Sena Buumi Bwanu Bweendelezyegwaa Kasimpe Lyoonse?

“Amusanduke kukucitululwa kwamyoyo yanu, kuti mukasimpikile makani ngaayanda Leza, makani mabotu aatambulika aalondokede.”—BA-ROMA 12:2.

1, 2. Nkaambo nzi ncocili ciyumu kuba Munakristo wini-wini mazubaano?

NCIYUMU kapati kuba Munakristo wini-wini mumazubaano aakumamanino—“[aa]ziindi zikataazya.” (2 Timoteo 3:1) Masimpe, umwi aumwi uuyanda kutobela cikozyanyo ca Kristo weelede kwiizunda nyika. (1 Johane 5:4) Amuyeeye ncaakaamba Jesu kujatikizya nzila ya Bunakristo naakati: “Amunjile mumulyango uumanikide, nkaambo mulyango uukwazeme anzila impati njiitola kukunyonyooka, nkabela abo banjila mulinjiyo mbanjibanji. Mulyango uumanikide anzila iipatide njiitola kubuumi, nkabela abo biijana mbace.” Alimwi wakati: “Ikuti kakuli muntu uuyanda kunditobela, aliimye akubweza cisamu cakwe cakupenzezya abuzuba akunditobela lyoonse, NW.”—Matayo 7:13, 14; Luka 9:23.

² Amana buyo kujana nzila iipatide iisololela kubuumi, icintu citobela ncayelede kukakatila kucita Munakristo nkuzumanana munzila eyo. Ino nkaambo nzi ncocikatazya kucita boobo? Nkaambo kakuti ikulyaaba akubbapatizigwa nkutwakacita kupa kuti Saatani agamike meeneeno naa bucenjezu bwakwe alindiswe. (Ba-Efeso 6:11) Ulakubona kukompama nkotujisi alimwi usola kunjilila mpawo ikutegwa atunyonganye munzila yakumuuya. Mbwaanga wakasola kumuwisya Jesu, tatukonzyi kulangila kuti inga watuleka buyo swebo.—Matayo 4:1-11.

Nzila zya Saatani Zyabucenjezu

3. Mbuti Saatani mbwaakabikka kudooneka mumizeezo ya Eva?

³ Inzila yabucenjezu imwi njabelesya Saatani njakutupa kudooneka mumizeezo. Ulanga-langa kukompama kuliko muzilwanyo zyesu zyakumuuya. Wakaibelesya nzila eyo yabucenjezu kumatalikilo kuli Eva naakati: “Sa ncobeni Leza wakaamba kuti, Tamweelede kulya misamu yoonse yamumuunda?” (Matalikilo 3:1) Icini ncaakali kwaamba Saatani ncakuti, ‘Sena ncobeni cilakonzyeka kuti Leza inga wamukasya boobo buya? Ino inga wamukasya buti kucintu cibotu kapati? Haaye, Leza ulizyi kuti mubuzuba mbomuyoolya kumusamu, imeso aanu ayoojaluka alimwi muyooba mbuli Leza, muyooziba bubotu abubi mbobubede!’ Aboobo Saatani wakabikka kudooneka mumizeezo ya Eva, cakaba mbuli kuti wakabyala mbuto.—Matalikilo 3:5.

4. Nkudooneka kuli buti kunga kwanyonganya bamwi sunu?

⁴ Ino sunu Saatani wiibelesya buti nzila eyi yabucenjezu? Ikuti twaleka kubikkila maanu kukubala Bbaibbele, kuciiyo cesu tobeni, kumipailo yesu, kumulimo wesu wa Bunakristo alimwi akumiswaangano, tulakonzya kutalika kudooneka akaambo kabamwi. Mucikozyanyo: “Ino tuzyi buti kuti aka nkasimpe mbubwenya mbwaakakayiisya Jesu?” “Sena ncobeni aano mazubaa kumamanino? Kayi lino tuli kale mumwaanda wamyaka wa 21.” “Sena nkondo ya Harmagedoni ilaafwaafwi naa icili kule kapati?” Ikuti twatalika kudooneka boobo, ncinzi ncotweelede kucita kutegwa tukumane kuyeeya oku?

5, 6. Ncinzi ncotweelede kucita ikuti naa twatalika kudooneka?

⁵ Jakobo wakapa lulayo lugwasya naakalemba kuti: “Na nkwali akati kanu uubula busongo, akumbile kuli-Leza, uubaabila boonse cabuuya acakutatongauka, nkabela ulabupegwa. Pele akumbile cakusyoma, atalimbululi akaniini, nkaambo uulimbulula ulikozyene amankwisita aalwizi aaululuka  akutontwa amuuwo. Muntu uuli boobo atayeeyi kupegwa cintu ku-Mwami, pe, nkaambo ulijisi myoyo yobile, ulapilauka mukweenda kwakwe koonse.”—Jakobo 1:5-8.

⁶ Aboobo, ino ncinzi ncotweelede kucita? Tweelede kuzumanana ‘kukumbila kuli-Leza’ mumupailo kuti tube alusyomo luyumu akumvwisya alimwi akusungwaala kucita ciiyo cesu tobeni kujatikizya mibuzyo naa kudooneka kuli koonse. Alimwi tulakonzya kulomba lugwasyo kuli baabo bayumu mulusyomo, kakunyina kudooneka kuti Jehova uyootupa lugwasyo ndotuyandika. Alimwi Jakobo wakati: “Amulibombye kuli-Leza. Amumukazye Saatani, uyoomucija. Amuswenenene kuli-Leza, elyo alakwe ulamuswenenena.” Inzya, kudooneka nkotujisi kuyoomana twanooswenenena kuli Leza kwiinda muciiyo cesu tobeni alimwi amumupailo.—Jakobo 4:7, 8.

7, 8. Ninzila zili buti zikonzya kutugwasya kuziba bukombi mbwaakayiisya Jesu, alimwi ino mbaani ibazizuzikizya nzila ezi?

⁷ Mucikozyanyo, amulange-lange mubuzyo wakuti: Ino tuzyi buti kuti tutobela bukombi mbwaakayiisya Jesu? Ninzila ili buti njotweelede kulanga-langa ikutegwa tujane bwiinguzi bwaceeci? Ibbaibbele litondezya kuti Banakristo beni-beni beelede kubaa luyando lwini-lwini akati kabo. (Johane 13:34, 35) Beelede kusalazya zina lya Leza lya Jehova. (Isaya 12:4, 5; Matayo 6:9) Alimwi beelede kulizibya izina elyo.—Kulonga 3:15; Johane 17:26.

⁸ Icizibyo cimbi cabukombi bwini-bwini mbulemu ku Jwi lya Leza, Ibbaibbele. Ndibbuku lilibedelede iliyubununa bube bwa Leza amakanzaakwe. (Johane 17:17; 2 Timoteo 3:16, 17) Kunze lyaboobo, Banakristo beni-beni baambilizya Bwami bwa Leza kuti mbobulangizi bulikke bantu mobayoobaa buumi butamani muparadaiso anyika. (Marko 13:10; Ciyubunuzyo 21:1-4) Balalyaandaanya kutwaambo twacisi twanyika eyi mbyaabi alimwi abukkale bwanjiyo busofwaazya. (Johane 15:19; Jakobo 1:27; 4:4) Mbaani ibazizuzikizya nzila ezi zyoonse sunu? Masimpe atondezya kuti kuli bwiinguzi bomwe buyo—Mbaakamboni ba Jehova.

Ino Mbuti Kuti Kudooneka Kwazumanana?

9, 10. Ncinzi ncotukonzya kucita kutegwa tukuzunde kudooneka kuzumanana?

⁹ Ino mbuti naa twabona kuti tuli mukuzundwaa kudooneka? Ncinzi ncotweelede kucita? Mwami musongo Solomoni upa bwiinguzi bwakuti: “Mwanaangu, na watambula majwi aangu, akubamba kabotu malailile aangu, na wacenjeka kutwi kwako kubusongo, akubika moyo wako kukumvwisya makani, na walilila kumvwa, akoongolola kuti ube amaanu, na wabuyandaula mbuli insiliva, akubulangaula mbuli zintu ziyandika zisisidwe, ncobeni uyoomvwa kuyoowa Jehova, akujana luzibo lwa-Leza.”—Tusimpi 2:1-5.

¹⁰ Sena tauli muzeezo uugambya oyo? Ikuti katulisungwide kubikkila maanu kapati kubusongo  bwa Leza, ‘tuyoolujana luzibo lwa-Leza.’ Inzya, iluzibo lwa Mwami Mupati wakujulu aanyika tulakonzya kulujana ikuti katulisungwide kuzitambula akuzikkomanina nzyaamba. Eco caamba kupaila kuli Jehova lyoonse alimwi akubaa ciiyo cesu tobeni. Izintu ziyandisi zisisidwe mu Jwi lyakwe zilakonzya kumanizya kudooneka kuli koonse nkotujisi kwiinda mukumunikilwaa kasimpe.

11. Ino kudooneka kwakamunyonganya buti sikukutaukila Elisha?

¹¹ Icikozyanyo cibotu icitondezya mupailo mbowakagwasya mubelesi wa Leza mukandu alimwi uudooneka, cilajanika ku 2 Bami 6:11-18. Sikukutaukila Elisha tanaakali kuziteelela kabotu zintu munzila yakumuuya. Wakakakilwa kubona kuti makamu aakujulu akaliko munsi kuti agwasilizye musinsimi wa Leza walo wakali kulwanwa ampi yaba Aramu. Kayoowede kapati, sikumukutaukila oyo wakoongolola ulaamba: “Maawe, simalelo wangu! Tucite buti?” Ino Elisha wakaingula buti? “Utayoowi pe, nkaambo abo mbetuli abo mbanji kwiinda mbabo.” Pele ino sikumukutaukila wakali kunoosyoma buti? Kunyina naakali kukonzya kwaabona makamu aabaangelo bakujulu.

12. (a) Ino kudooneka kwasikukutauka kwakamanizigwa buti? (b) Mbuti mbotunga twamanizya kudooneka kuli koonse nkotukonzya kubaankuko?

¹² “Mpawo Elisha wakakomba kuti, O Jehova, kovumbulula meso aakwe, kuti abone. Nkabela Jehova wakavumbulula meso aamulanda, elyo wakabona kuti cilundu cakalizwiide mabbiza ankalaki zyamulilo zizyungulukide Elisha.” Munzila eyo Jehova wakapa kuti sikukutauka abone makamu aakujulu aabaangelo aakali kumukwabilila Elisha. Oolo taluli ndolugwasyo lwa Leza ndotweelede kulangila pe. Kamuyeeya kuti, ooyo sikukutaukila musinsimi tanaakajisi Bbaibbele lyoonse pe kutegwa aiye alimwi akuyumya lusyomo lwakwe. Swebo tulijisi Bbaibbele lyoonse. Ikuti twalibelesya kabotu, mbubwenya buyo lusyomo lwesu aswebo lulakonzya kuyumizigwa. Mucikozyanyo, tulakonzya kuyeeya cakuzinzibala aazibalo zili mbozibede izipandulula Jehova kali munkuta yakwe kujulu. Eezi zimana kudooneka kuli koonse nkotujisi kuti Jehova ulaambunga yakujulu iigwasilizya babelesi bakwe mumulimo wakuyiisya uucitwa nyika yoonse mbwiizulwa sunu.—Isaya 6:1-4; Ezekieli 1:4-28; Daniele 7:9, 10; Ciyubunuzyo 4:1-11; 14:6, 7.

Amwaacenjelele Meeneeno aa Saatani!

13. Ino Saatani ubelesya nzila nzi nasoleka kuubya-ubya kukakatila kwesu nkotujisi kukasimpe?

¹³ Ninzila zili buti izimbi nzyabelesya Saatani kututyompya munzila yakumuuya alimwi akukakatila kwesu kukasimpe? Imwi yanzila eezi mbwaamu ibutondezyegwa mumbazu ziindene-indene.  Munyika yasunu bantu mobabikkila maanu kapati kukoonana, eco caambwa kuti cisyamwali (ibbala lyuuba-uba libelesegwa kwaamba kutasyomeka mucikwati) naa koonana kucitwa buyo busiku bomwe (bwaamu bucitwa cakutabaa makani) zyaba zintu zicitikaa buzuba muzyalani lyabantu babikkila maanu kapati aakulikondelezya kabanyina makani azintu zibyaabi zijanwa mukucita boobo. Zipekupeku, TV alimwi amavidiyo zisumpula bukkale buli boobu. Zifwanikiso zyabwaamu zilizwide mumasena manji, ikapati aa Internet. Aabo ibalangilila zintu zili boobu akaambo kakuyandisisya kuziba mbozibede balatepaulwa.—1 Ba-Tesalonika 4:3-5; Jakobo 1:13-15.

14. Nkaambo nzi Banakristo bamwi ncobazundwaa meeneeno aa Saatani?

¹⁴ Banakristo bamwi balekela kuzundwa alimwi akusofwaazyigwa mumizeezo amumyoyo yabo kwiinda mukuyandisisya kulangilila zifwanikiso zyabwaamu zitondwa. Balilekela kuwida mukooye ka Saatani koongelezya. Kanjikanji ikucita boobo kwasololela kukunyonganisigwa munzila yakumuuya. Aabo bali boobo bakakilwa kuzumanana kabali ‘mbuli bacece kumakani aabubi.’ Kunyina nobaba ‘bazonokede kumakani aabusongo.’ (1 Ba-Korinto 14:20) Mwakaa mwaka, izyuulu-zyuulu zinjila mumapenzi aaletwa akaambo kakukakilwa kutobela njiisyo azyeelelo zya Jwi lya Leza. Tiibabikkila maanu kukusama alimwi akuzumananaa “zilwanyo zyoonse zya-Leza.”—Ba-Efeso 6:10-13; Ba-Kolose 3:5-10; 1 Timoteo 1:18, 19.

Atuzibikkile Maanu Nzyotujisi

15. Nkaambo nzi ncocinga cabayumina bamwi ikulumba lukono lwabo lwakumuuya?

¹⁵ Jesu wakati: “Muyooziba bwini, abwalo bwini buyoomunununa.” (Johane 8:32) Ibunji bwa Bakamboni bakaleka bukkale bwabo bwakaindi alimwi akuyanzanaa zikombelo. Aboobo, aabo ibakacita obo tabajisi buyumuyumu mukumvwisya zijatikizidwe mulwaanguluko luletwaa kasimpe. Kulubazu lumbi, cilakonzya kubayumina kulubikkila maanu lukono lwabo lwakumuuya ibakubusi bamwi ibakakomezyegwaa bazyali bali mukasimpe. Kunyina nobakali cibeela cabukombi bwakubeja naa kujatikizigwaa nyika eyi iibikkila maanu mukulikondelezya, kubelesya misamu iikola alimwi akutalilemeka kuli mumo. Aboobo, cilakonzya kubaalila kubona kwiimpana kupati kuliko akati kaparadaiso wesu wakumuuya alimwi anyika ya Saatani iisofweede. Ibamwi balakonzya mane kulilekela kucita cibi ikutegwa balabile musamu wanyika uujaya ikuyanda buyo kusola kubona ncobaindwa!—1 Johane 2:15-17; Ciyubunuzyo 18:1-5.

16. (a) Mmibuzyo nzi njotunga twalibuzya? (b) Ncinzi ncotuyiisigwa akukulwaizigwa kucita?

¹⁶ Pele sena tuyandika kusikaa kuumpa minwe yesu buya ikutegwa tuzibe mbokubede kucisa alimwi akupenga? Sena inga tiitwaiya kuzintu zibyaabi zicitikila bamwi? Sena tweelede kupilukila “mubutimba” bwanyika eyi ikutegwa tubone naa kuli ncotwaindwa? (2 Petro 2:20-22) Petro wakayeezya Banakristo bamumwaanda wamyaka wakusaanguna ibakali cibeela canyika ya Saatani kuti: “Cakomena ciindi ncimwakasowa kale kukucita mbuli mbubacita bamasi. Mwakali kweenda mubumpuwe amuzisusi zibi, mukukolwa amunjalalando, mukusenga bukoko amukukomba mizimo iitondwa.” Masimpe tatuyandiki ‘kubaa butaka’ bwanyika ikutegwa  tubone mbobukonzya kubija bukkale. (1 Petro 4:3, 4) Muciindi caboobo, tuyiisigwa zyeelelo zyabukkale zya Jehova zisumpukide kapati ku Maandeesu aa Bwami, alo aali ngamasena kuyiisilwa lwiiyo lwa Bbaibbele. Alimwi tukulwaizigwa kubelesya maanu kutegwa tusinizye kuti tujisi kasimpe alimwi akuti tweendelezyegwaa kasimpe lyoonse.—Joshua 1:8; Ba-Roma 12:1, 2; 2 Timoteo 3:14-17.

Izina Lyesu Talili Lyakutuzibya Buyo

17. Mbuti mbotunga twaba Bakamboni ba Jehova bazwidilila?

¹⁷ Ikuti katweendelezyegwaa kasimpe, tuyoosoleka kwaambila bamwi kujatikizya nkako kufwumbwa notwajana ciindi cakucita boobo. Eci tacaambi kuti tuyookasinikizya kuli baabo ibatatondezyi luyandisisyo. (Matayo 7:6) Muciindi caboobo, tatukafwi nsoni kulizibya kuti tuli Bakamboni ba Jehova. Ikuti muntu watondezya luyandisisyo lumwi kwiinda mukubuzya mubuzyo weelela naa walitambula bbuku limwi lipandulula Bbaibbele, tunoolibambilide ikumwaambila bulangizi bwesu. Ee, eci inga cayandika kuti katujisi mabbuku amwi lyoonse kunyina makani abusena nkotubede—abe amunzi, kumilimo, kucikolo, kucintoolo naa mumasena aakulikondelezya.—1 Petro 3:15.

18. Mbuti kulizibya cantangalala kuti tuli Banakristo mbocili cintu cigwasya kapati mubuumi bwesu?

¹⁸ Notulizibya caantangalala kuti tuli Banakristo, tuyumya lukwabililo lwesu kukulwana kwa Saatani kwabumpelenge. Ikuti kakuli pobwe lyakusekelela buzuba bwakuzyalwa naa lya Kkilisimasi naa muzundano kumilimo, babelesima kanjikanji banooamba kuti, “Mutalipenzyi amwanakazi oyu. Ngumwi wa Bakamboni ba Jehova.” Akaambo nkoonaaka, ibantu inga banakuyoowa kwaamba makani mabyaabi nobali andiswe. Aboobo, ikuzibya bambi kujatikizya zintu nzyotukonzya kucita mbotuli Banakristo ncintu cigwasya kapati mubukkale bwesu, mbubwenya awalo mwaapostolo Petro mbwaakatondezya kuti: “Ino nguni uuti mubisye mwasungwaalila zintu zibotu? Pele nekuba kuti mwapenzegwa nkaambo kabululami, mulaba basicoolwe.”—1 Petro 3:13, 14.

19. Ino tuzi buti kuti tuli kwini kumazubaa kumamanino?

¹⁹ Impindu imbi njotujana notweendelezyegwaa kasimpe njakuti tunoosinizizye kuti aano mmazubaa kumamanino ncobeni aabweende obu bwazintu bubyaabi. Tunoozi kuti businsimi bwa Bbaibbele bunji buli mukuzuzikizigwa muciindi cesu. * Ikucenjezya kwa Paulo kwakuti “kumazuba aakumamanino kuyooba ziindi zikataazya” kuli mukusinizigwa kapati azintu zitalibijili zyali kucitika mumwaanda wamyaka wainda. (2 Timoteo 3:1-5; Marko 13:3-37) Icibalo cimwi mumuteende waino-ino awa icaamba mwaanda wamyaka wa 20 cakajisi mutwe wamakani wakuti “Unooyeeyegwa Kuti Cakali Ciindi Cabukkale Butalibijili.” Icibalo eco cakati: “Imwaka wa 1999 wakaba mwaka wiinda kutika bulowa mucisela cabili camwaanda wamyaka wiinda kutika bulowa.”

20. Ino ecino nciindi cakucita nzi?

²⁰ Ecino tacili nceciindi cakuwayawaya pe. Izilongezyo zya Jehova zyalibonya antangalala mumulimo wakuyiisya Bbaibbele mupati kapati wacitwa munyika yoonse mbwiizulwa kauli bumboni kuzisi. (Matayo 24:14) Amweendelezyegwe akasimpe lyoonse, alimwi amwaambile bamwi kujatikizya nkako. Ibuumi bwanu bwakumbele butamani buyeeme aazintu nzyomucita lino. Ikulilendekezya mumilimo takukatujanyi zilongezyo zya Jehova pe. (Luka 9:62) Muciindi caboobo, cino nceciindi ‘cakubikka myoyo yanu lyoonse kumilimo ya Mwami nkaambo mulizi kuti milimo yanu yamu Mwami tiili yabuyo pe.’—1 Bakolinti 15:58, Ci.

Bupanduluzi buyungizidwe

Sena Mulayeeya?

• Mbuti mbotunga twakumanizya kudooneka?

• Ncinzi ncotukonzya kwiiya kucikozyanyo casikukutaukila Elisha?

• Nkutepaulwa kuli buti kwabukkale nkotweelede kucenjelela lyoonse?

• Nkaambo nzi ncotweelede kulizibya caantangalala kuti tuli Bakamboni ba Jehova?

[Mibuzyo yaciiyo]

[Zifwanikiso izili apeeji 19]

Ikwiiya Bbaibbele lyoonse alimwi akupaila inga kwatugwasya kumanizya kudooneka

[Cifwanikiso icili apeeji 20]

Ikudooneka kwakajisi sikukutaukila Elisha kwakamanizigwaa cilengaano

[Cifwanikiso icili apeeji 21]

Tulayiisigwa zyeelelo zya Jehova zyabukkale busumpukide ku Maandaa Bwami mbuli yeeyi yaku Benin