Amutembaule Jehova Akaambo Kamilimo Yakwe Iigambya!
Amutembaule Jehova Akaambo Kamilimo Yakwe Iigambya!
“Moyo wangu ulamulemya Jehova, . . . nkaambo Singuzu wandicitila zintu zipati.”—LUKA 1:46-49.
1. Ino nkaambo kamilimo mipati iili buti ncotumulumbaizizya Jehova?
JEHOVA weelede kutembaulwa akaambo kamilimo yakwe mipati. Imusinsimi Musa naakaluula kufwutulwa kwabana Israyeli kuzwa mu Egepita, wakati: “Meso aanu alibwene milimo yoonse mipati ya-Jehova njaakacita.” (Deuteronomo 11:1-7) Mbubwenya buyo, imungelo Gabriyeli naakaambilizya kuli nakalindu Mariya zyamakani aakuzyalwa kwa Jesu, Mariya wakati: “Moyo wangu ulamulemya Jehova, . . . nkaambo Singuzu wandicitila zintu zipati.” (Luka 1:46-49) Mbotuli Bakamboni ba Jehova, tulamutembaula kujatikizya milimo mipati njaakacita naakalubula bana Israyeli mubuzike alimwi akumitwa kwamaleele kwa Mwanaakwe uuyandwa.
2. (a) Ino “bukanze [bwa Leza] bwakale-kale” bwaamba nzi kubantu bamvwa? (b) Ncinzi cakacitikila Johane kukasuwa ka Patmo?
2 Imilimo mipati ya Jehova minji iliswaangene a “bukanze bwakwe bwakale-kale” bwakulongezya bantu bamvwa kwiinda muli Mesiya alimwi abweendelezi bwakwe bwa Bwami. (Baefeso 3:8-13, The New Testament in Ila) Imakanze aayo aakali kuyaabuzuzikizigwa bucebuce eelyo mwaapostolo Johane uucembeede nakazumizigwa kubona mulyango wakujulu wakajaludwe kwiinda mucilengaano. Wakamvwa jwi lyakali mbuli mweembo kalyaamba kuti: “Boola, utante okuno, nkakutondezye zintu zyeelede kuba kuciindi ciciza.” (Ciyubunuzyo 4:1) Katandidwe amfwulumende yaba Roma kuzwa mucisi cakwabo kuya mukasuwa kategwa Patmo “nkaambo kamakani aa-Leza abumboni bwa-Jesu Kristo,” Johane wakapegwa “ciyubunuzyo ca-Jesu Kristo.” Nzyaakabona akumvwa zyakayubununa zintu zinji kujatikizya makanze aa Leza aakumatalikilo, aboobo zilabamunikila munzila yakumuuya akubakulwaizyaa ciindi ceelede Banakristo beni-beni boonse.—Ciyubunuzyo 1:1, 9, 10.
3. Mbaani ibaimininwaa baalu bali 24 mbaakabona Johane mucilengaano?
3 Kwiinda mumulyango ooyo wakujulu wakajaludwe, Johane wakabona baalu ibali 24 kabakkede azyuuno zyabwami alimwi kabasamide misini mbuli bami. Bakafwugama kumbele lya Leza akwaamba kuti: “Nduwe uuelede, O Mwami, kutambula bulemu alulemeko anguzu, nkaambo nduwe wakalenga zintu zyoonse, nkaambo kabukanze bwako nkizibeda, ankizyakalengelwa.” (Ciyubunuzyo 4:11) Aabo baalu baiminina Banakristo bananike boonse babusidwe mubusena bwabo busumpudwe mbwaakabasyomezya Leza. Balakulwaizigwa kutembaula Jehova akaambo kamilimo yakwe mipati yalo iiswaangene abulenge. Andiswe bulatugambya bumboni buliko bwa “nguzu zyakwe abu-Leza bwakwe zitamani.” (Ba-Roma 1:20) Alimwi notuyaabwiiya makani manji aa Jehova, tujana twaambo tunji ncotweelede kumutembauda akaambo kamilimo yakwe mipati.
Amwaambilizye Milimo ya Jehova Iitembaulika!
4, 5. Amupe zikozyanyo zijatikizya Davida mbwaakatembaula Jehova.
4 Sintembauzyo Davida wakatembaula Leza akaambo kamilimo Yakwe mipati. Mucikozyanyo, Davida wakaimba kuti: “Amutembaule Jehova uukala mu-Ziyoni, amuluule milimo yakwe akati kabamasi. Kondifwida luzyalo, O Jehova; bona mbundapenga kulibaabo bandisulide, webo nondisumpula kuzwa kumilyango yalufu; kuti nkaluule intembauzyo zyako zyoonse . . . mumilyango yamunzi wa-Zioni.” (Intembauzyo 9:11, 13, 14) Naakamana kupa mwanaakwe Solomoni malailile aamboyakeelede kuyakwa tempele, Davida wakalumba akutembaula Leza ulaamba: “Bupati anguzu abulemu aluzundo abwami, zyoonse nzizyako, O Jehova, . . . Bwami mbobwako, O Jehova, alimwi nduwe nosumpwidwe mbuli simutwe waboonse. . . . Lino sunu, O Leza wesu, iswe tulakulumba akutembaula izina lyako lilemu.”—1 Makani 29:10-13.
5 Imagwalo alatutamba, camasimpe alatukulwaizya ziindi zinjaanji ikuti tumutembaule Leza mbubwenya mbwaakacita Davida. Ibbuku lya Intembauzyo lijisi majwi manji aatembaula Leza alimwi afwaafwi acisela canyimbo eezyo zyaambwa kuti zyakaimbwaa Davida. Lyoonse wakali kutembaula akulumba Jehova. (Intembauzyo 69:30) Kuzwa kaindi, inyimbo zyakasololelwaa muuya wa Leza nzyaakaimba Davida alimwi abambi zyali kubelesyegwa mukutembaula Jehova.
6. Mbuti Intembauzyo zyakasololelwaa muuya mbozitugwasya?
6 Lilagwasya kapati akaka ibbuku lya Intembauzyo kubakombi ba Jehova! Notuyanda kulumba Leza akaambo kamilimo mipati njatucitila, tulakonzya kuyeeya majwi mabotu aajanika kubbuku lya Intembauzyo. Mucikozyanyo, eelyo notubuka kuzwa muŋonzi katuli baumi nobwaca buzubaa bumwi bupya, tulakonzya kulumba mumajwi mbuli aaya aakuti: “Ncibotu kulumba Jehova, akutembaula izina lyako, O Mupati-kampatila, kuluula luzyalo lwako cifumo, alusyomo lwako masiku, . . . Nkaambo yebo, O Jehova, wandibotezya kukucita kwako, ndaimba cakukondwa kumilimo yamaanza aako.” (Intembauzyo 92:1-4) Notwacikonzya kuzunda cisinkilizyo cimwi kukuyaambele kwesu munzila yakumuuya, inga twayanda kutondezya lukondo akulumba mumupailo mbubwenya mbwaakacita sintembauzyo naakaimba kuti: “Amuboole twiimbile Jehova, tupululuzizye indomba yalufutuko lwesu. Atuboneke kubusyu bwakwe cakulumba, atupululuzye antembauzyo.”—Intembauzyo 95:1, 2.
7. (a) Ncinzi cikondelezya mwalanga-langa nyimbo zinji ziimbwaa Banakristo? (b) Nkaambo nzi ikapati ncotweelede kusika kumiswaangano ciindi kaciciliko alimwi akuzumanana kusikila kumamanino?
7 Kanjikanji tulaimba nyimbo zyakutembaula Jehova kumiswaangano yambungano alimwi amipati. Cilakondelezya ikujana kuti ibunji bwanyimbo ezi zijisi twaambo twakasololelwaa muuya kuzwa mubbuku lya Intembauzyo. Tulikkomene kaka ikubaa nyimbo zyakutembaula Jehova sunu izikatalusya kapati! Ikwiimbila Leza ntembauzyo nkaambo kapati ncotuyandika kusika kumiswaangano ciindi kaciciliko alimwi akuzumanana kusikila kumamanino, notucita boobo tutola lubazu abakombima mukutembaula Jehova kwiinda munyimbo alimwi amumupailo.
“Amutembaule Jehova!”
8. Ncinzi cijanwa mubbala lyakuti “Aleluya,” alimwi ino bbala eli lisandululwa buti bunji bwaziindi?
8 Ikutembaula Jehova kulajanwa mubbala lyakuti “Aleluya,” ibusanduluzi bwakaambo ka Cihebrayo kalo bunji bwaziindi ikasandululwa kuti “Amutembaule Jehova!” Mucikozyanyo, ku Intembauzyo 135:1-3, tujana kutamba kwakusinizya kwakuti: “Amutembaule Jehova! Amutembaule izina lya-Jehova! Amutembaule, nobalanda ba-Jehova, nywebo nomwiima muŋanda ya-Jehova, mumbuwa zyaŋanda ya-Leza wesu. Amutembaule Jehova, nkaambo Jehova mubotu. Amwiimbile izina lyakwe, nkaambo ncibotu.”
9. Ncinzi citukulwaizya kutembaula Jehova?
9 Notuyeeya milimo ya Leza iigambya kwiinda muzilenge kubikkilizyaa zintu zyoonse nzyatucitila, ikulumba kuzwa mumoyo kutukulwaizya kuti tumutembaule. Notuyeeya zintu zigambya nzyaakacitila bantu bakwe kuciindi camusyule, myoyo yesu itukulwaizya kumutembaula. Alimwi eelyo notuyeeya cakuzinzibala zisyomezyo zyazintu zipati Jehova nzyayoocita, tuyandaula nzila zyakutembaula akutondezya kulumba kwesu.
10, 11. Nkaambo nzi nokuba kupona nkotupona ncokali kaambo kabotu nkotweelede kumutembauda Leza?
10 Ikupona nkotupona nkaambo kabotu nkotweelede kumutembauda Jehova. Davida wakaimba kuti: “Njookulumba [Jehova] nkaambo kakugambya kwakulengwa kwangu. Milimo yako ilagambya; moyo wangu ulizi loko.” (Intembauzyo 139:14) Camasimpe, ‘ikulengwa kwesu kulagambya’ alimwi tujisi zipego zitaliboteli mbuli kubona, kumvwa, alimwi anguzu zyakuyeeya. Aboobo, sena tatweelede kupona munzila iitembaula Mulengi wesu? Awalo Paulo waakaamba makani aaya naakalemba kuti: “Kufumbwa zintu nzimucita, nikuba kulya nikuba kunywa niciba cintu cimwi, amuzicite zyoonse cakuti kube bulemu kwa-Leza.”—1 Ba-Korinto 10:31.
11 Tuyoocita zintu zyoonse cakuti kube bulemu kuli Jehova ikuti katumuyanda ncobeni. Jesu wakaamba kuti, imulawo mutaanzi ngwakuti: “Uleelede kuyandisya Jehova Leza wako amoyo wako woonse, akumuuya wako woonse, akukuyeeya kwako koonse, akunguzu zyako zyoonse.” (Marko 12:30; Deuteronomo 6:5) Masimpe, tweelede kumuyanda Jehova alimwi akumutembaula mbwali Mulengi wesu nkaambo Nguupa “zipego zibotu zyoonse azyoolwe zyoonse zilondokede.” (Jakobo 1:17; Isaya 51:13; Incito 17:28) Ncamaanu kuti tucite boobo akaambo kakuti nguzu zyakuyeeya kwesu, imuzeezo wakuyeeya zintu zyakumuuya alimwi anguzu nzyotujisi zyakukonzya kucita zintu—ee, ibube bwesu boonse anzyotukonzya kucita—zizwa kuli Jehova. Mbwali Mulengi wesu, tweelede kumuyanda akumutembaula.
12. Ino mulimvwa buti kujatikizya milimo mipati ya Jehova alimwi amajwi aali ku Intembauzyo 40:5?
12 Imilimo ya Jehova mipati itupa twaambo itutabaliki ncotweelede kumuyanda akumutembaula! Davida wakaimba kuti: “Nzinji loko nzowakacita, O Jehova Leza wangu, nkokuti malele aako amakanze aako kulindiswe; taakwe uukonzya kukozyanizigwa ayebo. Na njanda kuzikanana nanka kuzyaamba, nzinji loko, tazibaliki.” (Intembauzyo 40:5) Davida taakwe naakakonzya kuyiibaluka milimo mibotu yoonse ya Jehova, andiswe mbubonya tatukonzyi. Pele katumutembaula Leza lyoonse eelyo notwiibalusigwa milimo yakwe mipati iili yoonse.
Imilimo Iiswaangene Amakanze aa Leza Aakumatalikilo
13. Mbuti bulangizi bwesu mbobuswaangene amilimo ya Leza mipati?
13 Ibulangizi bwesu bwabuumi bwakumbele buliswaangene kapati amilimo mipati alimwi iitembaulika iijatikizya makanze aa Leza aakumatalikilo. Kuzwa nobwakacitika buzangi mu Edeni, Jehova wakaamba businsimi bwakusaanguna buzwide bulangizi. Kasinganya muzoka, Leza wakati: “Nkabela njoobusya inkondo akati kanduwe amwanakazi, akati kalunyungu lwako alunyungu lwakwe. Walo uyookuuma amutwe, ayebo uyoomuluma kukasinde.” (Matalikilo 3:15) Bulangizi mu Lunyungu lwamwanakazi bwakazumanana mumizeezo yabantunsi basyomeka kuzikusika ciindi Jehova naakacita mulimo mupati kwiinda mukufwutula Nowa amukwasyi wakwe mu Zambangulwe lyakanyonyoona nyika mbyaabi. (2 Petro 2:5) Zisyomezyo zyabusinsimi kubaalumi mbuli Abrahamu alimwi a Davida zyakamunikila makani aambi kujatikizya ncaakali kuzyoocita Jehova kwiinda mu Lunyungu olo.—Matalikilo 22:15-18; 2 Samuele 7:12.
14. Ino ncitondezyo nzi ciinda zyoonse camilimo mipati ya Jehova njaakacitila bantu?
14 Icitondezyo ciinda zyoonse icakuti Jehova nguucitila bantu milimo mipati cakacitika eelyo naakapa Mwanaakwe simuzyalwaalikke—Lunyungu lwakasyomezyegwa, Jesu Kristo—kuba cituuzyo cacinunuzyo. (Johane 3:16; Incito 2:29-36) Cinunuzyo cakaba nentalisyo yakuyanzanisigwaa Leza. (Matayo 20:28; Ba-Roma 5:11) Jehova wakabunganya bayanzanisidwe bakusaanguna mumbungano ya Bunakristo iyakatalisigwa lya Pentekoste mu 33 C.E. Kwiinda mulugwasyo lwamuuya uusalala, bakakambauka makani mabotu koonse-koonse, kabatondezya lufwu abubuke bwa Jesu mbobubajalwida nzila bantu bamvwa kuzilongezyo zitamani mubweendelezi bwa Bwami bwa Leza bwakujulu.
15. Mbuti Jehova mbwaabweza ntaamu munzila iigambya kumazubeesu?
15 Kumazubeesu, Jehova wabweza ntaamu munzila iigambya ikubunganya Banakristo bananike bamamanino. Myuuwo yakunyonyoona yajatwa kutegwa ibasyeede akati kabali 144,000 aabo ibayoolela antoomwe a Kristo kujulu bagwalwe. (Ciyubunuzyo 7:1-4; 20:6) Leza wabona kwaamba kuti Banakristo bananike bafwutulwa kubwaange bwakumuuya kuli “BABULONI MUPATI,” ibulelo bwanyika yoonse bwabukombi bwakubeja. (Ciyubunuzyo 17:1-5) Ino kufwutulwa ooko ikwakacitwa mu 1919 alimwi abukwabilizi bwa Leza mbobajisi kuzwa ciindi eco kwapa kuti ibananike basyeede bacite nzi? Ikuti bamunike mukupa bumboni bwamamanino Jehova natananyonyoona bweende bwazintu bubyaabi obu bwa Saatani mu “mapenzi mapati” aali mukuswena afwaafwi cakubindaana kapati.—Matayo 24:21; Daniele 12:3; Ciyubunuzyo 7:14.
16. Ncinzi cili mukucitika akaambo kamulimo wakukambauka Bwami uuli mukucitwa sunu nyika yoonse mbwiizulwa?
16 Bakamboni ba Jehova bananike bali kumbele mumulimo wakukambauka Bwami cabusungu nyika yoonse mbwiizulwa. Akaambo kaceeci, imweelwe munji kapati wa “mbelele zimwi” lino uli mukukomba Jehova. (Johane 10:16) Tulakondwa kuti coolwe nkocicili cakuti aabo ibabombe myoyo bali anyika basangane andiswe mukutembaula Jehova. Aabo ibaingula kwiita kwakuti “boola” bayoofwutulwa mumapenzi mapati, kabalangila kunootembaula Jehova kusikila kukabe kutamani.—Ciyubunuzyo 22:17.
Izyuulu-Zyuulu Zyabantu Zili Mukuyobolokela Kubukombi Bwini-Bwini
17. (a) Mbuti Jehova mbwali mukucita milimo mipati kujatikizya mulimo wesu wakukambauka? (b) Mbuti bbuku lya Zekariya 8:23 mbolili mukuzuzikizigwa?
17 Sunu Jehova ucita milimo mipati alimwi iitembaulika kujatikizya mulimo wesu wakukambauka. (Marko 13:10) Mumyaka yalino-lino, ‘wajalula milyango mipati yakucita milimo mibotu.’ (1 Ba-Korinto 16:9) Eeci capa kuti makani mabotu aambilizyigwe muzyooko zyoonse oomo basinkondo bakasimpe mobakali kukasinkilizya musyule. Ibanji bakali mumudima munzila yakumuuya musyule lino bali mukwiingula kukwiita kwakuti bakombe Jehova. Bali mukuzuzikizya majwi aabusinsimi aaya aakuti: “Mbuboobu mbwaamba Jehova wamakamu. Mumazuba ayo bantu bali ikumi bazwa kumisyobo yoonse akumyaambo yoonse bayoojata cikobela camuntu mu-Juda, bayooti, Atweende anywebo, nkaambo twamvwa kuti Leza mpali akati kanu.” (Zekariya 8:23) Ooyu “muntu” wiiminina ba Juda bakumuuya, nkokuti Banakristo bananike basyeede baliko sunu. Mbwaanga inamba yakkumi yiiminina kuzyulila kweelanaa zintu zyaanyika, “bantu bali kumi” baiminina “inkamu impati” yabaabo bayobololwa kuti bayanzane a “bana ba-Israyeli ba-Leza,” aabo mbocibamba limwi “itanga lyomwe.” (Ciyubunuzyo 7:9, 10; Ba-Galatiya 6:16) Cilatukkomanisya kapati akaka ikubona bantu banji boobu kababeleka mulimo uusetekene caantoomwe kabali bakombi ba Jehova Leza!
18, 19. Mbumboni nzi buliko bwakuti Jehova uli mukuulongezya mulimo wakukambauka?
18 Tulikkomene kapati kuti makumi-makumi aazyuulu, inzya, myaanda-myaanda yazyuulu zyabantu lino bali mukutambula bukombi bwakasimpe mumasi manji mudumide bukombi bwakubeja cakuti tiikwali kulangilwa kuti bantu bakkala mumo inga baatambula makani mabotu. Kamwiile kulanga mu Yearbook of Jehovah’s Witnesses naa mu Ngazi Yamulindizi yamu January 1 akubala masi aajisi basikumwaya Bwami ibacita lipooti kuzwaa mweelwe wa 100,000 kusika kuli aayo aatandila ku 1,000,000. Eeci ncitondezyo cipati cakuti mulimo wakukambauka Bwami uli mukulongezyegwaa Jehova.—Tusimpi 10:22.
19 Mbotuli bantu ba Jehova, tulamutembaula akumulumba Taateesu wakujulu akaambo kakuti watupa mpindu ini-ini mubuumi, mulimo wakwe uupa bulumbu alimwi abulangizi bubotu bwabukkale bwakumbele. Tulapona akulangila katusinizizye kuzuzikizigwa kwazisyomezyo zyoonse Leza nzyaakasyomezya alimwi tukanzide ‘kuliyobola muluyando lwa-Leza cakulangilila buumi butamani.’ (Juda 20, 21) Tulikkomene kapati akaka kubona kuti ibankamu mpati ibatembaula Leza lino balasika ku 6,000,000! Kwiinda mucilongezyo ca Jehova cilibonya aantangalala, bananike basyeede antoomwe abeenzinyina ibambelele zimbi balikamantene mumbungano izili 91,000 mumasi aali 235. Toonse tulasaninwa kabotu munzila yakumuuya kwiinda mukusola-sola kwakutayozya kwa “muzike musyomesi uucenjede.” (Matayo 24:45) Mbunga yateokrasi iiyaabuyaambele, iyeendelezya caluyando, ilaulanganya mulimo wa Bwami kwiinda mukubelesya maofesi aamutabi aa Bakamboni ba Jehova aali 110. Tulalumba kuti Jehova wacitya myoyo yabantu bakwe bamukomba ‘ikumulemeka ambono zyabo.’ (Tusimpi 3:9, 10) Aboobo, mulimo wesu wakukambauka ulazumanana alimwi maandaa kusimbila, maandaa Beteli alimwi aabamisyinali, Maandaa Bwami alimwi a Maanda Amiswaangano Mipati aali mukuyakwa kufwumbwa leelyo nokwayandika.
20. Ino kutelaikaa milimo ya Jehova mipati alimwi iitembaulika kweelede kutukulwaizya kucita nzi?
20 Inga tiicakonzyeka pe kwiibandauka yoonse milimo mipati alimwi iitembaulika njaacita Taateesu wakujulu. Pele sena kuli muntu uujisi moyo mubotu uunga wakaka kusanganaa nkamu yabasikutembaula Jehova? Taaku pe! Aboobo, aabo boonse bamuyanda Leza aboongolole cakukondwa kuti: “Amutembaule Jehova! Amutembaule Jehova kujulu! Amumutembaule aatuntukide! Amumutembaule nyoonse nobaangelo bakwe! . . . [No]bakubusi abakamwale, bacembele abanikenike! Batembaule izina lya-Jehova, nkaambo izina lyakwe lilike ndipati, abulemu bwakwe bulainda nyika ajulu.” (Intembauzyo 148:1, 2, 12, 13) Camasimpe, lino alimwi mane kukabe kutamani, atuzumanane kutembaula Jehova akaambo kamilimo yakwe mipati!
Ino Inga Mwaingula Buti?
• Ino mmilimo nzi imwi ya Jehova iitembaulika?
• Ino nkaambo nzi ncomukulwaizigwa kutembaula Jehova?
• Mbuti bulangizi bwesu mbobuswaangene amilimo mipati ya Leza?
• Mbuti Jehova mbwali mukucita milimo iitembaulika kujatikizya mulimo wakukambauka Bwami?
[Mibuzyo yaciiyo]
[Cifwanikiso icili apeeji 8]
Sena mulasangana camoyo woonse mukwiimba nyimbo zyakutembaula Jehova?
[Cifwanikiso icili apeeji 11]
Tulikkomene kapati ikuti coolwe nkocicili cakuti babombe myoyo basangane andiswe mukutembaula Jehova