Basikwaambilizya Bwami Balaluula

India—“Lukamantano Akati Kabantu Baindene-Indene”

“LUKAMANTANO Akati Kabantu Baindene-Indene” nkaambyo kadumide ikabelesegwa kupandulula lukamantano lwabantu bamucisi ca India. Ikujana lukamantano mucisi eci cipati imuli bantu baindene-indene kujatikizya zilengwa, mwaambo, bukombi, luzubo, nsamino alimwi azyakulya tacili cintu cuuba-uba pe. Nokuba boobo, lukamantano luli boobo lulabonwa kumaofesi aabweendelezi aabakamboni ba Jehova mu India, nokuba kuti basikulisungula bakkala alimwi akubelekela nkuko bazwa muzisi azyooko zinji alimwi baambaula myaambo minji yiindene-indene.

• Atumuzyibe kabotu Rajrani—imwanakazi uucili mwana-mwana uuzwa ku Punjab, kunyika lwaambo kwini kwacisi ca India. Naakacili kwiiya Rajrani, umwi wabasicikolo mbocakali kwiiya limwi wakatalika kwiiya Bbaibbele a Bakamboni ba Jehova. Ooyu musimbi wakasola kukulwaizya Rajrani kwiiya Bbaibbele. Mbokunga oyu musimbi tanaakacizyi kabotu Cingisi alimwi Ngazi Yamulindizi teeyakalina talika kumwaigwa mumwaambo wa Cipunjabi aciindi eco, wakalomba Rajrani kuti kamugwasilizya kusandulula twaambo twakali mumagazini. Nzyaakabala Rajrani mu Ngazi Yamulindizi zyakatalika kumunjila kapati mumoyo akumukulwaizya kuyaambele kusikila limwi walyaaba kuli Jehova Leza akubbapatizigwa nokuba kuti wakali kukazigwaa bazyali bakwe. Mbwaanga sunu ubelekela ku Beteli yaku India, ucita mulimo nguwenya wakamujalula meso kukasimpe. Usandulula mabbuku aa Bunakristo kutola mumwaambo wa Cipunjabi!

• Alimwi atuzibe Bijoe, uuzwa kucibeela cimbi ca India—kucooko cili kumusanza lwaambo kwa Kerala. Bijoe wakatandwa kucikolo cakusekondali akaambo kakutatola lubazu muziyanza zyacisi. Nokakamana kaambo kakatola ciindi cilamfwu kunkuta, oomo mamanino mwaakali luzundo lwabukombi bwakasimpe, Bijoe wakapilukila kucikolo. * Alimwi wakazwidilila akutola lwiiyo lwakukkoleji. Nokuba boobo, ibukkale bwakutalilemeka bwakali aakkoleji bwakakatazya manjezeezyaakwe, aboobo wakacileka kwiiya kali muteemu yakusaanguna. Lino kakwiindide myaka iili kumi yakubelekela mu Beteli, ulimvwa kuti wajana mpindu kapati mbwali umwi wabantu baindene-indene pele bakamantene kabali mukwasyi wa Beteli kwiinda yeeyo njaakali kunoojana mukuzumanana lwiiyo lwaatala.

• Ba Norma alimwi a Lily balaamyaka yakuzyalwa yiinda kumakumi aali ciloba aumwi alimwi bakkala kabali bamukabafwu kwamyaka minji. Boonse babeleka kwamyaka yiinda kumakumi aali one mumulimo waciindi coonse. Lily wabeleka amutabi kwamyaka iisika kumakumi obile kali sikusandulula kutola mumwaambo uutegwa Tamil. Norma wakaunka kumutabi myaka iili kumi aitatu yainda naakafwidwa mulumaakwe. Kunze aakuba zitondezyo zibotu zyakuba basungu mumulimo alimwi babelesi balisungwide camoyo woonse, bagwasya kukulwaizya kubaa muuya mubotu walukamantano kumukwasyi woonse wa Beteli. Balabotelwa kusamausya beenzu alimwi balakkomana kuyanzanaa bakubusi bamumukwasyi akuluula kukondwa nkubajana mukubeleka kwamyaka minji mubukkale bwa Bunakristo. Abalo ibakubusi balakulwaizigwa ikubatamba mumaandaabo kutegwa bayanzane alimwi akubagwasya nokwayandika. Taziliboteli akaka zikozyanyo eezi!

Mbokunga bakauzunda muuya wakutamvwana uuleta lukazyanyo alimwi akuteendelana mumasena manji, basikulisungula aaba babelekela antoomwe cakubotelwa kukutaukila bamwi bali mumukwasyi uukamantene wa Beteli mu India.—Intembauzyo 133:1.

Bupanduluzi buyungizidwe

[Picture credit line on page 18]

Maapu iili kunze aamabala azifwanikiso: Mountain High Maps® Copyright © 1997 Digital Wisdom, Inc.