Amujane Lukkomano Kwiinda Mukupa!
Amujane Lukkomano Kwiinda Mukupa!
“Kupa kuli coolwe kwiinda kupegwa.”—INCITO 20:35.
1. Ino Jehova ulutondezya buti lukkomano lujanika mukupa?
LUKKOMANO lwakuziba kasimpe alimwi ampindu zijanika akaambo kakukaziba, nzipego ziyandisi kuzwa kuli Leza. Aabo ibamuziba Jehova balijisi twaambo tunji tubapa kukkomana. Pele mbubwenya mbuli mbocikkomanisya kutambula cipego, akwalo kupa umwi cintu kulakkomanisya. Jehova Nguupa “zipego zibotu zyoonse azyoolwe zyoonse zilondokede” alimwi “ngu Leza uukondwa, NW.” (Jakobo 1:17; 1 Timoteo 1:11) Ulapa njiisyo ziyandika kapati kuli baabo boonse bamvwa alimwi ulabotelwaa kulilemeka kwabaabo mbayiisya mbubwenya mbuli bazyali mbobakkomana ciindi bana babo nobatobela malailile aabo aaluyando.—Tusimpi 27:11.
2. (a) Ino Jesu wakaamba nzi kujatikizya kupa? (b) Ino ndukkomano nzi ndotujana ciindi notuyiisya bamwi kasimpe kamu Bbaibbele?
2 Mbubwenya buyo, ciindi Jesu naakalaanyika, wakali kukkomana kapati kubona bantu kabazumina nzyaakali kuyiisya. Imwaapostolo Paulo wakazubulula majwi aa Jesu aakuti: “Kupa kuli coolwe kwiinda kupegwa.” (Incito 20:35) Ilukkomano ndotujana ciindi notuyiisya bamwi kasimpe ka Bbaibbele taluli buyo lwakuti nkaambo twajana muntu wazumina lusyomo lwabukombi bwesu pe. Lulaindaawo, nkaambo lwalo ndukkomano lwakuzyiba kuti tuli mukupa muntu cintu cini-cini alimwi icitamani. Kwiinda mukupa cintu cimwi cakumuuya, tulakonzya kugwasya bantu kuti bagwasyigwe lino lwabo beni alimwi kukabe kutamani.—1 Timoteo 4:8.
Kupa Kuletela Lukkomano
3. (a) Mbuti baapostolo ba Paulo alimwi a Johane mbobakatondezya lukkomano lwakugwasya bamwi munzila yakumuuya? (b) Nkaambo nzi ikuyiisya kasimpe kamu Bbaibbele kubana besu ncokuli kutondezya luyando?
3 Masimpe, mbubwenya mbuli Jehova alimwi a Jesu mbobakukkomanina kupa zipo zyakumuuya, Ibanakristo abalo balakkomana kucita boobo. Imwaapostolo Paulo wakajana lukkomano kwiinda mukuziba kuti wakagwasya bantu bamwi kwiiya kasimpe ka Jwi lya Leza. Kumbungano ya ku Tesalonika wakalemba kuti: “Ninzi bulangizi bwesu alukondo lwesu amusini wesu wakulikankaizizya kubusyu bwa-Mwami wesu Jesu Kristo kukuboola kwakwe? Sa teensi ndinywe na? Ii mbokubede, ndinywe bulemu bwesu alukondo lwesu.” (1 Ba-Tesalonika 2:19, 20) Munzila iikozyenye, awalo mwaapostolo Johane kaamba babo mbaakayiisya kasimpe kamu Bbaibbele wakalemba kuti: “Taakwe kubotelwa kumbi nkunjisi kupati kwiinda oku kwakumvwa kuti bana bangu baleenda mulusinizyo.” (3 Johane 4) Alimwi amuyeeye buyo lukkomano lujanika kwiinda mukugwasya bana besu ikuba bana besu bakumuuya! Ikukomezya bana ‘mumilazyo ya Jehova’ ncitondezyo caluyando kubazyali. (Ba-Efeso 6:4) Aboobo ibazyali batondezya kuti balabikkila maanu kubuumi butamani bwabana babo. Ciindi bana nobazumina kasimpe, ibazyali balakkomana kapati alimwi akukkazikwa moyo.
4. Ncinzi icakacitika icitondezya lukkomano luboola akaambo kakupa munzila yakumuuya?
4 Imucizi Dell mmupainiya waciindi coonse ukwetwe kumwaalumi utali umwi wa Bakamboni ba Jehova alimwi ulijisi bana ibali musanu. Mucizi oyu waamba kuti: “Ndakonzya kumvwisya cakaamba mwaapostolo Johane nkaambo ndilalumba akaambo kakuti ibana bangu bone “baleenda mulusinizyo.” Ndilizyi kuti ciletela bulemu kuli Jehova ikuti mikwasyi kiikamantenyi mubukombi bwakasimpe, aboobo ndilakkomana ikujana cilongezyo eeci akaambo kakusoleka kwangu ikuyiisya bana bangu kasimpe. Ikulangila kupona buumi butamani mu Paradaiso abana bangu kundipa bulangizi alimwi akundikulwaizya kuliyumya nokuba kuti kuli mapenzi alimwi azilebyo.” Icuusisya ncakuti, imwana umwi musimbi wa Dell wakagwisigwa mumbungano akaambo kakucita milimo imwi iitali yabunakristo. Pele Dell ucizumanana kubeleka canguzu kutegwa acibambe ciimo cibotu. Waamba kuti: “Ndisyoma kuti buzuba bumwi mwanaangu uyoopiluka cakulibombya kuli Jehova. Pele ndilalumba Leza kubona kuti bana bangu bamwi balazumanana kubeleka cakusyomeka. Ilukkomano ndondijisi ndolundiyumya kapati.”—Nehemiya 8:10.
Ikubamba Zilongwe Izitamani
5. Iciindi notulyaaba mumulimo wakugwasya bamwi ikuba basikwiiya, ino nkuziba kuli buti kutuletela lukkomano?
5 Jesu wakalailila basikumutobela bakwe kuti bagwasye bantu ikuba basikwiiya Banakristo akubayiisya kujatikizya Jehova alimwi azintu nzyayanda. (Matayo 28:19, 20) Boonse bobile Jehova alimwi a Jesu bakagwasya bantu munzila mbotu kwiiya nzila yabwini. Aboobo notulyaaba lwesu mumulimo wakugwasya bamwi ikuba basikwiiya, tulakkomana ikuziba kuti twiiya cikozyanyo ca Jehova alimwi a Jesu mbubwenya mbuli bwakacita kuli Banakristo bakusaanguna. (1 Ba-Korinto 11:1) Iciindi notucita ziyanda Leza Singuzuzyoonse alimwi a Mwanaakwe ngwayandisya, ibuumi bwesu bulabaa mpindu. Elo kaka cilaletela lukkomano ikujanika akati ‘kabasimilimonyina’ Leza! (1 Ba-Korinto 3:9) Alimwi sena tacikkomanisyi ikuziba kuti abalo bangelo balijisi lubazu mumulimo ooyu wakukambauka makani mabotu?—Ciyubunuzyo 14:6, 7.
6. Mbotuyaabutola lubazu mukugwasya bantu munzila yakumuuya, ino mbaani ibaba balongwe besu?
6 Mubwini, kwiinda mukutola lubazu mumulimo ooyu wakugwasya bantu munzila yakumuuya, tatubi buyo babelesinyinaa Leza pe, pele kwiindaawo—tulabamba bulongwe butamani anguwe. Akaambo kalusyomo lwakwe, Abrahamu wakaitwa kuti mulongwe wa Leza. (Jakobo 2:23) Mbotuyaabusoleka kucita kuyanda kwa Leza, andiswe tulakonzya kuba balongwe wa Leza. Ikuti twacita oobo, alimwi tuyooba balongwe ba Jesu. Mboobu mbwaakaamba kuli basikwiiya bakwe: “Ndamwaamba kuti muli beenzuma, nkaambo zintu zyoonse nzendakamvwa kuli-Taata, ndamuzibya nzizyo.” (Johane 15:15) Bantu banji balakkomana ikuba balongwe babantu ibazibidwe naa bantu ibajisi zyuuno zipati, pele swebo tulakonzya kuba balongwe babantu bobile bapati bakoonse-koonse!
7. (a) Ino mukaintu umwi wakajana buti mulongwe mwini-mwini? (b) Sena andinywe cakamucitikila kale cintu cili boobu?
7 Kunze lyaboobo, ciindi notugwasya bantu ikuziba Leza, balaba balongwe besu andiswe, calo cituletela lukkomano. Imucizi wazina lya Joan uukkala mucisi ca United States, wakatalika kwiiya Bbaibbele amukaintu wazina lya Thelma. Nokuba kuti Thelma wakali kukazigwaa mukwasyi wakwe akaambo kakwiiya Bbaibbele, wakaliyumya mane limwi mwaka wakatobela wakabbapatizigwa. Imucizi Joan wakalemba kuti: “Icilongwe cesu tiicakamana buyo mpoonyaawo pe, pele kwakaba bulongwe lino ibwakkwanisya myaka iili 35. Kanjikanji twakali kweenda antoomwe mumulimo alimwi akumiswaangano mipati. Kumane boobo, ndakalongela kubusena bumbi kulampa makkilomita aali 800. Pele Thelma wazumanana kundilembela magwalo aaluyando alimwi aakkazika moyo, kaamba kuti ulandiyeeya lyoonse akundilumba akaambo kakuba mulongwe wakwe acitondezyo kulinguwe alimwi akumuyiisya kasimpe kamu Bbaibbele. Ikujana mulongwe uyandika kapati ncipego cibotu kapati kukusoleka nkundakacita mukumugwasya kwiiya kujatikizya Jehova.”
8. Ino nciimo cili buti cibotu cikonzya kutugwasya mumulimo?
8 Ikulangila kujana muntu uyanda kwiiya kasimpe kulakonzya kutugwasya kuliyumya nokuba kuti bunji bwabantu mbotuyaanya inga kabatondezya luyandisisyo lusyoonto antela kubulila limwi buya luyandisisyo ku Jwi lya Jehova. Ikubula luyandisisyo ooku kulakonzya kuleta buyumuyumu kulusyomo lwesu alimwi akukuliyumya. Pele, kuzilanga munzila mbotu zintu kulakonzya kugwasya. Fausto uukkala kucisi ca Guatemala wakaamba kuti: “Ciindi nondicita bukamboni kubantu bambi, ndilayeeya mbociyookondelezya ikuti muntu ngundikanana anguwe waakuba mukwesu wakumuuya naa mucizi. Ndilayeeya kuti naba omwe buyo muntu ngonditiiyaanye akonzye kutambula kasimpe ka Jwi lya Leza. Muzeezo ooyu ulandipa kuzumanana kupa bukamboni akundiletela kukkomano.”
Kuyoboda Kujulu Lubono
9. Ino ncinzi Jesu ncaakaamba kujatikizya lubono lwakujulu, alimwi ino inga twaiya nzi kuli ceeci?
9 Tacili cuuba-uba lyoonse ikugwasya bana besu naa bantu bambi buyo kuba basikwiiya. Ciyanda ciindi, kukkazika moyo alimwi akukakatila. Pele amuyeeye kuti, ibantu banji balilisungwide kubeleka canguzu kutegwa bajane lubono lwakumubili lunji, izintu kanjikanji zitabaleteli lukkomano alimwi zitabujuli akubujula pe. Jesu wakaambila baswiilizi bakwe kuti bakeelede kubelekela zintu zyakumuuya. Wakati: “Mutaliyobwedi lubono ansi ano, mpaabisya mapempya ankalaya, ababbi mpobatulula kuti babbe. Amuliyobwede lubono kujulu, nkwaatabisyi mapempya ankalaya, ababbi nkubatatululi kuti babbe.” (Matayo 6:19, 20) Kwiinda mukubaa mbaakani zyakumuuya—zijatikizya kutola lubazu mumulimo uyandika kapati wakugwasya bantu kuba basikwiiya—tulakonzya kuzyiba kuti tucita kuyanda kwa Leza alimwi akuti uyootupa bulumbu. Imwaapostolo Paulo wakalemba kuti: “Leza tali sikampenda, takonzya kuluba milimo yanu akuyanda nkomwatondezya nkaambo kezina lyakwe.”—Ba-Hebrayo 6:10.
10. (a) Nkaambo nzi Jesu ncaakajisi lubono lwakumuuya? (b) Ino Jesu wakalipa buti, alimwi ino wakabagwasya kapati buti bamwi?
10 Ikuti katubeleka cabunkutwe mumulimo wakugwasya bantu kuba basikwiiya, tuli mukuliyobweda “lubono kujulu” kweelanaa Jesu mbwaakaamba. Eeci cituletela kutambula calukkomano. Ikuti katupa camoyo omwe, tuyooyungizizya lukokkomano lwesu. Jesu kumugama buya wakamubelekela Jehova kwamyaka iitabaliki. Amuyeeye buyo ilubono ndwaakabungika kujulu! Nokuba boobo Jesu kwiina naakayandaula kucita zintu zyakwe mwini pe. Imwaapostolo Paulo wakalemba kuti: “[Jesu] wakalyaaba nkaambo kazibi zyesu kuti atusalulule kuzwa mububi bwaansi bwaciindi ecino, mbubonya mbwayanda Leza Taateesu.” (Ba-Galatiya 1:4) Jesu tanaakalyaaba buyo amoyo omwe mumulimo, pele wakapa buumi bwakwe buya kubugama kutegwa bamwi bajane coolwe cakukonzya kuyobola lubono lwabo kujulu.
11. Nkaambo nzi zipego zyakumuuya ncozili zibotu kwiinda zintu zyakumubili?
11 Kwiinda mukuyiisya bantu kujatikizya Leza, tulabagwasya abalo kujana nzila mbobakonzya kuyobola lubono lwakumuuya lutakonzyi kunyonyooka. Ino ncipo nzi cipati ncomukonzya kupa? Ikuti mwapa mulongwe wanu wacci naa nkoloko iidula, mootokala antela ŋanda, ooyo mulongwe wanu ulakonzya kulumba akukkomana alimwi andinywe mulabaa lukkomano lwakupa. Pele ino cipo eeco cinooboneka buti kwaakwiinda myaka iili 20? Ino iili 200? Iili 2,000? Kulubazu lumwi, ikuti mwalyaaba kugwasya muntu kubelekela Jehova, ooyo muntu ulakonzya kugwasyigwaa cipego eeco kukabe kutamani.
Kuyandaula Baabo Bayanda Kasimpe
12. Ino bantu banji balipa buti mukugwasya bamwi munzila yakumuuya?
12 Akaambo kakutola lubazu mulukkomano lwakupa zintu zyakumuuya, bantu ba Jehova basika kumamanino aanyika. Izyuulu zyabantu zili mbozibede baasiya maandaabo alimwi amikwasyi kutegwa babeleke mulimo wabumisyinali mumanyika oomo mobeelede kwiiya buya myaambo alimwi azilengwa. Bamwi balongela mumasena aali mucisi momunya mobakkala mwalo muyandika basikwaambilizya Bwami. Nokuba boobo, ibamwi bayiiya myaambo iitali yamucisi cabo kutegwa bajane zyoolwe zipya zyakukambauka mumasena mobakkala kubantu baboola kuzikukkala mucisi eeco. Mucikozyanyo, banabubili bamwi ku New Jersey mu U.S.A. nobakamana kukomezya bana babo lino babelekela ku Ofesi mpati ya Bakamboni ba Jehova yanyika yoonse, bakatalika mulimo wabupainiya akwiiya mwaambo wa Ciccainiizi (Chinese). Kwiinde buyo myaka yotatwe, bakali kusololela ziiyo zya Bbaibbele zyaaŋanda kubantu bali 74 ibakanana mwaambo wa Ciccainiizi, ibakali kukkoleji iyakali munsi-munsi. Sena mulakonzya kuyungizya mulimo wanu munzila imwi kutegwa mujane lukkomano lunji mumulimo wakugwasya bantu kuba basikwiiya?
13. Ino ncinzi ncomukonzya kucita ikuti kamuyanda kuti mulimo wanu kuuzyala micelo minji?
13 Antela mulalombozya kusololela ciiyo ca Bbaibbele, pele tamukonzyi kucita boobo. Mumanyikaamwi, cilakatazya kujana bantu balaaluyandisisyo. Ambweni bantu mbomuswaangana tabajisi luyandisisyo lwamu Bbaibbele. Ikuti kacili boobo, ambweni mulakonzya kukwiinduluka-induluka kwaamba kulombozya kwanu kuli Jehova mumupailo, kamuzyi kuti boonse bobile Jehova alimwi a Jesu Kristo balauyandisya mulimo ooyu alimwi balakonzya kumusololela kubantu ibali mbuli mbelele. Amuyandaule nzila kuzwa kuli baabo bajisi luzibo mumbungano antela aabo balaa mulimo uzyala micelo. Amukubelesye kuyiisya kucitwa alimwi anzila zipegwa ciindi camiswaangano ya Bunakristo. Amugwasyigwe alulayo lupegwaa balangizi beendeenda alimwi abamakaintu babo. Kunze lyaboobo, tamweelede kuleka pe. Mwaalumi musongo wakalemba kuti: “Cifumofumo byala imbuto zyako, aciindi cagoko utalesyi maanza aako, nkaambo tozi na nzizili zisi kule akati kazyo.” (Mukambausi 11:6) Lino amuyeeye baalumi basyomeka mbuli Nowa alimwi Jeremiya. Nokuba kuti bantu buyo basyoonto mbabakazumina mulumbe ngobakali kukambauka, mulimo wabo wakazwidilila. Kunze lyaboobo cakamukkomanisya Jehova.
Kubeleka Kusikila Waawo Mpomugolela
14. Ino Jehova ubabona buti aabo ibacembaalila mumulimo wakwe?
14 Cilakonzya kuba kuti, ibukkale bwanu tabumuzumizyi kubeleka kusikila waawo mpomuyanda kuti musike mumulimo. Mucikozyanyo, bucembele bulakonzya kupa kuti mutaciti mbomuyanda mumulimo wa Jehova. Nokuba boobo, amuyeeye mwaalumi musongo ncaakalemba ikuti: “Mutwe uuli amvwi munsini wabulemu, ulajanwa munzila yabululami.” (Tusimpi 16:31) Kuli Jehova, buumi bwakucita mulimo wakwe bulamukonda. Imagwalo alayaambele kwaamba kuti: “Akusikila kubucembele bwanu ndime oyo nguwenya. Akusikila kuciindi camvwi noocimuyumwide. Ndime ndakamucita, ndime uumubbede. Ndime uumuyumwide, ndime uuzoomuvuna.” (Isaya 46:4) Taateesu wakujulu siluyando usyomezya kugwasya akukulwaizya bantu basyomeka kulinguwe.
15. Sena mulasyoma kuti Jehova ulabuteelela bukkale bwanu? Ino nkaambo nzi?
15 Ambweni muli mukuliyumya akaambo kakuciswa, kukazigwaa mweenzinyoko wamulukwatano, mukuli wakweendelezya mukwasyi mupati antela penzi limbi buyo pati. Jehova ulibuzyi buyumuyumu mbotujana mubukkale bwesu alimwi ulatuyanda akaambo kakusolekesya kwesu mukumubelekela. Mbocibede oobu nokuba kuti nzyotukonzya kucita inga kazili zisyoonto kapati kweelanaa bamwi nzyobakonzya kucita. (Ba-Galatiya 6:4) Jehova ulizyi kuti tatulondokede alimwi ulazilanga munzila yeelede eezyo nzyayanda kuti tucite. (Intembauzyo 147:11) Ikuti twacita kusikila mpotungolela, tulakonzya kukkazikwa moyo katusyomede kuti tulayandika kapati mumeso aa Leza alimwi akuti takailubi milimo yesu yalusyomo.—Luka 21:1-4.
16. Ino muunzila iili buti imbungano yoonse mboitola lubazu mukugwasya muntu kuba sikwiiya?
16 Alimwi kamuyeeya kuti mulimo wakugwasya bamwi kuba basikwiiya mulimo wakubelekela antoomwe. Teensi muntu omwe ugwasya muntu kuba sikwiiya pe, mbubwenya mbuli dosi lyomwe lyamaanzi mbolitakonzyi kukomezya cisyango. Masimpe kuti Kamboni omwe ulakonzya kujana muntu uujisi luyandisisyo akutalisya ciiyo ca Bbaibbele. Pele muntu ooyo mupya aboola kuŋanda ya Bwami, imbungano yoonse ilamugwasya kuziba kasimpe. Ikusamausya kwabunyina kutondezya kweendelezya kwamuuya wa Leza. (1 Ba-Korinto 14:24, 25) Ibana alimwi abakubusi balapa bwiinguzi bukulwaizya, ikutondezya muntu mupya kuti bana besu baliindenene kapati abakubusi bakunyika. Ibaciswa, ibatacijisi nguzu alimwi abapati mumbungano balabayiisya bapya kuliyumya ncocipandulula. Kufwumbwa naa tuli bamusela uuli buti, antela ibajisi buyumuyumu, toonse tulijisi lubazu lupati mukugwasya bapya luyando lwabo lwakasimpe mboluyaabukomena, aboobo balaunka ambele kuya kulubbapatizyo. Kufwumbwa naa ndiwoola lyomwe ndyotutola mumulimo, nyendo yakupilukila imwi aimwi, mubandi ngotukananaa muntu uujisi luyandisisyo ku Ŋanda ya Bwami, zilakonzya kulibonya kuba kantu kaniini buyo, pele ncibeela camulimo wanguzu Jehova ngwali mukuzuzikizya.
17, 18. (a) Kunze lyamulimo wakugwasya bantu kuba basikwiiya, munzila nzi mbotukonzya kujana lukkomano mukupa? (b) Kwiinda mukujana lukkomano mukupa, ino nguni ngotwiiya?
17 Ncobeni, kunze lyakutola lubazu mumulimo uyandika kapati wakugwasya bantu kuba basikwiiya, swebo mbotuli Banakristo alimwi tulajana lukkomano mukupa kwiinda munzila zimwi. Tulakonzya kubikkaambali mali akusanga kugwasyilizya bukombi bwakasimpe alimwi akugwasya baabo babulide. (Luka 16:9; 1 Ba-Korinto 16:1, 2) Tulakonzya kuyandaula nzila mbotukonzya kutondezya kusamausya. (Ba-Roma 12:13) Tulakonzya kusolekesya ‘kucitila bantu boonse milimo mibotu, pele kwaambisya kuli baabo baciinga calusyomo.’ (Ba-Galatiya 6:10) Alimwi munzila nguba-uba, pele iyandika kapati, tulakonzya kupa bamwi kwiinda mukubalembela lugwalo, kubatumina luwaile, cipego, kubagwasya cigaminina alimwi amajwi aakukulwaizya.
18 Kwiinda mukupa, tutondezya kuti twiiya Taateesu wakujulu. Alimwi tutondezya luyando lwesu lwabunyina, icizibyo ca Banakristo bakasimpe. (Johane 13:35) Ikuyeeya zintu eezi kulakonzya kutugwasya kujana lukkomano mukupa.
Sena Inga Mwapandulula?
• Ino mbuti Jehova alimwi a Jesu mbubapa cikozyanyo cibotu cakupa munzila yakumuuya?
• Ino inga twazijana buti zilongwe zitamani?
• Ino nintaamu nzi nzyotukonzya kubweza ikuti katuyanda kuti mulimo wesu uzwidilile?
• Ino bantu boonse ibali mumbungano inga bajana buti lukkomano mukupa?
[Mibuzyo yaciiyo]
[Zifwanikiso izili apeeji 27]
Ciindi bana nobazumina kuyiisyigwa, ibazyali balakkomana kapati akukkazikwa moyo
[Cifwanikiso icili apeeji 29]
Kwiinda mukugwasya bantu kuba basikwiiya, tulakonzya kujana balongwe beni-beni
[Cifwanikiso icili apeeji 30]
Jehova ulatunyamuna mumyaka yabucembele
[Zifwanikiso izili apeeji 31]
Munzila nguba-uba pele iyandika kapati, tulajana lukkomano mukupa