Ikweendelaamwi Ambunga ya Jehova
Ikweendelaamwi Ambunga ya Jehova
“Leza waluumuno . . . amukondezye kuzintu zyoonse kuti mucite luyando lwakwe.”—BA-HEBRAYO 13:20, 21.
1. Ino bantu anyika bali bongaye, alimwi mbangaye babalilwa muzikombelo ziindene-indene?
MUMWAKA wa 1999, imweelwe wabantu anyika wakasika ku 6,000,000,000! Mumweelwe ooyu, ibbuku litegwa The World Almanac litwaambila kuti, ibali 1,165,000,000 mba Mozilemu; 1,030,000,000 mbaa Katolika; 762,000,000 mba Hindu; 354,000,000 mba Bbuda; 316,000,000 mba Protestanti; mpoonya ibali 214,000,000 mbacikombelo ca Orthodox.
2. Ncinzi cinga caambwa kujatikizya bukkale bwabukombi bwamazubaano?
2 Akaambo kakwiindana mumakani aabukombi alimwi amanyongwe aliko sunu, sena ituulunzuma twabantu aba bacita zintu kweelana aluyando lwa Leza? Peepe, akaambo kakuti “Leza tali Leza walupilingano pe, ngwaluumuno.” (1 Ba-Korinto 14:33) Kulubazu lumbi, ino mbuti kujatikizya bunyina bwamasi oonse bwabalanda ba Jehova? (1 Petro 2:17) Ikuvwuntauzya kwini-kwini kutondezya kuti ‘Leza waluumuno ulabakondezya kuzintu zyoonse kuti bacite luyando lwakwe.’—Ba-Hebrayo 13:20, 21.
3. Ncinzi cakacitika mu Jerusalemu lya Pentekoste wamu 33 C.E., alimwi ino nkaambo nzi?
3 Cilisalede kwaamba kuti imweelwe wabaabo bayanzanaa Bakamboni ba Jehova teensi ncecipimyo citondezya kuti balakkomaninwaa Leza; alimwi takuli kukomena kwamweelwe ikumukkomanisya. Tanaakasala bana Israyeli akaambo ‘kakuvwula kwabo’ kwiinda bantu boonse pe. Mubwini, mbebakali “bace” kwiinda misyobo yoonse. (Deuteronomo 7:7) Akaambo kakuti Israyeli tanaakasyomeka kuli Leza, lya Pentekoste wamu 33 C.E., Jehova wakatalika kukkomanina mbungano mpya yabasikutobela Jesu Kristo. Bakananikwaa muuya wa Jehova uusalala alimwi cabusungu bakaunka kabaya bukambaukila bambi kasimpe ka Leza alimwi a Kristo.—Incito 2:41, 42.
Kuya Kumbele Lyoonse
4. Nkaambo nzi ncomunga mwaamba kuti imbungano ya Banakristo bakusaanguna yakali kuya kumbele lyoonse?
4 Mumwaanda wamyaka wakusaanguna, mbungano ya Bunakristo yakali kuya kumbele lyoonse, yakatalisya zilawo zipya, yakagwasya bamwi kuba basikwiiya alimwi yakayaambele mukumvwisya makanze aa Leza. Banakristo bakusaanguna bakali kweendelaamwi amumuni wamuuya wakayubununwa kwiinda mumagwalo aakasololelwaa muuya wa Leza. Kwiinda mukukulwaizigwaa kuswaya kwabaapostolo abambi, bakaumanizya mulimo wabo woonse. Zyoonse ezi zilijisi bumboni mu Magwalo aa Bunakristo aa Cigiliki.—Incito 10:21, 22; 13:46, 47; 2 Timoteo 1:13; 4:5; Ba-Hebrayo 6:1-3; 2 Petro 3:17, 18.
5. Nkaambo nzi mbunga ya Leza ncoiyabuya ambele sunu, alimwi nkaambo nzi ncotweelede kweendelaamwi anjiyo?
5 Mbubwena buyo mbuli Banakristo bamumwaanda wamyaka wakusaanguna, Bakamboni ba Jehova bamazubaano bakatalika kabali buyo kakamu kasyoonto. (Zekariya 4:8-10) Kutalikila kumamanino aamwaanda wamyaka wa 19, kwali bumboni bulibonya bwakuti muuya wa Leza nguuyendelezya mbunga yakwe. Akaambo kakuti tusyoma mubweendelezi bwamuuya uusalala ikutali nguzu zyabantu, twazumanana ikuyaambele mukwaamvwisya kabotu Magwalo alimwi amukucita kuyanda kwa Leza. (Zekariya 4:6) Ono mbwaanga tuli “kumazuba aakumamanino,” kulayandika kapati ikweendelaamwi ambunga ya Leza iiyabweenda bucebuce kuya kumbele. (2 Timoteo 3:1-5) Kucita boobo kuyootugwasya kuzumanana katujisi bulangizi akutola lubazu kakunyina kujoka munsi mukukambauka Bwami bwa Leza bubikkidwe imamanino naatanakusikila bweende bwazintu oobu bubyaabi.—Matayo 24:3-14.
6, 7. Nimbazu nzi zyotatwe nzyotutiilange-lange oomo mbunga ya Jehova moyaya kumbele?
6 Akati kesu kuli baabo ibakatalika kuyanzanaa mbunga ya Jehova mumyaka yamuma 1920, 1930 alimwi amuma 1940. Mumyaka eeyo yakusaanguna, nguni akati kesu wakali kunga weezeezya ikuvwula kutaambiki alimwi akuyaambele kwambunga kusikila sunu? Amuyeeye buyo zintu zipati zyacitwa kumazubeesu aaya! Ncintu cikkomanisya kapati ikutelaikaa zintu Jehova nzyaazuzikizya kwiinda mubantu bakwe bakamantene ibeendelezyegwaa teokrasi.
7 Davida wansiku wakabotelwa kapati naakalanga alimwi akuzinzibala kuyeeya milimo ya Jehova mibotu. Wakati: “Na njanda kuzikanana nanka kuzyaamba, nzinji loko, tazibaliki.” (Intembauzyo 40:5) Andiswe mbubonya buyo tulaalilwa, tatukonzyi kupandulula zintu zinji alimwi zipati izilumbaizika Jehova nzyaacita kuciindi cesu. Nokuba boobo, atulange-lange mbazu zyotatwe mwalo mbunga ya Jehova moyayaambele: (1) kuyaambele mukumvwisya zintu zyakumuuya, (2) ikusumpuka akuyungizigwa kwamulimo alimwi (3) ikucinca kwaaciindi ceelede mubweende bwambunga.
Ikulumba Akaambo Kakumunikilwa Munzila Yakumuuya
8. Ncinzi kumunikilwa kwamuuya ncokwatugwasya kuziba kujatikizya Bwami kweelanaa bbuku lya Tusimpi 4:18?
8 Ikujatikizya kuyaambele kucitwa bucebuce mukumunikilwa munzila yakumuuya, ibbuku lya Tusimpi 4:18 lyazuzikizigwa ncobeni. Lyaamba kuti: “Inzila yabaluleme ili mbuli mumuni uumweka, uuya bungwengwemuka mane bwaca buzuba.” Tulalumba kapati kaka kumumuni wakumuuya ngotupegwa bucebuce! Bwami bwa Leza bwakakankaizigwa kumuswaangano iwakacitwa ku Cedar Point Ohio mu 1919. Jehova ubelesya Bwami ikusalazya zina lyakwe alimwi akusinizya bulelo bwakwe. Mubwini, ikumunikilwa munzila yakumuuya kwatugwasya kuziba kuti kuzwa mubbuku lya Matalikilo kusikila mubbuku lya Ciyubunuzyo, Ibbaibbele lipa bumboni kujatikizya makanze aa Jehova aakusalazya izina lyakwe kwiinda mu Bwami bweendelezyegwaa Mwanaakwe. Oomo momuli bulangizi boonse bwabaabo ibayanda bululami.—Matayo 12:18, 21.
9, 10. Ncinzi cakayiigwa kuma 1920 kujatikizya Bwami alimwi ambunga zyobile zikazyanya, alimwi ino eci cagwasya buti?
9 Kumuswaangano wakacitwa ku Cedar Point mu 1922, mumakani aakwe mapati J. F. Rutherford wakakulwaizya bantu ba Leza kuti “amwaambilizye, amwaambilizye, amwaambilizye Mwami abwami bwakwe.” Mucibalo cakamwaigwa mu Ngazi Yamulindizi yamu March 1, 1925 camutwe wakuti “Ikuzyalwa kwa Cisi,” cakabandika makani aakumvwisya munzila yakumuuya kujatikizya businsimi bwakali kwaamba zyakukkazikwa kwa Bwami bwa Leza mu 1914. Alimwi muma 1920 kwakazikuzibwa kuti kuli mbunga zyobile zikazyanya, iya Jehova aya Saatani. Inkondo eyo icizumanana akati kabo alimwi tuyooba kubbazu lwankamu iyoozunda lilikke buyotweendelaamwi ambunga ya Jehova.
10 Ino oolo luzibo luyungizidwe lwakumuuya lwatugwasya buti? Mbwaanga Bwami bwa Leza tabuli bwanyika eyi kubikkilizyaa Mwami Jesu Kristo, aswebo tatweelede kuba banyika ino pe. Kwiinda mukutatola lubazu muzyakucita zyanyika, tutondezya kuti tuli kulubazu lwakasimpe. (Johane 17:16; 18:37) Notubona mapenzi manji aaliko mubweende oobu bwazintu bubyaabi, tulalumba kaka ikuti tatuli lubazu lwambunga ya Saatani! Elyo tulaacoolwe cipati ikubaa luumuno munzila yakumuuya mumbunga ya Jehova!
11. Ndizina nzi lyamu Magwalo ndyobakazumina bantu ba Leza mu 1931?
11 Kumuswaangano wakacitilwa ku Columbus mu Ohio mu 1931, ibbuku lya Isaya 43:10-12 lyakabelesyegwa munzila yeelede. Basikwiiya Bbaibbele bakabweza zina libaandaanya lyakuti Bakamboni ba Jehova. Ncoolwe cipati kaka ncotujisi cakuzibya zina lya Leza kutegwa abamwi kabalilila kulindilyo kutegwa bakafwutuke!—Intembauzyo 83:18; Ba-Roma 10:13.
12. Nduzibo luli buti lwakumuuya kujatikizya inkamu impati ilwakapegwa mu 1935?
12 Bantu ba Leza banji kaitanasika myaka yakuma 1930 bakali kudooneka kujatikizya bulangizi bwabo bwabukkale bwakumbele. Ibamwi bakali kulombozya buumi bwakujulu pele bakazikkomanina njiisyo zyamu Bbaibbele zyaamba paradaiso anyika. Kumuswaangano wakacitilwa ku Washington, D. C., mu 1935 cakali kukondelezya kwiiya kuti, ibankamu impati ibaambwa ku Ciyubunuzyo caandaano ca 7 nimbunga yabaabo ibajisi bulangizi bwakuponaa nyika. Kuzwa leelyo, ikubunganya bankamu impati kwayaambele kapati. Sena tatulumbi kuti tacicili cintu cikatazya kulindiswe ikuteelela baabo ibankamu mpati? Ibwini bwakuti bantu banji bali mukuyoboloka kuzwa muzisi zyoonse amisyobo yoonse, bulatukulwaizya ikusungwaala mumulimo mbotuzumanana kweendelaamwi ambunga ya Jehova.
13. Mmakani nzi aayandika kapati aakabandikwa kumuswaangano wakacitilwa ku St. Louis mu 1941?
13 Imakani mapati bantu ngobayelede kubikkila maanu akakankaizigwa mu 1941 kumuswaangano wakacitilwa ku St. Louis mu Missouri. Mmakani aabweendelezi bwakujulu aansi. Aaya ngamakani aayelede kumanizyigwa cakufwambaana, alimwi buzuba bupati buyoosya bulafwambaana kusika kutegwa eco cicitike! Makani aambi aakalangwa-langwa mu 1941 akali kujatikizya kusyomeka, aatuzumizya kulisalila umwi aumwi wandiswe kulubazu nkotubede mumakani abweendelezi bwa Leza.
14. Ncinzi cakayiigwa kujatikizya basilutwe baambwa kuli Isaya 32:1, 2 kumuswaangano wamasi wakacitwa mu 1950?
14 Aamuswaangano wamasi wakacitilwa mu New York City mu 1950, basilutwe baambwa kuli Isaya 32:1, 2 bakapandululwa kabotu-kabotu. Cakali ciindi cikondelezya kapati eelyo Mukwesu Frederick Franz naakabandika makani aaya akupandulula kuti, aabo balangila kuyooba basilutwe munyika mpya bakali akati kesu. Kumuswaangano oyo alimwi ayakatobela, kwali mimuni yakusalazya makani aakumuuya munzila zinjaanji. (Intembauzyo 97:11) Tulalumba kapati kaka kuti inzila yesu “ili mbuli mumuni uumweka, uuya bungwengwemuka mane bwaca buzuba”!
Ikuya Kumbele Mumulimo Wesu
15, 16. (a) Mbuti mbotwakaya kumbele mumulimo wesu mumyaka yakuma 1920 akuma 1930? (b) Mmabbuku nzi aautola ambele mulimo wa Bunakristo mumakumi aamyaka aalino-lino?
15 Inzila yabili mwalo mbunga ya Jehova moyayaambele ijatikizya mulimo wesu mupati wakukambauka Bwami alimwi akugwasya bantu kuba basikwiiya. (Matayo 28:19, 20; Marko 13:10) Kutegwa tuucite kabotu mulimo ooyu, imbunga ilatukulwaizya lyoonse akututondezya mbokuyandika kubikkila maanu kukuyungizya mulimo wesu. Mumwaka wa 1922, Banakristo boonse bakakulwaizigwa kutola lubazu mumulimo wakukambauka. Cakali kuli umwi aumwi ikumwesya mumuni wakwe kwiinda mukutola lubazu mukukambauka makani aakasimpe. (Matayo 5:14-16) Mu 1927, kwakacitwa bubambe bwakuti buzuba bwamu Nsondo bube buzuba bwaalubazu bwakucita mulimo wamumuunda. Kutalikila mu February 1940, tiicakali kugambya ikubona Bakamboni mumigwagwa yamuzilawo mucitilwa makwebo kabaabila mamagazini aa Ngazi Yamulindizi alimwi a Consolation (yalo sunu yiitwa kuti Awake!).
16 Mu 1937 kwakazwa kabbuku kategwa Model Study ikakankaizya mbokuyandika kubaa nyendo zyakupilukila ikutegwa bantu bayiisigwe kasimpe kamu Bbaibbele. Mumyaka yakaccilila, mulimo wakucitya ziiyo zya Bbaibbele wakakankaizigwa kapati. Cibeela eci camulimo cakakankaizigwa kuzwa leelyo nokwakazwa bbuku lyakuti “Let God Be True” mu 1946 alimwi abbuku lya The Truth That Leads to Eternal Life mu 1968. Lino tubelesya bbuku lyakuti Luzibo Lutola Kubuumi Butamani. Ikwiiya makani aali mubbuku eeli kupa ntalisyo njumu yamu Magwalo mukugwasya bamwi kuba basikwiiya.
Ikuya Kumbele Mukubambulula Bweende Bwambunga
17. Mbuti mbunga ya Jehova mboyaya kumbele kweelanaa zilembedwe kuli Isaya 60:17?
17 Inzila yatatu, imbunga ya Jehova moyaya kumbele ijatikizya kubambulula bweende bwambunga. Ikweelanaa bbuku lya Isaya 60:17, Jehova wakasyomezya kuti: “Mucibaka camukuba njooleta ingolida, amucibaka cabutale njooleta insiliva; mucibaka cazisamu muzooba mukuba, amucibaka camabwe muzooba butale. Njoobika Luumuno lube simutwe wako, a-Bululami bube sikukubelesya.” Kweelanaa businsimi oobu, kwacitwa bubambe bwakuuyendelezya kabotu mulimo alimwi akweembela butanga munzila iili kabotu.
18, 19. Nkubambulula kuli buti kwamubweende bwambunga ikwacitwa mumyaka yainda?
18 Mumwaka wa 1919 kwakasalwa sikweendelezya mulimo mumbungano imwi aimwi yakalibambilide kunoocita mulimo wamumuunda. Bubambe oobu bwakapa kuti mulimo wamumuunda uyaambele. Ibubambe bwakusala baalu alimwi abamadikoni bamumbungano kwiinda mukuvwoota kwakalekwa mu 1932, aaya ngaakali matalikilo aakuleka kubelesya nzila zyakusala kucitwaa bantu kwamavwooti. Kwakali lusumpuko lumbi lupati lwakacitwa mu 1938 eelyo babelesi boonse bamumbungano nobakatalika kunoobikkwa kwiinda mukutobelesya bubambe bwakubikka bweendelezyegwaa teokrasi bwakali kucitwaa Banakristo bamumbungano yakusaanguna. (Incito 14:23; 1 Timoteo 4:14) Mu 1972, ikubikkwa kwabalangizi alimwi abakutausi kwakeendelezyegwa kweelanaa mbokwakali kucitwa akati ka Banakristo bakusaanguna. Muciindi cakulekela muntu omwe buyo kuba mulangizi wambungano, lugwalo lwa Ba-Filipi 1:1 alimwi amagwalo aambi atondezya kuti aabo ibazuzikizya zyeelelo zyamu Magwalo ziyandika kubalangizi bakali kunooli kabunga kabaalu buya.—Incito 20:28; Ba-Efeso 4:11, 12.
19 Mpoonya mu 1975, ibubambe bwakacitwa bwakuti makkomitii a Kabunga Keendelezya ka Bakamboni ba Jehova kaayendelezya milimo yanyika yoonse yambunga ya Leza. Imakkomitii aa Mutabi akabikkwa kutegwa kaayendelezya mulimo wamuzilawo mwaabede. Kuzwa leelyo, kwali bubambe bwakuubya-ubya mulimo kumaofesi mapati alimwi aamitabi kutegwa ‘kusalwe zintu ziyandika kapati.’ (Bafilipi 1:9, 10, Ci) Imikuli njobajisi beembezi ba Kristo baniini tiili yakusololela buyo mumulimo wabukambausi pele ilabikkilizyaa kuyiisya kabotu mumbungano alimwi akweembela kabotu butanga bwa Leza.—1 Timoteo 4:16; Ba-Hebrayo 13:7, 17; 1 Petro 5:2, 3.
Ibusolozi bwa Jesu Bwabunkutwe
20. Ikweendelaamwi ambunga ya Jehova kuyanda kuti tuzibe nzi kujatikizya mulimo wa Jesu?
20 Ikweendelaamwi ambunga ya Jehova iiyaabuya kumbele bucebuce ciyanda kuziba mulimo Jesu Kristo ngwapedwe kuli Leza kali “mutwe wambungano.” (Ba-Efeso 5:22, 23) Icimbi ciyandika kubikkila maanu nceeco cilembedwe kuli Isaya 55:4, nkotwaambilwa kuti: “Ngonguwe [mebo nde Jehova] ngundabika kuti abe kamboni kumisyobo yabantu, musolozi asilutwe kubantu.” Masimpe, Jesu ulizi mbokweendelezyegwa. Alimwi ulizizi mbelele zyakwe alimwi azintu nzyoziyandika. Mubwini, eelyo naakali kulingula mbungano zili ciloba mu Asia Minor, iziindi zyosanwe wakati: “Ndizi milimo yako mbwiibede.” (Ciyubunuzyo 2:2, 19; 3:1, 8, 15) Alimwi Jesu ulizizi nzyotuyandika mbuli mbwazizi Wisi, Jehova. Katanaamba mupailo wacikozyanyo, Jesu wakati: “Usowanu ulizi zintu nzimubula kamutana kumubuzya.”—Matayo 6:8-13.
21. Mbuti busolozi bwa Jesu mbobutondezyegwa mumbungano ya Bunakristo?
21 Ino busolozi bwa Jesu butondezyegwa buti? Inzila imwi nkwiinda mubalangizi Banakristo, “zipego kubantu.” (Baefeso 4:8, Ci) Ibbuku lya Ciyubunuzyo 1:16 litondezya kuti balangizi bananike bali mukwaanza kwakwe kwakululyo, kabeendelezyegwa anguwe. Sunu, Jesu ulabusololela bubambe bwabaalu kunyina makani naa bajisi bulangizi bwabuumi bwakujulu naa bwaanyika. Mbubwenya mbokwapandululwa mucibalo camusyule, babikkwaa muuya uusalala kweelanaa zyeelelo zyamu Magwalo. (1 Timoteo 3:1-7; Tito 1:5-9) Mumwaanda wamyaka wakusaanguna, ikabunga kabaalumi basimide kakabambwa ku Jerusalemu ikuti kabe kabunga keendelezya kalo kakali kweendelezya mbungano alimwi amulimo wakukambauka Bwami. Eci cikozyanyo ncecitobelwaa sunu mumbunga ya Jehova.
Amweendelaamwi!
22. Ndugwasyo nzi ndobapa iba Kabunga Keendelezya?
22 Izintu zyoonse zya Bwami anyika zyapegwa “[ku]muzike musyomesi uucenjede” walo wiimininwaa bamu Kabunga Keendelezya ka Bakamboni ba Jehova. (Matayo 24:45-47) Ibamu Kabunga Keendelezya babikkilide maanu ikapati kukwaabila malailile aakumuuya abusolozi kumbungano ya Bunakristo. (Incito 6:1-6) Pele eelyo bakwesu nobacitikilwa ntenda ziletwaa zilengwaleza, iba Kabunga Keendelezya balailila mbunga yamumulawo yomwe naa kwiindaawo kuti zibagwasye alimwi akubayakulwida maandaabo naa Maandaa Bwami aakanyonyooka. Ikuti Banakristo bamwi balatundululwa naa kupenzegwa, bubambe bwakubakulwaizya munzila yakumuuya bulacitwa. Alimwi ‘muciindi citeelede,’ kusola-sola ikuyandika koonse kulacitwa kutegwa mulimo wakukambauka uzumanane kuya kumbele.—2 Timoteo 4:1, 2.
23, 24. Ncinzi Jehova ncabaabila lyoonse bantu bakwe kunyina makani amapenzi aabacitikila, alimwi ino tweelede kubaa makanze nzi?
23 Kufwumbwa mubukkale mobabede bantu bakwe, Jehova lyoonse ulabaabila cakulya cakumuuya alimwi abusolozi buyandika. Leza alimwi ulabapa busongo alimwi aluzibo bakwesu beendelezya kuti balibambile kuyaambele kulangilwa kucitwa alimwi akucinca kucitwa mumbunga yateokrasi. (Deuteronomo 34:9; Ba-Efeso 1:16, 17) Ziyume zibe buti, Jehova ulatupa zintu zyoonse nzyotuyandika ikutegwa tuzuzikizye mulimo wesu ngotutumidwe wakugwasya bamwi kuba basikwiiya akuumanizya nyika yoonse mbwiizulwa.—2 Timoteo 4:5.
24 Tulijisi lusyomo luyumu lwakuti Jehova takooyoobasiya bantu bakwe basyomeka; uyoobavwuna “kumapenzi ayo mapati” aalangilwa. (Ciyubunuzyo 7:9-14; Intembauzyo 94:14; 2 Petro 2:9) Tulijisi twaambo tunji ncotweelede kuzumanana kulujatisya lusyomo ndotwakatondezya kumatalikilo mane do kumagolelo. (Ba-Hebrayo 3:14) Aboobo atuzumanane amakanzeesu aakweendelaamwi ambunga ya Jehova lyoonse.
Ino Inga Mwaingula Buti?
• Nkaambo nzi ncotunga twaamba kuti imbunga ya Jehova yazumanana kuya kumbele?
• Mbumboni nzi buliko bwakuti bantu ba Jehova balapegwa luzibo luyungizidwe bucebuce munzila yakumuuya?
• Mbuti mbokwaba kuyaambele mumulimo wa Bunakristo?
• Nkubambulula kuli buti kwaaciindi ceelede ikwacitwa mubweende bwambunga akati kababelesi ba Jehova?
[Mibuzyo yaciiyo]
[Cifwanikiso icili apeeji 11]
Mbubwenya mbuli Davida, tatukonzyi kwiibandauka milimo mibotu yoonse ya Jehova
[Cifwanikiso icili apeeji 12]
Butanga bwa Leza bwagwasigwaa kubambululwa kwabweende bwambunga ikucitwaa ciindi ceelede