Amuzumanane Kamukkomene Lyoonse Mumulimo wa Jehova
Amuzumanane Kamukkomene Lyoonse Mumulimo wa Jehova
“Amusekelele mu-Mwami lyoonse. Ee, ndaamba lwabili eli ijwi lyakuti, Amusekelele”—BA-FILIPI 4:4.
1, 2. Mbuti mukwesu umwi amukwasyi wakwe mbobakacikonzya kuzumanana kabakkomene nokuba kuti bakanyonyookelwa zyoonse nzyobakajisi?
IMUNAKRISTO umwi wamyaka yakuzyalwa iili 70 uukkala kucisi ca Sierra Leone wazina lyakuti James, wali kubeleka canguzu mubuumi bwakwe boonse. Amweezeezye lukondo ndwaakajisi eelyo naakacikonzya kujana mali aakuula ŋanda iitaduli kapati iijisi maanda one mukati! Pele, nokwakainda ciindi cili mbocibede kuzwa leelyo James amukwasyi wakwe nobakalongela muŋanda eyo, kwakabuka nkondo mucisi eeco, aboobo ŋanda yabo yakaumpwa akunyonyookela limwi. Bakanyonyookelwa ŋanda yabo pele kukondwa kwabo tiikwakamana pe. Ino nkaambo nzi?
2 James amukwasyi wakwe bakagamikide mizeezo yabo ikutali aazintu nzyobakanyonyookelwa, pele kuli zeezyo nzyobakacijisi. James upandulula kuti: “Nomuba muciindi camapenzi aataambiki, twakali kuswaangana, kubala Bbaibbele, kupaila antoomwe alimwi twakali kwaabana abambi kufwumbwa kusyoonto nkotwakajisi. Twakazumanana katukkomene akaambo kakuti twakabikkila maanu kucilongwe citaliboteli ncotujisi a Jehova.” Kwiinda mukuyeeya zintu zibotu nzyobakajisi, icipati kwiinda zyoonse kacili cilongwe cibotu cigaminide a Jehova, aaba Banakristo basyomeka bakacikonzya kuzumanana ‘kusekelela.’ (2 Ba-Korinto 13:11) Ee, tiicakali cuuba-uba pe ikuliyumya mubukkale bwamapenzi oobo. Pele tiibakaleka kusekelela muli Jehova.
3. Mbuti Banakristo bakusaanguna bamwi mbobakazumanana kabakkomene?
3 Ibanakristo bakusaanguna abalo bakainda mumasukusyo mbuli aakacitikila James amukwasyi wakwe. Nokuba boobo, imwaapostolo Paulo wakalembela Banakristo bana Hebrayo majwi aaya aakuti: “Mwakali kumweta-mweta nomwakali kunyangwa lubono lwanu.” Mpoonya Paulo wakapandulula kaambo kakabapa kuti kabakondwa ategwa: “Nkaambo kakuti mwakalizi kuti mulijisi lubono lumbi lubotu lutamani.” (Ba-Hebrayo 10:34) Inzya, aabo Banakristo bamumwaanda wamyaka wakusaanguna bakajisi bulangizi busumbula. Cakusyomeka bakali kulangila kuyootambula cimwi catakali kunga canyonyoonwa—“musini wabuumi” butamani mu Bwami bwa Leza bwakujulu. (Ciyubunuzyo 2:10) Sunu, ibulangizi bwesu bwa Bunakristo kunyina makani naa mbwakujulu naa mbwaanyika, bulakonzya kutugwasya kuzumanana katukkomene neliba leelyo notuli mumapenzi.
“Amukondwe Mubulangizi Bwanu”
4, 5. (a) Nkaambo nzi lulayo lwa Paulo lwakuti “amukondwe mubulangizi bwanu” ncolwakali kuyandika kubana Roma? (b) Ncinzi cinga capa kuti Munakristo aleke kubikkila maanu kubulangizi mbwajisi?
4 Imwaapostolo Paulo wakakulwaizya basyominyina ibakali mu Roma kuti “amukondwe mubulangizi bwanu” bwabuumi butamani. (Baloma 12:12, Ci) Oolo lulayo lwakali kuyandika kapati kubana Roma kuciindi eeco. Kakutanaindaa myaka iili kkumi kuzwa leelyo Paulo naakabalembela, bakatalika kupenzyegwa citaambiki alimwi bamwi bakapenzyegwa mane kusikila bakajaigwa akaambo kamulawo wa Mwami Nero. Ilusyomo ndobakajisi lwakuti Leza wakali kuyoobapa musini wabuumi ngwaakasyomezya kulangilwa kuti ndulwakabayumya mumapenzi ngibakajisi. Ino swebo sunu tuli mubukkale buli buti?
5 Mbotuli Banakristo, aswebo tulangila kupenzyegwa. (2 Timoteo 3:12) Kunze lyaboobo, tulizyi kuti “bantu boonse buyo balasikilwa ziindi zyalufu azyamapenzi.” (Mukambausi 9:11) Muyandwa wesu ulakonzya kufwa muntenda. Ambweni muzyali naba mulongweesu ngotuyandisya ulakonzya kufwa kubulwazi bumwi. Ccita kuti twabikkila maanu kapati kubulangizi bwesu bwa Bwami, tulakonzya kuba muntenda munzila yakumuuya imasukusyo aali boobo naacitika. Aboobo inga cainda kubota kulibuzya kuti, ‘Sena ‘ndilakondwa mubulangizi bwangu’? Ino nditola ciindi cilamfwu buti kuzinzibala kuyeeya? Sena ndilaalusyomo lwakuti Paradaiso njotulangila iyoobako ncobeni? Sena mumizeezo yangu ndilibonena mumo? Sena ndicilombozya kapati kuti bweende obu bwazintu bumane mbubwenya mbweekali kulombozya neekatalika kwiiya kasimpe?’ Ooyu mubuzyo wamamanino uyandika kuyeeyesya. Nkaambo nzi? Nkaambo ikuti katulaa buumi buli kabotu, katujisi mali manji alimwi ikuti katukkala mucisi mutakwe nkondo, imunyina nzala naa ntenda zyacilengwaleza, tulakonzya aciindi eeci kuleka kubikkila maanu kunyika mpya ya Leza eeyo njotulangila.
6. (a) Ncinzi ncobakabikkila maanu ba Paulo a Sila eelyo nobakali kupenga? (b) Mbuti cikozyanyo caba Paulo a Sila mbocinga catukulwaizya sunu?
6 Alimwi Paulo wakalaya bana Roma kuti “amukakatile nikuba kuciindi camapenzi.” (Ba-Roma 12:12) Paulo wakali muntu wakaindide kale mumapenzi manji. Buzuba bumwi masiku, wakabona mwaalumi mucilengaano iwakamutamba kuti ‘azabukile ku-Makedoniya’ kuyoogwasya bantu kwiiya zya Jehova. (Incito 16:9) Mpoonya, Paulo antoomwe a Luka, Sila alimwi a Timoteo bakaunka ku Europe. Ino ncinzi cakali kuyoobacitikila bamishinali aabo basungu? Mmapenzi! Nobakamanizya kukambauka mumunzi waku Makedoniya wa Filipi, Paulo a Sila bakaumwa akubikkwa muntolongo. Cakutadooneka, basicisi bamwi ku Filipi tiibakali kuyanda buyo kuswiilila mulumbe wa Bwami, pele alimwi bakaukazya canguzu. Sena eeci cakacitika cakapa kuti aabo bamishinali basungu batakkomani? Peepe. Nobakamana kuumwa akubikkwa muntolongo, “akati kamasiku ba-Paulo a-Sila bakali kukomba akwiimbila Leza nyimbo.” (Incito 16:25, 26) Ee, ikucisa kwazicisa izyakuumwa kunyina nokwaabapa kukondwa ba Paulo a Sila, pele eeco teensi ncobaabikkila maanu pe bamishinali aabo bobile. Imizeezo yabo yakagaminide aali Jehova alimwi ambuli mbwaakali kubalongezya. Kwiinda ‘mukukakatila nokuba kuti bakali kupenzegwa,’ ba Paulo a Sila bakaba zitondezyo zibotu kapati kubanyina mu Filipi amumasena aambi.
7. Nkaambo nzi mipailo yesu ncoyeelede kubikkilizyaa kulumba?
7 Paulo wakalemba kuti: ‘Amujatisye kukomba.’ (Ba-Roma 12:12) Sena mulapaila eelyo nomulibilika kujatikizya zintu zimwi? Ino inga mupailila nzi? Cakutadooneka inga mulaligama penzi lyenu akulomba Jehova kuti amugwasye. Pele alimwi mulakonzya kubikkilizyaa kulumba kujatikizya zyoolwe nzyomujisi. Nokuli mapenzi, ikutelaikaa zintu zibotu nzyatucitila Jehova kutugwasya ‘kukondwa mubulangizi bwesu.’ Davida walo ibuumi bwakwe bwakazwide mapenzi wakalemba kuti: “Nzinji loko nzowakacita, O Jehova Leza wangu, nkokuti malele aako amakanze aako kulindiswe; taakwe uukonzya kukozyanizigwa ayebo. Na njanda kuzikanana nanka kuzyaamba, nzinji loko, tazibaliki.” (Intembauzyo 40:5) Ikuti mbubwenya mbuli Davida lyoonse katuyeeya cakuzinzibala kujatikizya zintu zibotu nzyotutambula kuzwa kuli Jehova, mmasimpe tunooli bantu bakkomene.
Amuzumanane Kamukkomene Lyoonse
8. Ncinzi cigwasya Munakristo kuzumanana kakkomene napenzyegwa?
8 Jesu ukulwaizya basikumutobela kuti beelede kuzumanana kabakkomana lyoonse nobacitikilwa masukusyo aayindene-indene. Waamba kuti: “Inywe muli acoolwe nibazoomutukila akumupenzya akumutamikizya zintu zibi zyoonse zyakubeja nkaambo kandime.” (Matayo 5:11) Nkaambo nzi ncotweelede kukkomana mubukkale buli boobo? Ikukonzya kuliyumya notukazigwa ncitondezyo cakuti muuya wa Jehova ulatweendelezya. Imwaapostolo Petro wakaambila Banakristonyina bakuciindi cakwe kuti: “Na mwasampaulwa nkaambo kazina lya-Kristo, elyo muli basicoolwe, ikuti ndilyonya ndimukalilide Muuya wabulemu, nkokuti Muuya wa-Leza.” (1 Petro 4:13, 14) Kwiinda munguzu zyamuuya wakwe, Jehova uyootugwasya kuliyumya, eelyo tuyookonzya kuzumanana katukkomene lyoonse.
9. Ncinzi cakagwasya bakwesu bamwi kujana twaambo twakubedaa lukondo nobakaangidwe muntolongo akaambo kalusyomo lwabo?
9 Neliba leelyo notuli mumapenzi aataambiki, tulakonzya kukondwa. Wakacisinizya eco Munakristo umwi uutegwa Adolf. Muntu ooyu ukkala mucisi oomo mulimo wa Bakamboni ba Jehova mowakakasyidwe kwamyaka minji. Adolf abeenzinyina banji baalumi abanakazi bakaangwa akupegwa myaka minji muntolongo akaambo kakuti bakakaka kusulaika lusyomo lwabo lwamu Bbaibbele. Buumi bwamuntolongo bwakali kukatazya citaambiki, pele mbubwenya mbuli ba Paulo a Sila, Adolf abeenzinyina bakajana twaambo ncobakeelede kumulumba Leza. Bakati, ibuumi bwakuntolongo bwakabagwasya kuyumya lusyomo lwabo alimwi akubaa bube bwa Bunakristo bubotu mbuli bwaabi, lweetelelo alimwi akubaa luyando kubanyina. Mucikozyanyo, sintolongo umwi naatambula cibbudu cimwi kuzwa kumunzi, wakali kwaabana izyakali mukati abasyominyina balo ibakali kubona zipego ezi kuti zyakali kuzwa kuli Jehova, Imwaabi wiinda boonse “[wa]zipego zibotu zyoonse azyoolwe zyoonse zilondokede.” Imilimo yalubomba iili boobo yakapa kuti sikwaabila alimwi abasikwaabilwa bakondwe. Aboobo ikubikkwa muntolongo nkobaabikkwa kwakacitwaa muzeezo wakunyonyoona lusyomo lwabo kwakabapa kuti bayume munzila yakumuuya!—Jakobo 1:17; Incito 20:35.
10, 11. Mbuti mucizi umwi mbwaakakweendelezya kubuzyigwa kwakutayozya-yozya ikwakatobelwaa mulandu wamyaka minji muntolongo?
10 Ella, walo uukkala mucisi oomo mulimo wa Bwami mowakalesyedwe wakaangwa akaambo kakutola lubazu mukwaambila bamwi kujatikizya bulangizi bwakwe bwa Bunakristo. Kwamyezi iili lusele, wakali kubuzyigwa-buzyigwa cakutayozya. Mpoonya kumamanino naakamana kulungulula kunkuta, wakapegwa mulandu wakwaangwa myaka iili kkumi muntolongo oomo mwakanyina bakombi ba Jehova bambi. Ella wakalaa myaka yakuzyalwa iili 24 buyo kuciindi eeco.
11 Masimpe, Ella kunyina naakali kulangila kumana myaka minji yabukubusi bwakwe mucitolokesi. Pele akaambo kakuti kunyina naakali kukonzya kucinca bukkale bwakwe, Ella wakacinca kuyeeya kwakwe kujatikizya zintu. Aboobo, wakatalika kubona busena bwantolongo kuba cilawo cakwe cimugeme cakukambaukila. Waamba kuti: “Kwakali masena manji aakukambaukila cakuti myaka yakali kwiile kwiinda cakufwambaana.” Nokwakainda myaka yiinda kuli yosanwe, Ella wakabuzyigwa alimwi. Nobakabona kuti ikubikkwa muntolongo nkwaakabikkwa kunyina nokwakanyonganya lusyomo lwakwe, basikumubuzya bakamwaambila kuti: “Tatukonzyi kukwaangununa pe; nkaambo kunyina nowacinca nokuceya.” Cakusinizya Ella wakaingula kuti: “Pele ndacinca! Ono zintu ndizilanga kabotu kwiinda kumatalikilo neekaletwa muntolongo, alimwi lusyomo lwangu lino lwayuma kapati kwiinda musyule!” Alimwi mukaintu oyu wakayungizya kuti: “Ikuti kamutayandi kundaangulula, ndinookkede kusikila leelyo Jehova aakubona kuti nciindi ceelede cakundivwuna.” Mumyaka iili yosanwe acisela kali muntolongo, Ella kunyina naakatyompwa akuleka kukkomana! Wakaiya kukkutila kufwumbwa mubukkale mwaakajanika. Sena kuli ncomunga mwaiya kucikozyanyo cakwe?—Ba-Hebrayo 13:5.
12. Ncinzi cinga camuletela luumuno lwamumizeezo Munakristo uuli mubukkale bukatazya?
12 Mutayeeyi kuti Ella ujisi cipego cimwi caalubazu icimupa kuliyumya mubuyumuyumu buli boobo. Kaamba ciindi naakali kubuzyigwa kakusyeede buyo myezi misyoonto katanaambilwa mulandu, Ella ulazuminizya kuti: “Ndilayeeya kuti ndakatalika kuluma njeela, alimwi ndakabimba mbuli kayuni kaandwa mpeyo kuyoowa kwalo.” Nokuba boobo, lusyomo ndwajisi Ella muli Jehova nduyumu kapati. Waiya kusyoma muli nguwe lyoonse. (Tusimpi 3:5-7) Aboobo lino Leza mmuntu wini-wini kulinguwe kwiinda musyule. Upandulula kuti: “Lyoonse neekali kunjila muŋanda yakubuzyilwa, ndakali muntu waangulukide. . . . Ibukkale nobwakaindilila kuyoosya, andime ndakaindilila kwaanguluka.” Ikwaanguluka oku kwakali kuzwa kuli Jehova. Imwaapostolo Paulo upandulula kuti: “Mutalibilikili cintu niciba comwe, pele muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza, elyo luumuno lwa-Leza lwiinda miyeeyo yoonse yabantu luyooyaminina myoyo yanu amiyeeyo yanu muli-Kristo Jesu.”—Ba-Filipi 4:6, 7.
13. Ncinzi citusyomezya kuti, ikuti naa twaba mumapenzi tunoojisi nguzu zyakuliyumya?
13 Ella walo lino waanguludwe, wakazumanana kakkomene nokuba kuti wakainda mubukkale bukatazya. Tanaakacicita eci munguzu zyakwe mwini pe, pele kwiinda munguzu nzyaakamupa Jehova. Mbocakabede akumwaapostolo Paulo walo iwakalemba kuti: “Aboobo ndalikankaizizya makompami aangu cakukondwa, kuti inguzu zya-Kristo zindipopele. . . . ikuti ciindi ncinkompeme nciconya ncindi singuzu.”—2 Ba-Korinto 12:9, 10.
14. Amupe cikozyanyo Munakristo mbwanga wabaa miyeeyo mibotu mubukkale bukatazya alimwi acinga cacitika.
14 Ibuyumuyumu mbomujisi bulakonzya kabwiindene aboobu mbotwabandika. Nokuba boobo, kufwumbwa naa buli buti, bwini mbwakuti cilakatazya kuliyumya mumapenzi. Mucikozyanyo, sikumulemba milimo ulakonzya kalaa cilengwa cakutongooka mulimo ngomucita lyoonse—ulakonzya katongooka mulimo wanu kapati kwiinda wababelesi bamuzikombelo zimbi. Ambweni inga tiicakonzyeka kuti mujane mulimo uumbi. Ino mbuti mbomunga mwazumanana kamukkomene? Amuyeeye Adolf abeenzinyina, balo ibakaiya kubaa bube buyandika nkaambo kabukkale bwabo bwamuntolongo. Ikuti mwasoleka kukkomanisya sikumulemba milimo—naba ‘sikakomokomo’—muyoobaa bube bwa Bunakristo mbuli kuliyumya akukakatila. (1 Petro 2:18) Kunze lyaboobo, mulakonzya kuba mubelesi uuyandika kapati, calo cinga cayungizya zyoolwe zyakujana mulimo mubotu kumbele. Ono atubandike nzila zimbi mbotunga twazumanana katukkomene mumulimo wa Jehova.
Ikuubya-Ubya Kusololela Kulukondo
15-17. Ncinzi ncobakaiya banabukwetene bamwi kuti inga cagwasya kumanizya kuzyingwa nkobaajisi nokuba kuti tiibakali kucikonzya kumana icakali kubapa kulimvwa boobo?
15 Ambweni inga kamunyina zyoolwe zyakulisalila mulimo ngomuyanda kucita naa nkomuyanda kubelekela, pele kulakonzya kakuli mbazu mubukkale bwanu momunga mwalyeendelezya. Amubone cakacitika eeci citobela.
16 Banabukwetene Banakristo bamwi bakatamba mwaalu umwi kucilalilo kuŋanda yabo. Imangolezyaayo, imukwesu amukaintu wakwe bakaambila mwaalu makani aabakatazya mumukwasyi wabo kuti kwaciindi cili mbocibede bali kulimvwa kuti bali mukuzundwaa mapenzi aabukkale. Nokuba kuti boonse bobile bakajisi milimo yabuzuba boonse nkobakali kumanina ciindi cinji, kunyina nobakali kukonzya kujana milimo iimbi. Bakali kutelaika naa bakacilaa ciindi cilamfwu buti cakuliyumya mubukkale buli boobo.
17 Nobakalomba lulayo, imwaalu wakabaingula kuti “Amubuubye-ubye.” Munzila nzi? Imulumi alimwi amukaintu wakwe bakali kutola ciindi ciinda kumawoola otatwe abuzuba munzila nobaya kumilimo anobazwa nkuko. Imwaalu, walo iwakabazyi kabotu banabukwetene abo wakapa muzeezo wakuti bayeeye zyakulongela kubusena bulaafwaafwi ankobabelekela ikutegwa bacesye ciindi ncobakali kutola kweenda kuunka kumilimo akuzwa nkuko abuzuba. Iciindi cakali kunoojanwa cakali kukonzya kubelesyegwa kulanganya zintu zimbi ziyandika—naa kwiile kulyookezya. Ikuti bukkale kabutamupi lukkomano ndomweelede, ino mulekela nzi kulingula-lingula naa inga mwajana kukatalukwa kwiinda mukucinca bukkale bwanu?
18. Nkaambo nzi ncociyandika kapati kuyeeya kabotu-kabotu kamutanaa kubweza ntaamu?
18 Icimbi cikonzya kugwasya kucesya mapenzi nkuyeeya kabotu-kabotu katutana kusala cakucita. Mucikozyanyo, Munakristo umwi wakayeeya kuti ayake ŋanda. Wakasala buyake bujisi bupangopango bukatazya, nokuba kuti kunyina buzuba mubuumi bwakwe mbwaakayakide ŋanda. Ono wajana kuti wakali kukonzya kweeleba mapenzi amwi ikuti ‘naakayeeya kabotu kweenda kwakwe’ katanasala buyake bwaŋanda yakwe. (Tusimpi 14:15) Aumbi Munakristo wakazumina kugwasya musyominyina kubbadela mali aacikwelete. Kweelanaa cizuminano, ikuti sikukweleta wakakilwa kwaapilusya mali aayo, ooyo wakalisungula kugwasya nguwakeelede kwaabbadela mali aayo. Kumatalikilo kwakanyina mapenzi pe, pele kumbele sikukweleta tanaakakonzya kuzuzikizya cizuminano. Sikukweletesya wakalibilika, aboobo wakaambila sikulisungula kuti aabbadele mali aacikwelete oonse aakasyeede. Eeli lyakaba penzi lipati kuli sikulisungula kugwasya. Sena nocatakacitika eci naakazibikkila maanu mbazu zyoonse katana kuzumina kubweza mukuli oyo kujatikizya cikwelete eco?—Tusimpi 17:18.
19. Ino ninzila nzi zimwi zinga zyatugwasya kucesya kuzyingwa mubuumi bwesu?
19 Eelyo notwakatala, tutayeeyi kuti tulakonzya kucesya buyumuyumu mbotujisi akubukulusya lukondo lwesu kwiinda mukucesya ciindi ncotutola muciiyo cesu ca Bbaibbele, mumulimo wamumuunda alimwi akujanika kumiswaangano. Tutaciti boobo pe nkaambo eezi nenzila ziyandika kapati motunga twatambula muuya wa Jehova uusalala, imuzwa lukondo. (Ba-Galatiya 5:22) Milimo ya Bunakristo ilakatalusya lyoonse alimwi kanjikanji taiminyi pe. (Matayo 11:28-30) Kanjikanji zintu zitupa kulema tazili zyakumuuya pe, pele nzintu zyakumubili naa zyakulikondelezya. Ikulizibizya kufwambaana koona kulakonzya kutugwasya kugusya penzi eeli. Ikuyungizya ciindi cakulyookezya kulakonzya kugwasya kapati. Mukwesu N. H. Knorr iwakali umwi waba Kabunga Keendelezya ka Bakamboni ba Jehova kusikila ciindi naakafwa, lyoonse wakali kwaambila bamishinali kuti: “Nomwatyompokelwa, icintu citaanzi ncomweelede kucita nkulyookezya. Muyoocitikilwa cintu ncomutalangili nkaambo ipenzi lyoonse ndyomunoojisi linooli lyuuba-uba kulimanizya bwaca ikuti naa mwawona kwaciindi cilamfwu!”
20. (a) Mubufwaafwi, amwaambe nzila mbotunga twazumanana katukkomene. (b) Ntwaambo nzi ntomunga mwayeeya tumupa kukondwa? (Amubone kabbokesi apeeji 27.)
20 Banakristo bajisi coolwe cilibedelede cakubelekela “Leza uuli acoolwe.” (1 Timoteo 1:11) Mbubwenya mbotwabona kale, tulakonzya kuzumanana katukkomene neliba leelyo notuli mumapenzi mapati. Atubikkile maanu kubulangizi bwa Bwami, atucince kujatikizya mbotuzilanga zintu ikuti naa kwayandika kucita boobo alimwi atubuubye-ubye buumi bwesu. Eelyo kufwumbwa naa muubukkale buli buti motuyoojanika, tuyooazuminizya majwi aamwaapostolo Paulo aakuti: “Amusekelele mu-Mwami lyoonse. Ee, ndaamba lwabili eli ijwi lyakuti, Amusekelele”!—Ba-Filipi 4:4.
Amwiibikkile Maanu Kapati Mibuzyo Eeyi:
• Nkaambo nzi Banakristo ncobeelede kububikkila maanu kapati lyoonse bulangizi bwa Bwami?
• Ncinzi cinga catugwasya kuzumanana katukkomene notuli mubukkale bukatazya?
• Nkaambo nzi ncotweelede kubuubya-ubya buumi bwesu?
• Muumbazu nzi bamwi mobaubya-ubya buumi bwabo?
[Mibuzyo yaciiyo]
Kabbokesi/[Zifwanikiso izili apeeji 27]
Twaambo Tumbi Ncotweelede Kukondwa
Mbotuli Banakristo, tujisi twaambo tunji tutupa kukondwa. Amulange-lange twaambo ootu tutobela:
1. Tulimuzyi Jehova.
2. Twaiya kasimpe ka Jwi lya Leza.
3. Tulakonzya kulekelelwa zibi zyesu kwiinda mukusyoma cituuzyo ca Jesu.
4. Bwami bwa Leza buleendelezya—inyika mpya ilaafwaafwi!
5. Jehova watuleta muparadaiso yakumuuya.
6. Tulayanzana kabotu a Banakristo.
7. Tulijisi coolwe cakutola lubazu mumulimo wakukambauka.
8. Tuli bazumi, alimwi tulijisi nguzu.
Ino ntunji buti twaambo tumbi ntomunga mwaamba tumupa kukondwa?
[Cifwanikiso icili apeeji 24]
Ba Paulo a Sila bakali kukondwa neliba leelyo nobakali muntolongo
[Zifwanikiso izili apeeji 26]
Sena mulabikkila maanu kapati aabulangizi bukkomanisya bwanyika ya Leza mpya?