Bakamboni ba Jehova Bali Mukuyaambele Kabali Bayumu!

Lipooti Yamuswaangano Waamwaka

MUMAZUBAANO aakudooneka, Bakamboni ba Jehova balaampuwo yakuti Mbanakristo bayumu. Eeci cakasalazigwa lyamuswaangano waamwaka wa Watch Tower Bible and Tract Society of Pennsylvania, iwakacitilwa Muŋanda Mucitilwa Miswaangano Mipati ya Bakamboni ba Jehova ku Jersey City mu New Jersey mu Mujibelo mu October 7, 2000. *

Mumajwi aakwe aakujalula muswaangano, Sicuuno mukwesu John E. Barr umwi wamu Kabunga Keendelezya ka Bakamboni ba Jehova wakaamba kuti: “Akati kazyuulu-zyuulu zyatuulunzuma twabantu bali munyika, swebo tulizi alimwi tulasyoma kuti Jehova Mwanaakwe uuyandwa Jesu Kristo, lino ulibikkidwe acuuno cabwami kujulu, akuti uleendelezya akati kabasinkondonyina.” Ikukakatila kulusyomo kuli boobo kwakabandikwa mumalipooti aali cisambomwi aakkomanisya kuzwa muzisi zili mbozibede munyika.

Ikuzunda Mizimo Kwiinda Mukubelesya Kasimpe Kamu Bbaibbele mu Haiti

Kusyoma mizimo ncintu cidumide kapati mucisi ca Haiti. Sikweendelezya Mutabi wakucisi eeci mukwesu John Norman wakaluula kuti, “Kanjikanji bantu bakomba basikale kutegwa balikwabilile.” Muŋanga umwi wakatalika kudooneka ciindi naakakosoka mweendo muntenda. Wakatelaika ulaamba, ‘Ino eeci inga cacitika buti kakuli ndilicingilidwe amizimo?’ Mbubwenya mbuli bamwi, ooyu mwaalumi wakayiisyigwa kasimpe a Bakamboni ba Jehova, aboobo wakagwasigwa kuleka kusyoma mizimo. Kuyungizigwa mu Haiti, kwatondezyegwaa bantu bakajanika mu April 19, 2000 ilya Ciibalusyo Calufwu lwa Kristo. Ciindi mweelwe wabasikumwaya zya Bwami nowakaindwaa ziindi zyone kweelana abaabo bakajanika.

Bunkutwe Mucilawo Cipati Cacisi ca Korea

Mucisi ca Korea, 40 pasenti ya Bakamboni ba Jehova bali mumulimo waciindi coonse. Sikweendelezya Mutabi mukwesu Milton Halmilton wakaluula kuti, “Kwiinda mukubelesya nkamu eeyi mpati yabasikwaambilizya, cilawo cesu cijisi bantu ibali tuulunzuma tuli 47 cilamanizyigwa ciindi comwe amwezi.” Ikuyaambele mumbungano zibelesya mwaambo wakutambaika kuli mukucitika kapati. Mubbazu limwi mubelesegwa mwaambo wakutambaika, iziiyo zya Bbaibbele izili 800 zilasololelwa. Nkokuti mumweelwe waakati-kati, kuciiyo comwe kuli sikumwaya omwe-omwe. Mukubula coolwe, bakwesu ibakubusi bacaangwa akaambo kakutatola lubazu munkondo. Nokuba boobo, aaba Banakristo basyomeka ibaangidwe balalanganizigwa kabotu abeendelezi bantolongo,  alimwi kanjikanji bapegwa milimo iyandika muntu usyomeka.

Kuzuzikizya Ziyandika Akaambo Kakuvwula mu Mexico

Imweelwe waatala wabasikwaambilizya zya Bwami bali 533,665 bakapa malipooti aamulimo wamumuunda mumwezi wa August 2000 ku Mexico. Mweelwe ooyu ulanjila ziindi ziinda kuli zyotatwe kumweelwe wabaabo bakajanika ku Ciibalusyo. Sikweendelezya Mutabi mukwesu Robert Tracy wakaamba kuti, “Mbaakani yesu mwaka uno njakuti tuyake Maanda aa Bwami aambi aasika ku 240.” Alimwi wakayungizya kuti, “Nokuba boobo, tuciyanda maanda manji kwiinda waawo.”

Ibakubusi akati ka Bakamboni ba Jehova bali mu Mexico balaa zikozyanyo zibotu. Kujatikizya mukubusi umwi, mupaizi wacikombelo ca Katolika wakaamba kuti: “Inga ndakkomana kuti akati kabasikunditobela kakuli omwe buyo uuli mbuli nguwe. Ndilabalombozya bantu aaba akaambo kakusinizya kuyumu alimwi akulibelesya cabusongo Ibbaibbele nkobacita. Balakakatila kukasimpe ka Leza, mane kusikilaa kubikka buumi bwabo muntenda.”

Kusyomeka Nokuli Mapenzi mu Sierra Leone

Kuzwa mu 1991 lyakatalika nkondo yamucisi mumona ku Sierra Leone, zyuulu-zyuulu zyabantu bajaigwa, kucisigwa antela kulemana. Sikweendelezya Mutabi mukwesu Bill Cowan wakaluula kuti, “Nkondo alimwi amapenzi akabacinca kapati bantu. Bunji bwabaabo ibatakali kuuyanda mulumbe wesu lino balaswiilila caluyandisisyo. Tacigambyi kubona bantu kabaunka ku Maanda aa Bwami kuyoojanika kumiswaangano kwaciindi cakusaanguna nokuba kuti tiibakatambwa pe. Kanjikanji ibakwesu balaimikwa munzila abantu balomba ciiyo ca Bbaibbele.” Nokuba kuti cisi eeci cazumanana kuba mumanyongwe, mulimo wakukambauka zya Bwami uli mukuzyala micelo mu Sierra Leone.

Ipulogilamu Yamayake Manji mu South Africa

Lino kuyandika zyuulu zili mbozibede zya Maanda aa Bwami mucilawo cilanganyizigwaa ofesi lyamutabi lyaku South Africa. Myaanda-myaanda yamaandaaya akayakwa kale. Umwi wamu Kkomitii Yamutabi mukwesu John Kikot wakaamba kuti, “Muciindi cakuswaanganina muzidumba naa munsi aazisamu mbuli mbucakabede musule, ibakwesu lino balaswaangana mumasena mabotu alimwi akukkala muzyuuno zili kabotu. Nokuba kuti bunji bwa Maanda aa Bwami aaya ayakidwe munzila nguba-uba, pele alibonya kuba maanda aakondelezya mumasena oomo mwaabede. Mumasenaamwi kujanika kuti naa kwayakwa Ŋanda ya Bwami, mwaka utobela kuyoojanika kuti mweelwe wayungizigwa ziindi ziinda kuli zyobile.”

Izyalani Lipya lya Bakamboni mu Ukraine

Mumwaka wamulimo wa 2000, kwakali mweelwe waatala wabasikumwaya bali 112,720 mucisi eeci. Mweelwe wiinda ku 50,000 wabaaba bakaiya kasimpe mumyaka yosanwe buyo yainda. Sikweendelezya Kkomitii ya Mutabi mukwesu John Didur, wakaamba kuti, “Masimpe Jehova wabusya zyalani lipya alimwi lya Bakamboni bankutwe kuti baambilizye izina lyakwe!” Alimwi wakayungizya kuti, “Mumyaka yobile yainda twakaabila mamagazini aainda kutuulunzuma tuli 50, walo uuli ngomweelwe wabantu bamucisi eeci. Amwezi tulatambula mweelwe wakati-kati uusika kucuulu wamagwalo kuzwa kubantu bajisi luyandisisyo ibayanda makani aambi.”

Izibeela zya Pulogilamu Zimbi Zikondelezya

Mukwesu Daniel Sydlik, umwi wamu Kabunga Keendelezya wakakanana makani aakabanjila mumoyo. Icibalo cakuti “Ikabunga Keendelezya Mbokaindene a Kabunga Kamu Mulawo” icili mumagazini eeyi ciyeeme amakani aaya.

Mukwesu Theodore Jaracz umwi wamu Kabunga Keendelezya wakakanana makani aapa kukkala aansi kuyeeya alaamutwe wakuti, “Balangizi a Bakutausi Balabikkwa Munzila Yateokrasi.” Cibalo cimwi icili mumagazini eeyi ciyeme amakani aaya.

Alimwi muswaangano waamwaka wakabikkilizyaa makani aakulwaizya aajatikizya lugwalo lwamwaka wa 2001 aakakananwaa mukwesu David Splane umwi wamu Kabunga Keendelezya. Lugwalo olu lujanika kumajwi aa Paulo aakuti: “Mwiime nji, mutabi bateteete mukucita zyoonse nzyayanda Leza.” (Bakolose 4:12, Ci) Bakamboni ba Jehova nyika yoonse mbwiizulwa balikanzide kucita boobo mbobakambauka makani mabotu aa Bwami bwa Leza cakusyomeka munyika yoonse.—Matayo 24:14.

Bupanduluzi buyungizidwe