Amubikkile Maanu Kumiyeeyo Yamuuya Kutegwa Mupone!
Amubikkile Maanu Kumiyeeyo Yamuuya Kutegwa Mupone!
“Miyeeyo yamuuya mbuumi.”—BA-ROMA 8:6.
1, 2. Nkwiimpana nzi nkolipa Bbaibbele akati ‘kanyama’ alimwi “amuuya”?
TACILI cintu cuuba-uba kuzumananaa bukkale buli kabotu mumeso aa Leza akati kabantu batalilemeki ibayandisya kukondelezya zisusi zyabo zyanyama. Nokuba boobo, Magwalo alapa kwiindana kuliko akati ‘kanyama’ “amuuya,” alatondezya kabotu-kabotu zicitika ikuti muntu wazundwaa zisusi zyamubili wakwe mubisyi alimwi azilongezyo zijanwa natobela busolozi bwamuuya wa Leza uusalala.
2 Mucikozyanyo, Jesu Kristo wakati: “Muuya nguupa buumi, mubili ngwabuyo, majwi ngendakamwaambila muuya, mbuumi.” (Johane 6:63) Ku Banakristo baku Galatiya, imwaapostolo Paulo wakalemba kuti: “Nyama ilijisi zisusi zilwisya muuya, awalo Muuya ulalwisya nyama. Ezi zyobile zilasundana.” (Ba-Galatiya 5:17) Alimwi Paulo wakati: “Oyo uubyala zintu zyanyama ulatebula bubozi buzwa kunyama, pele oyo uubyala zintu zyamuuya ulatebula buumi butamani buzwa ku-Muuya.”—Ba-Galatiya 6:8.
3. Ncinzi ciyandika kutegwa twaanguluke kuzisusi alimwi amiyeeyo mibyaabi?
3 Imuuya wa Jehova uusalala—inguzu zyakwe nzyabelesya zilakonzya kuzigwisizya limwi ‘zisusi zyanyama’ akucitwa buzike amubili mubisyi. (1 Petro 2:11) Ikutegwa twaanguluke kubuzike bwazintu zibyaabi, cilayandika kapati kuti tugwasigwe amuuya wa Leza, kayi Paulo wakalemba kuti: “Miyeeyo yanyama ndufu, anukuti miyeeyo yamuuya mbuumi, alimwi nduumuno.” (Ba-Roma 8:6) Ino caamba nzi kubikkila maanu kumiyeeyo yamuuya?
‘Kubikkila Maanu Kumiyeeyo Yamuuya’
4. Ino caamba nzi ‘kubikkila maanu kumiyeeyo yamuuya’?
4 Paulo naakalemba ‘zyakubikkila maanu kumiyeeyo yamuuya,’ wakabelesya bbala lya Cigiliki ilyaamba “mbwayeeya muntu, aayeeme mizeezo, . . . mbaakani, kulombozya alimwi akusoleka kwakwe.” Ibbala cciti liswaangene andilyo lyaamba “kuyeeya munzila imwi.” Aboobo, ikubikkila maanu kumiyeeyo yamuuya caamba kweendelezyegwa, kusololelwa alimwi akukulwaizigwaa nguzu nzyabelesya Jehova. Caamba kuti tulalisungula kuti kuyeeya alimwi akulombozya kwesu zyeendelezyegwe cakumanininaa muuya wa Leza uusalala.
5. Ino tweelede kusika aali mukulisungula kweendelezyegwaa muuya uusalala?
5 Mbotweelede kweendelezyegwaa muuya uusalala kwakakankaizigwaa Paulo naakaamba zyakuba ‘bazike kumuuya.’ (Ba-Roma 7:6) Kwiinda mukusyoma cituuzyo cacinunuzyo ca Jesu, Banakristo baangululwa kubuzike bwacibi, aboobo ‘balifwide’ kubukkale bwabo bwakale nkobakali bazike. (Ba-Roma 6:2, 11) Aabo ibafwide munzila yacikozyanyo ili boobo bacipona munzila yakumubili alimwi lino balaangulukide kutobela Kristo kabali “bazike babululami.”—Ba-Roma 6:18-20.
Ikusanduka Kupati
6. Nkucinca nzi kucitwa abaabo ibaba “bazike babululami”?
6 Ikusanduka kuzwa ‘kubazike bacibi’ akuba babelesi ba Leza katuli “bazike babululami” nkupati ncobeni. Kujatikizya bamwi ibakacincide boobo, Paulo wakalemba kuti: “Mulisanzizidwe, mulisalazizidwe, mulilulamikidwe muzina lya-Mwami Jesu Kristo aku-Muuya wa-Leza wesu.”—Ba-Roma 6:17, 18; 1 Ba-Korinto 6:11.
7. Nkaambo nzi ncociyandika kapati kuzilanga mbwazilanga zintu Jehova?
7 Ikutegwa kucinca kupati kuli boobo kutucitikile, kusaanguna tweelede kwiiya mbwazilanga zintu Jehova. Imyaanda yamyaka ili mbwiibede yainda, sintembauzyo Davida wakalomba Leza camoyo woonse kuti: “Kondizibya inzila zyako, O Jehova; . . . Kondeenzya mulusinizyo lwako, undiyiisye.” (Intembauzyo 25:4, 5) Jehova wakamuswiilila Davida, alimwi ulakonzya kwiingula amipailo yababelesi bakwe bamazubaano. Mbwaanga inzila zya Leza alimwi akasimpe kakwe zilasalala, ikuziyeeya cakuzinzibala kuyootugwasya notutepaulwa kukkutya zisusi zyanyama zisofweede.
Imulimo Mupati Ngolijisi Jwi lya Leza
8. Nkaambo nzi ncociyandika kapati kuti twiiye Bbaibbele?
8 Ijwi lya Leza, Ibbaibbele lyakalembwa kwiinda munguzu zyamuuya wakwe. Aboobo, inzila iiyandika yakuzumizya muuya oyo kuti ubeleke mulindiswe nkwiinda mukubala akwiiya Bbaibbele abuzuba ikuti kacikonzyeka. (1 Ba-Korinto 2:10, 11; Ba-Efeso 5:18) Ikuvwuzya kasimpe alimwi anjiisyo zya Bbaibbele mumizeezo amumyoyo yesu kuyootugwasya kulwana mapenzi aatulwisya munzila yakumuuya. Inzya, ikutepaulwa nokucitika, imuuya wa Leza ulakonzya kutugwasya kwiibaluka ziyeezyo zyamu Magwalo alimwi anjiisyo izinga zyayumya makanzeesu aakucita zintu kweelana akuyanda kwa Leza. (Intembauzyo 119:1, 2, 99; Johane 14:26) Aboobo, tatukonzyi kweenwa kutobela nzila yabukkale iitaluzi.—2 Ba-Korinto 11:3.
9. Mbuti ciiyo ca Bbaibbele mbociyumya makanzeesu aakubamba cilongwe cesu a Jehova?
9 Mbotuzumananaa kwiiya Magwalo cakusinizya alimwi cabunkutwe kwiinda mumabbuku aagwasya kwiiya Bbaibbele, muuya wa Leza ulayeendelezya mizeezo amoyo wesu, calo cipa kuti tuzibikkile maanu kapati zyeelelo zya Jehova. Cilongwe cesu a Leza nceciba cintu ciyandika kapati mubuumi bwesu. Notutepaulwa, tatubikkili maanu kukwiininizya kuliko muzintu zitaluzi. Muciindi caboobo, ncotubikkila maanu kapati nkuzumananaa kusyomeka kwesu kuli Jehova. Ikuyandisisya cilongwe ncotujisi anguwe kutukulwaizya kulwana miyeeyo ili yoonse iinga yacinyonganya naa kucinyonyoona.
“Nduuyandisya Loko Mulao Wako!”
10. Nkaambo nzi kutobela milawo ya Jehova ncokuyandika ikutegwa tubikkile maanu kumiyeeyo yamuuya?
10 Ikuti katuyanda kubikkila maanu kumiyeeyo yamuuya, iluzibo lwa Jwi lya Leza lulikke taluzulide pe. Mwami Solomoni wakali kuziteelela kapati zyeelelo zya Jehova, pele wakakakilwa kuzitobela kumamanino aabuumi bwakwe. (1 Bami 4:29, 30; 11:1-6) Ikuti lyoonse katubikkila maanu kuzintu zyakumuuya, tuyoobona mbokuyandika kuzyiba ncolyaamba Bbaibbele alimwi akutobela milawo ya Leza camoyo woonse. Eco caamba kuba bankutwe kulingaula zyeelelo zya Jehova alimwi akusungwaala kuzitobela. Oobo mbwaakali kuzilanga zintu sintembauzyo. Wakaimba kuti: “Nduuyandisya loko mulao wako! Nduuyeeya buzuba boonse!” (Intembauzyo 119:97) Eelyo notukubikkila maanu ncobeni kutobela milawo ya Leza, tutondezya bube bwabunaleza mumicito. (Ba-Efeso 5:1, 2) Muciindi cakoongelezyegwa kucita zibi kakunyinaa lukwabililo, tutondezya micelo yamuuya alimwi ikuyandisisya kukkomanisya Jehova kutugwasya kutantamuka “milimo yanyama” iisesemya.—Ba-Galatiya 5:16, 19-23; Intembauzyo 15:1, 2.
11. Mbuti mbomunga mwapandulula kuti mulawo wa Jehova uukasya bwaamu ncikwabilizyo kulindiswe?
11 Mbuti mbotunga twailemeka akwiiyandisya milawo ya Jehova? Inzila imwi nkwiinda mukulanga-langa mpindu iijanwa mulinjiyo. Amuyeeye mulawo uuzumizya koonana kwabantu bakwatene buyo alimwi uukasya bwaamu abumambi. (Ba-Hebrayo 13:4) Sena kutobela mulawo oyu kutwiimya cintu cimwi cibotu? Sena Taateesu wakujulu siluyando inga wabikka mulawo uutwiimya cintu cigwasya? Peepe! Amubone cili mukucitika mumaumi aabantu banji ibatatobeli zyeelelo zya Jehova zyakulilemeka. Ikumita kwamusokwe kanjikanji kusololela kukugusya mada naa kubaa zikwati zicitika bantu kabatanaa kulibambila alimwi zivwulide mapenzi. Ibanji bakomezya bana kabanyina mulumi naa mukaintu. Kunze lyaboobo, aabo ibajatikizigwa mubwaamu bali muntenda yakuciswa malwazi aaboola kwiinda mukoonana. (1 Ba-Korinto 6:18) Alimwi ikuti mubelesi wa Jehova wajatikizigwa mubwaamu, ulakonzya kupenzegwa kapati amizeezo. Ikukatazyigwa akaambo kamulandu kulakonzya kuletela cilabila akupenga kapati mumizeezo. (Intembauzyo 32:3, 4; 51:3) Aboobo, sena tacisalali kuti mulawo wa Jehova uukasya bwaamu ubambilidwe kuti utukwabilile? Inzya, masimpe kuli mpindu iitalikomeneni mukuzumanana kulilemeka!
Amupailile Lugwasyo lwa Jehova
12, 13. Nkaambo nzi ncociyandika kupaila notusikilwa zisusi?
12 Masimpe, ikubikkila maanu kumiyeeyo yamuuya kuyandika kupaila camoyo woonse. Cilayandika kulomba lugwasyo lwamuuya wa Leza, kayi Jesu wakati: ‘Ikuti nywebo . . . kamucizi kupa bana banu zintu zibotu, Usowanu uuli kujulu sena takooindilila kubapa Muuya Uusalala ibamukumbila’? (Luka 11:13) Tulakonzya kwaamba notupaila mbotuluyanda lugwasyo lwamuuya kujatikizya zintu motukompeme. (Ba-Roma 8:26, 27) Ikuti twazyiba kuti zisusi naa kulanga nkotujisi muzintu zimwi kuli mukutunyonganya, naa eelyo musyomima siluyando natuzibya zintu zili boobo, ncabusongo ikuligama buya penzi eelyo mumipailo yesu alimwi akulomba lugwasyo lwa Leza kutegwa tuzunde tumpenda tuli boobo.
13 Jehova ulakonzya kutugwasya kubikkila maanu kuzintu ziluleme, zisalala, zibotu alimwi zitembaulika. Alimwi elo kaka cilayandika kumukombelezya camoyo woonse ikutegwa “luumuno lwa-Leza” lukwabilile myoyo alimwi amiyeeyo yesu! (Ba-Filipi 4:6-8) Aboobo, atupailile lugwasyo lwa Jehova kuti ‘tugame kutobela bululami, akukomba, alusyomo, aluyandano, alukakatilo, alulibombyo.’ (1 Timoteo 6:11-14) Kwiinda mulugwasyo ndwapa Taateesu wakujulu, kulibilika akutepaulwa tazikakomeni kusikila waawo mpotutakonzyi kuzyeendelezya. Muciindi caboobo, buumi bwesu bunooli bwakuliiba nkwapa Leza.
Mutapenzyi Muuya
14. Nkaambo nzi muuya wa Leza ncoutukulwaizya kubaa bukkale busalala?
14 Umwi aumwi akati kababelesi ba Jehova basimide balalutobela lulayo lwa Paulo lwakuti: “Mutazimyi Muuya.” (1 Ba-Tesalonika 5:19) Mbwaanga muuya wa Leza “Muuya Uusalala,” taukwe kampenda pe, ulisetekene. (Ba-Roma 1:4) Aboobo, imuuya oyo noutweendelezya, utukulwaizya kubaa bukkale busalala. Ulatugwasya kuzumanana mubukkale busalala ibutondezyegwa kwiinda mukumvwida Leza. (1 Petro 1:2) Ikucita milimo iili yoonse iisofweede kwaambwa kuti nkukazya muuya oyo alimwi eco ciletela mapezi. Munzila nzi?
15, 16. (a) Mbuti mbotunga twapenzya muuya wa Leza? (b) Mbuti mbotunga tweeleba kupenzya muuya wa Jehova?
15 Paulo wakalemba kuti: “Mutapenzyi Muuya Uusalala wa-Leza, nguwenya ngumwakaandwa kujanza lyakwe mane kusikila kubuzuba bwalununuko.” (Ba-Efeso 4:30) Imagwalo aamba muuya wa Jehova kuti ncizibyo naa ‘citondezyo cacintu cakacili kumbele’ ku Banakristo basyomeka ibananike. Alimwi eco mbuumi bwakujulu butafwiki. (2 Ba-Korinto 1:22; 1 Ba-Korinto 15:50-57; Ciyubunuzyo 2:10) Muuya wa Leza ulakonzya kubeendelezya bananike abeenzinyina ibajisi bulangizi bwabuumi bwaanyika kupona munzila yakusyomeka alimwi ulakonzya kubagwasya kweeleba milimo mibyaabi.
16 Imwaapostolo wakacenjezya makani aatumpenda tujatikizya kubeja, kubba, zisapi alimwi azimwi-zimwi. Ikuti twayungwa kucita zintu zili boobo, tunookazya lulayo lwakasololelwaa muuya lwa Jwi lya Leza. (Ba-Efeso 4:17-29; 5:1-5) Munzila imwi tunoopenzya muuya wa Leza, alimwi camasimpe eco ncecintu ncotuyandisya kweeleba. Akaambo kaceeci, ikuti umwi akati kesu watalika kuubya-ubya lulayo lwa Jwi lya Jehova, tulakonzya kutalika kubaa tumpenda tunga twatusololela kukubisya acaali alimwi akucinyonyweeda limwi cilongwe ncotujisi a Leza. (Ba-Hebrayo 6:4-6) Nokuba kuti inga katutali mukucita cibi lino, tulakonzya katuli munzila yakucita boobo kumbele. Kwiinda mukukazya kweendelezyegwaa muuya, tunoopenzya muuya. Alimwi tunookazya akuusisya Jehova nsoni, ikuzwa muuya uusalala. Mbotuyanda Leza, tatuyandi abuniini kucita boobo. Muciindi caboobo, tulakonzya kupailila lugwasyo lwa Jehova ikutegwa tutapenzyi muuya wakwe pele kuti tukonzye kupa bulemu kuzina lyakwe lisalala kwiinda mukuzumanana kubikkila maanu kumiyeeyo yamuuya.
Amuzumanane Kubikkila Maanu Kumiyeeyo Yamuuya
17. Nimbaakani nzi zyakumuuya nzyotunga twalibikkila, alimwi ino nkaambo nzi kucita boobo ncocili cintu cabusongo?
17 Inzila iiyandika kapati kutegwa tuzumanane kubikkila maanu kumiyeeyo yamuuya nkulibikkila mbaakani zyakumuuya alimwi akusoleka kuzizuzikizya. Kweelanaa zintu nzyotuyandika alimwi abukkale bwesu, imbaakani zyesu zilakonzya kubikkilizya kuyaambele muziyanza zyesu zyakwiiya, ikuyungizya ciindi ncotubeleka mumulimo naa kubelekela kuti tube acoolwe cimwi camulimo mbuli bupainiya bwaciindi coonse, mulimo waku Beteli naa wabumishinali. Eeci ciyoopa kuti mizeezo yesu kaizwide zintu zyakumuuya alimwi ciyootugwasya kutatobela kukompama kwesu kwabuntunsi naa kubikkila maanu kukuzuzikizya mbaakani zyabuvwubi alimwi azintu zimbi zitakulwaizigwi mumagwalo izidumide mubweende bwazintu obu. Kucita boobo masimpe ncintu cabusongo, kayi Jesu wakakulwaizya kuti: “Mutaliyobwedi lubono ansi ano, mpaabisya mapempya ankalaya, ababbi mpobatulula kuti babbe. Amuliyobwede lubono kujulu, nkwaatabisyi mapempya ankalaya, ababbi nkubatatululi kuti babbe. Nkaambo lubono lwako nkulubede, nkukonya oko nkuubede moyo wako.”—Matayo 6:19-21.
18. Nkaambo nzi ncociyandika kapati kuzumanana kubikkila maanu kumiyeeyo yamuuya kumazubaano aakumamanino?
18 Kubikkila maanu kumiyeeyo yamuuya alimwi akuzunda ziyanza zyanyika mmasimpe ninzila yabukkale yabusongo ‘kumazubaano aakumamanino.’ (2 Timoteo 3:1-5) Kunze lyaboobo, “nyika ilamana, azisusi zyayo, pele oyo uucita makanze aa-Taata [Leza] ulakalilila kukabe kutamani.” (1 Johane 2:15-17) Mucikozyanyo, ikuti Munakristo uucili mwana-mwana walibikkila mbaakani yamulimo waciindi coonse, eci inga camubeda busolozi bugwasya mumyaka iikatazya eelyo nayabukomena. Nasinikizigwa kucita cintu ncazyi kuti ncibi, imuntu uuli boobo unoobikkilide maanu aacintu ncakanzide kuzuzikizya mumulimo wa Jehova. Imuntu uubikkila maanu kuzintu zyakumuuya uuli boobo, uyoocibona kuti tacili camaanu kuleka kuzuzikizya mbaakani zyakumuuya akaambo kazintu zyakumubili naa kulikondelezya ikukulwaizigwaa cibi. Kamuyeeya kuti Musa iwakali kubikkila maanu kuzintu zyakumuuya lyoonse “wakasala kupenzegwa antoomwe abantu ba-Leza kwiinda kubotelwa misalo iimana buyo.” (Ba-Hebrayo 11:24, 25) Kunyina makani naa tucili bana naa tuli bapati, tusala kucita mbwaakacita eelyo notuzumanana kubikkila maanu kumiyeeyo yamuuya kwiinda kubikkila maanu kuzisusi zyanyama.
19. Nimpindu nzi njotuyoojana ikuti naa twazumanana kubikkila maanu kumiyeeyo yamuuya?
19 ‘Ikubikkila maanu kumiyeeyo yanyama mbusinkondonyinaa Leza,’ pele ‘kubikkila maanu kumiyeeyo yamuuya mbuumi, alimwi nduumuno.’ (Ba-Roma 8:6, 7) Ikuti twazumanana kubikkila maanu kumiyeeyo yamuuya, tunoolaa luumuno lutaliboteli. Imyoyo amizeezo yesu inookwabilidwe kabotu-kabotu kukoongelezya kwacibi. Tunoolibambilide ikukazya kutepaulwa mukucita zibi. Alimwi tunoojisi lugwasyo lwa Leza lunootuyumya mukulwisyanya ikuliko akati kamubili amuuya.
20. Nkaambo nzi ncotukonzya kusinizya kuti cilakonzyeka kuzwidilila mukulwisyanya kucitika akati kamubili amuuya?
20 Kwiinda mukuzumanana kubikkila maanu kumiyeeyo yamuuya, tunoojisi cilongwe cibotu a Jehova, ikuzwa buumi amuuya uusalala. (Intembauzyo 36:9; 51:11) Saatani Diabolosi ababelesinyina bali mukusoleka nzila zyoonse nzyobakonzya kuti banyonyoone cilongwe ncotujisi a Jehova Leza. Basola kweendelezya mizeezo yesu, mbwaanga balizi kuti naa twabatobela, mukuya kwaciindi eco ciyootupa kuba basinkondonyinaa Leza akutusololela kulufwu. Pele tulakonzya kuzwidilila mukulwisyanya kuliko akati kanyama alimwi amuuya. Mbocakabede obo kuli Paulo, mbwaanga naakalemba zyankondo njaakajisi lwakwe, wakasaanguna kubuzya kuti: “Ino nguni uukonzya kundivuna kumubili oyu walufu?” Mpoonya katondezya kuti nkwali uukonzya kumuvwuna, wakakankamuka ategwa: “Ngu-Leza. Ndamulumba kuli-Jesu Kristo Mwami wesu!” (Ba-Roma 7:21-25) Aswebo tulakonzya kumulumba Leza kwiinda muli Kristo kuti wakatupa nzila mbotunga twaliyumya mukukompama kwabuntunsi akuzumanana kubikkila maanu kumiyeeyo yamuuya kumwi katujisi bulangizi butaliboteli bwabuumi butamani kumbele.—Ba-Roma 6:23.
Sena Mulayeeya?
• Ino caamba nzi kubikkila maanu kumiyeeyo yamuuya?
• Mbuti mbotunga twazumizya muuya wa Jehova kutweendelezya?
• Amupandulule ncociyandika kapati kwiiya Bbaibbele, ikutobela milawo ya Jehova alimwi akupaila kulinguwe notulwana cibi.
• Mbuti kulibikkila mbaakani zyakumuuya mbokunga kwatugwasya kuzumanana munzila yabuumi?
[Mibuzyo yaciiyo]
[Cifwanikiso icili apeeji 14]
Ciiyo ca Bbaibbele citugwasya kuzunda zintu zitulwana munzila yakumuuya
[Cifwanikiso icili apeeji 15]
Ncintu ciyandika kupailila lugwasyo lwa Jehova kuti tuzunde zisusi
[Zifwanikiso izili apeeji 16]
Imbaakani zyakumuuya zilakonzya kutugwasya kuzumanana kubikkila maanu kumiyeeyo yamuuya