumipailo njotupaila tobeni?

• Mbuti Banakristo bamwi mobakali ‘basikuumbulizya moyo’ kuli Paulo?

• Muubukkale buli buti motunga twaba ‘basikuumbulizya moyo’?

• Ino nimbaakani nzi njotujisi notupailila alimwi akujana nzila zikonzya kuyumya-yumya bakwesu abacizi?

[Mibuzyo yaciiyo]

[Cifwanikiso icili apeeji 11]

Sena inga mwabikkilizyaa Munakristo uumbi mukulikondelezya kwamukwasyi wanu?

[Kulumba]

Cakazumizigwa Abeni ba Mpulazi ya Green Chimney