Ikuba Mukamufwu Mbokwakabajatikizya Bamakaintu Bobile

SANDRA ngumukamufwu ukkala kucisi ca Australia. Iciindi mulumaakwe naakafwa myaka iilimbwiibede yainda, Sandra wakanyongana kapati mumizeezo. “Imuzeezo wakuti ndafwidwa mulumaangu alimwi iwakali mulongwaangu eeci cakandimana maano. Tandikozyi kuyeeya mbundakapiluka kuzwa kucibbadela kuboola kuŋanda alimwi ancindakacita buzuba oobo boonse. Mumvwiki zisyoonto buyo zyakatobela, kuyoowa kwangu kwakatalika kuba cicisa cini buya cizumanana.”

Sandra ulijisi mweenzinyina ucembeede wazina lya Elaine, iwali mukamufwu kwamyaka iili cisambomwi yainda. Mucizi ooyu wakamulwazya mulumaakwe David kwamyezi iili cisambomwi katanafwa abulwazi bwakkansa. Wakausa kapati cakuti kwamazuba masyoonto buyo akainda kuzwa mulumaakwe naakafwa, wakaba abbayibayi naa koofwaala kwaciindi cisyoonto. Nokwakainda myaaka yobile, wakasuntuka mubuleya. Nokuba boobo, musilisi wakwe kwiina naakajana bulwazi mumubili wakwe pe. Pele wakajana kuti Elaine wakalijisi buusu kumoyo, aboobo wakamukulwaizya kuti aunke kuŋanda yakwe akuti akasoleke kulila. Elaine waamba kuti, “Cakatola ciindi cilamfwu kutegwa ndicikonzye kulyeendelezya mukuusa kwangu” alimwi wakayaambele kwaamba kuti ciindi naakali kulendelelwa, “ndakali kuunka kuzyuli akuyoolivwumba kumutwe azisani zya David.”

Masimpe, kufwidwa mweenzinyoko kuletela kucita zintu munzila ziindene-indene, akaambo kakuti kuba mukamufwu kujatikizya zinji kwiinda buyo bukkale bwakubula mulumi. Mucikozyanyo, Sandra wakaliluba kwaciindi cili mbocibede. Mbubwenya mbuli bambi banji baafwidwa caino-ino, Sandra wakalimvwa mbuli muntu utakwabilidwe uukonzya kusikilwa mapenzi kufwumbwa ciindi. Sandra ulayeeya kuti, “ndakalizibilide kulekela mulumaangu kukosola makani, lino ndakeelede kwaakosola makani ndelikke. Ndakatalika kubaa cilabila. Ndakalimvwa kukatala akugonkelwa. Cakandibeda cintu ciyumu ikuzyiba ncondakeelede kucita aciindi eeco.”

Makani akozyenye ayaaya aakacitikila ba Sandra a Elaine alacitika abuzuba munyika yoonse mbwiizulwa. Malwazi, ntenda, nkondo, nkondo zyakujaya musyobo umwi alimwi alunya luli muzibeela ziindene-indene nzyezipa kuti mweelwe wabamukabafwu uvwule. * Bunji bwabamakaintu aaba inga bafwida buyo mucamba akaambo kakutaziba ncobeelede kucita. Ino balongwe alimwi abamukoowa inga bacita nzi ikutegwa babagwasye bamukabafwu aabo? Cibalo citobela cilijisi nzila zimwi zikonzya kugwasya.

Bupanduluzi buyungizidwe