Lufwutuko Kuli Baabo Ibasala Mumuni

“Jehova ngumumuni wangu alufutuko lwangu. Ino ngwani ngwenjoowa?”—INTEMBAUZYO 27:1.

1. Nzipego nzi zipa buumi nzyaabila Jehova?

KULI Jehova Nkokuzwa mumuni wazuba walo uupa kuti kube buumi anyika. (Matalikilo 1:2, 14) Alimwi ngo Mulengi wamumuni wakumuuya walo uumanizya mudima uujaya wanyika ya Saatani. (Isaya 60:2; 2 Ba-Korinto 4:6; Ba-Efeso 5:8-11; 6:12) Aabo ibasala mumuni balakonzya kwaamba mbuli bwakaamba sintembauzyo kuti: “Jehova ngumumuni wangu alufutuko lwangu. Ino ngwani ngwenjoowa?” (Intembauzyo 27:1a) Nokuba boobo, mbubwenya mbuli mbocakacitika kuciindi ca Jesu, aabo ibasala mudima inga balangila buyo lubeta lwakusinganizigwa.—Johane 1:9-11; 3:19-21, 36.

2. Ncinzi cakacitika insiku kuli baabo ibakakaka mumuni wa Jehova, alimwi akuli baabo ibakaswiilila jwi lyakwe?

² Kuciindi ca Isaya, ibunji bwabantu ba Jehova bacizuminano bakaukaka mumuni. Akaambo kaceeci, Isaya wakalibonena lunyonyooko lwabwami bwakunyika bwacisi ca Israyeli. Alimwi mu 607 B.C.E., Jerusalemu atempele yakwe zyakanyonyoonwa alimwi ibantu bamu Juda bakatolwa mubuzike. Pele aabo ibakaswiilila jwi lya Jehova bakayumizigwa kukazya luleyo lwakuciindi eco. Kujatikizya mwaka wa 607 B.C.E., Jehova wakasyomezya kuti aabo ibakali kuyoomuswiilila bakali kuyoofwutuka. (Jeremiya 21:8, 9) Mazubaano, swebo notuyanda mumuni tulakonzya kwiiya zintu zinji kujatikizya cakacitika mumazubaayo aamusyule.—Ba-Efeso 5:5.

Ilukkomano Lujisi Baabo Ibali Mumumuni

3. Ino sunu ndusyomo nzi ndotukonzya kubaandulo, ‘mmusyobo nzi uululeme’ ngotuyanda alimwi ino ‘mmunzi nzi muyumu’ ngoujisi “musyobo” oyu?

³ “Tulijisi munzi muyumu. [Leza] uyoobika lufutuko lube bulambo bwesu alubaya lwesu. Amujalule milyango kuti musyobo uululeme uusyomeka unjile.” (Isaya 26:1, 2) Aaya ngamajwi aakusekelela aabantu ibakasyoma muli Jehova.  Iba Juda basyomeka kuciindi ca Isaya bakasyoma Jehova kuti Nkokuzwa lukwabililo lwini-lwini ikutali kuli baleza bakubeja bakali kukombwaa basicisinyina. Olo ndolusyomo aswebo ndotujisi sunu. Kunze lyaboobo, tulauyanda “musyobo uululeme” wa Jehova—nkokuti “ba-Israyeli ba-Leza.” (Ba-Galatiya 6:16; Matayo 21:43) Awalo Jehova ulauyanda musyobo wabantu oyu akaambo kakulilemeka kwawo. Kwiinda mukulongezyegwa anguwe, iba Israyeli ba Leza bajisi “munzi muyumu,” imbunga iili mbuli munzi iiwugwasya alimwi akuukwabilila.

4. Ino mizeezo nzi njotweelede kusungwaalila kubaanjiyo?

⁴ Aabo ibali ‘mumunzi’ ooyu balizyi kabotu-kabotu kuti “oyo uupangika moyo wakwe kuli [Jehova], uyoomukazika muluumuno lwakasimpe, nkaambo kakuti [usyoma Jehova].” Jehova ulabagwasya aabo ibapangikide myoyo kukusyoma nguwe akutobela njiisyo zyakwe ziluleme. Aboobo, aabo ibakali kusyomeka mu Juda bakatobela lulayo lwa Isaya lwakuti: “Amusyome Jehova lyoonse, nkaambo mu-Mwami Jehova momujenwe indomba iitamani.” (Isaya 26:3, 4; Intembauzyo 9:10; 37:3; Tusimpi 3:5) Aabo ibapangikide mizeezo basyoma “Mwami Jehova” kuti ne Ndomba yakuccijila iitakwe mapezi. Bajisi “luumuno lwakasimpe” lutamani anguwe.—Ba-Filipi 1:2; 4:6, 7.

Ikubausya Nsoni Basinkondo ba Leza

5, 6. (a) Mbuti Babuloni wansiku mbwaakazundwa? (b) Muunzila nzi ‘Babuloni Mupati’ mowakazundwa?

⁵ Ino mbuti naa aabo ibasyoma Jehova banjila mumapenzi? Tabeelede kuyoowa pe. Jehova ulazizumizya zintu zili boobo kwaciindi cili mbocibede, pele mukuya kwaciindi ulakatalusya alimwi aabo ibapenzya ulababeteka. (2 Ba-Tesalonika 1:4-7; 2 Timoteo 1:8-10) Amulange-lange cakacitikila umwi “munzi uusumpwidwe.” Isaya waamba kuti: “[Jehova] wafwiinsya abo bakede kujulu, nkukuti munzi uusumpwidwe. Wauselusya, wauselusizya ansi, wausisya akubulongo. Uyoolyataulwa zituta. Uyoolyataulwa zituta zyabacete azilyatililo zyabatengwana.” (Isaya 26:5, 6) Imunzi waambwaawa kuti ulisumpwidwe weelede kuti ngu Babuloni. Masimpe imunzi oyo wakabapenzya bantu ba Leza. Pele ino ncinzi cakacitikila Babuloni? Mu 539 B.C.E., wakazundwa aba Medi alimwi aba Persia. Elo kaka nkuusigwa nsoni oko!

⁶ Kuciindi cesu, imajwi aa Isaya aabusinsimi alacipandulula kabotu cakacitikila ‘Babuloni Mupati’ kuzwa mu 1919. Imunzi oyo uusumpwidwe wakazundwa cakuusigwa nsoni mumwaka oyo nowaasinikizigwa kwaangulula bantu ba Jehova mubuzike bwakumuuya. (Ciyubunuzyo 14:8) Icakatobela cakali kwiinda ikuusizya nsoni. Ikakamu  ako kasyoonto ka Banakristo kakatalika ‘kulyataula’ iwakabatolede mubuzike. Mu 1922, bakatalika kwaambilizya lunyonyooko lwa Kristendomu lwakali kulangilwa, bakaambilizya zyakulizyigwa kwamyeembo kucitwaa bangelo ziindi zyone ikuli ku Ciyubunuzyo 8:7-12 alimwi amapenzi otatwe aakasinsimwa ku Ciyubunuzyo 9:1–11:15.

“Inzila Yabaluleme Njabululami”

7. Mbusolozi nzi aabo ibabikkila maanu kumumuni wa Jehova mbobatambula, alimwi nguni ngobalangila alimwi ino bakkomanina nzi?

⁷ Jehova ulabafwutula aabo ibabikkila maanu kumumuni wakwe alimwi ulabamunikila munzila yabo mbubwenya Isaya mbwatondezya kuti: “Inzila yabaluleme njabululami. Uwe noluleme uleenzya baluleme munzila zyabo. Ee, ncobeni twali kukulindila, O Jehova, munzila yambeta zyako. Izina lyako aciibalusyo cako, nzenzizyo nziiyandisya myoyo yesu.” (Isaya 26:7, 8) Jehova ngu Leza uululeme alimwi aabo ibamukomba beelede kutobela zyeelelo zyakwe ziluleme. Nobacita boobo, Jehova ulabasololela, ulazibotezya nzila zyabo. Kwiinda mukutobela busolozi bwakwe, aaba babombe myoyo batondezya kuti balangila Jehova alimwi camoyo woonse balalikkomanina izina lyakwe—‘iciibalusyo’ cakwe.—Kulonga 3:15.

8. Nciimo nzi cibotu ncaakatondezya Isaya?

⁸ Isaya wakalikkomanina zina lya Jehova. Eco cilalibonya kumajwi aakwe aatobela aakuti: “Moyo wangu wali kukuyandisya ciindi camasiku. Ncobeni moyo wangu uuli mukati kangu uyoofuma kukuyandaula. Nkaambo imbeta zyako niziboneka ansi, bantu baluwa balaiya bululami.” (Isaya 26:9) Isaya wakamuyanda Jehova cakumaninina, inzya ‘camoyo wakwe woonse.’ Amweezeezye musinsimi oyo kapaila kuli Jehova ciindi camasiku nokuumwide wii, kaamba mbwalimvwa mumoyo alimwi akulomba busolozi bwa Jehova cabusungu. Taciliboteli kaka cikozyanyo eco! Kunze lyaboobo, Isaya wakaiya bululami kumbeta zya Jehova. Mumakani aya, utuyeezya mbokuyandika kupakamana lyoonse, kubikkila maanu kukumvwisya kuyanda kwa Jehova.

Bamwi Basala Mudima

9, 10. Micito nzi yaluzyalo Jehova njakacitila musyobo wakwe uutasyomeki, pele ino bakaibona buti?

⁹ Jehova wakabafwida luzyalo kapati bantu bamu Juda, pele mukubula coolwe tabali boonse ibakacita ncaakali kuyanda. Lyoonse ibunji bwabantu bakali kusala buzangi aluleyo muciindi cakusala mumuni wakasimpe ka Jehova. Isaya wakati: “Muntu sizibi afwidwa buuya, taiyi bululami pe. Munyika yabulome uyoopilinganya milimo yakwe. Takoobona bulemu bwa-Jehova pe.”—Isaya 26:10.

¹⁰ Kuciindi ca Isaya, Jehova naakatandabika janza lyakwe kukwabilila Juda kuli basinkondonyina, ibunji bwabantu bakakaka kucizumina eeci. Naakabalongezyaa luumuno lwakwe, icisi eco kunyina nocakalumba pe. Aboobo Jehova wakabasiya kutegwa babelekele “bami bambi,” elyo kumamanino wakazumizya kuti ba Juda batolwe mubuzike ku Babuloni mu 607 B.C.E. (Isaya 26:11-13) Nokuba boobo, mukuya kwaciindi ibasyoonto buyo bacisi eco bakapiluka kucisi cokwabo kabeempedwe.

11, 12. (a) Ino basikutola Juda mubuzike bakajisi bulangizi nzi? (b) Mbulangizi nzi bwakumbele mbobakajisi mu 1919 aabo ibakatolede balanda ba Jehova bananike mubuzike?

 ¹¹ Ino mbuti kujatikizya baabo bakatolede Juda mubuzike? Mubusinsimi Isaya wiingula kuti: “Lino balifwide, tabaciponi, bantu aabo bafwide tabakakonzyi kubuka pe. Wakabasubula akubanyonyoona, wakacita kuti kabataciyeeyegwi pe.” (Izaya 26:14, BT) Inzya, naakanyonyoonwa Babuloni mu 539 B.C.E., kunyina naakacijisi bulangizi bwakumbele. Muciindi, imunzi oyo tiiwakacili kuyooibalukwa limbi pe. Wakali ‘kunoofwidilide,’ alimwi ibulelo bwakwe bupati bwakali kunoomaninide. Nkucenjezya kupati oku kaka kuli baabo ibasyoma bantu bamunyika eyi balaampuwo!

¹² Imbazu zyabusinsimi obu zyakazuzikizigwa eelyo Leza naakazumizya balanda bakwe bananike kuya mubuzike bwakumuuya mu 1918 alimwi anaakabalubula mu 1919. Kuzwa kuciindi eco, ibulangizi bwakumbele bwasikubatola mubuzike, ikapati bwa Kristendomu tiibwakacili bubotu pe. Pele izilongezyo zyakabambilidwe bantu ba Jehova zyakali zinji kapati.

“Wavuzya Bantu Bacisi”

13, 14. Nzilongezyo nzi zipati eezyo balanda ba Jehova bananike nzyobabaanzizyo kuzwa mu 1919?

¹³ Jehova wakabalongezya balanda bakwe bananike mu 1919 akaambo kaciimo amicito yabo yakweempwa alimwi wakabavwuzya. Kusaanguna, kwakabikkilwa maanu kukuyobolola ba Israyeli ba Leza bakasyeede, mpoonya kumbele ayalo “inkamu impati” ya “mbelele zimwi” yakatalika kuyobololwa. (Ciyubunuzyo 7:9; Johane 10:16) Izilongezyo ezi zyakasinsimwa mubusinsimi bwa Isaya bwakuti: “Wavuzya bantu bacisi, O Jehova, wavuzya bantu bacisi. Nduwe walemekwa. Wakomezya migaano yoonse yanyika. O Jehova, mumapenzi aabo balibikide myoyo yabo kulinduwe. Bakakukomba ciindi eco niwakali kubakoma.”—Isaya 26:15, 16.

¹⁴ Mazubaano, imigano ya Israyeli wa Leza yakomezyegwa nyika yoonse mbwiizulwa, alimwi ibankamu impati ibayungizyigwa lino ibatola lubazu cabunkutwe mumulimo wakukambauka makani mabotu balasika kubantu ibali tuulunzuma tuli cisambomwi. (Matayo 24:14) Tacilikomeneni kaka cilongezyo ca Jehova! Alimwi tabulikomeneni bulemu ibupegwa kuzina lyakwe! Izina elyo sunu lilamvwugwa muzisi zili 235—ikuzuzikizigwa kutaliboteli kwacisyomezyo cakwe.

15. Mbubuke nzi bwacikozyanyo ibwakacitika mu 1919?

¹⁵ Juda wakali kuyandika lugwasyo lwa Jehova kutegwa aloboke kubuzike bwabana Babuloni. Kunyina nobakali kukonzya kuloboka kakunyina kugwasigwa anguwe. (Isaya 26:17, 18) Mbubwenya buyo, ikulubulwa kwa Israyeli wa Leza mu 1919 cakali citondezyo calugwasyo lwa Jehova. Tiikwakali kukozyeka kakunyina kugwasigwa anguwe. Alimwi ikucinca oko kwakali kugambya kapati cakuti Isaya ukweezyanisyaa bubuke, naamba kuti: “Bafu bako bayoopona, mitunta yangu iyoobuka. Amubuke, mwiimbe, inywe nobakede mubulongo, nkaambo mume wako uli mbubonya mbuli mume wamumuni. Nyika iyoobusya [bafu, BT] bayo.” (Isaya 26:19; Ciyubunuzyo 11:7-11) Inzya, aabo ibafwide bayoozyalululwa kutegwa bazumanane kucita milimo!

Ilukwabililo Muziindi Zyamapenzi

16, 17. (a) Ncinzi ba Juda ncobakali kuyandika kucita ikutegwa bafwutuke lunyonyooko lwa Babuloni mu 539 B.C.E.? (b) Ino ‘maanda aamukati’ alangilwa kuti ncinzi sunu, alimwi mbuti mbwaatugwasya?

¹⁶ Ibalanda ba Jehova lyoonse bayandika lukwabililo lwakwe. Pele, ino-ino uyootandabika janza lyakwe kwaciindi camamanino kunyika ya Saatani, alimwi bakombi bakwe bayooyandika lugwasyo lwakwe kapati kwiinda lyoonse. (1 Johane 5:19) Kujatikizya ciindi eco camapenzi, Jehova utucenjezya kuti: “Amuboole nubantu bangu, munjile mumaanda aanu aamukati, mulijalile milyango ya[nu], muyube kaindi kaniini, mane bukali bukamane. Nkaambo amubone! Jehova ulazwa kubusena bwakwe kuti abweedezye bantu bakede munyika mulandu wabubi bwabo. Ayalo nyika iyooyubununa bulowa bwayo, tiikooyoovumba limbi bajayidwe bayo.” (Isaya 26:20, 21; Zefaniya 1:14) Ibusinsimi obu bwakatondezya ba Juda kujatikizya mbobakeelede kufwutuka lunyonyooko lwa Babuloni mu 539 B.C.E. Aabo ibakabutobela bakeelede kukkala mumaandaabo, kabasisidwe kuli basikalumamba basikusaala ibakali mumigwagwa.

 ¹⁷ Sunu, ‘maanda aamukati’ aabusinsimi obo cakutadooneka aamba makumi-makumi aazyuulu aambungano zyabantu ba Jehova nyika yoonse mbwiizulwa. Imbungano ezyo ncilikwabilizyo noliba lino, mbobusena Banakristo nkobajana lukwabililo akati kabanyina mubweendelezi bwaluyando bwabaalu. (Isaya 32:1, 2; Ba-Hebrayo 10:24, 25) Eci cilayandika ikapati akaambo kalunyonyooko lulaafwaafwi lwabweende obu bwazintu eelyo lufwutuko nolunooyeeme aakutobela zintu ziyandika.—Zefaniya 2:3.

18. Mbuti Jehova ino-ino ‘mbwatiikajaye intale iili mulwizi’?

¹⁸ Kujatikizya ciindi eco, Isaya usinsima kuti: “Mubuzuba obo Jehova uyoobelesya ipanga lyakwe litakonkomani ipati ijumu kuti akome Leviyatani inzoka iicijisya a-Leviyatani inzoka iilizingaila, alimwi uyoojaya intale iili mulwizi.” (Isaya 27:1) Ino “Leviyatani” wamazubaano nguni? Ngooyo “muzoka waciindi” Saatani lwakwe antoomwe abweende bwakwe bwazintu bubyaabi oobo mbwabelesya kulwisya ba Israyeli ba Leza. (Ciyubunuzyo 12:9, 10, 17; 13:14, 16, 17) Mu 1919, Leviyatani tanaakacili anguzu kubantu ba Leza. Mukuya kwaciindi, kunyina nacinooyoomvwigwa limbi pe. (Ciyubunuzyo 19:19-21; 20:1-3, 10) Aboobo, Jehova “uyoojaya intale iili mulwizi.” Kwaciindi cino, kunyina cintu Leviyatani ncakonzya kucita kulwana bantu ba Jehova iciyoozwidilila. (Isaya 54:17) Ncintu cuumbulizya kapati kaka ikusyomezegwa makani aaya!

“Muunda Mubotu Wamasaansa”

19. Ino ciimo cabananike basyeede cili buti mazubaano?

¹⁹ Akaambo kamumuni woonse ooyu uuzwa kuli Jehova, sena tatweelede kukkomana? Inzya, tuleelede! Isaya ulalupandulula kabotu-kabotu lukkomano lwabantu ba Jehova naalemba kuti: “Mubuzuba obo muunda mubotu wamasaansa muyoouimbila. Mebo nde-Jehova ndaulanga, ndautuntulwida lyoonse. Ndaulanga masiku asikati kuti kutabi uubisizya.” (Isaya 27:2, 3) Jehova waulanganya “muunda [wakwe] mubotu wamasaansa,” nkokuti ibasyeede ba Israyeli ba Leza alimwi abeenzinyina ibabeleka cabunkutwe. (Johane 15:1-8) Akaambo kaceeci kwazyalwa micelo iipa bulemu kuzina lyakwe alimwi alukkomano lunji kubalanda bakwe anyika.

20. Mbuti Jehova mbwaikwabilila mbungano ya Bunakristo?

²⁰ Tulakonzya kukkomana akaambo kakuti bukali bwa Jehova butaanzi mbwaakajisi kubalanda bakwe bananike oobo bwakapa kuti azumine kuti bainke mubuzike bwakumuuya mu 1918 lino tabuciko pe. Jehova mwini waamba kuti: “Nsikwe bukali. Nicakabota myuunga amitubetube niyakabikwa kuti indilwisye. Nindakailyataula, akwiiumpa yoonse antoomwe. Cita ajate inguzu zyangu kuti tuyanzane awe. Ncobeni atuyanzane awe.” (Isaya 27:4, 5) Ikutegwa asinizye kuti imisaansa iyoozumanana kaili ‘mibotu,’ Jehova ulalyataula akumanizya zintu zibyaabi zyoonse zili mbuli nsaku izinga zyainyonganya. Aboobo kutabi muntu naba umwi uunyonganya bukkale bwambungano ya Bunakristo! Boonse ‘abajate inguzu zya Jehova,’ babelekele kukkomaninwa anguwe alukwabililo ndwapa. Mukucita boobo, tulayanzanaa Leza—icintu ciyandika kapati cakuti Isaya waciindulula ziindi zyobile kucaamba.—Intembauzyo 85:1, 2, 8; Ba-Roma 5:1.

21. Mbuti nyika yambolezi mboyazuzigwaa “micelo”?

 ²¹ Izilongezyo zilazumanana ategwa: “Muziindi ziciza luzubo lwa-Jakobo luyoosimpa miyanda, aba-Israyeli bayoosyuuka akucita malubaluba, elyo bayoozuzya luwa loonse micelo.” (Isaya 27:6) Ikapango aka kazuzikizigwa kuzwa mu 1919, katondezya bumboni butaliboteli bwanguzu zya Jehova. Banakristo bananike bazuzya nyika “micelo,” nkokuti icakulya cakumuuya cizulide. Munyika yabumpelenge, calukkomano basumpula zyeelelo zya Leza zisumpukide. Alimwi Jehova wazumanana kubalongezya kwiinda mukubavwuzya. Aboobo ibeenzinyina ibabalilwa mutuulunzuma tuli mbotubede ibambelele zimwi “balamumanina milimo [Leza] isikati amasiku.” (Ciyubunuzyo 7:15) Tutacuubyi-ubyi coolwe cesu citalikomeneni cakulya “micelo” alimwi akwiiabila bambi!

22. Nzilongezyo nzi nzyobajana aabo ibazumina mumuni?

²² Mumazubaano aakatazya, eelyo mudima nouvwumbide nyika alimwi amudima uusiya mbi nowuvwumba misyobo yabantu, sena tatulumbi kuti Jehova wapa mumuni wakumuuya kubantu bakwe? (Isaya 60:2; Ba-Roma 2:19; 13:12) Kuli boonse ibautobela, imumuni oyo ubapa luumuno lwamumizeezo alimwi alukkomano lino alimwi ikapati buumi butamani kumbele. Aboobo swebo notuyanda mumuni atumutembaule Jehova camoyo woonse akusangana asintembauzyo mukwaamba kuti: “Jehova ninguzu zyabuumi bwangu. Ngwani ngwencija? Lindila Jehova! Koyuma, amoyo wako ujate inguzu. Lindila Jehova!”—Intembauzyo 27:1b, 14.

Sena Mulayeeya?

• Ino aabo badyaaminina bantu ba Jehova bajisi bulangizi nzi bwakumbele?

• Nkuvwula nzi ikusinsimwa mubbuku lya Isaya?

• Muukati ‘kamaanda aamukati’ aali motweelede kujanika, alimwi ino nkaambo nzi?

• Nkaambo nzi ciimo cabantu ba Jehova ncocimutembaula?

[Mibuzyo yaciiyo]

Kabbokesi kali apeeji 30]

IBBUKU LIPYA

Imakani manji aabandikwa muzibalo ezi zyobile zyaziiyo akabandikwa kaali makani mupulogilamu yamuswaangano wacooko wamu 2000/2001. Kumamanino aamakani aayo, kwakamwaigwa bbuku lipya lyamutwe wakuti Isaiah’s Prophecy—Light for All Mankind I. Ibbuku eli ilijisi mapeeji aali 416 lilapandulula kapango akapango kazyaandaano zitaanzi zili 40 zyabbuku lya Isaya.

[Cifwanikiso icili apeeji 26]

Balikke baluleme mbebazumizigwa ‘mumunzi wa Jehova muyumu,’ imbunga yakwe

[Cifwanikiso icili apeeji 27]

Isaya wakayandaula Jehova “ciindi camasiku”

[Cifwanikiso icili apeeji 29]

Jehova ulaukwabilila ‘muunda wakwe wamasaansa’ alimwi ulauzyazya micelo