Kuswiilila—Sena Nciiyo Ciyandika Kapati Kubwana?

IMUTWE wamakani wamuteende umwi wakati, “Bazyali Bayanda Bana Baswiilila Ncobeni, Kutali Bainzya Buyo Mulawo.” Kuluula ooku kwakajanwa mubuvwuntauzi ibwakacitwa mucisi ca New Zealand, bwalo bwakayubununa kuti ibali buyo “22 pasenti yabaabo ibakaingula bakacibona kuti ncaamaanu kuyiisya bana kuswiilila aŋanda.” Alimwi buvwuntauzi oobu bwakatondezya kuti bazyali mazubaano baamba kuti cintu ciyandika kapati ikuyiisya bana makani akulilemeka kabotu, lwaanguluko alimwi amukuli ngobajisi.

Mazubaano aabusyaacivwulemwangu akuliyanda, tacigambyi kujana kuti bantu banji tababikkili maanu kumakani ajatikizya kuswiilila alimwi akukuyiisya bana babo. Pele sena kuswiilila kwamuntu ucili mwana ncintu ncotuteelede kubikkila maanu akucibona kuba cintu cikulukulu alimwi citacijisi mulimo? Antela ncintu icili akati kaziiyo ibana nzyobeelede kwiiya akugwasigwa anzizyo? Iciyandika kapati ncakuti, ino Jehova Leza Wakatalisya bubambe bwamukwasyi ukubona buti kuswiilila bazyali, alimwi ino kuswiilila ooku kulaampindu nzi?—Incito 17:28; Ba-Efeso 3:14, 15.

“Kucita Boobu Cililuleme”

Imwaapostolo Paulo wakalemba boobu kumbungano ya Banakristo bamumwaanda wamyaka wakusaanguna yaku Efeso: “Nobana, amuswiilile bazyali banu mu Mwami, nkaambo kucita boobu cililuleme.” (Baefeso 6:1, Ci) Aboobo, kaambo keni kuswiilila ncokuyandika nkakuti kuleendelanaa ceelelo ca Leza cakucita cintu ciluleme. Kweelanaa bwakaamba Paulo, “kucita boobu cililuleme.”

Kweelanaa kaambo aaka, tubona kuti ilulayo bazyali ndobapa caluyando kabajisi makanze aluleme, Ijwi lya Leza lilupandulula kuti lulikozyene acintu cibotezya, “zilaba ingala kumutwe wako, aluwenje munsingo yako,” alimwi cilaba cintu ‘cibotezya Mwami.’ (Tusimpi 1:8, 9; Ba-Kolose 3:20) Kwiindana aceeci, kutaswiilila bazyali kupa kuti muntu atakkomaninwi aa Leza.—Ba-Roma 1:30, 32.

‘Kuti Ukale Kabotu’

Paulo wakaamba abumbi bulumbu bwakali kukonzya kutambulwa akaambo kakuswiilila naakati: “Aka kapango kakuti, Lemya uso abanyoko, ngumulazyo mutaanzi uuyungizizigwa cisyomezyo. Kulaambwa kuti, Ukale kabotu akupona ciindi cilamfu ansi.” (Ba-Efeso 6:2,3; Kulonga 20:12) Ino muunzila nzi kuswiilila bazyali mokukonzya kupa kuti muntu awongole?

Cakusaanguna, sena taali masimpe kwaamba kuti bazyali bakapona ciindi cilamfwu alimwi kuti luzibo ndobajisi lulagwasya? Nokuba kuti inga balibonya kubula luzibo kujatikizya makkompyuta naa ziiyo zimwi ziyiigwa kucikolo, balizi mbokuponwa munyika alimwi amapenzi amubuumi mbwaakonzya kumanizigwa. Kulubazu lumwi, ibakubusi cilabaalila kucita zintu bweelede kweelanaa mizeezo iboola ciindi nobakomena. Aboobo, inga balafwambaana kusala zintu kabatanayeeya kabotu, kanjikanji balacita cintu zibyaabi akaambo kakuyungwa kubeenzinyina kwalo ikubanjizya mumapenzi ataambiki. Mubwini, Ibbaibbele lyaamba kuti: “Bufubafuba bulaangidwe mumoyo wamwana.” Ino  mbuti mbobukonzya kugwisigwa? “Musako wakukomya ulabutanda.”—Tusimpi 22:15.

Bulumbu bujanika mukuswiilila bazyali tabupi buyo cilongwe kubazyali amwana pe, pele bulainda aawo. Ikutegwa kube lusumpuko kakunyina manyongwe muciinga, kuyandika lukamantano lwalo lukonzya kuboola kwiinda mukuswiilila. Mucikonzyanyo, mulukwatano, ikubaa muuya wakulisungula mukucita zintu kutali kuyanda buyo kucitilwa kamutabikkili maanu kuli zyeezyo nzyobayanda bamwi alimwi ambobalimvwa, kulakonzya kuleta luumuno, kumvwana alimwi alukkomano. Kumilimo babelesi bayandika kulibombya munzila zyoonse ikutegwa bazwidilile muzintu nzyobacita. Kujatikizya milawo alimwi abweende naa bubambe bwamfwulumende, kuswiilila takupi buyo kuti muntu atasubulwi pe, pele cilatantamuna mapenzi kwamanawaawo cilaletela lukwabililo.—Ba-Roma 13:1-7; Ba-Efeso 5:21-25; 6:5-8.

Ibakubusi bataswiilili bweendelezi kanjikanji tabakkali kabotu muciinga. Mukwiimpana, kwiiya kuswiilila kutalikila kubwana kulakonzya kuzumanana kuzyala micelo mubuumi bwamuntu boonse. Elo kaka cilagwasya kwiiya kuswiilila kocili mwana!

Bulumbu Bupati Bwakuswiilila

Kuswiilila takuleteli buyo lukkomano mumukwasyi alimwi abulumbu bwakoongola pe, pele bulakonzya kubamba ntalisyo yakuba cilongwe cibotu ciyandika kapati—ikuyanzana akati kamuntu boonse alimwi a Mulengi wakwe. Mbwali “Mulengi” alimwi “mokabede kasensa kabuumi,” masimpe Jehova Leza tweelede kumuswiilila lyoonse.—Mukambausi 12:1; Intembauzyo 36:9.

Ibbala lyakuti “kuswiilila” lilajanika ziindi zinji munzila ziindene-indene mu Bbaibbele. Kunze lyaboobo, kuli myaanda-myaanda yamilawo, malailile, milazyo alimwi mbeta zya Leza zyalo ziyanda kuti katulibombya. Takudoonekwi buya kuti Leza uyanda kuti katumuswiilila kutegwa tumukkomanisye. Ee, kuswiilila ncintu ciyandika kapati mukubaa cilongwe a Jehova. (1 Samuele 15:22) Icuusisya ncakuti, tacili cilengwa cabo bantu ikuswiilila pe, pele cakutaswiilila. Ibbaibbele lyaamba kuti: “Miyeeyo yamoyo wamuntu mibi lyoonse kuzwa kubwanike bwakwe.” (Matalikilo 8:21) Aboobo, kwiiya kuswiilila takweelede kuyiigwa buyo muntu nacili muniini pe, pele kweelede kuzumanana mubuumi bwakwe boonse. Kucita boobo kuletela bulumbu bupati.

Amuyeeye kuti, ikweelanaa bwaamba mwaapostolo Paulo, makani ajatikizya kuswiilila bazyali alijisi zisyomezyo izili mumbazu zyobile izyakuti “Ukale kabotu akupona ciindi cilamfu ansi.” Kusinizya cisyomezyo eci kulajanika ku Tusimpi 3:1, 2 kuli majwi aakuti: “Mwanaangu, utalubi mulao wangu; moyo wako ujatisye malailile aangu; nkaambo koongola, amyaka yabuumi, aluumuno, zilakuletela ezi zyoonse.” Bulumbu bupati kuli baabo baswiilila mbwakubaa cilongwe cibotu a Jehova lino alimwi abuumi butamani munyika mpya yaluumuno.—Ciyubunuzyo 21:3, 4.

[Zifwanikiso izili apeeji 31]

Kuswiilila kuletela kumvwana mumukwasyi, kumilimo alimwi akuli Jehova