Kwaambilizya Kwaalubazu

KUMAMANINO aamuswaangano waamwaka wa Watch Tower Bible and Tract Society of Pennsylvania mu October 7, 2000, ikwaambilizya kwaalubazu kwakacitwaa sicuuno, imukwesu John E. Barr umwi wamu Kabunga Keendelezya. Kwaambilizya ooku kwakayeeme aamakani aamusule aakakananwa mukwesu Theodore Jaracz alimwi a Daniel Sydlik.—Amubone mapeeji 12-16 alimwi a 28-31 mumagazini eeyi.

Mukwesu Barr Wakakaamba kaambo kayandika kapati, eelyo naakati: “‘Muzike musyomesi uucenjede’ alimwi a Kabunga kakwe Keendelezya bajisi milimo mipati yakucita kwiinda yeeyo yapedwe mbunga zizibidwe mumulawo. Imilimo iilembedwe yambunga imwi aimwi yazeezi taali makani mapati pe. Nokuba boobo, Simaleleesu Jesu Kristo wakabikka ciinga camuzike musyomesi kuti cilanganye ‘zintu zyoonse nzyajisi’ naa makani aajatikizya Bwami aano anyika.”—Matayo 24:45-47.

Kujatikizya mbunga yaku Pennsylvania, Mukwesu Barr wakayungizya kuti: “Kuzwa ciindi noyakatalisigwa mu 1884, imbunga ya Watch Tower Bible and Tract Society of Pennsylvania yagwasya kapati mumakani aatujatikizya kusikila sunu. Nokuba boobo, nimbunga buyo iibelesyegwaa ‘muzike musyomesi uucenjede’ nokwayandika.”

Mumakani aabo, Mukwesu Sydlik alimwi a Jaracz bakapandulula kuti, nokuba kuti “muzike musyomesi uucenjede” wakapegwa mukuli wakulanganya zintu zyoonse zya Mwami izili anyika, eeco tacilesyi ciinga camuzike ikuzumizya baalumi beelela iba “mbelele zimwi” kuti balanganye mikuli imwi yabweendelezi iitali yakuyiisya. (John 10:16) Alimwi kwiina kaambo kamu Magwalo katondezya kuti boonse naa bamwi akati kabeendelezi ibali mumbunga zyamumulawo izibelesyegwaa Bakamboni ba Jehova beelede kuti kabali Banakristo bananike.

Mukwesu Barr wakaambila baswiilizi kuti ino-ino , bamwi bamu Kabunga Keendelezya ka Bakamboni ba Jehova ibakali beendelezi mumilimo alimwi ababelesi, cakuliyandila bakaleka kucita obo, bakasiila mikuli njobakajisi mutubunga twabeendelezi tuli mumbunga zyoonse zibelesyegwaa “muzike musyomesi uucenjede” ku United States. Ibakwesu basyomeka ibaciinga cambelele zimwi bakasalwa kutegwa bakkale mumasena aaya.

Ikusala ooku kulagwasya kapati. Eeci cipa kuti iba Kabunga Keendelezya bajane ciindi cakubamba cakulya alimwi akulanganya zintu zyakumuuya ziyandika kubunyina bwanyika yoonse mbwiizulwa.

Mukumaniizya, sicuuno wakaambila baswiilizi bakwe ibakakkomene kapati kuti: “Nokuba kuti mikuli minji iijatikizya milawo abweendelezi zyapegwa kubalangizi bajisi luzibo, . . . boonse buyo balabeleka kwiinda mubusolozi bwamuuya bwa Kabunga Keendelezya. . . . Toonse buyo tulapaila akusyoma Jehova kuti ulatulongezya eelyo notusola kucita kuyanda kwakwe kubulemu alimwi akukusalazigwa kwazina lyakwe lilemu.”