Ino Luyando Lwanu Lujatikizya Bantu Bali Buti?
Ino Luyando Lwanu Lujatikizya Bantu Bali Buti?
“Yanda mweenzinyoko mbuli mboliyanda omwini.”—MATAYO 22:39.
1. Nkaambo nzi ncotweelede kubayanda abasimukoboma ikuti naa tulamuyanda Jehova?
JESU naakabuzigwa wakali mulawo mupati wakaingula kuti: “Yanda Leza Jehova wako amoyo wako woonse, amoya wako woonse, amumiyeeyo yako yoonse.” Mpoonya wakazubulula mulazyo wabili uukozyenye awakusaanguna ategwa: “Yanda mweenzinyoko mbuli mboliyanda omwini.” (Matayo 22:37, 39) Inzya, kuyanda simukobonyoko ncecizibya Munakristo. Ncobeni, ikuti katumuyanda Jehova, tweelede kubayanda abalo basimukoboma. Nkaambo nzi? Nkaambo tulalutondezya luyando ndotujisi kuli Leza kwiinda mukutobela Jwi lyakwe, alimwi Jwi lyakwe litulailila kuyanda basimukoboma. Aboobo, ikuti katutabayandi bakwesu abacizi, luyando ndotujisi kuli Leza talukonzyi kuba lwini-lwini pe.—Ba-Roma 13:8; 1 Johane 2:5; 4:20, 21.
2. Ino basimukoboma tweelede kubayandaa luyando luli buti?
2 Jesu naakati tweelede kubayanda basimukoboma, nzinji nzyaakali kwaamba kunze lyabulongwe buyo. Alimwi wakali kwaamba luyando lwiindene aloolo lujanika mumikwasyi naa akati kamwaalumi amwanakazi. Wakali kwaamba luyando Jehova ndwajisi kubabelesi bakwe balyaabide alimwi andobajisi abalo kulinguwe. (Johane 17:26; 1 Johane 4:11, 19) Mulembi mu Juda umwi walo Jesu ngwaakabona kuti wakali kwaamba cabusongo wakazuminizya nzyaakamwaambila Jesu kuti kuyanda Leza kweelede kucitwa “amoyo woonse akukuyeeya koonse akunguzu zyoonse.” (Marko 12:28-34) Wakaliluzi. Luyando Munakristo ndwabaandulo kuli Leza akuli basimukobonyina lubikkilizya mbotulimvwa alimwi ambotuyeeya. Luzwa mumoyo alimwi lweendelezyegwaa mizeezo.
3. (a) Mbuti Jesu mbwaakayiisya mwaalumi “similao” kuti wakeelede kulanga zintu zinji kujatikizya bakali basimukobonyina? (b) Ino cikozyanyo ca Jesu cibeleka buti ku Banakristo sunu?
3 Kweelanaa makani ngaakalemba Luka, Jesu naakati tweelede kuyanda basimukoboma, “similao umwi” wakamubuzya kuti: “Ino munamuzeesu nguni?” Jesu wakaingula kwiinda mukubelesya cikozyanyo. Kwakali mwaalumi umwi wakaumwa akubbidwa akusiigwa ufwumba bulamfwu munzila. Kusaanguna kwakainda mupaizi, mpoonya kwakatobela mu Levi. Boonse bakamulanga buyo ameso. Mpoonya kwakasika muna Samariya, wakamubona mwaalumi oyo iwakaumwa alimwi caluzyalo wakamucitila zintu zinji. Nguni akati kabantu abo botatwe wakali simokobonyinaa muntu wakaumidwe? Bwiinguzi bwakalisalade. (Luka 10:25-37) Ooyo similawo kulangilwa kuti wakagambwa kumvwa Jesu kaamba kuti muna Samariya wakali simukobonyina mubotu kwiinda mupaizi amu Levi. Masimpe, Jesu wakali kugwasya mwaalumi oyo kuyanda basimukobonyina munzila ziindene-indene. Abalo Banakristo balalutondezya luyando munzila zinji. Amulange-lange bantu mbolubikkilizya luyando lwabo.
Luyando Mumukwasyi
4. Nkuli Munakristo nkwayelede kusaanguna kutondezya luyando?
4 Banakristo balabayanda banamukwasyi babo—bamakaintu balabayanda balumi babo, balumi balabayanda bamakaintu babo abazyali balabayanda bana babo. (Mukambausi 9:9; Ba-Efeso 5:33; Tito 2:4) Ee, luyando lwabusazinyina lulabonwa mumikwasyi minji. Nokuba boobo, imakani aatambulwa aajatikizya kulekana, kupenzyanya akati kabanabukwetene alimwi akulekelezya naa kupenzya bana atondezya kuti mikwasyi ili mumapenzi mazubaano alimwi luyando lutondezyegwa talukonzyi kwiiyanzanya pe. (2 Timoteo 3:1-3) Ikutegwa kube kuzwidilila kwini-kwini mubukkale bwamikwasyi yabo, Banakristo bayandika kubaa luyando oolo Jehova alimwi a Jesu ndobajisi.—Ba-Efeso 5:21-27.
5. Nguni bazyali ngobasyoma kuti nguukonzya kubagwasya kulela bana babo, alimwi ino ncizi cacitika kubanji?
5 Bazyali Banakristo babona bana babo kuti ncintu ciyandisi kapati ncaakabapa Jehova alimwi basyoma nguwe kuti nguukonzya kubagwasya kubalela. (Intembauzyo 127:3-5; Tusimpi 22:6) Munzila eyi, babaa luyando lwa Bunakristo lwalo lubagwasya kukwabilila bana babo kuzintu zibyaabi zyoongelezya bakubusi. Akaambo kaceeci, ibazyali Banakristo banji bajana lukkomano mbuli ndwaakabaandulo mutumbu umwi kucisi ca Netherlands. Naakamana kulangilila mwanaakwe musankwa kabbapatizigwa walo iwakali akati kabantu bali 575 ibakabbapatizigwa mucisi ca Netherlands mwakali—wakalemba kuti: “Lino mulimo ngundali kucita mumyaka iili 20 yainda wabaa mpindu. Iciindi anguzu kubikkilizyaa kucimwa, kusoleka alimwi abuumba—lino zyalubwa.” Ulikkomene kapati kuti mwanaakwe musankwa, cakulisungula mwini wakasala kubelekela Jehova. Akati kamweelwe waatala wabasikumwaya bali 31,089 ibakatuma malipooti mucisi ca Netherlands mwakali, mbanji ibakayiisigwa kuyanda Jehova abazyali babo.
6. Mbuti luyando lwa Bunakristo mbolunga lwagwasya kuyumya caanzyo calukwatano?
6 Paulo wakati luyando “ncecaanzyo cabuumi bulondokede,” alimwi lulakonzya kukwabilila lukwatano nomuba muziindi zyamapenzi mapati. (Ba-Kolose 3:14, 18, 19; 1 Petro 3:1-7) Imwaalumi umwi uuzwa kunsumbu nsyoonto ya Rurutu iijanwa makkilomita aali 700 kuzwa kunsumbu ya Tahiti naakatalika kwiiya Bbaibbele a Bakamboni ba Jehova, imukaintu wakwe wakali kumukazya kapati. Mukuya kwaciindi, mukaintu oyo wakabweza bana bakwe, wamusiya mulumi akulongela ku Tahiti. Nokuba boobo, mulumi wakazumanana kutondezya kuti ulamuyanda kwiinda mukumutumina mali lyoonse alimwi akutumina luwaile kabuzya naa mukaintu wakwe abana bakali kupona buti. Aboobo wakasungwaala kapati kuzuzikizya zyeelelo zyakwe zya Bunakristo. (1 Timoteo 5:8) Wakali kupaila lyoonse kuti mukwasyi ukamantane alimwi elyo muciindi, imukaintu wakwe wakapiluka. Naakapiluka, mulumi wakacita zintu zyoonse ‘caluyando, alukakatilo, alulibombyo.’ (1 Timoteo 6:11) Wakabbapatizigwa mu 1998 alimwi kumbele wakakondwa kapati eelyo mukaintu wakwe naakazumina kwiiya Bbaibbele. Iciiyo eco cakali akati kaziiyo zili 1,351 zyakacitwa imwakali mucilawo ceendelezyegwaa mutabi wa Tahiti.
7. Kweelanaa cakaamba mwaalumi umwi kucisi ca Germany, ncinzi cakayumya lukwatano lwakwe?
7 Kucisi ca Germany, imwaalumi umwi wakakazya mukaintu wakwe wakajisi luyandisisyo mukasimpe ka Bbaibbele alimwi wakalisinizide kuti Bakamboni ba Jehova bakali kuyanda kumucenga buyo. Pele kumbele amazuba wakalembela Kamboni wakasaanguna kusikila mukaintu wakwe kuti: “Ndamulumba kuti mwakazibya mukaintu wangu kuli Bakamboni ba Jehova. Kumatalikilo, ndakalibilika kapati akaambo kakuti kuli zintu zinji zitali kabotu nzyeekamvwide kujatikizya mbabo. Pele ono, mbwaanga ndalikujanika kumiswaangano amukaintu wangu, ndaziba kuti ndakalilubide kapati. Ndilizi kuti nditeelela kasimpe alimwi kapa kuti lukwatano lwesu luyume.” Bakamboni ba Jehova bali 162,932 kucisi ca Germany alimwi abali 1,773 munsumbu zyeendelezyegwaa mutabi wa Tahiti bali akati kamikwasyi minji iikamantene muluyando lwabunaleza.
Luyando ku Bakwesu Banakristo
8, 9. (a) Nguni uutuyiisya kuyanda bakwesu, alimwi ino luyando lutukulwaizya kucita nzi? (b) Amupe cikozyanyo citondezya luyando mbolunga lwakulwaizya bakwesu kunoogwasyanya.
8 Paulo wakaambila Banakristo baku Tesalonika kuti: ‘Nywebo nobeni muliyiisidwe kuli-Leza kuti muyandane.’ (1 Ba-Tesalonika 4:9) Inzya, aabo ‘bayiisidwe a Jehova’ balayandana. (Isaya 54:13) Luyando lwabo lulatondezyegwa mumicito mbubwenya Paulo mbwaakatondezya naakati: “Umwi aumwi abe muzike kumweenzinyina cakuyandana.” (Ba-Galatiya 5:13; 1 Johane 3:18) Mucikozyanyo, eci balacicita nobaswaya bakwesu abacizi, nobakulwaizya batyompedwe alimwi anobagwasya bakompeme. (1 Ba-Tesalonika 5:14) Luyando lwesu lwa Bunakristo lwini-lwini lulijatikizidwe mukukomezyegwa kwaparadaiso yesu yakumuuya.
9 Mumbungano ya Ancón—yomwe akati kambungano zili 544 mucisi ca Ecuador—ibakwesu bakatondezya luyando munzila iigwasya. Ikubulika kwamilimo kwakapa kuti banji kabanyina mali, aboobo basikumwaya bakayeeya kuti bajane mali kwiinda mukusambala zyakulya kuli basikuzela nswi banyenzi nobakali kupiluka kuzwa mukuzela nkobakali kucita busiku boonse. Boonse bakabelekela antoomwe kubikkilizyaa bana. Bakali kutalika kubelekaa ciindi ca 1:00 a. m. ikutegwa cakulya kacibambidwe kuzikusikaa ciindi ca 4:00 a. m. eelyo basikuzela nswi nobakali kupiluka. Imali aakajanwa abakwesu aba akaabanwa kweelana apenzi lyakajisi umwi aumwi. Ilugwasyo lwakugwasya boonse luli boobo lwakatondezya luyando lwa Bunakristo lwini-lwini.
10, 11. Mbuti mbotunga twatondezya luyando kubakwesu mbotutazyibene limwi?
10 Nokuba boobo, luyando ndotujisi tatulutondezyi buyo ku Banakristo mbotuzyibene limwi pe. Mwaapostolo Petro wakati: “Amuyande babunyina [boonse, NW].” (1 Petro 2:17) Tulabayanda bakwesu abacizi boonse akaambo kakuti boonse mbakombima ibakomba Jehova Leza. Iziindi zyamapenzi zilakonzya kutupa coolwe cakutondezya luyando olu. Mucikozyanyo, mumwaka wamulimo wa 2000, imaanzi akapaya cibyaabi kapati kucisi ca Mozambique alimwi inkondo yamucisi iicizumanana ku Angola yakapa kuti banji bapenge kapati. Imweelwe mupati wabakwesu bali 31,725 ku Mozambique alimwi abali 41,222 ku Angola bakapenga kapati azintu ezi zyakabacitikila. Aboobo, Bakamboni mucisi cilaafwaafwi ca South Africa batuma zintu zinji zyakuligwasya kutegwa bacesye-cesye mapenzi aabanyina muzisi ezi. Ikulisungula kwabo kukusanga kubanyina bapengede muzintu ‘zinji’ nzyobakajisi kwakatondezya luyando ndobajisi.—2 Ba-Korinto 8:8, 13-15, 24.
11 Alimwi luyando lulalibonya eelyo ibakwesu mumasi manji nobasanga kumayake aa Maandaa Bwami alimwi Amaanda Mucitilwa Miswaangano mipati mumasi aali mubucete. Icikozyanyo cimwi nceeco caku Solomon Islands. Nokuba kuti kwakali manyongwe manji, ooku ku Solomon Islands kwakaba kuyungizigwaa 6 pasenti kumweelwe wabasikumwaya mwakali kwalo kwakapa kuti kube mweelwe waatala mupya wabasikumwaya bali 1,697. Bakalibambila kuyaka Ŋanda Yakucitila Miswaangano Mipati. Nokuba kuti bantu banji bakalonga kuzwa munsumbu eyo akaambo kamapenzi, basikugwasilizya bakaboola kuzwa ku Australia kuzyoogwasya mukuyaka. Mukuya kwaciindi, basikugwasilizya bakapiluka nkobazwa, pele bakabona kwaamba kuti babayiisya bakwesu banyenzi kumanizya ntalisyo yaŋanda. Izibulo zyakuyasya ŋanda zyakabambilidwe limwi zyakatumwa kuzwa ku Australia alimwi ikumanizigwa kwaŋanda eyi mbotu kapati yakukombela kuyooba bumboni bubotu kuzina lya Jehova alimwi akuluyando lwabakwesu—aciindi masena manji imutalisidwe mayake naacilede.
Tulaiyanda Nyika, Mbubwenya Mbwaiyanda Leza
12. Mbuti mbotumwiiya Jehova kujatikizya mbotubalanga aabo ibatasyomi nzyotusyoma?
12 Sena luyando ndotujisi luyiila buyo aamikwasyi yesu abunyina bwesu? Tacikonzyi kuba boobo, ikuti katuli ‘basikwiiya Leza.’ Jesu wakati: “Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” (Ba-Efeso 5:1; Johane 3:16) Mbubwenya mbuli Jehova Leza, bantu boonse tulabeendelezya caluyando—kubikkilizyaa baabo batasyomi nzyotusyoma. (Luka 6:35, 36; Ba-Galatiya 6:10) Ikapati mumakani aya, tulakambauka makani mabotu aa Bwami alimwi akwaambila bamwi mulimo waluyando mupati ngwaakabacitila Leza. Eci inga capa lufwutuko kuli boonse ibaswiilila.—Marko 13:10; 1 Timoteo 4:16.
13, 14. Nzyakuluula nzi ziliko zyabakwesu ibakatondezya luyando kubantu batakali Bakamboni nkobakacita mubukkale bukatazya kapati?
13 Amulange-lange cikozyanyo cabapainiya baalubazu bone bakucisi ca Nepal. Bakatuminwa kudolopo lili kumusanza lwaambo lwacisi eci alimwi kwamyaka iili yosanwe yainda, batondezya luyando lwabo kwiinda mukukambauka cakukkazika moyo mudolopo elyo amuminzi iizingulukide. Ikutegwa basikile bantu boonse mucilawo eci, kanjikanji baleenda misinzo milafwu kwamawoola manji aamacinga kakupya kapati kwiindaa 40°C. Iluyando lwabo alimwi ‘akucita kabotu cabusungu mumulimo’ zyakazyala micelo mibotu ciindi nokwakatalisigwa kakamu kaciiyo cabbuku mumunzi umwi. (Ba-Roma 2:7) Mu March 2000, ibantu bali 32 bakajanika kumakani aabuleya aakabandikwaa mulangizi wabbazu wakali kuswaya. Cisi ca Nepal cakabaa mweelwe waatala mupya mwakali wabasikumwaya bali 430—kwalo kuli nkuyungizigwaa 9 pasenti. Masimpe, Jehova uli mukubalongezya bakwesu mucisi eco akaambo kabunkutwe alimwi aluyando lwabo.
14 Mucisi ca Colombia, bapainiya baalubazu babeleka buyo kwaciindi cili mbocibede bakaunka kuyookambaukila musyobo wa Bansame uutegwa Wayuu. Ikutegwa bacicite eci, bakaiya mwaambo mupya, pele ikuyandisisya kwabo kwaluyando kwakalumbulwa eelyo ibali 27 nobakajanika kumakani aabuleya nokuba kuti kwakawa mvwula yaajuzya kacembele buzuboobo. Ibunkutwe bwaluyando buli mbuli boobo bwakatondezyegwaa bapainiya aba bwakapa kuti kube kuyungizigwaa 5 pasenti alimwi akuti kube mweelwe waatala wabasikumwaya bali 107,613 mucisi ca Colombia. Ku Denmark, imucizi umwi uucembeede wakali kuyanda kwaambila bamwi makani mabotu, pele wakali mulema. Kakunyina kutyompwa, wakali kubandikaa bantu bajisi luyandisisyo kwiinda mukubalembela magwalo. Lino ulalembelanaa bantu bali 42 alimwi ucitya ziiyo zya Bbaibbele zili 11. Uli akati kamweelwe waatala wabasikumwaya bali 14,885 ibakatuma malipooti kucisi ca Denmark imwakali.
Amubayande Basinkondonyoko
15, 16. (a) Ino Jesu wakaamba kuti luyando lwesu lweelede kujatikizya bantu bali buti? (b) Mbuti bakwesu bakali kweendelezya makani mbobakacita munzila yaluyando kumuntu wakamwaya makani aakubejelezya Bakamboni ba Jehova?
15 Jesu wakaambila mwaalumi similawo kuti muna Samariya inga wabonwa kuti ngusimukobonyina. Mumulumbe wakwe waa Cilundu, Jesu wakayaambele naakati: “Mwakamvwa mbukwakaambwa kuti, Yanda mweenzinyoko, pele sinkondonyoko umusule. Mebo ndamwaambila kuti, Amuyande basinkondonyoko, amubakombele bamupenzya, kuti mube bana bakwe Usowanu uuli kujulu.” (Matayo 5:43-45) Neliba leelyo muntu natukazya, tulasoleka ‘kuzunda bubi kukucita bubotu.’ (Ba-Roma 12:19-21) Ikuti kakukonzyeka, tulamwaambila makani mabotu ngotujisi, imakani aakasimpe.
16 Kucisi ca Ukraine, kwakalembwa cibalo mumuteende uutegwa Kremenchuk Herald cakali kwaamba kuti Bakamboni ba Jehova ninkamu mbyaabi kapati. Aya akali makani mapati akaambo kakuti ku Europe ibantu bamwi babaamba boobu Bakamboni ba Jehova ikutegwa bazule buleya kuti imilimo ya Bakamboni yeelede kucesegwa naa kulesyelwa limwi buya. Aboobo, mweendelezi wamuteende oyo wakasikilwa akulombwa kuti kumwaigwe makani aakululamika makani aamucibalo eco aatakaluzi. Wakazumina, pele mumakani aayo wakabikkilizya akaambo kakuti cibalo citaanzi cakayeeme aamakani aasinizidwe. Eelyo ibakwesu bakali kulanganya makani ayo bakamusikila alimwi amakani aambi. Kumamanino, imweendelezi oyo wakaziba kuti imakani aakali mucibalo citaanzi tanaakaluzi pe, elyo wakamwaya cibalo cakuzumina makani aamucibalo eco kuti tanaakaluzi pe. Ikwaambaula anguwe cakusinizya alimwi munzila yalubomba yakali nenzila yaluyando yakweendelezya makani aya alimwi kwakapa kuti kucitike zintu zibotu.
Mbuti Mbotunga Twabaa Luyando?
17. Ncinzi citondezya kuti talili lyoonse nocinooli cuuba-uba kutondezya luyando kuli bamwi?
17 Mwana nazyalwa, bazyali bakwe balamuyanda ndilyonya. Ikweendelezya bantu bapati caluyando talili lyoonse nokuzuminwa buyo. Nkakaambo kaako Ibbaibbele cakwiinduluka-induluka ncolitwaambila kuti tuyandane—nkaambo ncintu ncotweelede kubelekela. (1 Petro 1:22; 4:8; 1 Johane 3:11) Jesu wakalizi kuti luyando lwesu lwakali kuyoosunkwa naakati tweelede kulekelela mukwesu “ziindi zili ciloba zivuzigwe aziindi zili makumi aali ciloba.” (Mateyo 18:21, 22, Ci) Awalo Paulo wakatukulwaizya kuti tuzumanane ‘kweengelelana.’ (Bakolose 3:12, 13, Ci) Anu ncotwaambilwa kuti: “Amutobele luyandisyo”! (1 Ba-Korinto 14:1) Ino eci inga twacicita buti?
18. Ncinzi ciyootugwasya kuyanda bamwi?
18 Kusaanguna, tulakonzya kunooyeeya luyando ndotujisi kuli Jehova Leza. Luyando olu ncecintu citukulwaizya kapati kuyanda basimukoboma. Nkaambo nzi? Nkaambo notucita boobo, cilamubotela Taateesu wakujulu alimwi cimupa bulemu akumutembaula. (Johane 15:8-10; Ba-Filipi 1:9-11) Cabili, tulakonzya kubona zintu mbuli mbwazibona Jehova. Lyoonse notucita cibi, tulamubisizya Jehova; pele nokuba boobo, ulatulekelela alimwi ulazumanana kutuyanda. (Intembauzyo 86:5; 103:2, 3; 1 Johane 1:9; 4:18) Ikuti zintu twazilanga mbuli mbwazilanga Jehova, tunoolibambilide lyoonse kuyanda bamwi akubalekelela zibi nzyobatucitila. (Matayo 6:12) Catatu, tulakonzya kweendelezya bamwi mbuli mbotuyanda kuti batweendelezye. (Matayo 7:12) Akaambo kakuti tatulondokede, lyoonse tuyandika kulekelelwa. Mucikozyanyo, notwaamba zintu zibacisa kumoyo bamwi, tulangila kuti bayooibaluka kuti muntu woonse ulabisya alulimi ciindi aciindi. (Jakobo 3:2) Ikuti katuyanda kuti bamwi kabatweendelezya caluyando, aswebo tweelede kubeendelezya caluyando.
19. Mbuti mbotunga twajana lugwasyo lwamuuya uusalala mukubaa luyando?
19 Cane, tulakonzya kulomba lugwasyo lwamuuya uusalala nkaambo luyando ncibeela camicelo yamuuya. (Ba-Galatiya 5:22, 23) Zilongwe, kulimvwa kwabanamukwasyi alimwi aluyando lwabantu bakwetene kanjikanji inga talubelekelwi buya pe. Pele tuyandika lugwasyo lwamuuya wa Jehova ikutegwa tube aaluyando ndwajisi Jehova, iluyando luli ncecaanzyo cabukkale cilondokede. Tulakonzya kuyandaula lugwasyo lwamuuya uusalala kwiinda mukubala Bbaibbele lyakasololelwaa muuya. Mucikozyanyo, ikuti twaiya bukkale bwa Jesu, tulakonzya kubona mbwaakabeendelezya bantu alimwi tulakonzya kuzyiba mbotunga twamwiiya. (Johane 13:34, 35; 15:12) Kunze lyaboobo, tulakonzya kulomba Jehova kuti atupe muuya uusalala, ikapati notuli mubukkale bukatazya kucita zintu munzila yaluyando. (Luka 11:13) Camamanino, tulakonzya kutobela luyando kwiinda mukukakatila kumbungano ya Bunakristo. Ikuyanzanaa bakwesu abacizi basiluyando kulatugwasya kubaa luyando.—Tusimpi 13:20.
20, 21. Nkutondezya kwaluyando kwaalubazu kuli buti nkobakacita Bakamboni ba Jehova mumwaka wamulimo wa 2000?
20 Mwakali, kwakali mweelwe waatala wabasikumwaya makani mabotu bali 6,035,564 nyika yoonse mbwiizulwa. Bakamboni ba Jehova bakabelesya mawoola aali 1,171,270,425 kuyandaula bantu kuti babaambile makani mabotu aayo. Nduyando lwakapa kuti baliyumye nokupya, noiwa mvwula yaajuzya kacembele alimwi anokutontola buti nobakali kucita mulimo oyu. Nduyando lwakabakulwaizya kukananina basicikolonyina ambocibeleka limwi alimwi akusikila basinakooma mumigwagwa alimwi amumasena aambi. Ibanji mbobakaswaya Bakamboni tiibakali kwaakkomanina makani pe, ibamwi bakali kukazya. Nokuba boobo, ibamwi bakalijisi luyandisisyo cakuti kwakacitwa nyendo zyakupilukila zili 433,454,049 alimwi iziiyo zya Bbaibbele zyakacitwa zyakali 4,766,631. *
21 Elo kaka ezi zyoonse cakali citondezyo cipati caluyando ndobajisi Bakamboni ba Jehova kuli Leza wabo akuli basimukobonyina! Luyando olo talukamani pe. Tulaa lusyomo lwakuti mumwaka wamulimo wa 2001, bantu bayookambaukilwa kwiinda waawo. Zilongezyo zya Jehova azizumanane kubakombi bakwe bankutwe alimwi basyomeka mbobazumanana kucita ‘zintu zyoonse muluyando’!—1 Ba-Korinto 16:14.
Bupanduluzi buyungizidwe
^ munc. 20 Imakani oonse aajatikizya Lipooti Yamwaka Wamulimo ya 2000 ali aaccaati lili amapeeji 28-31.
Sena Inga Mwapandulula?
• Nguni ngotwiiya notubayanda basimukoboma?
• Ino luyando lwesu lweelede kujatikizya bantu bali buti?
• Nzyakuluula nzi zitondezya luyando lwa Bunakristo?
• Mbuti mbotunga twabaa luyando lwa Bunakristo?
[Mibuzyo yaciiyo]
Ccaati iili apeeji 28-31
LIPOOTI YAMWAKA WAMULIMO WA 2000 YA BAKAMBONI BA JEHOVA NYIKA YOONSE MBWIIZULWA
Amubone Bbaundi Volyumu
[Zifwanikiso izili apeeji 25]
Luyando lwa Bunakristo lulakonzya kukamantanya mukwasyi
[Zifwanikiso izili apeeji 26]
Luyando lutukulwaizya kwaambila bamwi zyabulangizi bwesu