Sena ‘Mulacijatisya Loko Ciindi Canu Coonse’?

IMWAAPOSTOLO Paulo wakalaya Banakristo bamumwaanda wamyaka wakusaanguna mu Efeso kuti: “Amucenjele loko mbumweenda. Muteendi mbuli bafubafuba, pe, amweende mbuli basimaanu. Amujatisye loko ciindi canu coonse, nkaambo kakuti mazuba aasunu mabi.” (Ba-Efeso 5:15, 16) Nkaambo nzi lulayo olu ncolwakali kuyandika? Ibwiinguzi kumubuzyo oyu buyandika kuti muntu kajisi luzibo kujatikizya bukkale bwa Banakristo mumunzi ooyo wansiku.

Munzi wa Efeso wakali aampuwo akaambo kakuzwidilila mumakani aabuvwubi, bwaamu butaambiki, kuvwula kwamilandu alimwi amicito yiindene-indene yabudaimona. Kunze lyaboobo, Banakristo bakeelede kuzilwana njiisyo zyabusyaabusongo zijatikizya ciindi. Ba Giliki batakali Banakristo mu Efeso teebakali kusyoma kwaamba kuti ciindi cakali kuya buyo kumbele kolikke. Basyaabusongo bana Giliki bakabayiisyide kuti, ibuumi ncibeela cimwi cizumanana kuliinduluka. Imuntu wabelesya ciindi cakwe cabuyamba mucibeela cimwi, wakali kukonzya kucijana alimwi mucibeela cimbi. Ikuyeeya kwamusyobo oyu nokwakapa Banakristo baku Efeso kuti babe amuuya wakuliiba kujatikizya ciindi ncaakabambide Jehova cakucita zintu alimwi aciindi ncaakabikkide calubeta lwakwe. Aboobo, lulayo lwa Paulo ‘lwakucijatisya loko ciindi’ lwakaleelede.

Paulo tanaakali kwaamba buyo ciindi cizyi bantu boonse. Ibbala lya Cigiliki ndyaakabelesya lyaamba ciindi cibikkidwe, ciindi ceelede cakucita mulimo umwi uugaminide. Paulo wakali kulaya Banakristo bamumwaanda wamyaka wakusaanguna kuti bacijatisye loko ciindi cibotu naa iceelede cakweetelelwa ncibakajisi nocatakaninga kumana anolwatakaninga kugusigwa luzyalo lwa Leza alimwi aciindi calufwutuko—Ba-Roma 13:11-13; 1 Ba-Tesalonika 5:6-11.

Tupona muciindi cili mbubonya mbuli ceeco. Aboobo muciindi cakucibelesya cabuyamba ciindi eci calufwutuko citakoyoojanwa limbi kwiinda mukugama kulangaula zyakulikondelezya zijanika munyika zyaaciindi cisyoonto buyo, Banakristo beelede kucibelesya kabotu ciindi ncobajisi mukucita milimo ‘yakulemeka Leza’ alimwi akuyumya cilongwe cabo a Mulengi, Jehova Leza.—2 Petro 3:11; Intembauzyo 73:28; Ba-Filipi 1:10.