Mibuzyo Yabasikubala

Ino Banakristo bakasimpe beelede kucibona buti cilengwa cidumide icakupa bantu bamwi makkopi aamapulogilamu aamakkompyuta aayo aasambalwa buya (commercial software)?

Ibamwi balakonzya kupa kaambo munzila ilubide ncobacitila boobu kwiinda mukukozyanisyaa majwi aa Jesu aakuti: “Mwakapegwa buyo, anywe amupe buyo.” Aawa Jesu tanaakali kwaamba zyakupa makkopi amabbuku aakasyidwe amulawo wabasikwaalemba naa imapulogilamu aamukkompyuta (software) aakonzya kubelesyegwa buyo kwiinda mukutobela mulawo pe. Wakali kwaamba kupa kucitwa kwiinda mumulimo. Jesu wakaambila baapostolo bakwe kuti baunke mumadolopo alimwi amuminzi iindene-indene kutegwa bakakambauke zya Bwami, bakaponye balwazi alimwi akugwisya madaimona. Muciindi cakubabbadalesya aabo mbobakacitila milimo eeyi, ibaapostolo bakeelede ‘kubapa cabuyo.’—Matayo 10:7,8.

Akaambo kakuvwula kwamakkompyuta abelesyegwaa bantu alimwi amumakwebo, ibantu banji balaayanda kapati mapulogilamu aabelesyegwaa kkompyuta aitwa kuti software. Kanjikanji pulogilamu eeyi yeelede kuulwa buya. Bamwi bantu balizumizidwe  kulemba mapulogilamu aakupa buyo alimwi kwaambwa kuti abalo mbobapa balakonzya kwaakkopolola akwapa bantu bambi. Pele bunji bwamapulogilamu aamukkompyuta aaya asambalwa buya. Taakwe makani pe ankobayanda kuyooabelesya kube kuŋanda antela kumakwebo, aabo ibabelesya pulogilamu yamukkompyuta beelede kuyuula buya. Ikuti muntu umwi wabweza pulogilamu yamukkompyuta yakakkopololwa buya kakwiina kubbadela, ooku nkusotoka mulawo mbubwenya buyo mbuli mbocibede akumabbuku akalembululwa nokuba kuti apegwa buyo kakwiina kubbadelesya.

Bunji bwamapulogilamu aamukkompyuta (kubikkilizyaa zisobano) alijisi milawo izumizya muntu kubelesya pulogilamu eeyo, ikuti mwini antela wiibelesya weelede kutobela akubelesya zintu nzyazumizidwe zyalo. Bunji bwamalailile aaya aamba kuti, muntu omwe buyo nguweelede kwiibikka pulogilamu eeyo mukkompyuta akwiibelesya alikke buyo—kanjikanji eeci caamba kubikka pulogilamu eeyo mukkompyuta yomwe buyo, nokuba kuti njakubelesya kuŋanda, kumakwebo naa kucikolo. Imalaisensi amwi alazumizya kuti muntu ubelesya pulogilamu eeyo ulakonzya kuti kajisi kkopi yakwe buyo iimbi yapulogilamu, pele teelede kubambila bantu bambi makkopi pe. Ikuti mwini wayanda kuti pulogilamu yoonse ayipe muntu uumbi (kubikkilizyaa laisensi alimwi amapepaambi), ulakonzya kucita oobo. Aboobo kunyina lino walo nacijisi nguzu zyakwiibelesya alimwi pulogilamu eeyo pe. Imalaisensi aaya aliindene, aboobo muntu uulaa pulogilamu eeyo naa uupegwa weelede kubuzya milawo ijatikizidwe mulaisensi eeyo.

Masi manji alizuminene mutwaambo tujatikizya mulawo uukasya kulembulula naa kubamba “zintu zibambwa kwiinda mubusyaabusongo,” zili mbuli mapulogilamu aamukkompyuta, alimwi balasola kubikka milawo iikwabilila zintu eezyo. Mucikozyanyo, imuteende utegwa The New York Times iwamu January 14, 2000, wakaluula kuti, “Bamapulisa baku Germany abaku Denmark bakajata bamwi ibakali mukabunga nkobaamba kuti nkabunga kabakapika kabba mapulogilamu azisobano zyamumakkompyuta” kalo ikakali kukkopolola akwaamwaya, alimwi amwi bakali kwaasambala kwiinda mukubelesya Internet.

Ino mbungano ya Bunakristo yaabona buti makani aaya? Jesu wakati: “Zintu zya-Kaisara amuzipe Kaisara, azyalo zintu zya-Leza amuzipe Leza.” (Marko 12:17) Eeci cipandulula kuti, Banakristo beelede kubamba milawo yacisi eeyo iitakazyanyi amilawo ya Leza. Ikujatikizya mfwulumende, imwaapostolo Paulo wakati: “Bantu boonse abalibombye kumaami aacisi . . . Oyo uulwisya bwami ulakazya cintu cibikwa kwa-Leza, nkabela basikukazya balalijanina kubetekwa.”—Ba-Roma 13:1, 2.

Ibaalu mumbungano Zyabanakristo, tabeelede kulingula makkompyuta aabamwi mbuli kuti mbabapedwe nguzu zyakulingula akubona kuti milawo iikasya kulembulula naa kukkopolola ilatobelwa. Pesi balasyoma alimwi akuyiisya kuti Banakristo tabeelede kubweza cintu citali cabo pe alimwi beelede kuba bantu batobela milawo. Eeci cilabakwabilila Banakristo kuti kabataangwi akaambo kakutyola milawo alimwi cipa kuti kabajisi manjezeezya mabotu kuli Leza. Paulo wakalemba kuti: “Nkaambo kaako kuleelede kulibombya, teensi nkaambo kabukali bulike, pele nkaambo kamanjezeezya aalo.” (Ba-Roma 13:5) Mbubwenya buyo, Paulo wakatondezya Banakristo bakasimpe ncobalombozya kwiinda mumajwi aakuti: “Ncobeni twazumina kuti tulijisi kweezeezya kubotu, tuyanda kuti tululame, tubule akampenda.”—Ba-Hebrayo 13:18.

Kabbokesi kali apeeji 31]

Basimakwebo bamwi alimwi azikolo balaula malaisensi aazumizya mweelwe wabantu uuli mbuubede kubelesya pulogilamu eeyo. Mu 1995, imbungano zya Bakamboni ba Jehova zyakabandika cibalo cakajatikizya lulayo olu:

“Bunji bwamakkampani aayo abamba alimwi akuulisya mapulogilamu aamukkopyuta alabikkilizyaa mulawo uukasya kulembulula naa kukkopolola mapulogilamu aaya, eelyo alapa laisensi iitondezya mbwaayelede kubelesyegwa mapulogilamu kweelanaa mulawo. Kanjikanji laisensi eeyi ikasya muntu wakaula pulogilamu eeyo ikupa bamwi makkopi aapulogilamu; alimwi tacili mumulawo ikucita boobo kweelana ambowaamba mulawo wamasi oonse uukasya kulembulula. . . . Makkampani amwi mapati asambala makkompyuta akabikkwa kale mapulogilamu aaya aajisi kale laisensi. Nokuba boobo, zintoolo zimwi mobaulisya makkompyuta tababikkilizyi amalaisensi akaambo kakuti mapulogilamu ngobakabikkila limwi taazumizidwe amulawo pe, aboobo eeci caamba kuti, ooyo uula utyola mulawo nabelesya mapulogilamu aaya. Kweelana aceeci, Banakristo tabeelede kubikka naa ikugwisya makani aakasidwe amulawo (mbubwenya mbocibede kumabbuku aa Sosaiti) kuzwa muma electronic bulletin board kubikkilizya ayaayo akakkopololwa kakunyinaa kuzumizigwaa mulawo wabalaawo.