Ikulwana Bucete—Sena Ninkondo Iitakonzyi Kuzundwa?

BASIMUZWAMASI abasikweendeenda baswaya ŋanda yamaofesi aambunga ya Lukamantano Lwazisi (UN) mu Dolopo lya New York, babona Ŋanda mucitilwa miswaangano ya Economic and Social Council iijisi mipaipi mwiinda ntambo zyamagesi iilibonya muciluli citanamana mukkoce mwiinda bantu. Sikubasololela aaba upandulula kuti: “Ciluli ‘citanamana’ eci bunji bwabantu bacibona kuti ncitondezyo ciyeezya kuti mulimo wambunga ya Lukamantano Lwazisi iwakwaabila bantu zintu nzyobayandika taumani pe; lyoonse kunooli cintu cimwi cakucita mukusumpula bukkale bwabantu munyika.”

Nokuba kuti Cibeela cambunga eci cijisi bubi kapati kukulwaizya bukkale busumpukide kubantu boonse, mulimo oyu ulibonya kuti taumani pe. Icigambya ncakuti, muciindi camulimo wa Jesu Kristo anyika mumwaanda wamyaka wakusaanguna C.E., wakaamba kuti: “Muuya wa-Jehova uli alindime, nkaambo wandinanika kuti ndikambaukile bacete makani mabotu.” (Luka 4:18) Ino akali “makani mabotu” nzi ngaakakambauka? Wakali mulumbe uujatikizya Bwami bwa Jehova Leza uuli nga “macijilo aamutengwana [uuli] mumapenzi” mbwaakali kuzyookkazika oomo Jesu Kristo mwaakali kunooli Mwami. Ino Bwami oobo buyoocita nzi? Isaya wakasinsima kuti: “Jehova wamakamu uyoocitila bantu boonse . . . ipobwe lyazintu zyamafuta, ipobwe lyawaini uulwela, zintu zyamafuta zibotu, waini uulwela uusefedwe kabotu. Lufu [uyoolumenenena] mane kukabe kutamani. Mwami Jehova uyoosindula misozi kumasyu oonse.”—Isaya 25:4-6, 8.

Sena mulayanda kuzyiba makani aambi kujatikizya Bwami bwa Leza ‘mbobuyoosumpula bukkale bwabantu bamunyika,’ eelyo nokutanooli muntu uupengede cintu nociba cimwi? Amulange ansaawa mubone mbomunga mwaswaigwaa mwiiyi uuyoomutondezya makani manji kujatikizya ncolyaamba Bbaibbele aamakani aali boobo.