Ikucinca Kwazyeelelo, Kuliswaangene Akutasyomeka
Ikucinca Kwazyeelelo, Kuliswaangene Akutasyomeka
Kuciindi ca Mwami Henry Wakusaanguna iwaku England (1100-1135), intaamu yomwe yakali kulangwa kuba “bulamfwu bwakuzwa kumpemo ya Mwami mane kusikila kuli cigumu wakujanza kuti kalivwungulukide janza.” Ino tusamu ooto twakupimya itulampa buyo ntaamu yomwe itwakali kubelesyegwaa bantu ba Mwami Henry twakali kusyomeka buti? Ikuunka kumwami akuyoolibonena njiyakali nzila ilikke yakusinizya cipimyo ciluzi.
IZYEELEKO aano mazuba zilapandululwa kabotu-kabotu muzyeelelo. Aboobo, mita yomwe ipandululwa kuba bulamfwu bwamumuni mboweenda mubusena bunyina cintu nouba muya mukavwaluvwalu komwe kunjizya (divide) a 299,792,458. Ikwaamba masimpe, ooyu mumuni uujisi mayuwe aatacinci mubulamfwu alimwi ulapangwa akugwisyigwaa musyobo umwi wamuncini uulibedelede uutegwa laser. Ikuti kabajisi muncini uujisi ceelesyo ceelene, ibantu kufwumbwa kubusena nkobabede balakonzya kweelanya cipimyo cibikkidwe akusinizya kuti kupima kwabo kwakulampa kwazintu kuleelene akwabantu bambi boonse.
Ikucinca kwazyeelelo zyazipimyo, nokuli kusyoonto buti, kulakonzya kupa kudooneka, aboobo kusola-sola kupati kulacitwa kusoleka kukwabilila zyeelelo. Mucikozyanyo, mucisi ca Britain iceelelo cibikkidwe cakupima kulema kwacintu, ncibulo cibambidwe kwiinda mukuswaanganya antoomwe lubulo lwapulatinamu (platinum) alimwi alwa ilidiyamu (iridium) icilema kkilogilamu yomwe buyo. Cibulo eci ciyobodwe kubusena nkubapimina naa nkubavwuntauzyila zintu kwalo ikwiitwa kuti National Physical Laboratory. Kusofwaazyigwa kwamuuwo akaambo kabusi bwamyootokala alimwi andeke zyuuluka mujulu kwapa kuti kube kuyungizyika kwakulema kwaceelelo cibikkidwe cakkilogilamu buzubaa buzuba. Nokuba boobo, icibulo eci, naa mupaipi ncikozyanyo buyo caceelelo camunyika cibambidwe muciimo cankomeki zyotatwe zyalubulo zibikkidwe mukkomba lyaansi aba International Bureau of Weights and Measures mu Sèvres, mucisi ca France. Pele nokuba kulema nwacibulo eci akwalo kulacinca-cinca akaambo kakusofwaala kuliko kutakonzyi kubonwaa meso eesu. Aboobo kusikila sunu, bahaazibwene balanga-langa zyazipimyo (metrologists) baalilwa kujana ceelelo cisitikide citacinci.
Nokuba kuti kucinca kusyoonto kapati kulibonya kuti kunyina makani kubantu banji, ikucincila limwi kwaceelelo kulakonzya kuleta manyongwe. Mucisi ca Britain, ikucinca kuzwa kumulongo wazipimyo zizyibidwe zibelesyegwa mukupima kulema kwazintu kwampondo alimwi ama aunsi (pounds and ounces) ikuya kumakkilogilamu alimwi amagilamu (kilograms and grams) kwakasumpula kutasyomana kutaambiki—alimwi kuyeeme aatwaambo tulimvwisya. Basizintoolo bamwi batalomenyi pe, izipimyo ezi zipya nizyatakalinaa kuzyibwa kabotu kubantu banji cakabapa kutalika kubbida basikuula munzila yalucengo.
Zyeelelo Zyamumukwasyi Azyamukulilemeka
Ino mbuti kujatikizya kucinca kwazyeelelo zyamumukwasyi alimwi azyamukulilemeka? Izinga zyacitika akaambo kakucinca kuli boobo nkubyaabi kapati. Malipooti aamazubaano kujatikizya kwaandaana kwamikwasyi, bwaamu abumambi alimwi akutundulula bana ikudumide kulabagambya banji alimwi kusinizya kuti tupona kuciindi izyeelelo nozili mukuyaansi. Imikwasyi yabazyali bali balikke, ibana bakomezyegwaa “bazyali” bacita bunasodoma alimwi amakani aayoosya aakoonwa kwabana balelwaa mbunga zyabweendelezi zinyenzi, zitondezya zintu zicitika eelyo bantu nobatatobeli zyeelelo ziluleme. Kweelanaa mbulyakasinsima Bbaibbele myaka iitandila kuzyuulu zyobile yainda, ibantu banji baba “basikuliyanda, . . . basilunya, . . . batayandi zibotu. . . . Bayanda kulibotezya mucilawo cakubotezya Leza.”—2 Timoti 3:1-4, Ci.
Ikuyaansi kwazyeelelo zyakulilemeka kuliswaangene kapati akutasyomeka kwabusicinguni ikweetezya kapati. Caino-ino buyo aawa, imucito mubi kapati wakuzwa kuzyeelelo zisumpukide mubusilisi wakalibonya caantangalala mu Hyde, idolopo lili kunyika kwacisi ca England, ooko bantu bakkala nkuko nkobakajisi lusyomo muli bamadokotela aamikwasyi yabo ibakali “kulemekwa alimwi akusyomeka.” Pele lusyomo lwabo lwakazoomana ceetezya. Ino cakacitika buti? Malipooti aamunkuta akayubununa kuti musilisi umwi ngowakali alubazu mukujaya balwazi bamakaintu basika ku 15. Masimpe, bamapulisa bakatalika kulanga-langa kujatikizya lufwu lwabantu bainda ku 130 bakajatikizyidwe adokotela ooyu. Ibupati bwakumana kwakusyomeka bwakakankaizyigwa iciindi dokotela naakajaninwa mulandu akutolwa kuntolongo. Ibabelesi bakuntolongo bobile ibalangilwa kuti banyina bakajaigwaa dokotela ngumunya ooyu, bakapegwa milimo iimbi kutegwa batabi nobalanganya sintolongo oyu mubyaabi. Aboobo tacigambyi pe ikuti lipooti yakaambo aka mumuteende wa The Daily Telegraph yakapandulula sikucita zibi oyu kuti ngu “‘dokotela’ Diabolosi.”
Akaambo kazyeelelo ezi zicinca-cinca alimwi ziyaabumana mumbazu zinji zyabukkale, ino lino nguni ngomunga mwasyoma cakumaninina? Nkukuli nkomunga mwajana zyeelelo zitacinci, zikulwaizyigwaa bweendelezi bulaanguzu zyakukakatila kulinzizyo kakunyina kucinca? Icibalo citobela cilailanga-langa mibuzyo eeyi.