“Majwi aa Leza Akacili Kuzwida Anembo Mukumwaika Koonse-koonse”
“Majwi aa Leza Akacili Kuzwida Anembo Mukumwaika Koonse-koonse”
“Ulatuma makani aakwe ansi, ijwi lyakwe lilacijaana aluno.”—INTEMBAUZYO 147:15.
1, 2. Mmulimo nzi Jesu ngwaakapa basikwiiya bakwe, alimwi ino wakali kujatikizya nzi?
IBUSINSIMI bumwi bukankamanisya mu Bbaibbele bujanwa mubbuku lya Incito 1:8. Kakuceede ciindi cisyoonto buyo kuti apiluke kujulu, Jesu wakaambila basikumutobela basyomeka kuti: “Muyootambula nguzu, wasika alindinywe Muuya Uusalala, muyooba bakamboni bangu . . . mane kusikila kumamanino aanyika.” Elo kaka oyo wakali kuyooba mulimo uutalikomeneni!
2 Ikwaambilizya jwi lya Leza nyika yoonse kulibonya kuti wakali mulimo muyumu kuli basikwiiya abo basyoonto ibakatumwa. Amubone ncicakali kujatikizya. Bakeelede kugwasya bantu kuteelela makani mabotu aa Bwami bwa Leza. (Matayo 24:14) Alimwi ikuba bakamboni ba Jesu kwakali kujatikizya kupandulwida bantu njiisyo zyakwe alimwi amulimo ngwajisi mumakanze aa Jehova. Kunze lyaboobo, imulimo oyo wakali kubikkilizyaa kugwasya bamwi kuba basikwiiya alimwi akubabbapatizya. Alimwi imulimo oyu wakeelede kucitwa nyika yoonse mbwiizulwa!—Matayo 28:19, 20.
3. Ino Jesu wakabasyomezya nzi basikumutobela, alimwi ino bakaubona buti mulimo ngobakapegwa?
3 Nokuba boobo, Jesu wakabasyomezya basikumutobela kuti muuya uusalala uyoobagwasya mukubeleka mulimo ngwaakabapede. Aboobo, nokuba kuti mulimo oyo wakali mupati alimwi basikukazya bakazumanana kutegwa ulekwe, basikwiiya ba Jesu bakusaanguna bakacicita eco Jesu ncaakabalailila cakuzwidilila. Aaya mmakani aakacitika ncobeni aatakonzyi kukazigwa pe.
4. Mbuti luyando lwa Leza mbolwakatondezyegwa mumulimo wakukambauka akuyiisya bamwi?
4 Imulimo wakukambauka akuyiisya nyika yoonse cakali citondezyo caluyando lwa Leza kuli baabo ibatakamuzyi. Wakabapa coolwe cakuswenenena kuli Jehova alimwi akulekelelwa zibi zyabo. (Incito 26:18) Kunze lyaboobo, imulimo wakukambauka alimwi akuyiisya wakatondezya luyando lwa Leza kuli baabo ibajisi mulumbe mbwaanga wakabagwasya kutondezya mbobamuyandisya Jehova alimwi akutondezya luyando ndobajisi kubantunyina. (Matayo 22:37-39) Imwaapostolo Paulo wakaubikkila maanu kapati mulimo wa Bunakristo cakuti wakawaamba kuti ncintu “ciyandisi.”—2 Ba-Korinto 4:7.
5. (a) Nkukuli nkotujana makani aasinizidwe aajatikizya Banakristo bakusaanguna, alimwi ino nkuvwula kuli buti ikupandululwa oko? (b) Nkaambo nzi bbuku lya Incito ncolibagwasya ibabelesi ba Leza mazubaano?
5 Imakani aasyomeka aatondezya mulimo wabukambausi wa Banakristo bakusaanguna alajanika mubbuku lyakamunikilwaa muuya uusalala lya Incito lyalo lyakalembwaa sikwiiya Luka. Mmakani aatondezya kuvwula ikugambya alimwi kwakufwambaana. Ikuyaambele mukumwaigwa kwaluzibo lwa Jwi lya Leza oku kutuyeezya bbuku lya Intembauzyo 147:15 lyaamba kuti: “[Jehova] ulatuma makani aakwe ansi, ijwi lyakwe lilacijaana aluno.” Imakani aajatikizya Banakristo bakusaanguna ibakayumizigwaa muuya uusalala alatukkomanisya alimwi akutugwasya mazubaano. Bakamboni ba Jehova bacita mulimo ngoonya wakukambauka akugwasya bamwi kuba basikwiiya, nkuti buyo balo baucita mumasena manji. Alimwi aswebo tulasikilwa mapenzi mbuli aakajisi Banakristo mumwaanda wamyaka wakusaanguna. Notulanga-langa makani aambuli mbwaakabalongezya Jehova akubayumya-yumya Banakristo bakusaanguna, lusyomo lwesu mulugwasyo ndwapa lulayumizigwa.
Ikuvwula Kwabasikwiiya
6. Nkaambo nzi ikajanika ziindi zyotatwe mubbuku lya Milimo kajatikizya kumwaika, alimwi ino kaamba nzi?
6 Inzila imwi njotunga twabelesya mukulanga-langa kuzuzikizigwa kwa Incito 1:8 njeeyo yakukalangisya kaambo kakuti “majwi aa Leza akacili kuzwida anembo mukumwaika koonse-koonse,” ikaambo kajanika kakuli kwiimpana kuniini iziindi zyotatwe buyo mu Bbaibbele alimwi ikajanika buyo mubbuku lya Milimo. (Milimo 6:7; 12:24; 19:20, Ci) “Majwi aa Leza” naa “Majwi aa Mwami” aambwa muzibalo ezi aamba makani mabotu—imulumbe uukulwaizya wakasimpe ka Leza, imulumbe uulaa buumi, ulaanguzu iwakacinca bukkale bwabaabo ibakautambula.—Ba-Hebrayo 4:12.
7. Ino kumwaika kwa jwi lya Leza kuswaanganizidwe anzi ku Milimo 6:7, alimwi ino ncinzi cakacitika mubuzuba bwa Pentekoste mu 33 C.E.?
7 Imakani mataanzi aamba zyakumwaika kwa jwi lya Leza ajanika ku Milimo 6:7. Ooko tubala kuti: “Nkabela Majwi aa Leza akamwaika koonse-koonse, awalo mweelwe wabasyomi wakali kuya buvula akukomena mu Jelusalemu. Abalo bapaizi banji bakasyoma.” Aawa kumwaika kuliswaangene akuvwula kwabasikwiiya. Musyule, lyabuzuba bwa Pentekoste mu 33 C.E., imuuya wa Leza uusalala wakatilwa kuli basikwiiya ibasika ku 120 ibakabungene muŋanda imwi yamujulu. Aciindi awo imwaapostolo Petro wakakanana makani aakulwaizya kapati, alimwi akati kabaabo ibakaswiilila, ibali 3,000 bakasyoma mubuzuba obo mboonya. Kulangilwa kuti kwakali kwiilingana kupati kaka eelyo zyuulu-zyuulu zyabantu nobakaunka kuziba naa kumaziba aamaanzi aakali mu Jerusalemu kuyoobbapatizigwa muzina lya Jesu, imwaalumi wakakankamidwe mbuli cigwebenga imazuba aali 50 musyule!—Incito 2:41.
8. Mbuti basikwiiya mbobakavwula mumyaka yakumbele kuzwa lya Pentekoste mu 33 C.E.?
8 Pele aayo akali ngamatalikilo buyo. Ikusoleka kulesya mulimo wakukambauka ikwakacitwaa beendelezi bazikombelo bana Juda tiikwakazwidilila pe. Cakabatyompya beendelezi aaba ikubona kuti “buzuba abuzuba Mwami wakali kuyungizya [kuli basikwiiya] bamwi bakafutulwa.” (Milimo 2:47, Ci) Ndilyonya, “mweelwe wabaalumi basyomi wakatisike kuzyuulu zyosanwe.” Kuzwawaawo, “bantu banji-banji baalumi abakaintu abalo bakali kuyungizigwa ku Mwami.” (Milimo 4:4; 5:14) Nokwakainda ciindi, tubala kuti: “Imbungano yamu-Judaya moonse, amu-Galilaya, amu-Samariya, yakaba aluumuno akuyumizigwa, alimwi yakayungililwa mboyakali kweenda akumuyoowa Mwami akubotezegwa Muuya Uusalala.” (Incito 9:31) Imyaka yakatobela, ambweni kuma 58 C.E., kwakaambwa “[zya]zyuulu-zyuulu zya Bajuda basyoma.” (Milimo 21:20) Kuciindi eco, kwakali basyomi banji Bamasi.
9. Ino Banakristo bakusaanguna inga mwabaamba kuti bakali bantu bali buti?
9 Ikuvwula kwabasikwiiya oku kwakacitika ikapati kwiinda mukusandulwa buya. Ibukombi bwakali bupya—pele basicikombelo bakali bankutwe kapati. Muciindi cakuba basicikombelo batolo, basikwiiya bakali bankutwe mukubelekela Jehova akutobela Jwi lyakwe, zimwi ziindi bakaiya kasimpe kuli baabo ibakali kupenzegwa kapati. (Incito 16:23, 26-33) Aabo ibakaba Banakristo bakacita obo kwiinda mukusala nkobakacita nobakamana kusalalilwa makani oonse. (Ba-Roma 12:1) Bakayiisigwa munzila zya Leza; ikasimpe kakali mumizeezo alimwi amumyoyo yabo. (Ba-Hebrayo 8:10, 11) Bakalilisungwide kufwida zintu nzyobakali kusyoma.—Incito 7:51-60.
10. Mmukuli nzi Banakristo bakusaanguna ngobakazumina, alimwi ino mmulimo nzi uukozyenye awooyo uucitwa sunu?
10 Aabo ibakatobela njiisyo zya Bunakristo bakauzyiba mukuli ngobakajisi wakwaambila bambi kasimpe. Eeci cakapa kuti kuvwula kwabasikwiiya kuzumanane. Sikwiiya Bbaibbele umwi wakati: “Ikwaambila bamwi lusyomo lujisi muntu tiikwakali kubonwa kuba coolwe cabaabo bankutwe buyo naa basalidwe kuba bavangeli. Kukambauka wakali mulimo waalubazu wasicikombelo woonse. . . . Ikuyandisisya kwa Banakristo boonse nkobakacita cakufwambaana kwakayumya Bunakristo kuzwa kumatalikilo kwini.” Alimwi wakalemba kuti: “Kukambauka cakali ncecintu cipati aakajisilidi Banakristo bakusaanguna.” Ncimwi buyo asunu kujatikizya Banakristo beni-beni.
Ikuvwula Kwazyooko
11. Nkuvwula kuli buti ikwaambwa kubbuku lya Milimo 12:24, alimwi ino eci cakacitika buti?
11 Ibusena bwabili ikujanwa makani aakumwaika kwa jwi lya Leza bujanika ku Milimo 12:24: “Majwi aa Leza akacili kuzwida anembo mukumwaika koonse-koonse.” Aawa ikaambo aka kaliswaangene akuvwula kwazyooko. Nokuba kuti kwakali kukasigwaa mfwulumende, imulimo wakazumanana kuyaambele. Imuuya uusalala kusaanguna wakatilwa mu Jerusalemu, alimwi kuzwa kooko imajwi aa Leza akamwaika koonse-koonse cakufwambaana. Ikupenzyegwa ikwakali mu Jerusalemu kwakapa kuti basikwiiya bamwaikizyanye muzyooko zyoonse zyamu Judaya alimwi amu Samariya. Ino cakacitika ncinzi? “Aabo bakamwaikide, bakainka koonse-koonse kuya bukambauka Mulumbe Mubotu.” (Milimo 8:1, 4) Filipo wakasololelwa kuti akambaukile mwaalumi umwi, eelyo ooyo naakazwaa kubbapatizigwa iwakatola mulumbe kucisi ca Etiopiya. (Incito 8:26-28, 38, 39) Cakufwambaana ikasimpe kakamwaika mu Luda, Mweezi wa Sarona alimwi aku Jopa. (Incito 9:35, 42) Kumbele, imwaapostolo Paulo wakeenda musinzo wazyuulu-zyuulu zyamakkilomita mulwizi amumigwagwa, kaya bubamba mbungano muzisi zinji zyeengelede lwizi lwa Mediterranean. Imwaapostolo Petro wakaunka ku Babuloni. (1 Petro 5:13) Mumyaka iili buyo 30 kuzwa nowakatilwa muuya uusalala lya Pentekoste, Paulo wakalemba kuti makani mabotu “akakambaukilwa bantu boonse baansi ano.” Ibantu aba balangilwa kuti mbaabo bakali mumasena aakazizyilwe kuciindi eco.—Ba-Kolose 1:23.
12. Mbuti basikukazya Bunakristo mbobakazumina kuti jwi lya Leza lyakamwaikizyanya muzyooko zinji?
12 Nobaba basikukazya Bunakristo bakazuminizya kwaamba kuti ijwi lya Leza lyakalimwaikide mu Bulelo bwaba Roma boonse. Mucikozyanyo, ibbuku lya Incito 17:6 lyaamba kuti ku Tesalonika, icisi caba Giliki nkocili kunyika, basikukazya bakoompolola kuti: “Abo abasandamuna nyika basika akookuno.” Kunze lyaboobo, kumatalikilo kwamwaanda wamyaka wabili, iwakali kutegwa Pliny Musyoonto wakalembela Muleli wa Roma Trajan kuzwa ku Bituniya kaamba Bunakristo. Wakatongooka kuti: “Tamuli buyo mumadolopo pe, pele bwamwaikizyanya amuminzi azisi zyeengelede.”
13. Muunzila nzi ikuvwula kwazyooko nkolyakasika jwi mbokwakatondezya luyando ndwajisi Leza kubantu?
13 Ikumwaika kwajwi muzyooko zinji cakali citondezyo caluyando lwa Jehova lupati kubantu bakonzya kufwutulwa. Petro naakabona muuya uusalala kaubeleka kumuntu Wabamasi Korneliyo, wakati: “Nkasimpe ndabona kuti Leza talangi ciimo camuntu, pele mumasi oonse uumuyoowa akucita bululami ulatambulwa kulinguwe.” (Incito 10:34, 35) Imakani mabotu mbubwenya mbuli sunu wakali mulumbe wakeelede kusikila bantu boonse, alimwi ikuvwula kwazyooko nkolyakamwaikila jwi lya Leza kwakapa kuti bantu koonse-koonse bajane coolwe cakuzumina luyando lwa Leza. Mumwaanda wamyaka uno wa 21, ijwi lya Leza lyamwaika kumasena oonse munyika.
Ikuvwula Kwakabaa Nguzu
14. Nkuvwula kuli buti ikupandululwa kubbuku lya Milimo 19:20, alimwi ino ijwi lya Leza lyakazunda nzi?
14 Ibusena bwatatu bujatikizya kumwaika kwa jwi lya Leza bujanwa ku Milimo 19:20: “Majwi aa Mwami akali kuya bumwaika akubeleka canguzu.” Ibbala lini lya Cigiliki lisanduludwe kuti “canguzu” lipandulula “kulitakata canguzu zyoonse mumulimo.” Itupango twamusyule tupandulula kuti ibanji mu Efeso bakasyoma, alimwi ibali mbobabede ibakali basimabibo bakaumpa mabbuku aabo kabalangilila bantu boonse. Aboobo ijwi lya Leza lyakazunda njiisyo zyabukombi bwakubeja. Alimwi makani mabotu akazunda zisinkilizyo zimbi mbuli kupenzegwa. Kunyina cakali kukonzya kulikasya. Amumakani aya tujana kweendelana kupati a Bunakristo bwini-bwini bwamazubaano.
15. (a) Ncinzi sikwiiya makani aa Bbaibbele aakaindi umwi ncaakaamba kujatikizya Banakristo bakusaanguna? (b) Ino basikwiiya bakalumbaizya ni kujatikizya kuzwidilila kwabo?
15 Ibaapostolo alimwi a Banakristo bambi bakusaanguna bakaambilizya jwi lya Leza cabunkutwe. Kaamba mbabo, sikuluula makani aakaindi aa Bbaibbele wakati: “Ibantu nobakanzide kwaamba makani aa Mwami wabo, bajana nzila zinji mbobakonzya kucita boobo. Masimpe, mbusungu bwabaalumi abanakazi aaba mbotuli mukulombozya ikwiinda nzila nzyobakabelesya.” Nokuba boobo, aabo Banakristo bakusaanguna bakalizyi kuti ikuzwidilila kwamulimo wabo tiikwakaba akaambo kanguzu zyabo beni pe. Bakali kucita mulimo wa Leza alimwi Leza nguwakali kubagwasya kuucita. Ikuyaambele munzila yakumuuya kweendelezyegwaa Leza. Imwaapostolo Paulo wakacaamba eci mulugwalo ndwaakalembela mbungano yaku Korinto. Wakalemba kuti: “Mebo ndakazikila, Apolo nguwakatililila, pele Leza nguwakamenya. Nkaambo tuli basimilimonyina Leza.”—1 Ba-Korinto 3:6, 9.
Muuya Uusalala uli Mukubeleka
16. Ncinzi citondezya kuti muuya uusalala wakabapa nguzu basikwiiya zyakuti bakanane cabusicamba?
16 Amuyeeye kuti Jesu wakasyomezya basikwiiya bakwe kuti muuya uusalala wakali kunoojisi mulimo mukumwaika kwa jwi lya Leza alimwi akuti muuya uusalala wakali kunoobayumya basikwiiya mumulimo wabo wakukambauka. (Incito 1:8) Ino eci cakacitika buti? Kakutanainda ciindi cilamfwu kuzwa lya Pentekoste imuuya nowakatilwa kuli basikwiiya, Petro a Johane bakaitwa kuti bakalungulule ku Nkuta Mpati yaba Juda yakabambidwe ababetesi bakajisi mulandu wakujaya Jesu Kristo. Sena baapostolo bakakankama kuyoowa kwalo akaambo kabantu abo basilunya alimwi babyaabi? Peepe! Muuya uusalala wakabayumya ba Petro a Johane kukanana cabusicamba kapati cakuti basinkondonyina bakagambwa, mane “ba[ka]baziba kuti ba[ka]li kweenda a-Jesu.” (Incito 4:8, 13) Alimwi muuya uusalala wakapa kuti Stefano abakambaukile cabusicamba bamu Nkuta Mpati. (Incito 6:12; 7:55, 56) Musyule, muuya uusalala wakabakulwaizya basikwiiya kukambauka cabusicamba. Luka uluula kuti: “Lino nobakamana kukomba, cibunganino cabo cakazungaanizigwa, elyo boonse bakazuzigwa Muuya Uusalala, nkabela bakatalika kwaamba makani aa-Leza akaanzambwene.”—Incito 4:31.
17. Muunzila nzi zimbi basikwiiya mobakagwasigwaa muuya uusalala mumulimo wabo?
17 Kwiinda mumuuya wakwe uusalala ulaanguzu kapati, Jehova antoomwe a Jesu uubusidwe bakuuyendelezya mulimo wakukambauka. (Johane 14:28; 15:26) Imuuya nowakatilwa ali Korneliyo, aabasazinyina alimwi abalongwe bakwe, imwaapostolo Petro wakazyiba kuti bantu Bamasi batapaludwe abalo bakali kweelela kubbapatizigwa muzina lya Jesu Kristo. (Incito 10:24, 44-48) Kumbele imuuya wakajisi mulimo mupati mukusala Barnaba alimwi a Saulo (imwaapostolo Paulo) kunjila mumulimo wabumishinali alimwi amukubeendelezya nkobakeelede kuunka ankobatakeelede. (Incito 13:2, 4; 16:6, 7) Muuya wakeendelezya nzila zyakabelesegwa mukusala kwabaapostolo alimwi abapati bamu Jerusalemu. (Incito 15:23, 28, 29) Alimwi muuya uusalala wakeendelezya kubikkwa kwabalangizi mumbungano ya Bunakristo.—Incito 20:28.
18. Mbuti Banakristo bakusaanguna mbobakalutondezya luyando?
18 Kunze lyaboobo, imuuya uusalala wakabeleka mu Banakristo beni, wakabapa kuti babe abube bwabunaleza mbuli luyando. (Ba-Galatiya 5:22, 23) Luyando lwakakulwaizya basikwiiya ikwaabana zintu nzyobakajisi abeenzinyina. Mucikozyanyo, noyakainda Pentekoste yamu 33 C.E., nkomo yamali aakubelesya Banakristo boonse yakatalisigwa ikutegwa igwasilizye mukujana zintu zyakumubili nzyobakali kuyandika basikwiiya ibakali mu Jerusalemu. Ibbaibbele lyaamba kuti: “Lino kakutakwe muntu akati kabo uwakabula cintu, nkaambo kakuti boonse abakajisi myuunda na maanda bakazyuuzya, bakaleta mali aamakwebo, baabika kumaulu aabaapostolo, elyo umwi aumwi wakaabilwa mbubonya mbwaakabulide.” (Incito 4:34, 35) Luyando olu tiilwakatondezyegwa buyo kubasyominyina, pele akuli bambi kwiinda mukubaambila makani mabotu abalo alimwi akubacitila milimo yaluzyalo iimbi. (Incito 28:8, 9) Jesu wakaamba kuti luyando lwakulyaaba lwakali kuyoozibya basikumutobela. (Johane 13:34, 35) Masimpe ibube buyandika kapati nduyando lwalo lwakapa kuti bantu baswene kuli Leza alimwi bwakagwasilizya mukuvwula kwakacitika mumwaanda wamyaka wakusaanguna mbubwenya mbuli mbokucitika sunu.—Matayo 5:14, 16.
19. (a) Muunzila nzi zyotatwe jwi lya Jehova molyakamwaika mumwaanda wamyaka wakusaanguna? (b) Ncinzi ncotutiikalange-lange mucibalo citobela?
19 Antoomwe, ikaambo kakuti “muuya uusalala” kalajanika ziindi zili 41 mubbuku lya Incito. Cakutadooneka, ikumwaika kwa Bunakristo bwini-bwini mumwaanda wamyaka wakusaanguna kwakaliswaangene anguzu alimwi abusolozi bwamuuya uusalala. Basikwiiya bakavwula, ijwi lya Leza lyakamwaika muzyooko zinji alimwi lyakazunda njiisyo zyabukombi alimwi azyabusyaabusongo bwakuciindi eco. Ikuvwula kwamumwaanda wamyaka wakusaanguna oko kulikozyenye azicitika mumulimo wa Bakamboni ba Jehova mazubaano. Mucibalo citobela, tulalanga-langa kuvwula kupati kukondelezya kwacitika akaambo kakumwaika kwa jwi lya Leza mazubaano.
Sena Mulayeeya?
• Ino basikwiiya bakusaanguna bakavwula buti?
• Muunzila nzi ijwi lya Leza molyakamwaika muzyooko zinji?
• Ino ijwi lya Leza lyakazunda buti mumwaanda wamyaka wakusaanguna?
• Mmulimo nzi muuya uusalala ngowakabeleka mukumwaigwa kwa jwi lya Leza?
[Mibuzyo yaciiyo]
[Cifwanikiso icili apeeji 22]
Filipo wakakambaukila muna Etiopiya, aboobo makani mabotu akamwaika muzyooko zimbi
[Cifwanikiso icili apeeji 23]
Muuya uusalala wakasololela baapostolo alimwi abapati ibakali mu Jerusalemu
[Nkotwakajana cifwanikiso icili apeeji 20]
Lubazu lwakululyo atala: Cifwanikiso cambowakabede Munzi wa Jerusalemu muciindi ca Tempele Lyabili – calo icili mumbuwa zya Hotela lya Holyland ku Jerusalem