Zilongezyo zya Bwami Zilakonzya Kuba Zyanu

IMWAAPOSTOLO Munakristo Paulo wakali kupasaula mukwaambaula myaambo imwi mipati-pati yakuciindi cakwe. Lwiiyo ndwakajisi lweelene buyo alwaku yunivesiti imazubaano. Wakalijisi zyoolwe zinji alimwi anguzu zyamumulawo zyakajisi sicisi muna Roma woonse. (Incito 21:37-40; 22:3, 28) Eezi zyoolwe nozyakamupa kuti avwube alimwi akubaa mpuwo. Pele wakati: “Kufumbwa zintu izyakali kundetela impindu, sunu ndaziyeeya kuti nzyabuyo . . . nkaambo kacintu eci ciinda loko kubota cakuziba Jesu Kristo . . . ndaziyeeya kuti masifwisifwi buyo mukuyanda kuti njane Kristo.” (Ba-Filipi 3:7, 8) Nkaambo nzi Paulo ncakaambila boobo?

Paulo, iwakazibidwe kuti ngu Saulo waku Tarso alimwi wakali sikupenzya baabo “benzila eyi,” wakazooba musyomi naakapegwa cilengaano ca Jesu uubusidwe mubulemu bwakwe. (Incito 9:1-19) Paulo, eci cakamucitikila mumugwagwa waku Damasko cakamupa kusinizya kuti Jesu ngowakali Mesiya wakasyomezedwe naa Kristo wakali kuyooba mweendelezi wa Bwami bwakasyomezedwe. Eeci alimwi cakaleta kucinca kugambya mubuumi bwa Paulo boonse mbubonya mbuli majwi aakwe ngaakakanana canguzu aatondezyegwa atalaawa. Munzila imwi, mbwaakali muntu uusyomeka alimwi mubombe moyo, Paulo wakeempwa.—Ba-Galatiya 1:13-16.

Mu Bbaibbele, ibbala  icciti lyakuti “amweempe” ikanjikanji lisandululwa kuzwa kubbala lya Cigiliki lyalo ilyaamba “wamana kuzyiba” mukwiimpanaa “kuzyibila limwi.” Aboobo kweempwa kujatikizya kucinca kwamiyeeyo yamuntu, ciimo naa makanze alimwi akuleka bukkale bwakaindi bubyaabi akutabukkomanina limbi. (Incito 3:19; Ciyubunuzyo 2:5) Paulo tanaakaleka cintu cipati eco cakacitika mumugwagwa waku Damasko kuti cibe buyo cintu cakamunjila mumizeezo naa kuba buyo cakuluula cakumuuya. Walo eci cakamupa kujaluka mizeezo akuzyiba kuti bukkale bwakwe bwakaindi katanaziba Kristo bwakanyina mpindu. Alimwi wakazyiba kuti, ikutegwa ajane mpindu kuluzibo lupya ndwaakajana kujatikizya Kristo, wakaleelede kubweza ntaamu zyakucinca bukkale bwakwe.—Ba-Roma 2:4; Ba-Efeso 4:24.

Ikucinca Kwakaleta Zilongezyo

Luzibo lunji Paulo ndwaakajisi musyule kujatikizya Leza lwakazwide kunkamu yaba Farisi, kwalo nkwaakali umwi wanjiyo. Lusyomo lwabo lwakali kubikkilizya busongo azilengwa zyabantu zinji. Akaambo kakutamvwana mubukombi, busungu bwa Paulo alimwi anguzu zyakwe zyakalubila. Nokuba kuti wakali kuyeeya kuti waali kubelekela Leza, mubwini wakali kumulwana.—Ba-Filipi 3:5, 6.

Naakabaa luzibo lwini-lwini kujatikizya Kristo alubazu ndwajisi mumakanzaa Leza, Paulo wakabona kuti wakeelede kusala: Sena wakeelede kuti azumanane kali mu Farisi akubotelwa zyuuno abulemu, naa kuti acince buumi bwakwe akutalika kucita kufwumbwa ziyandika kuti azuminwe kuli Leza? Mucoolwe, Paulo wakasala kabotu, nkaambo wakati: “Nsiusi insoni ku-Makani Mabotu aa-Kristo pe, nkaambo ninguzu zya-Leza zyakufutula boonse basyoma, kukusaanguna ba-Juda, elyo ba-Helene abalo.” (Ba-Roma 1:16) Paulo wakaba mukambausi uusungweede wamakani mabotu aa Bwami aajatikizya Kristo.

Kumbele kakwiindide myaka minji, Paulo wakaambila Banakristonyina kuti: “Nsiyeeyi kuti ndicijene kale, pe, pele cintu comwe ncencita nceeci. Ndaziluba zintu zili musule, ndadunamina zintu zili kunembo, aboobo nja bubindaanina kumagolelo, kuti nkajane bulumbu bwakujulu mbwatwiitila Leza muli-Kristo Jesu.” (Ba-Filipi 3:13, 14) Paulo wakajana mpindu kumakani mabotu nkaambo cakulisungula wakazileka ezyo zyakali kumulesya kubelekela Leza alimwi camoyo woonse wakacita zintu zyakali kweendelanaa makanze a Leza.

Ino Ncinzi Ncomunga Mwacita?

Antela mwakazwa kwaamvwa caino-ino makani mabotu aa Bwami. Sena bulangizi bwakupona kukabe kutamani muparadaiso iilondokede bulamubotela? Cileelede kuba boobo nkaambo toonse twakazyalwa katujisi kulombozya kwakupona akubotelwa abuumi muluumuno alimwi akuliiba. Ibbaibbele lyaamba kuti Leza wabika, “buumi buteeli “ mumyoyo yesu. (Mukambausi 3:11) Aboobo ncilengwa cakuzyalwaancico buya kulangila ciindi eelyo bantu nobaya kupona kukabe kutamani muluumuno amulukkomano. Alimwi oyo ngomulumbe makani mabotu aa Bwami ngoujisi.

Nokuba boobo, ikuti bulangizi obu bube bwini-bwini muleelede kuvwuntauzya akujana cijatikizidwe mumakani mabotu. Imwaapostolo Paulo wakalailila kuti: “Mukasimpikile makani ngaayanda Leza, makani mabotu aatambulika aalondokede.” (Ba-Roma 12:2) Aboobo mbubonya mbuli Paulo, mwamana kubaa luzibo akuteelelesya, mweelede kusala cakucita.

Kulubazu lumbi, mulakonzya kamujisi njiisyo zyabukombi zimwi kujatikizya buumi bwanu bwakumbele. Amuyeeye kuti Saulo wakalaa mizeezo yakwe kujatikizya luyando lwa Leza katanaba mwaapostolo Paulo. Pele muciindi cakulangila maleele kuzwa kuli Leza, ino kayi mulekela nzi kwaalanga munzila yeelede makani aya? Amulibuzye kuti: “Sena ndilaazi ncobeni makanze aa Leza kujatikizya bantu alimwi anyika? Mbumboni nzi mbondikonzya kupa kwiiminina lusyomo lwangu? Sena bumboni bwangu inga teebwazungaana kuti bwalangwa-langwa kweelanaa caamba Jwi lya Leza, Ibbaibbele?” Kwiinda mukulanga-langa njiisyo zyabukombi bwanu munzila iili boobu, muyoozwidilila alimwi kunyina ncomuyoosowa pe. Masimpe mweelede kuyandisisya kucita boobu nkaambo Ibbaibbele likulwaizya kuti: “Amukasunke zintu zyoonse  mbuzibede, kuti mujatisye zibotu.” (1 Ba-Tesalonika 5:21) Alimwi sena takuli kuzuminwaa Leza ikuyandika kapati?—Johane 17:3; 1 Timoteo 2:3, 4.

Basololi babukombi balakonzya kutusyomezya kuti kuli buumi butamani kumbele. Pele ccita kuti cisyomezyo eco kaciyeeme aanjiisyo zyamu Bbaibbele, tacikooyootugwasya pe kujana zilongezyo zya Bwami bwa Leza. Mu Mulumbe wakwe waa Cilundu uudumide, Jesu wakacenjezya canguzu ulaamba: “Boonse bandaambila kuti, Mwami, mwami, teensi mbabo bayoonjila mu-Bwami bwakujulu, ngooyo uucita luyando lwa-Taata uuli kujulu.”—Matayo 7:21.

Amubone kwaamba kuti Jesu wakakankaizya kapati aakucita luyando lwa Usyi kuba ceelelo ciyandika kukutambula zilongezyo zya Bwami bwa Leza. Munzila imwi, icikonzya kulibonya kuba cabunaleza mubwini inga teecazuminwa a Leza. Alimwi Jesu wakayaambele kwaamba kuti: “Kubuzuba obo banjibanji bayoondaambila kuti, Mwami, mwami, sa teetwakasinsima kuzina lyako? alimwi, sa teensi kuzina lyako nkutwakatanda badaimona? Sa teensi kuzina lyako nkutwakacita milimo mipati minji? Lino nzoobaambila kuti, Nsimuzi pe, amuzwe kulindime inywe nubamucita zibi.” (Matayo 7:22, 23) Camasimpe, iciyandika kapati nkubona kwaamba kuti twaazyiba kabotu-kabotu makani mabotu aa Bwami akwaatobela.—Matayo 7:24,25.

Lugwasyo Nkoluli

Kwamyaka yiinda kumwaanda, Bakamboni ba Jehova bali kukambauka makani mabotu aa Bwami bwa Leza. Kwiinda mukubelesya mabbuku alimwi akukanana abantu, bali mukugwasya bantu nyika yoonse kujana luzibo lwini-lwini kujatikizya Bwami, zilongezyo nzyobuyooleta alimwi ancayelede kucita muntu kuti akazijane zilongezyo ezyo.

Tumukulwaizya kuti muuteelele mulumbe uuli mukukambaukwaa Bakamboni ba Jehova. Kwiinda mukutambula makani mabotu akucita ncaamba, mulakonzya kutambula zilongezyo zipati—kutali lino lyalo pe, pele akumbele eelyo Bwami bwa Leza bwakweendelezya nyika yoonse.—1 Timoteo 4:8.

Amubweze ntaamu lino nkaambo zilongezyo zya Bwami bwa Leza zili afwaafwi!

[Zifwanikiso izili apeeji 7]

Kwiinda mukubelesya mabbuku alimwi akukananaa bantu, Bakamboni ba Jehova balakambauka makani mabotu aa Bwami bwa Leza