Amwiibikkile Maanu Milimo ya Leza Iigambya
Amwiibikkile Maanu Milimo ya Leza Iigambya
“Nzinji loko nzowakacita, O Jehova Leza wangu, nkokuti malele aako amakanze aako kulindiswe; taakwe uukonzya kukozyanizigwa ayebo.”—INTEMBAUZYO 40:5.
1, 2. Mbumboni nzi mbotujisi kujatikizya milimo ya Leza iigambya, alimwi ino eci ceelede kutukulwaizya kucita nzi?
NOMUBALA Bbaibbele, mulakonzya kubukaa kubona kuti Leza wakacita zintu zigambya kubantu bakwe bansiku, iba Israyeli. (Joshua 3:5; Intembauzyo 106:7, 21, 22) Nokuba kuti Jehova lino taciziciti zintu ezi mubukkale bwabantu, kuli bumboni bunji kapati mbotubona bwamilimo yakwe iigambya. Aboobo tulijisi kaambo ncotweelede kusanganaa sintembauzyo mukwaamba kuti: “O Jehova, milimo yako yavula! Zyoonse wakazicita mubusongo bwako! Nyika ilizwide zilenge zyako.”—Intembauzyo 104:24; 148:1-5.
2 Ibantu banji sunu balabuunduluzya naa ikubukaka bumboni busalala buli boobo bwamilimo ya Mulengi. (Ba-Roma 1:20) Pele cilagwasya alimwi cilayandika kuti swebo tuzitelaike akukosola makani kweelanaa ciimo cesu alimwi amulimo ngotujisi ku Mulengi wesu. Izyaandaano 38 kusikila ku 41 zyabbuku lya Jobu zilakonzya kutugwasya kapati kumakani aaya, mbwaanga ooko Jehova wakayibalusya Jobu mbazu zimwi zyamilimo Yakwe iigambya. Amulange-lange makani aayandika ngaakaamba Leza.
Milimo Yanguzu Alimwi Iigambya
3. Mbubwenya mbokulembedwe kuli Jobu 38:22, 23, 25-29, nzintu nzi Leza nzyaakabuzya?
3 Cimwi ciindi Leza wakabuzya Jobu kuti: “[Sena] wakanjila muziyobwedo zyacaanda? Wakabona sena zilongelelo zyacivulamabwe, eco ncindiyobweda mazuba aaguwo kuti ncibelesye kuumya akulwanya?” Caanda alimwi acivwulamabwe nzintu zyayile kuzyibilwa mubuumi bwabantu mumasena manji anyika. Leza wakazumanana ategwa: “Nguni wakabamba ziwido zyamvula yamusinku, akucita nzila yalulabo, kuti iwe munyika iitakalwi muntu, amunkanda mutakwe bantu, kuti ikakondye zyuundu, ikasamike nyika njumu amwemvwe? Imvula ilijisi wisi sa? Wisi wamume nguni? Azwa mwidanzi mankaakamba? Nguni wakazyala caanda”?—Jobu 38:22, 23, 25-29.
4-6. Muunzila nzi iluzibo ndwajisi muntu kujatikizya caanda molutamaninide?
4 Ibamwi ibakkala mumasena asumpukide aavwuzyenye bantu alimwi ibayandika kweenda nyendo lyoonse, icaanda kuli mbabo inga baile kucibona kuba penzi. Pele ibantu banji balacikkomanina caanda nkaambo cibapa busena bubotu kapati bwakusobanina zisobano zilibedelede ciindi camupeyo. Kamuyeeyede mubuzyo wa Leza, sena mulicizi kabotu caanda, nokuba kuzyiba bwini mbocilibonya? Ee, tulizyi caanda cinji mbocilibonya, ambweni twakabona zilundu zyacaanda muzifwoto naa kwiinda mukulibonenaa meso tobeni caanda cinji. Pele ino mbuti kujatikizya tufwefwelenga twacaanda? Sena mulituzyi mbotulibonya, nokuba kutulanga-langa kabotu abusena mpotupangilwa?
5 Kwamakumi aamyaka bantu bamwi batwiiya kapati akutufwotola tufwefwelenga twacaanda. Ikafwefwelenga kacaanda komwe buyo kalakonzya kakajisi bumbuulumbuulu bwacaanda buli 100 ibuyalidwe munzila ziindene-indene zikondelezya kapati. Ibbuku litegwa Atmosphere lyaamba kuti: “Ikwiindana-indana kwabufwefwelenga bwacaanda kulizizyilwe kapati, alimwi nokuba kuti basayaansi balazumanana kwaamba kuti kunyina mulawo mububumbo uukasya kuti butakozyanyi, kunyina bufwefwelenga bukozyenye ibwakajanwa kale pe. Ikuvwuntauzya kupati kumwi kwakacitwaa . . . Wilson A. Bentley, iwakatola myaka yiinda ku 40 kalanga-langa alimwi akufwotola bufwefwelenga bwacaanda kabelesya muncini wa microscope, pele kunyina naakajana bufwefwelenga nobuceya bukozyenye mubuyale bwabo.” Alimwi nokuba kuti muziindi zitacitiki-citiki, tobile twakalibonya kuti tulikozyenye, sena eco inga cacinca kwiindana kugambya kapati kwamisyobo yatufwefwelenga twacaanda?
6 Amuyeeye mubuzyo wa Leza wakuti: “[Sena] wakanjila muziyobwedo zyacaanda?” Ibantu banji bayeeya kuti makumbi ngamayobwedo aacaanda. Sena inga mweezeezya kuya kuciyobwedo cili boobo kutegwa mukabale mweelwe wabufwefwelenga bwacaanda mubuyale bwambubo bwiindene-indene alimwi akwiiya mbobupangwa? Ibbuku lya encyclopedia lyasayaansi limwi lyaamba kuti: “Ibupange alimwi amatalikilo aabumbuulumbuulu bwacaanda ibuyandika kutegwa kube kwaangana kwakkumbi lyamadosi mukutontola kusikaa -40°C takuna kuteelelwa kabotu kusikila sunu.”—Intembauzyo 147:16, 17; Isaya 55:9, 10.
7. Ino luzibo ndobajisi bantu kujatikizya mvwula luyiilaali?
7 Antela, ino mbuti kujatikizya mvwula? Leza wakabuzya Jobu kuti: “Imvula ilijisi wisi sa? Wisi wamume nguni?” Ibbuku lya encyclopedia lyasayaansi elyo ndyoonya lyaamba kuti: “Akaambo kabumpiyompiyo bwakweenda kwamuuwo alimwi akwiindana-indana kwabusi bwameenda abumbuulumbuulu buli mumuwo, cilibonya kuti tacikonzyeki pe kujana kaambo kaluzi ikapandulula mbwaapangwa makumbi alimwi akwaangana kwabusi bwameenda kuba caanda.” Munzila nguba-uba, basayaansi bapa nzila zinji kapati pele kunyina mubwini nobanga baipandulula cakusalazya imvwula. Nokuba boobo, mulizyi kuti mvwula iiyandika ilawa akwiida nyika yesu akukomezya zisyango alimwi akupa kuti buumi bukonzyeke kabuli bwalukkomano.
8. Nkaambo nzi ncaayandika kapati majwi a Paulo aalembedwe ku Incito 14:17?
8 Sena tamukuzumini kukosola makani nkwaakacita mwaapostolo Paulo? Wakakulwaizya bamwi ikubona bumboni mumilimo eyi iigambya bwakuti Uuyicita nkwali ncobeni. Kaamba Jehova Leza, Paulo wakati: “Takalekede kulilungulula walo, mbwaakacita kabotu akumupa imvula eziindi zyazilyo izizwa kujulu, wazuzya myoyo yanu kulya akubotelwa.”—Incito 14:17; Intembauzyo 147:8.
9. Mbuti milimo ya Leza iigambya mboitondezya nguzu zyakwe ziteeli?
9 Cakutadooneka, ooyo Sikucita milimo eyo iigambya alimwi iigwasya ulijisi busongo anguzu ziteeli. Ikujatikizya nguzu zyakwe, amutelaike ceeci: Kwaambwa kuti buzubaa buzuba kubboloka ndabo zili 45,000, ituulunzuma twiinda ku 16 amwaka. Eeco caamba kuti, mukaindi nkoona kano kuli mukubboloka ndabo zisika ku 2,000. Imakumbi aagambya muzwa ndabo yomwe ajisi nguzu zyeelene amabbomba aanyukkiliya aali kkumi naa kwiindaawo aakalosyegwa mu Nkondo Yanyika Yabili. Inguzu ezyo zimwi zipati zilabonwa kululabo. Kunze lyakuyoosya, ikumweka kwalulabo kulagwasya mukupanga muya wa nitrogen uunjila mumavwu akubelesyegwaa zisyango kauli camutuzya wacilengwaleza. Aboobo ilulabo ninguzu zitondezyegwa, pele alimwi lulagwasya kapati.—Intembauzyo 104:14, 15.
Ino Mwaakosola Buti Makani?
10. Ino inga mwayiingula buti mibuzyo iili kuli Jobu 38:33-38?
10 Amulibikke muciimo ca Jobu, eelyo kamubuzyigwaa Leza Singuzuzyoonse. Cakutadooneka mulazuminizya kuti ibunji bwabantu tababikkili maanu kapati kumilimo ya Leza iigambya. Jehova utubuzya mibuzyo njotubala kuli Jobu 38:33-38. “Sa ulizi milao yamajulu? Ulakonzya sa kwiimika inguzu zyayo munyika? Ulakonzya kulailila mayoba kuti akutumine maanzi manji sa? Sa ulakonzya kutuma lulabo kumulimo walo? Sena lulakuvuwa kuti, Mpendi? Nguni wakaaiisya mayoba, nguni wakapa luzibo kululabo? Nguni uujisi nguzu zyakubungika mayoba, na kutingamika nongo zyakujulu, mavu naayumide, amavwinga naajatene?”
11, 12. Nzintu nzi zimwi izipa bumboni bwakuti Leza ngu Sikucita milimo iigambya?
11 Twabandika buyo twaambo tusyoonto Elihu ntwaakabandikaa Jobu alimwi akubona zintu zimwi Jehova nzyaakabuzya Jobu kuti aingule “mbuli muntu.” (Jobu 38:3) Twaamba kuti “zimwi” buyo nkaambo kuli Jobu caandaano 38 alimwi a 39, Jehova wakabikkila maanu kuzintu zimbi ziyandika mububumbo. Mucikozyanyo, wakaamba kujatikizya nyenyeezi zyakujulu. Nguni uuzi milawo yazyo? (Jobu 38:31-33) Jehova wakabandika kuli Jobu kujatikizya zinyama zimwi abayuni mbuli, syuumbwa acikwangala, njeleele, cibize, munyati, impowani, mpoonya bbiza alimwi asikwaze. Aboobo Leza wakabuzya naa Jobu nguwakazipa bube bwazyo zinyama ezi zisiyene-siyene abayuni kutegwa kazipona mbozipona alimwi ambozikomena. Mulakonzya kuzikkomanina kapati zyaandaano ezi, ikapati ikuti kamwaakkomanina mabbiza naa banyama bambi.—Intembauzyo 50:10, 11.
12 Alimwi mulakonzya kulanga-langa Jobu caandaano 40 a 41, ooko Jehova alimwi nkwaakabuzya Jobu kuti ayingule mibuzyo iijatikizya zilenge zyobile. Tulizizyi ezi kuti ngucivwubwe, imunyama mupati cini-cini ulaanguzu alimwi aciwena wamumulonga wa Nile uulaanguzu ziyoosya. Cimwi acimwi cakalengwa munzila yaco iigambya yeelede kubikkilwa maanu. Lino atubone mbotunga twaakosola makani.
13. Ino mibuzyo Leza njaakabuzya yakapa kuti Jobu alimvwe buti, alimwi ino makani aya ayelede kutukulwaizya kucita nzi?
13 Jobu caandaano 42 citutondezya mbwaakalimvwa Jobu kumibuzyo njaakamubuzya Leza. Musyule Jobu wakali kulibikkila maanu kapati lwakwe mwini abantu bambi. Pele, kwiinda mukuzumina lulayo lumvwika mumibuzyo njaakamubuzya Leza, Jobu wakalulamika mizeezo yakwe. Wakalyaambilila ategwa: “Ndilizi kuti [yebo Jehova] ulakonzya kucita zyoonse, kuti oko nkokanza takukwaalili. Ndakainganya makanze aa-Leza cakutayeeya; ndakaamba cakutasongwaala zintu zigambya ziindilila luzibo lwangu.” (Jobu 42:2, 3) Inzya, kabikkide maanu kumilimo ya Leza, Jobu wakati izintu ezi zyakali kugambya kapati kulinguwe. Twamana kulanga-langa zintu zigambya ezi zyamububumbo, busongo bwa Leza alimwi anguzu nzyajisi zyeelede kutukulwaizyaa swebo. Akubaa mbaakani nzi? Sena nkuyanda buyo kuti tuzyibe nguzu zipati nzyajisi Jehova anzyakonzya kucita? Antela, sena tweelede kukulwaizyigwa kwiinda waawo?
14. Mbuti Davida mbwaakalimvwa kujatikizya milimo ya Leza iigambya?
14 Ku Intembauzyo 86, tujana twaambo tukozyenye ntwaakaamba Davida walo muntembauzyo yamusyule iwakaamba kuti: “Kujulu kulaamba bulemu bwa-Jehova, mweenya uukwazeme ulatondezya milimo yamaanza aakwe. Buzuba bulaambila buzubanyina, masiku alazibya masikunyina.” (Intembauzyo 19:1, 2) Pele Davida wakazumanana kwaamba zimbi. Ku Intembauzyo 86:10, 11, tubala kuti: “Nkaambo yebo uli mupati, ulacita maleele. Nduwe Leza olike. Njiiyisya inzila yako, O Jehova, kuti njeende mulusinizyo lwako; mbe simoyo omwe kukulemeka izina lyako.” Ibulemu bwa Davida ku Mulengi wazintu zyoonse zigambya bwakabikkilizyaa kuyoowa kumubisizya. Mulakonzya kumvwisya kaambo ncaakacitila boobo. Davida tanaakayanda kunyemya Yooyo uukonzya kucita milimo eyi iigambya. Aswebo tatuyandi kumunyemya pe.
15. Nkaambo nzi ikuyoowa kubisizya Leza nkwaakajisi Davida ncokwakeelede?
15 Davida wakalizyi kuti mbwaanga Leza ulijisi nguzu zitaambiki nzyayendelezya, ulakonzya kuzyeendelezya kulwana baabo ibatayandiki kutondezyegwa luzyalo lwakwe. Kuli mbabo, eco caamba mapenzi. Leza wakabuzya Jobu kuti: “[Sena] wakanjila muziyobwedo zyacaanda? Wakabona sena zilongelelo zyacivulamabwe, eco ncindiyobweda mazuba aaguwo kuti ncibelesye kuumya akulwanya?” Icaanda, civwulamabwe, imvwula yaguwo, myuuwo alimwi alulabo zyoonse nzibelesyo zyakwe zyakulwanya. Elo kaka zilengwaleza ezi nzibelesyo zigambya alimwi zilaanguzu kapati!—Jobu 38:22, 23.
16, 17. Ncinzi citondezya nguzu zigambya nzyajisi Leza, alimwi ino wakazibelesya buti nguzu ezyo musyule?
16 Ambweni mulayeeya ntenda imwi yakacitwaa cimwi cazeezi—iguwo lyamvwula mpati, kambizi, mvwula yacivwulamabwe naa kupaya kwamaanzi aamvwula. Mucikozyanyo, kumatalikilo kwamwaka wa 2000, kwakawunga guwo lyamvwula mpati ku Europe nkoili kumusanza lwaambo. Eeli guwo lyakabagambya nobaba bahaazibwene mumakani aambobuca. Lyakajisi lubilo lwa 200 km/hr, lyakavwumbaula zyuulu-zyuulu zyaziluli zyamaanda, lyakawisya zibulo zijisi ntambo zyamagesi akubbindamuna zimbayambaya. Amuciyeeyele buyo eci: Iguwo elyo lyamvwula lyakazyula naa kutyolaula muzibeela-beela imasamu aatandila kutuulunzuma tuli 270—aali 10,000 mupaaki ya Versailles mulikke kumbali kwadolopo lya Paris. Ituulunzuma twamikwasyi twakanyina magesi mumaanda. Ibakafwa bakali kutandila ku 100. Zyoonse ezi zyakacitika mukaindi buyo kasyoonto. Tazilikomeneni kaka nguzu ezyo!
17 Umwi inga waamba kuti iguwo nintenda buyo zicitika cakutanyoneka alimwi cakuteendelezyeka. Pele ino ncinzi cinga cacitika ikuti Ooyo singuzuzyoonse wacita zintu zigambya kwiinda mukuzyeendelezya buya nguzu ezyo munzila iigaminide? Wakacita cintu cikozyenye aceeco kuciindi ca Abrahamu, eelyo naakazyiba kuti Mubetesi wanyika yoonse wakalibupimide bubi bwamuminzi yobile ya Sodoma a Gomora. Yakalibijide citaambiki cakuti ikutongooka kujatikizya minzi eyo kwakasika kuli Leza kujulu walo iwakagwasya bantu baluleme boonse kuloboka akuzwa muminzi eeyo yakasinganizidwe. Imakani aakaindi aamba kuti: “Mpoonya awo Jehova wakalosya sulufa amulilo [kuzwa kujulu]” aminzi eyo. Oyo wakali mulimo uugambya, ikukwabilila baluleme akunyonyoona bantu bakabijide cakuzwa munzila.—Matalikilo 19:24.
18. Mmilimo iigambya iili yaambwa kuli Isaya caandaano 25?
18 Kumbele Leza wakabeteka munzi wansiku wa Babuloni, ooyo uulangilwa kuti nguuwambwa kuli Isaya caandaano 25. Leza wakasinsimide kuti munzi oyo wakali kuyooba tongo ategwa: “Wakamwaya munzi kuti ube citantaala, amunzi uuli alubaya kuti ube matongo. Iŋanda yabwami bwabazwakule wainyonyoona, aboobo tuucili munzi, tuukooyooyakululwa limbi.” (Isaya 25:2) Basikuswaya mazubaano kubusena oko kwakali Babuloni yansiku balakonzya kusinizya kuti eci cakacitika ncobeni. Sena lunyonyooko lwa Babuloni lwakaide kulicitikila? Peepe. Muciindi caboobo tulakonzya kuzumina kuyeeya kwa Isaya iwakati: “O Jehova, nduwe Leza wangu. Njookutembaula, njoolemeka izina lyako, nkaambo wacita milimo iigambya, makani aakakanzwa kalekale cakusyomeka acalusinizyo.”—Isaya 25:1.
Imilimo Iigambya Kumbele
19, 20. Nkuzuzikizigwa nzi kwa Isaya 25:6-8 nkotunga twalangila?
19 Leza wakabuzuzikizya businsimi buli atalaawa ikaindi, alimwi uyoocita milimo iigambya kumbele. Mumakani aaya, aawo Isaya mpaamba “milimo iigambya” njacita Leza, tujana businsimi busyomeka ibuyoozuzikizigwa kumbele, mbubwenya lubeta lwa Babuloni mbolwakazuzikizigwa. ‘Ncintu nzi cigambya’ icisyomezyegwa? Ibbuku lya Isaya 25:6 lyaamba kuti: “Jehova wamakamu uyoocitila bantu boonse mucilundu ecino ipobwe lyazintu zyamafuta, ipobwe lyawaini uulwe[e]la, zintu zyamafuta zibotu, waini uulwe[e]la uusefedwe kabotu.”
20 Oobo businsimi buyoocitika ncobeni munyika mpya njaakasyomezya Leza iilaafwaafwi. Kuciindi eco, bantu banoonyina mapenzi aaminya banji sunu. Masimpe ngakuti, ibusinsimi buli mubbuku lya Isaya 25:7, 8 bulasinizya kuti Leza uyoobelesya nguzu zyakwe nzyaakabelesya kulenga, ikuyoocita mulimo omwe akati kamilimo yakwe iigambya uutanacitidwe ooyu: “Lufu walumenenena mane kukabe kutamani. Mwami Jehova uyoosindula misozi kumasyu oonse, akwalo kusampaulwa kwabantu bakwe uyookumanisya, nkaambo mbuboobo Jehova mbwaamba.” Kumbele imwaapostolo Paulo wakazubulula cibalo eco akucibelesya kwaamba mbwayoobusya bafwide Leza kuti bapone alimwi. Elo kaka unoogambya mulimo ooyo!—1 Ba-Korinto 15:51-54.
21. Mmilimo nzi iigambya Leza njayoocita kubantu bafwide?
21 Ikaambo kambi imisozi yabuumba ncoitakabiko limbi nkakuti, ibantunsi bayoogwisilwa malwazi oonse ngobajisi mumibili yabo. Jesu naakali anyika, wakaponya bantu banji, iboofwu bakalanga, ibasinke matwi bakamvwa, ibalema bakaba kabotu. Kuli Johane 5:5-9 kwaambwa makani aakuponesyegwa kwamwaalumi wakalemene kwamyaka iili 38. Ibakali kulangilila bakayeeya kuti makani aya akali kugambya naa wakali mulimo wamaleele. Ncobeni akali maleele! Pele Jesu wakabaambila kuti imakani aayooinda kugambya ngaayo aakubusya bantu bafwide nkwayoocita naakati: “Mutagambwi aliyeeyi nkani, nkaambo ciindi ciyoosika ncobati kamvwe ijwi lyakwe boonse abali muzyuumbwe, bayoozwa mpoonya, abo abakacita kabotu bayoobusigwa kubuumi.”—Johane 5:28, 29.
22. Nkaambo nzi bacete alimwi abapengede ncobanga balangila zintu zibotu kumbele?
22 Eeco ciyoocitika ncobeni akaambo kakuti iwakacisyomezya ngu Jehova. Mulakonzya kusinizya kuti aakubelesya akweendeelezya nguzu zyakwe zipati zyakubukulusya zintu, izintu ezi ziyoocitika zinoogambya. Ibbuku lya Intembauzyo 72 lyaamba zintu nzyayoocita kwiinda mu Mwanaakwe, Imwami. Kuciindi eco balulami bayoovwula. Luumuno lunooli lunji. Leza uyoobavwuna ibacete alimwi abapengede. Usyomezya kuti: ‘Maila ayoovwula ansi, aatala lyazilundu. Ayooyooma mbuli lusaka lwaku Lebano yansiku. Abantu bamuminzi bayoovwula mbuli bwizu bwamusokwe.’—Intembauzyo 72:16.
23. Ino milimo ya Leza iigambya yeelede kutukulwaizya kucita nzi?
23 Masimpe, tulaakaambo ncotweelede kubikkila maanu kumilimo ya Jehova iigambya njaakacita kaindi, njali mukucita sunu alimwi anjasyomezya kuti uyooyicita lino-lino kumbele. “Alumbwe Jehova Leza, Leza wa-Israyeli; ngonguwe alike uucita male[e]le. Izina lyakwe lyabulemu lilumbwe lyoonse, anyika yoonse izule bulemu bwakwe. Akube boobo! Akube boobo!” (Intembauzyo 72:18, 19) Aaya makani tweelede kwaabandika lyoonse kubasazima abantu bambi cakukondwa. Inzya, “a[t]ukanane bulemu bwakwe akati kabamasi, amaleele aakwe akati kamisyobo yoonse.”—Intembauzyo 78:3, 4; 96:3, 4.
Ino Inga Mwaingula Buti?
• Mbuti mibuzyo njaakabuzigwa Jobu mboikankaizya kulezya kwaluzibo lwabantunsi?
• Nzikozyanyo nzi zyamilimo ya Leza iigambya izyaambwa kuli Jobu zyaandaano 37 kusikila ku 41 izyamunjila mumoyo?
• Ino tweelede kulimvwa buti twamana kulanga-langa imwi yamilimo ya Leza iigambya?
[Mibuzyo yaciiyo]
[Zifwanikiso izili apeeji 16]
Ino mwaakosola buti makani kujatikizya kwiindana-indana kugambya ikwabufwefwelenga bwacaanda alimwi anguzu ziyoosya zyalulabo?
[Kulumba]
snowcrystals.net
[Zifwanikiso izili apeeji 18]
Imakani aajatikizya milimo ya Leza iigambya aabe ngamakani ngomusolozya lyoonse mumibandi yanu