Balangizi Abakutausi Balabikkwa Munzila Yateokrasi
Balangizi Abakutausi Balabikkwa Munzila Yateokrasi
“Amujatisye, lwanu nobeni, abutanga boonse mbuumubika Muuya Uusalala kuti mube balinguzi bambubo.”—INCITO 20:28.
1, 2. Mbuti ibbuku lya Isaya 60:22 mbolili mukuzuzikizigwa sunu?
IKAINDI Jehova wakasinsima kuti kwakali kuzoocitika cintu cimwi cigambya kuciindi cakumamanino. Kwiinda mumusinsimi Isaya, kwakaambwa kuti: “Kakamu kaniini kayooba cuulu, abantu bace bayooba mukowa mupati. Mebo nde-Jehova njoofwambya makani aya kuciindi cao ceelede.”—Isaya 60:22.
2 Sena kuli bumboni bwakuti ibusinsimi obu buli mukuzuzikizigwa mumazubaano? Inzya nkobuli! Mumyaka yakuma 1870, kwakatalisigwa imbungano yomwe yabantu ba Jehova ku Allegheny mu Pennsylvania mucisi ca U.S.A. Kuzwa kumbungano eyo nsyoonto, makumi-makumi aazyuulu zyambungano zyatalisigwa alimwi zili mukuzumanana kuvwula nyika yoonse mbwiizulwa. Ituulunzuma twabasikwaambilizya Bwami—imukowa mupati lino uli mukuyanzanaa mbungano ziinda ku 91,000 mumasi aali 235 munyika yoonse mbwiizulwa. Cakutadooneka, eci cisinizya kuti Jehova uli mukufwambaanya kuyobololwa kwabakombi beni-beni “mapenzi mapati” alo aalaafwaafwi kapati naatana kutalika.—Matayo 24:21; Ciyubunuzyo 7:9-14.
3. Ino caamba nzi kubbapatizigwa ‘muzina lya Taata, lya Mwana alimwi alya muuya uusalala’?
3 Musyule lyakulyaaba beni kuli Jehova alimwi kweelanaa malailile aa Jesu, aabo ibabalilwa mutuulunzuma bakabbapatizigwa “muzina lya-Taata alya-Mwana alya-Muuya Uusalala.” (Matayo 28:19) Ikubbapatizigwa “muzina lya-Taata” caamba kuti aaba bantu ibalyaabide balazumina kuti Jehova ngo Wisi wabo wakujulu akuti Nguupa buumi alimwi balalibombya kubweendelezi bwakwe. Ikubbapatizigwa ‘muzina lya-Mwana’ caamba kuti balazumina kuti Jesu Kristo Ncecinunuzyo cabo, ngo Musololi alimwi ngo Mwami wabo. Alimwi baluuzi mulimo wamuuya uusalala wa Leza naa nguzu nzyabelesya mukweendelezya buumi bwabo. Eci citondezya kuti bakabbapatizigwa ‘amuzina lyamuuya uusalala.’
4. Mmunzila nzi balanda Banakristo mbobabikkwa?
4 Basikwiiya bapya, baba balanda ba Jehova Leza babikkidwe eelyo nobabbapatizigwa. Ino nguni uubabikka? Munzila imwi, imajwi aalembedwe ku 2 Ba-Korinto 3:5 alabeleka kuli mbabo aakuti: “Buzulizi bwesu [bwakuba balanda] buzwa kuli-Leza.” Kunyina bulemu bumbi mbobanga balombozya kunze lyakubikkwaa Jehova Leza lwakwe! Kuzwaa ciindi cakubbapatizigwa, balazumanana kuyaambele munzila yakumuuya kabali balanda ba “makani mabotu” kufwumbwa leelyo nobazumina bweendelezi bwamuuya wa Leza uusalala alimwi akuzumanana kutobela Jwi lyakwe.—Matayo 24:14; Incito 9:31.
Ikubikkwa Munzila Yateokrasi Kutali Kwiinda Mukusalwaa Bantu
5. Sena balangizi Banakristo abakutausi basalwaa bantu? Amupandulule.
5 Ibweendelezi bucitwaa balangizi beelela alimwi aboobo bwabakutausi bulayandika mukulanganya ziyandika zyakumuuya zyababelesi ibayungizigwa ciindi aciindi. (Bafilipi 1:1, Ci) Ino baalumi aba basimide munzila yakumuuya babikkwa buti? Tabusyi munzila mbuli zeezyo zibelesegwa mu Kristendomu. Mucikozyanyo, balangizi Banakristo tabasalwi aabantu pe, nkokuti kwiinda mukujana mavwooti manji kuzwa kuli basimbungano ibayanda kuti babe balangizi. Muciindi caboobo, balabikkwa munzila yateokrasi. Ino eco caamba nzi?
6. (a) Ino teokrasi yini-yini ninzi? (b) Nkaambo nzi ikubikkwa kwabalangizi alimwi abakutausi ncokuli kwamunzila yateokrasi?
6 Teokrasi yini-yini mbulelo bweendelezegwaa Leza. Bakamboni ba Jehova balalibombya cakulisungula kubweendelezi bwakwe alimwi babelekelaamwi ikutegwa bacite kuyanda kwa Leza. (Intembauzyo 143:10; Matayo 6:9, 10) Ikubikkwa kwabalangizi Banakristo, naa ibaalu alimwi abakutausi kulacitwa munzila yateokrasi akaambo kakuti ibweende bwakusala alimwi akubikka baalumi basimilimo abo kulacitwa kwiinda mububambe bwa Leza mbubwenya mbobubede mu Magwalo Aasalala. Alimwi mbwaanga ngo “simutwe waboonse,” Jehova ulijisi nguzu zyakubikka nzila oomo imbunga yakwe iilibonya mboyeelede kweendelezyegwa.—1 Makani 29:11; Intembauzyo 97:9.
7. Ino Bakamboni ba Jehova beendelezegwa buti?
7 Mukwiimpanaa zikombelo zya Kristendomu zinji, Bakamboni ba Jehova kunyina nobalisalila bweendelezi bwabukombi mbobatobela pe. Aaba Banakristo beni-beni balasoleka kukakatila kuzyeelelo zya Jehova. Balangizi akati kabo tababikkwi mubweendelezi ambungano naa akabunga kamwi kabweendelezi bwacikombelo. Ikuti zintu zimwi zyamunyika zyasola kunyonganya bubambe oobu, ibantu ba Jehova balakaka kuzitobela. Cakusinizya batobela cikozyanyo cakatondezyegwaa baapostolo mumwaanda wamyaka wakusaanguna nobakati: “Tuleelede kumvwa Leza kwiinda bantu.” (Incito 5:29) Aboobo, Bakamboni balalibombya kuli Leza muzintu zyoonse. (Ba-Hebrayo 12:9; Jakobo 4:7) Ikutobela bweendelezi bwateokrasi kulamukkomanisya Leza.
8. Nkwiindana nzi kuliko akati kakusala kucitwaa bantu alimwi akooko kucitwa munzila yateokrasi?
8 Mbotuli balanda bamweendelezi Wateokrasi Mupati, Jehova, tweelede kuzyiba kwiindana kuliko akati kanzila zyakusala kucitwaa bantu alimwi azeezyo zicitwa munzila yateokrasi. Inzila zyakusala zicitwaa bantu ziyanda kuti kakuli mweelwe wabantu weelene alimwi kanjikanji zilacitwa kwiinda mukucita cipeekani akusala kwiinda mukutobela cibeela cijisi mweelwe wabantu munji. Inzila zili boobo tazijatikizigwi pe mukubikkwa kucitwa munzila yateokrasi. Takucitwi aabantu pe; alimwi takuzwi kumbunga iizumizidwe amulawo iili yoonse. Kuboneka kuti Paulo wakali kwaamba zyakubikkwa kwakwe kwakacitwaa Jesu a Jehova kuti abe “apostolo wabamasi,” eelyo naakaambila bana Galatiya kuti kubikkwa kwakwe ‘teekwakazwa kubantu pe, ikuti taakabikkwa kumaanza aabantu, wakabikkwa kumaanza aa-Jesu Kristo akumaanza aa-Leza Wisi iwakamubusya kuzwa kubafwu.’—Ba-Roma 11:13; Ba-Galatiya 1:1.
Ikubikkwaa Muuya Uusalala
9. Ncinzi bbuku lya Incito 20:28 ncolyaamba kujatikizya kubikkwa kwabalangizi Banakristo?
9 Paulo wakayeezya balangizi ibakali ku Efeso ikuti bakabikkwaa Leza kwiinda mumuuya uusalala. Wakati: “Amujatisye, lwanu nobeni, abutanga boonse mbuumubika Muuya Uusalala kuti mube balinguzi bambubo, mulele mbungano ya-Mwami njakaula abulowa bakwe mwini.” (Incito 20:28) Aabo balangizi Banakristo bakali kuyandika kuzumanana kusololelwaa muuya uusalala mbobakali kweendelezya mikuli yabo kabali beembezi babutanga bwa Leza. Ikuti mwaalumi uubikkidwe wajanika kuti taceeleli kweelana azyeelelo zya Leza, muciindi imuuya uusalala wakali kuyoobeleka aalinguwe kumugusya acibaka ncajisi.
10. Mbuti muuya uusalala mboujisi mulimo mupati mukubikkwa kucitwa munzila yateokrasi?
10 Mbuti muuya uusalala mboubeleka mulimo mupati? Icakusaanguna, imakani aamba zyeelelo zyabweendelezi bwamunzila yakumuuya akasololelwaa muuya uusalala. Mumagwalo Paulo ngaakalembela ba Timoteo a Tito, wakandandamika zyeelelo zyeelede kuzuzikizigwaa balangizi alimwi abakutausi. Antoomwe wakabandauka zyeelelo zili 16. Mucikozyanyo, balangizi bakeelede kuba bantu batakwe kampenda, basitikide, balibatamika, batakwe kancimwa, bayobolola beenzu, bajisi maanu aakufundisya kabotu alimwi kabali basilutwe bamikwasyi bapa zikozyanyo zibotu. Tiibakeelede kuciindizya kunywa bukoko, naa kuba basimuyanda mali pele bakeelede kuba bantu balyeendelezya. Mbubwenya buyo, aabo ibabelekela kubikkwa kuba bakutausi beelede kutobela zyeelelo nzizyonya.—1 Timoteo 3:1-10, 12, 13; Tito 1:5-9.
11. Nzyeelelo zili buti zimwi izyeelede kuzuzikizigwaa baalumi ibabelekela kubaa mikuli yamumbungano?
11 Ikulanga-langa zyeelelo ezi kutondezya kuti aabo ibasololela mubukombi bwa Jehova beelede kupa cikozyanyo cibotu mubukkale bwa Bunakristo. Ibaalumi ibabelekela mikuli yamumbungano beelede kutondezya kuti muuya uusalala ulabeendelezya. (2 Timoteo 1:14) Ceelede kubonwa aantangalala kuti baalumi aba bali mukuzyala micelo yamuuya wa Leza mbuli “luyandano, lukondo, luumuno, busicamba, buuya, bubotu, lusyomo, lubombo, kulyeendele[zy]a.” (Ba-Galatiya 5:22, 23) Imicelo iili boobo yeelede kutondezyegwa mumicito yabo nobeendelezya basyominyina alimwi abantu bambi. Ee, bamwi balakonzya kabali kumbele kwiinda bamwi mukutondezya micelo imwi yamuuya, pele bambi abalo balakonzya kabali kumbele kutondezya zyeelelo zimbi zyabalangizi. Pele mubukkale bwabo boonse, aabo ibalangila kubikkwa kuba balangizi naa bakutausi beelede kutondezya kuti mbaalumi babikkila maanu kuzintu zyakumuuya, ibazuzikizya zyeelelo zya Jwi lya Leza.
12. Mbaani ibanga baambwa kuti bakabikkwaa muuya uusalala?
12 Paulo naakalailila bamwi kuti bamwiiye, wakacikonzya kwaamba boobo cakwaanguluka akaambo kakuti walo wakali kwiiya Jesu Kristo ooyo ‘wakatusiila cibonesyo kutegwa tutobele mumikondo yakwe.’ (1 Petro 2:21; 1 Ba-Korinto 11:1) Aboobo aabo ibazuzikizya zyeelelo zyamu Magwalo nobabikkwa kuba balangizi naa bakutausi inga baambwa kuti bakabikkwaa muuya uusalala.
13. Ino muuya ubagwasya buti aabo ibalanga-langa baalumi beelela kubeleka mumbungano?
13 Kuli lubazu lumbi lutondezya mboubeleka muuya uusalala mukusala akubikkwa kwabalangizi. Jesu wakaamba kuti ‘Taata uuli kujulu ulabapa muuya uusalala aabo ibamukumbila.’ (Luka 11:13) Aboobo ibaalu nobaswaangana mumbungano inyenzi kuti balange-lange baabo ibeelela kuyumuna mikuli mumbungano, balapaila kulomba kuti muuya wa Leza ubeendelezye. Ikusala kwabo inga kuyeeme aamakani aambwa mu Jwi lya Leza lyakasololelwaa muuya, alimwi muuya uusalala ulabagwasya kuzyiba naa muntu uulangwa-langwa kuti abikkwe ulazizuzikizya zyeelelo zyamu Magwalo. Aabo ibalanga-langa baabo ibeelela tabeelede kucita boobo munzila mbyaabi yakweendelezyegwaa ciwa camuntu, lwiiyo naa zintu nzyakonzya kucita. Icini ncobalanga ceelede kuyaamaa kuziba naa muntu oyo mmwaalumi uubikkila maanu kuzintu zyakumuuya, ooyo basimbungano ngobakonzya kusikila cakwaanguluka kutegwa abalaye munzila yakumuuya.
14. Ncinzi ncotwiiya mubbuku lya Incito 6:1-3?
14 Nokuba kuti tubunga twabaalu antoomwe abalangizi beendeenda balajatikizigwa mukusala bakwesu beelede kubeleka kabali baalu naa abakutausi, ikubikka kwini kulacitwa kweelanaa nzila yakabikkwa mumwaanda wamyaka wakusaanguna. Cimwi ciindi, kwakayandika kuti baalumi beelela munzila yakumuuya beendelezye mukuli umwi wakali kuyandika kapati. Kabunga keendeelezya kakapa busolozi oobu bwakuti: “Amusale akati kanu baalumi abali musanu mubabili, abali empuwo mbotu, [abazwide] Muuya Uusalala abusongo, mbotuti bike mumulimo oyo.” (Incito 6:1-3) Nokuba kuti baalumi ibakali kweendelezya makani aya mbebakasala, ikubikkwa kwakacitwaa baalumi bakajisi mukuli oyo ku Jerusalemu. Icilengwa cikozyenye aceeco ncecitobelwa sunu.
15. Mbuti Kabunga Keendelezya mbokajatikizidwe mumakani aakupa baalumi mikuli?
15 Kabunga Keendelezya ka Bakamboni ba Jehova nkakasala cakaanzambwene boonse bamu Makkomitii aa Mitabi. Nobalanga-langa baabo ibakonzya kuyumuna mukuli oyo mupati, ba Kabunga Keendelezya inga bayeeya kaambo ka Jesu kakuti: “Kufumbwa uupegwa kunjikunji kuyooitwa kunjikunji kulinguwe, ayooyo uubikilwa kunjikunji, kulinguwe balakumbila kwiindilila.” (Luka 12:48) Kunze lyakubikka baabo bamu Makkomitii aa Mitabi, ba Kabunga Keendelezya mbababikka baalu bamu Beteli alimwi abalangizi beendeenda. Nokuba boobo, batuma bakwesu basyomeka kubabelekela mulimo wakupa baalumi mikuli iimbi. Acalo eci cilaacikozyanyo camu Magwalo.
‘Sala, Mbubonya Mbundakakulailila’
16. Nkaambo nzi Paulo ncaakamusiila ku Krete Tito, alimwi ino eci citondezya nzi kujatikizya kubikkwa ikucitwa munzila yateokrasi mazubaano?
16 Paulo wakaambila mubelesinyina Tito kuti: “Nkakaambo ako ncendakakusiila mu-Krete, kuti umanizye kubamba oonse makani, akusala baalu muminzi yoonse, mbubonya mbundakakulailila.” (Tito 1:5) Mpoonya Paulo wakandandamika zyeelelo nzyaakali kuyoolanga-langa mubaalumi ibeelela kupegwa mikuli eyo. Aboobo, sunu iba Kabunga Keendelezya basala bakwesu beelela mumitabi ikubaiminina mukubikka baalu abakutausi. Kulabikkilwa maanu kapati ikubona kuti aabo ibaiminina ba Kabunga Keendelezya balaamvwisya akwaatobela malailile mukusala ooko. Aboobo kwiinda mubusolozi bwa Kabunga Keendelezya, ibaalumi beelela balabikkwa kuti babeleke mumbungano zya Bakamboni ba Jehova nyika yoonse mbwiizulwa.
17. Mbuti ikusala mukubikka balangizi abakutausi mbokweendelezyegwa abaku ofesi lyamutabi?
17 Eelyo mazina abaabo basalwa kuba balangizi alimwi abakutausi naatumwa kuofesi lyamutabi wa Watch Tower Society, ibaalumi bajisi luzibo basyoma bweendelezi bwamuuya wa Leza mukubikka ooko. Ibaalumi aba balimvwa kuti bajisi mukuli mupati, mbwaanga balizi kuti tabeelede kubikka maanza abo cakufwambaanaa muntu uli woonse, ikutegwa batajatikizigwi muzibi zyakwe.—1 Timoteo 5:22.
18, 19. (a) Mbuti ikubikkwa kwabamwi mbokucitwa? (b) Mbuti bweende boonse bwakusala akubikka mbokweendelezyegwa?
18 Ikubikkwa kwabamwi kulakonzya kucitwa kwiinda mulugwalo lujisi cidindo cakuofesi yambunga iizumizidwe amulawo. Ilugwalo olo lulakonzya kubelesegwa kubikka bakwesu bali mbobabede mumbungano.
19 Ikubikkwa kucitwa munzila yateokrasi kuzwa kuli Jehova kwiinda mu Mwanaakwe alimwi anzila njabelesya Leza, nkokuti “muzike musyomesi uucenjede” a Kabunga kakwe Keendelezya. (Matayo 24:45-47) Ibweende boonse bwakusala akubikka, bweendelezyegwaa muuya uusalala. Cili boobu akaambo kakuti izyeelelo zitobelwa nkozili mu Jwi lya Leza lyalo lyakasololelwaa muuya uusalala, alimwi imuntu uubikkwa ulatondezya kuti uzyala micelo yamuuya oyo. Aboobo ikubikkwa kweelede kubonwa kuti kucitwaa muuya uusalala. Mbubwenya balangizi abakutausi mbobakali kubikkwa munzila yateokrasi mumwaanda wamyaka wakusaanguna, asunu ncimwi buyo.
Ikulumba Busolozi bwa Jehova
20. Nkaambo nzi aswebo ncotuzuminizya makani akaamba Davida aali ku Intembauzyo 133:1?
20 Kuciindi ecino cakuyaambele munzila yakumuuya akuvwula kwamulimo wateokrasi mukukambauka Bwami, tulalumba kuti Jehova mwini nguubikka balangizi abakutausi. Ibubambe obu bwamu Magwalo bulagwasya mukuzumanana kutobela zyeelelo zya Leza zisumpukide zyabululami akati kesu to Bakamboni ba Jehova. Kunze lyaboobo, imuuya wa Bunakristo alimwi akusoleka kwabaalumi aba kulagwasya kapati kukubamba luumuno lwesu lutaliboteli alukamantano katuli balanda ba Jehova. Mbubwenya mbuli sintembauzyo Davida, tukulwaizigwa kukankamuka kuti: “Ncobeni ncintu cibotu cibotezya, na babunyina bakala kabotu antoomwe”!—Intembauzyo 133:1.
21. Mbuti ibbuku lya Isaya 60:17 mbolili mukuzuzikizigwa sunu?
21 Tulalumba kapati kaka kubusolozi bwa Jehova kwiinda mu Jwi lyakwe alimwi amuuya uusalala! Alimwi alaampindu ncobeni majwi aalembedwe kuli Isaya 60:17 aakuti: “Mucibaka camukuba njooleta ingolida, amucibaka cabutale njooleta insiliva; mucibaka cazisamu muzooba mukuba, amucibaka camabwe muzooba butale. Njoobika Luumuno lube simutwe wako, a-Bululami bube sikukubelesya.” Inzila zyateokrasi noziyaabubelesegwa kabotu bucebuce akati ka Bakamboni ba Jehova, twalibonena zilongezyo ziliko mumbunga ya Leza yoonse yaanyika.
22. Ino ncinzi ncotulumba lyoonse, alimwi ncinzi ncotweelede kukanza kucita?
22 Tulalumba kapati kujatikizya bubambe mbotujisi bwateokrasi. Alimwi tulalumba kapati kujatikizya mulimo muyumu pele uukkomanisya uucitwaa balangizi alimwi abakutausi ibakabikkwaa teokrasi. Camoyo woonse tulamutembaula Taateesu wakujulu siluyando walo watupa buvwubi munzila yakumuuya alimwi iwatulongezya kapati. (Tusimpi 10:22) Aboobo, atukanze kuzumanana kweendelaamwi ambunga ya Jehova. Kwiinda zyoonse, atuzumanane kubelekelaamwi calukamantano mukutembaula akupa bulemu kuzina lya Jehova lipati alimwi lisalala.
Ino Inga Mwaingula Buti?
• Nkaambo nzi ncotunga twaamba kuti ikubikkwa kwabalangizi abakutausi kulacitwa munzila yateokrasi ikutali yakusalwaa bantu?
• Mbuti baalumi Banakristo bajisi mikuli mbobabikkwaa muuya uusalala?
• Mbuti iba Kabunga Keendelezya mbobajatikizidwe mukubikka balangizi abakutausi?
• Nkaambo nzi ncotweelede kumulumba Jehova kujatikizya kubikkwa kucitwa munzila yateokrasi?
[Mibuzyo yaciiyo]
[Cifwanikiso icili apeeji 9]
Baalu abakutausi bajisi coolwe cakubeleka kwiinda mukubikkwaa teokrasi