Kugwasyanya Akati Kabunyina Bwanyika Yoonse
Kugwasyanya Akati Kabunyina Bwanyika Yoonse
KUFWUMBWA nkomukonzya kulanga, mubona bantu. Ibanji balicembeede, akati kabaaba kuli bamwi balemenyi cakuti tabacikonzyi kweenda kabotu. Kuli bamakaintu bamitide alimwi abanabukwetene bacili bana-bana bajisi bana babatobela munsi lyabo. Boonse aaba mbazangalisi—baalumi, bamakaintu alimwi abana—ibakasinikizigwa kusiya maandaabo akutijila mucisi ceengelede kuyooyuba akaambo kankondo mumasi aabo, mapenzi aaletwaa zilengwaleza naa zintu zimwi. Ibamwi basinikizigwa kwaasiya maandaabo aakukkala cakwiinduluka-induluka. Iciindi cakusaanguna nobabona zitondezyo zyamanyongwe mumasi aabo naa mapenzi aaletwaa zilengwaleza, balabweza twakubelesya tumwi twamuŋanda, ibana babo alimwi akuccijila kubusena bunyina manyongwe. Mpoonya izintu nozyaba kabotu, ibazangalisi banji balapiluka kuzisi zyabo akuya kutalika kuyaka maandaabo alimwi.
Kwamyaka iili mbwiibede, icisi ca Central African Republic cazumizya bazangalisi bazwa kumasi aali mbwaabede kunjila mucisi eeco. Caino-ino aawa, zyuulu-zyuulu zyabantu kubikkilizyaa Bakamboni ba Jehova banji, bakasinikizigwa kuccija kuzwa mucisi ca Democratic Republic of Congo imulwanwa nkondo akuya kucisi ciciliibide kwaciindi cili mbocibede ca Central African Republic.
Kugwasigwaa Bakwesu
Imulimo wakweendelezya lugwasyo luyandika, bakaubona kuba coolwe cipati Bakamboni bamucisi ca Central African Republic. Ibakwesu Banakristo ibakali kusika, bakabambilwa masena aakoona. Ikusaanguna, kwakajanwa masena mumaandaa bakwesu, pele mbobakali kuyaabuvwula bazangalisi, kwakayandika bubambe buli kabotu. Maandaa Bwami amwi akasandulwa kuba masena aakoona. Bakamboni banyenzi bakalyaaba kubeleka, eelyo bakabikka magesi, mipaipi yameenda mumasena mwakali kuyandika alimwi akusyingulula zibuye asamende kutegwa aabo bakali kuyakukkala mumo bakoone muli kabotu. Bazangalisi bakabelekela antoomwe abakwesu aba banyenzi kubamba masena aya aakoona. Ipulogilamu yakucita miswaangano yoonse yakabambwa mumwaambo wa Cilingala kutegwa aabo bakali kusika bajane cakulya cakumuuya cipa buumi. Ikubelekela antoomwe kwa Bakamboni banyenzi alimwi abeenzu babo kwakatondezya kuti ibunyina bwanyika yoonse mbwancobeni.
Mikwasyi yabazangalisi teeyakali kusikila antoomwe lyoonse. Muziindi zimwi, ibamukwasyi bakali kunga baandaana kutija, bakali kuswaanganina kumbele nobakali kusika kumasena nkubakali kuya. Imulongo wamazina abaabo bakasika wakabikkwa aa Ŋanda ya Bwami imwi aimwi. Kwakacitwa bubambe bwakujana baabo bakali kunga tabanalibonya. Ofesi lyamutabi ilyeendelezya mulimo wa Bakamboni ba Jehova mucisi lyakali kutuma myootokala yotatwe abuzuba kugwasya Bakamboni bakacili munzila alimwi akuyandaula baabo bakali kunga basweeka. Eeyi myootokala yakali kuzibwaa mabala mapati akalembedwe aakuti “WATCH TOWER—Bakamboni ba Jehova.”
Amweezeezye buyo ikukondwa nkukakabaa nkuko ikakamu kabana ibali ciloba bakaandeene abazyali babo nobakabona mootokala wa Bakamboni ba Jehova. Ndilyonya bakalundukila kumootokala akulipandulula kuti bakali bamwi ba Bakamboni ba Jehova. Ibakwesu bakabatolaa mootokala ku Ŋanda ya Bwami ooko nkubakaakuswaanganaa alimwi amikwasyi yabo.
Ino ncinzi cabagwasya Banakristo aaba basyomeka kucikonzya kuliyumya mubukkale buli boobu, kutali buyo kwaciindi comwe pele ciindi aciindi? Balisinizizye cakumaninina kuti tuli muciindi cakumamanino mbubonya mbukwakasinsimwa mu Magwalo Aasalala.—2 Timoteo 3:1-5; Ciyubunuzyo 6:3-8.
Aboobo, balizyi kuti Jehova Leza ino-ino uuyoomanizya inkondo, kusulaikana, kulwana alimwi amanyongwe woonse. Ipenzi lyabazangalisi talicinooyooliko pe, anooli makani aakaindi. Kwaciindi ecino, kweelanaa kulailila kwamwaapostolo Paulo ikujanika ku 1 Ba-Korinto 12:14-26, Bakamboni ba Jehova balasoleka kugwasyanya. Nokuba kuti balaandanizidwe amilonga, minyinza, myaambo alimwi akulampa kwamisinzo yamasena mobakkala, balabikkilana maanu kujatikizya bukkale bwaumwi aumwi, aboobo balafwambaana kubweza ntaamu yakugwasya ciindi umwi nayandika lugwasyo.—Jakobo 1:22-27.
Maapu iili apeeji 30]
(Kutegwa mubone bwini mbwaakkede mabala, amubone bbuku lini)
AFRICA
Central African Republic
Democratic Republic of Congo
[Kulumba]
Kuzwa muma Maapu aa Mountain High® Copyright © 1997 Digital Wisdom, Inc.
[Zifwanikiso izili apeeji 30]
Maandaa Bwami otatwe akasandulwa kuba maanda aakutambwida beenzu
[Cifwanikiso icili apeeji 31]
Zyakubelesya zyamunkicini zyakabikkwa cakufwambaana
[Cifwanikiso icili apeeji 31]
Bazangalisi banji bakazumanana kusika
[Zifwanikiso izili apeeji 31]
Bana bakazwaa kuzyalwa bakaile kwiindilila kuba bazangalisi